Jakovo 2
2
Thsivi thso mavwevwe
1Andengenu, pakuninga ci mwakwakutawa kwa Fumu wetu Yesu Krisitu o kutethzima, mu thsie mavwevwe. 2Tu shimbe kenge ci mu thsiciwano#2.2 Mu Thsigerike po sinagoge. thsenu kwaa keya munu o fumanyi oyu na vata kanthzea ko gauda nevata yoiwa, karo akopo ku keya hepwe oyu na vata enyakinyaki. 3Ngeci amwepo mu monithsa nene direma koya na vata nawa no ku mu ambera ci: “Mu shimbe ethsi thsipura thsothsiwa mwikarepo,” unone mwa ambera oya hepwe ci: “Owe, o katuke o kekare paya,” nji ci “O keye no wikare pashi ku nyonga thzange,” 4apo po mu na monithsa thsiano mu kaci kenu no kwikara akwakuratura weanekera yoimango.
5Aenthzange awa na shima, mu ni teerere! Nyambi wa hangurire ahepwe muno mu kaye ci ekare afumanyi mu thsitawo, no ku tambura kutumina oku a kumbwethzire awa a na mu shimi. 6Uno honi amwe mwaa shwahura ahepwe. Awa na mi dyaterera no ku mi kokakokera ku makuta ne kadi wodiyo awa afumanyi? 7Wodiyo karo awa na yengweranga dithzina dyo direma dya Yesu Krisitu oku mu na kundama.
8Ngeci mwaa hengeka shemwa murao o thsifumu ou u di mu Mañoro o ku ninga ci: “O shime muenthzoe eci edi wa cishima othsinda,” apo mwaa tenda eyi i na roera. 9Unone ngeci amwepo mu tenda mavwevwe, apo mwaa tenda thsivi, karo murao waa mi ratura ci mwakwakucora murao. 10Inene munu shaanga yoyu hengeka mirao thzothzihe unone aa corapo ofoci, aa shimbiwa ci thzothzihe na thzi coro. 11Inene oyu wa ambire ci “Kadi o mukwa ku rembeka,” karo yo wa ambire ci: “Kadi o mukwa kwipaa.” Mweyo, ngeci owe po o wipaa munu, shaanga ko rembekire o na coro murao.
12Mweyo, yoihe eyi mu amba no ku tenda mu dimuke ci kenge mwa ku raturiwa ko murao ou u na rukurura anu. 13Inene Nyambi ka a kwikara no ñeke apa a ku ratura munu o kupira ñeke kwamweya. Ñeke thzaa othza raturo.
Thsitawo nekwama
14Owa wine, andengenu, o ku amba ci: “Ame po ni di no thsitawo” ko kukana ku monithsa ekwama yethso thsitawo thsoe? Ethso thsitawo thso kengeyo ne kenge nga thsi ku yoyithsa nji? 15Ngeci waa mona muenthzoe o mukwerume nji o mbuyama oyu na piri edya nevata, 16ine eyi nga i mu kwathsa ku mu ambera ci: “O ende mu thsiyaro, o ka enyenene no ku dya nawa,” ko kukana ku mu pa thsimweya ethsi thsi na fotahara kwirama yenthzi? 17Mofoci no thsitawo thso kupira ekwama thsa kufa.
18Nga munu ayepo amba ci: “Owe o di no thsitawo, ame ni di nekwama,” kenge nga ni mu ambera ci: “O ni monithse edi nga o wikara no thsitawo ko kupira ekwama, name kenge ni ku monithsa thsitawo thsange kekwama yange yoiwa.” 19Waa tawa ci Nyambi po yofoci,#2.19 Ku di Nyambi yofoci. waa kwama nawa! No mathzimu nao aa tawa kengeyo no ku tutuma ku yapa.
20Owe o munu sho tomba, ene waa fota ci shime ku ku tongwera ci thsitawo thso kupira ekwama po ka thsi kwathsire thsimweya? 21Ene ka mu dimukire ci mukwathsañuru wetu Aburahama wa variwire ci muwawa pa meho a Nyambi kekwama yenthzi uya a tupurire mwanenthzi Isaka pa katara? 22Mu na mono, thsitawo thsenthzi nekwama yenthzi ya kwamenine pofoci, ekwama yenthzi ya kwanithserire thsitawo thsenthzi. 23Ya tendaharire eci edi a amba Mañoro ku ninga ci: “Aburahama wa tawire kwa Nyambi, karo Nyambi wa mu varire ci muwawa mukaci ko thsitawo thsenthzi.” Mane Nyambi wa mwithsire ci mbushe. 24Mu na mono honi, munu aa tendiwa o muwawa kekwama kadi ko thsitawo pohuma.
25Mofoci karo na Rahaba#Josh 2. oya diherehere, wekarire o muwawa pa meho a Nyambi keyi a kwamine yo ku tambura tuya tunenga no ku wa nehethza dikuñwa dyadyo. 26Erama o ku i na piri mupepo ya kufa, mofoci no thsitawo thso kupira ekwama thsa kufa.
Currently Selected:
Jakovo 2: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company