AkwaGalata 3
3
Murao no thsitawo kwa Krisitu
1Amwe mwakwa Galatia o kupira maano! Edye oyu na a mi roo? Ya monithsiwire nawanawa pa meho enu ci Yesu Krisitu wambiwire pa mbinda! 2Naa fota ku mipura thsinu thsofoci pohuma: Ene shime mwa tamburire Mupepo wa Nyambi ketenda yo murao nji ko ku tawa Muthzimbu Ouwa? 3Ene mwa tomba nji? Na mu tateka ko Mupepo, ene mwaa fota honi ku manenena kokoro wenu nji? 4Ene shime na mu piti mu makando mwinu yoingi mukenge nji? Yoshemwa ya mi kwathsire thsimweya. 5Ene Nyambi oyu na a mi pa Mupepo wenthzi no ku tenda ekomokithsa mu kaci kenu ne shime naa tende kengeyo ketenda yo murao nji ko ku tawa kwenu Muthzimbu Ouwa?
6Eci edi i na ambiwa mu Mañoro keyi ya Aburahama ci: “Wa tawire kwa Nyambi, karo Nyambi wa mu varire kwikara omuwawa mukaci ko thsitawo thsenthzi.” 7Mweyo, mu dimuke ci awa a di no thsitawo wodiyo pohuma ethsiwa ci ana Aburahama. 8Mañoro ko ku mona yo ku rupara ci Nyambi kenge mba a tenda Anukenge kwikara owawawa ko thsitawo, Nyambi wa hongire cimo Muthzimbu Ouwa kwa Aburahama ou a ambire ci: “Matunga oahe kenge mba a fiyaweriwa mukaci koe.” 9Mweyo, awa a na tawa aa fiyaweriwa pofoci na Aburahama aye mukwerume o thsitawo.
10Wahe awa a na kurupera etenda yo murao mushi thzo thsikuto a di, inene ku na ñoriwa ci: “Ku kutiwe munu yomuhe o kukana ku twarerera ku tenda yoihe eyi i na ñoriwa mu vuka thzo murao.” 11Apa honi yaa monahara nawa ci kwithsa o kwikara o muwawa pa meho a Nyambi ketenda yo murao, inene ku na ñoriwa ci: “O muwawa kenge a ku yoya ko thsitawo.” 12Murao ka u tanarerire pa thsitawo, unone wa amba ci: “Munu yomuhe o ku tenda eyi enu kenge a ku yoya kayo.”
13Unone Krisitu wa tu paturire ku thsikuto thso murao ko ku citenda o thsikuto mukaci ketu, inene ku na ñoriwa ci: “Ku kutiwe munu yomuhe o ku kurekiwa pa thsitondo.” 14Wa tu paturire ci thsiyauthzi thsa Aburahama nga thsi keye kwAnukenge ka Krisitu Yesu, ci ko thsitawo nga tu twethse ku tambura thsikumbwethzo thso Mupepo.
Murao no thsikumbwethzo
15Andengenu, ni mi monithse muro kenu eyi i tendahara diyuwa no diyuwa. Ngeci anu aa ciyuva thsinu, aa tanarithsa ethso thsiyuvano, kwithsa o ku kana eyi a na ciyuvu nji ku vungithsako thsimweya. 16Mofoci no Nyambi edi a kumbwethzire Aburahama na mwanahoka wenthzi. Mañoro ka a ambire ci: “Nanahoka oe,” ku monithsa ci anu owangi, unone aa amba ci: “Na mwanahoka woe,” ku monithsa ci munu yofoci, aye Krisitu. 17Eyi ni amba po naa amba ci: Nyambi shime a tangire ku cikwata thsiyuvano na Aburahama no ku thsi hengeka, ao murao mbeci u keye munyima thzo myaka thzo 430. Tumba u twethsa ku mana ethso thsiyuvano nji kwipithsa thsikumbwethzo thsa Nyambi. 18Unone ngeci twaa tambura thsiyauthzi thsa Nyambi ko murao, apo honi ka tu thsi tamburire ko thsikumbwethzo, uno honi Nyambi ko thsihemo thsenthzi wa thsi pire Aburahama ko thsikumbwethzo.
19Murao honi ne ine wa piwerire? Shime wa piwire mukaci ko murandu wetu shime aye mwanahoka oyu wa kumbwethziwire ou a keyire. Murao po shime wa piwire ko tungeru, mukwa ku twimanena mbeci a u tu tambwere. 20Mukwakwimanena po tumba a fotiwa ngeci munu yofoci pohuma diko, unone Nyambi po yofoci.
21Ene eyi ne yaa monithsa ci murao waa rwithsa ekumbwethzo ya Nyambi nji? Dyombo! Inene murao nga wa piwire ci u pe mwoyo, apo honi owawa nga na u keya ko murao. 22Unone Mañoro aa amba ci kaye kokahe mukoro o thsivi ka di, ci eyi ya kumbwethziwire eyi i piwa ko thsitawo kwa Yesu Krisitu nga i piwe kowa a tawa.
23Uno honi thsitawo o ku thsi shime ku keya, murao shime wa twangire eci enthzinda shime thsitawo ethsi thsa roerire ku keya mu kaye ou thsa hokoriwire. 24Mweyo, murao wa tu nyungire shime Krisitu ou a kumine ci tu twethse kwikara owawawa ko thsitawo. 25Uno honi na thsi keye ethsi thsitawo, ka tu di honi mushi thza mukwakunyunga.
26Inene kwa Krisitu Yesu mwahe mwana Nyambi ko thsitawo. 27Inene mwahe amwe na mu korovethziwa mwa Krisitu, na mu vata Krisitu. 28Mweyo, kwithsa thsiano mu kaci ko Majuda nAnukenge, mu kaci kapika nakwakurukuruka, mu kaci kakwerume nambuyama. Inene mwahe mwa thsofoci mwa Krisitu Yesu. 29Pano honi mu nekara anua Krisitu, mwanahoka a Aburahama, karo mwashwana weyi a kumbwethzire Nyambi.
Currently Selected:
AkwaGalata 3: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company