AkwaFilipi 2
2
Kucihuthsa kushi nokuru wa Krisitu
1Ene thsitawo thsenu kwa Krisitu ne thsaa mi tanarithsa nji? Ene mwaa hengawethziwa ku thsishimo thsenthzi nji? Nji mu di no thsiciwano mu Mupepo Oukenu? Ene mu di no thsihemo no ñekeñeke kwanu amweya nji? 2Mweyo, naa mi romba ci mu yarithserere thsinyanyu thsange ko kwikara no muanekerero ofoci, mwikare no thsishimo thsofoci, no kwikara thsofoci mu mupepo no maano ofoci. 3Mwa tenda enu koñondi, nji ko ku fota ku shangariwa. Mu cihuthse kushi, karo mwa anekera ci mwaa pita amweya. 4Mwa mamera yenu pohuma, unone mu mamere neyi yamweya.
5Mwikare noa maano mu kaci kenu, aa ekarire nao Krisitu Yesu.
6Aye, shaanga ci wekarire shemwa Nyambi ku tunda ku matatekero,
ka a shimbire ku cishoka na Nyambi ci thsinu ethsi nga a ñañerera.
7Unone aye keshima yenthzi,
wa thsiire yoihe eyi ekarire nayo ko ku citenda mupika,
ko kwerekiwa mu thsikupuro thsonu.
8Wa cihuthsire kushi,
ko ku yuvera Nyambi shime ku twara ku kufa,
mane kufa ko pa mbinda!
9Mweyo, Nyambi wa mu thzinekire,
mu ndau thzo ku thzinama nene, karo wa mu pire dithzina dyodikuru ku pita mathzina oahe.
10Ci pa dithzina dya Yesu,
yumbiwa yoihe yo mu wiru, no mu kaye, no kushi thzo kaye ya ku tongame ku mu remeka.
11Karo madimi oahe a ambe ci Yesu Krisitu po Fumu,
ku shangara kutethzima kwa Nyambi Tata.
Tu muneke eci mwethzi mu kaye
12Mweyo, ashimiwa ange, eci diya na mu ni yuveranga thsikati thsothsihe o ku ni di nenu, mu tende kengeyo shaanga o ku ni di kokure nenu. Ko kuyapa no ku tutuma, mu kwame ekwama yo ku monithsa kuyoyithsiwa kwenu. 13Inene Nyambi yo na kwamanga mu mwenu ku mi shimithsa no ku mi tendithsa enu yo ku mu roerithsa.
14Mu tende enu yoihe ko kukana ku cithsimoka, nji ko ku kanyeka, 15ci mwikare o kupira kapongonyi no kwikara owakenu, ana Nyambi o kupira kapongonyi mu kaci kanu owamango o rerodino. Mu muneke mu kaciko eci mimunyi mu kaye. 16Mu tanarithse diywi dyo mwoyo ci mu diyuwa dya Krisitu nga na ku wane po ku cishangarera mukaci kenu ci ka na ni ciri mu kengekenge nji ku kwama mu kengekenge. 17Unone shaanga onyinga wange o wa ku viithsiwe eci nupu pa thsiyambero ethsi thsi tupuriwa ko thsitawo thsenu, apo honi kenge na ku nyanyuka nene, na ku ciwane nenu mu thsinyanyu thsange. 18Mweyo, namwe mwaa roera ku nyanyuka nange.
Timoti na Epafirodite
19Naa kurupera ci ngeci Fumu Yesu waa ku i shime, kenge na ku tuma Timoti ku kwenu wanguwangu ci na ku na tanare mucima ou na ku na yuva keyi yenu. 20Inene ka ni di noyu yumweya o ku ninga eci aye, oyu wa ku pakera shemwa maano keyi yenu. 21Amweya po aa twarera pohuma maano yo athsinda, kadi ya Yesu Krisitu. 22Uno honi amwe po mu na mu dimuka Timoti, inene mwa cimonenine edi a kwamine nange ko ku rurama eci mwana na tata wenthzi o ku tu honga Muthzimbu Ouwa. 23Mweyo, naa kurupera ku mu tuma oko wanguwangu ngeci enu o ya ku ni endere nawa. 24Naa kurupera kwa Fumu ci name kenge na ku keya oko wanguwangu.
25Naa anekera ci ku di nawa ci ni mi tumene muenthzange mukwakutawa Epafirodite, aye muenthzange mwikwama karo muenthzange dishwarare, oyu mwa tumine ci naa ni kwathseko mwifotahara yange. 26Epafirodite aa fota nene ci naa mi mone mwahe. Aa cinyenga nene pakuninga ci na mu na yuvu ci aa kora. 27Yashemwa shime aa kora, shime ku kokangera. Unone Nyambi na a mu fera ñeke, kadi aye pohuma unone name Nyambi naa ni fera ñeke ci nekara mu mathsiwa oakuru.
28Mweyo, naa fota nene ci ni mu tumene oko ci nga mwa ku na nyanyuke ou mwa ku na mu mona karo, name karo naa fota ci mathsiwa ange a pwe. 29Mwa ku na mu tambure ko thsinyanyu eci mwapenu kwa Fumu. Mwaa roera ku pa direma anu o ku cipitura eci aye. 30Inene aye kambe a fe mukaci kekwama ya Krisitu. Na a shuvu mwoyo wenthzi ci a ni kwathse eyi mu na kwanga ku ni kwathsa amwe.
Currently Selected:
AkwaFilipi 2: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company