AkwaRoma 15
15
Mu temunune Krisitu
1Atwe tu na tanara mu thsitawo twaa roera ku cithzua micima mukaci kakwakutawa aenthzetu awa na faratera. Ka tu roerire ku tenda yo ku nyanyukithsa atwe pohuma. 2Munu no munu ku kwetu a roerithse muenthzenthzi ko ku mu tendera yoiwa no ku mu umba mu thsitawo. 3Inene shaanga Krisitu ka a tendire yo ku cinyanyukithsa yothsinda, unone eci dyodi ku na ñoriwa ci: “Kushwahura kowa ku shwahura ku na wera pa pange.” 4Inene enu yoihe eyi ya ñoriwire kukare, shime ya ñoriwerire ku tu rongithsa, ci ko mucima outhzui notanarithso o Mañoro tu twethse kwikara nokurupero.
5Nyambi oyu na panga othzui notanarithso a mi pe ku yoya ko thsianekera thsofoci nanu amweya eci edi a tendire Krisitu Yesu, 6ci mwahe mwikare no maano ofoci, no diywi dyofoci ci mu shangare Nyambi no Tata wa Fumu wetu Yesu Krisitu.
Muthzimbu Ouwa po wa Majuda nAnukenge
7Mweyo, mu citambure oandu nawa eci Krisitu edi naa mi tambura ci mu twethse ku pa direma kwa Nyambi. 8Inene naa mi tongwera ci Krisitu shime a pirukire ngamba o Majuda ku monithsa ci Nyambi wa ku rurama, no ku yarithserera eyi a kumbwethzire kwakwathsañuruetu. 9Karo shime a keyire ci Anukenge nawo a twethse ku shangara Nyambi mukaci ko ñeke thzenthzi eci edi ku na ñoriwa ci:
“Mweyo, kenge na ku ku shangara mu kaci kAnukenge,
karo kenge na ku shangara dithzina dyoe ko membo.”
10Kuna ñoriwa karo ci:
“Amwe mwAnukenge, mu roere nanuenthzi.”
11Pamweya karo ci:
“Mu shangare Fumu, mwahe amwe mwanukenge,
Mu mu shangare, mwahe amwe mwa mambunga.”
12Isaya naye karo wa ambire ci:
“Mwanahoka wa Jese kenge mba a keya,
oyu wa ku endithsa Anukenge,
karo kenge mba paka okurupero wo ku kwenthzi.”
13Uno honi Nyambi, aye oyu mu na kurupera, a mi pe thsinyanyu thso kuyara no thsiyaro mukaci ko thsitawo thsenu, ci okurupero wenu u twarerere ku kura kokoro o Mupepo Oukenu.
Ekwama ya Paulu
14Andengenu, ame naa tawa shemwa ci mu na yara owa, mu di nodimukero o kuyara, karo mwaa twethsa ku cirongithsa oandu. 15Uno honi na ni mi ñorera kondume mwiambaura imweya, ci ni i mi vurukithse, mukaci ko thsihemo ethsi na a ni pa Nyambi. 16Nyambi wa ni hangurire ci nikare mukwakukwama wa Krisitu Yesu kwAnukenge. Wa ni pire ekwama yopurisita yo ku rongithsa Muthzimbu wenthzi Ouwa. Nyambi wa tendire eyi ci Mupepo Oukenu u twethse ku tenda Anukenge kwikara eyambero yoikenu yo ku mu roerithsa.
17Pakuninga ci kwa Krisitu Yesu ni di, naa twethsa honi ku cishangara mwikwama yange kwa Nyambi. 18Unone ka ni keshuka ku amba ngara thsinu shime yekwama eyi na a kwama Krisitu kange ku reta Anukenge ku kuyuvera Nyambi ko maywi netenda yange mu kaciko. 19Shime a tawire kokoro wemonithso nekomokithsa kokoro o Mupepo wa Nyambi. Mweyo, na ni tongora ko kuyara yo Muthzimbu Ouwa keyi ya Krisitu mu mandau oahe ku tatekera ku Yerusalema shime ku ka kuma mu ditunga dya Iliriko. 20Unone eshima yange po ku honga Muthzimbu Ouwa keyi ya Krisitu mu mandau aa a kana ku yuva ya Krisitu, ci na umbera pa mushisho wa munu yumweya. 21Eci edi ku na ñoriwa ci:
“Awa kanine ku tongweriwa yenthzi kenge mba mona,
karo awa kanine ku yuva yenthzi kenge mba yuvithsithsa.”
Eceka ya Paulu yo ku ka hungera ku Roma
22Eyi po yodiyo na i ni kwangithsanga rorungi ku na mi hungerithsa.
23Pano honi ka ni di karo no ndau thzekwama mo ano matunga, shime na ni shimbi myaka thzothzingi o ku ni fotanga ku na mi hungerithsa. 24Naa kurupera ku na mi hungerithsa ou na ku na pita ku thza ku Sipeini. Ou na ku mana ku cikora kwikara nenu mbeci honi na ku fote ci mu ni kwathse mu ruendo rwange.
25Pano po mu dikuñwa ni di ku thza ku Yerusalema ku ka kwathsa akwakutawa a Fumu awa diko. 26Inene makereke o mu Masedonia no mu Akaya na i wa roerithsa ku tendera koreko akwakutawa wahepwe o ku Yerusalema. 27Wodiyo athsinda na shimi nene ku tenda kengeyo, karo shemwa shemwa a di no makongo ku kwo. Inene ngeci Anukenge na tambura thsiyauthzi thso mupepo thso Muthzimbu Ouwa ku tunderera ku Majuda, nawo aa roera ku wa kwathsa kewana yo. 28Mweyo, ou na ku mana eyi ekwama no ku ka kumithsa eyi ya ku korekiwa, kenge na ku na pita oko o ku ni thza ku Sipeini. 29Karo ni na dimuka ci ku keya kwange ku na mi hungerithsa kenge kwa ku mi retithsera ci Krisitu a mi fiyawere ko kuyara.
30Andengenu, naa mi adikanena mwa Fumu Yesu Krisitu no thsishimo thsa Mupepo ci mu ciwane nange mu ku tanarithsa ku ni romberera kwa Nyambi. 31Mu rombere ci Nyambi a ni amwene kwakwakukana ku tawa o mu Judea, karo mu rombere ci eyi ekwathsa ni twara ku Yerusalema i twethse ku ka tamburiwa nawa kwanua Nyambi oku i thza. 32Mweyo, kenge na ku keya oko o ku ni na nyanyuka nene ngeci Nyambi waa ku i shime, kenge na ku na cikora kuyooyera ou na ku nekara nenu. 33Naa rombera ci Nyambi oyu na panga thsiyaro ekare nenu mwahe. Ameni.
Currently Selected:
AkwaRoma 15: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company
