Maheveru 7
7
Mupurisita Melekisedeki
1Melekisedeki po nedi fumu o thsikuña thsa Salema, karo nedi mupurisita wa Nyambi, aye o Kuthzinama Nene. Aburahama ou a ka tundire ku mvo oku a ka thzirithsire mafumu, Melekisedeki wa mu hanganine no ku mu fiyawera. 2Aburahama wa mu pire thso mudikumi kwinu yoihe eyi ekarire nayo. Thso kutanga, edi dithzina dyo Melekisedeki dyaa amba ci: “Fumu owawa.” Ku tunda apo, yodiyo karo fumu wa Salema, ku amba ci: “Fumu o thsiyaro.” 3Tata wenthzi no mama wenthzi no dihumo dyenthzi ka ya dimukiwire, matatekero no mamaneneno o mwoyo wenthzi ka ya dimukiwire. Mupurisita o diyere, eci edi a di Mwana Nyambi.
4Mu mone okuru wa Melekisedeki! Shaanga Aburahama, aye mukwathsañuru shokuru o Maisiraele wa mu pire thso mudikumi kwinu yoikuru mu thsivaka eyi a ka kuparire mu mvo. 5Uno honi mu murao mo thsi di thsiraerera thso ku ninga ci mapurisita, awo anahoka a Livi, a shimbe thso mu dikumi kwaenthzo Maisiraele, shaanga ikare ci wahe shime tundererire kwa Aburahama. 6Melekisedeki ka a tundererire kwa Livi, unone wa shimbire thso mu dikumi kwa Aburahama no ku mu fiyawera, aye Aburahama oyu wa tamburire ekumbwethzo ya Nyambi. 7Kwithsa yo ku kanyekapo, mukwa ku fiyawera mukuru kupita oyu na fiyaweriwa.
8Mapurisita awa a na shimbanga thso mu dikumi po anu o ku twethsa kufa, unone Melekisedeki aye po twaa tongweriwa mu Mañoro ci aa yoya. 9Twaa twethsa ku amba ci Livi, aye oyu na piwanga thso mu dikumi, naye wa pire thso mu dikumi kwa Melekisedeki ka Aburahama. 10Inene Aburahama apa a ciwanine na Melekisedeki, Livi aye o ku shimbi ekarera mwirama ya mukwathsañuru wenthzi Aburahama.
Yesu aa cipitura eci Melekisedeki
11Uno honi ngeci kwononoka kwa waniwire kopurisita wa Livi omu a tambwerire anu murao, ine karo eyi ku fotiwera mupurisita o mu shayo thza Melekisedeki, kadi o mu shayo thza Aroni? 12Inene ngeci opurisita waa tutururiwa, no murao nawo waa roera ku piruriwa. 13Inene Fumu wetu Yesu oyu tu ambaura yenthzi po nedi wa mu mukuta wao, omu mwa kana ku hanguriwa shaanga munu yofoci kwikara mupurisita ci a kwamene Nyambi pa katara. 14Karo i na dimukiwa nawa ci Fumu wetu po shime erekiwire mu mukuta wa Juda, karo Mushe wa diyerire ku amba yo mapurisita ku tunderera omo mu mukuta.
15Ombangi weyi waa monaharerera nawanawa pakuninga ci na ku keya mupurisita yumweya o ku pitura eci Melekisedeki. 16Ka na a hanguriwa kwikara Mupurisita kokuthza ko murao o thsiraerera thso ku kengerera pa thsikuta thsenthzi, unone na a hanguriwa kokoro o mwoyo o kukana kwipithsiwa. 17Inene Mañoro aa amba ci,
“O mupurisita o diyere,
mu shayo thza Melekisedeki.”
18Mweyo, thsiraerera thso kare keyi yopurisita na thsi pakeriwa ku mbadi, mukaci ko ku faratera kwathso no kukana ku kwathsa thsimweya. 19Inene murao ka wa twethsire ku tenda thsinu thsipi nji thsipi kwikara thso kwononoka, unone okurupero ouwa kupita o kutanga na u keya, ou u tu twara po pepi na Nyambi.
20Karo Nyambi ka a i tendire ko kukana kucethzera ngoro! Unone ka kwekarangire kwethza ngoro mapurisita ou a hanguriwangire kwikara mapurisita. 21Unone Nyambi wa hangurire Yesu kwikara mupurisita ko kwethza ngoro ou a ambire ci,
“Fumu naethzi ngoro ci,
ka a ku pirura eanekera yenthzi,
‘Owe po o mupurisita o diyere.’”
22Mukaci ko kucethzera kwenthzi, Yesu yodiyo na tanarithsa thsiyuvano thsothsipe thso kupita thso kare.
23Kwekarire mapurisita owangi kukare, inene kufa kwa wa kwangithsire ku shumuna mwikwama yo yopurisita. 24Unone pakuninga ci Yesu aa yoya diyere, opurisita wenthzi mbera ka u pu. 25Mweyo, aye aa twethsa ku yoyithsa ko kuyara awa keya kwa Nyambi kenthzi, inene aye po wa ku yoya diyere ci a twethse ku wemanena kwa Nyambi.
26Yesu yodiyo mupurisita shokuru oyu na roera oyu twa fotire, inene mukenu, ka a di no kapongonyi, wa kupira katamwethzi ko thsivi. Wa panduriwire kwanu wevi, no kuthzinekiwa pa thsituro thsoshokuru nene mu wiru. 27Yesu ka a cishokire no mapurisita o shokuru amweya, inene ka ekarire ci shime a tupure eyambero diyuwa no diyuwa yo ku tetera evi, thso kutanga evi yo, mbeci honi evi yanu amweya. Inene aye po wa citupurire thsinda kwikara thsiyambero thsevi yanu rofoci karo ro mahurerero. 28Murao wa Mushe wa hangurire mapurisita o shokuru awa faraterire ko kwikara anu. Uno honi munyima thzo murao, Nyambi wa hangurire Mwane ko ku cethzera, oyu na a tendiwa o kwononoka diyere.
Currently Selected:
Maheveru 7: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company