Maheveru 2
2
Mwa pomekithsa oku kuyoyithsiwa kokukuru
1Mweyo, twaa roera ku tanarithsa nene eyi na tu yuvu ci katere tu yemburuke. 2Inene ngeci muthzimbu ou wa piwire ko tungeru wa koropire, karo munu yomuhe oyu wa u corire no kukana ku u shupwera wa piwire humbithso ethzi thza mu roerire ne, 3ngepi twa ku para ngeci twaa pomekithsa oku kuyoyithsiwa kokukuru? Fumu aye thsinda yodiyo wa tangire ku ku raura oku kuyoyithsiwa, ngou honi a i tu tongwerire awa mu yuvire. 4Nyambi wa pire ombangi o o muthzimbu ko ku pa emonithso, yo ku komokithsa nekomokithsa, karo nepa yo Mupepo Oukenu eyi i na eriwa kwanu komu a na shimena aye.
Yesu wa tendiwire munu shemwa
5Mweyo kadi cingwa tungeru a pire Nyambi ku endithsa kaye aka ka keya, aka tu ambaura yako. 6Unone kumweya mu Mañoro yumweya wa pire ombangi ci,
“Nyambi, munu ne thsine ci o mu anekere,
mwana munu ne thsine ci o mu pakere maano?
7Owe wa mu pakire kushi thzo tungeru kamanana,
no ku mu pa mushukwe o kutethzima no direma.
8Karo owe wa mu pire ku endithsa enu yoihe.”
Yoihe ku ambiwa ci “enu yoihe” yaa amba ci kwithsa ethsi thsi na thsiiwako. Uno honi tu shime ku mona enu yoihe o ku i na pakiwa mushi thzenthzi. 9Unone twaa mona Yesu, oyu wa pakiwire kamanana mu ndau thzo kushi thzo tungeru, na a piwa mushukwe o kutethzima no direma pakuninga ci wa fire, ci ko thsihemo thsa Nyambi nga a fere anu wahe.
10Mu kureta ana owangi mu kutethzima, yoshemwa ya roerire ci aye Nyambi oyu i nekarerako no kwikarako kenthzi enu yoihe, a tende Yesu kwikara o ku kwanenena ko makando aa a nyandire. Inene Yesu po yodiyo na wa tangerera ku wa twara ku kuyoyithsiwa. 11Inene Yesu oyu kenithsa anu kwivi yo, nowa a kenithsiwa, wahe a di no Tata wo yofoci. Eyo ngeyi a kanena ku fa honyi Yesu ku wethsa ci aminenthzi. 12Wa amberire Nyambi ci,
“Kenge na ku ka raura yo dithzina dyoe kwaenthzange.
Kenge na ku ku shangara apa a na konganena anuoe.”
13Wa ambire karo ci,
“Kenge na ku mu kurupera.”
Karo ci,
“Yamono nana awa na a ni pa Nyambi.”
14Mweyo, pakuninga ci awa ana aa kwamiwa pa nyama nonyinga, Yesu naye wekarire nyama nonyinga, ci ko ku fa nga a pwithse oyu na kwata okoro o kufa, aye shamaonga, 15ci nga a rukurure wahe awa a na yoyo mwoyo wo ouhe mupika o ku yapa kufa. 16Inene yoshemwa kadi cingwa tungeru a na kwathsa, unone aa kwathsa anahoka a Aburahama. 17Mweyo, ya roerire ci shime a tendiwe eci aenthzenthzi, kwikara munu shemwa mwinu yoihe, ci nga ekare Mupurisita Shokuru o ñeke norurami mwikwama ya Nyambi, ci nga a twethse ku tupura thsiyambero thso ku tundithsa evi yanu. 18Pakuninga ci aye naa nyanda no ku tumauriwa, aa twethsa ku tu kwathsa yoihe tu tumauriwa.
Currently Selected:
Maheveru 2: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company