AkwaRoma 5
5
Thsiyaro thsa Nyambi
1Mweyo, pakuninga ci na tu tendiwa owawawa ko thsitawo, mu thsiyaro tu di na Nyambi mwa Fumu wetu Yesu Krisitu. 2Mu mwenthzi Yesu na tu wana dikuñwa ko thsitawo ku kuma mothsino thsihemo omu tu nemana. Tu na nyanyuka honi mukaci ko ku kurupera ku kekara mu kutethzima kwa Nyambi. 3Kadi eyo pohuma, unone karo twaa nyanyuka mu makando etu, ko ku dimuka ci makando aa reta muooto, 4muooto waa reta mukarero o shemwa, karo mukarero o shemwa waa reta okurupero, 5karo ou okurupero ka wa retithsera ku ena, inene Nyambi na a pingurwera thsishimo thsenthzi mu micima thzetu ko Mupepo Oukenu oyu a tu pire.
6O ku shimbi twekarera o ku faratera, ko thsikati ethsi thsi na roera, Krisitu wa fererire anu owamango. 7Inene kadi nene ci munu a fere munu o muwawa, shaanga ci munu kenge nga a keshuka ku fera munu o muwa. 8Unone Nyambi naa tu monithsa okuru o thsishimo thsenthzi pakuninga ci o ku shimbi twekarera anu wevi, Krisitu wa tu fererire.
9Pakuninga honi ci na tu tendiwa owawawa konyinga wenthzi, yoshemwa kenge a ku tu yoyithsa kuanthzi wa Nyambi. 10Inene ou twekarire akwethzimbo ya Nyambi, wa tu huthserire ku kwenthzi aye thsinda ko kufa kwa Mwane. Pakuninga honi ci na tu huthseriwa kwa Nyambi, yoshemwa kenge twa ku yoyithsiwa ko mwoyo wa Mwane. 11Uno honi kadi eyo pohuma, unone twaa nyanyuka karo mukaci keyi na a tu tendera Nyambi mwa Fumu wetu Yesu Krisitu oyu naa tu huthsera kwa Nyambi.
Adama na Krisitu
12Mweyo, dyodi thsa keyire thsivi mu kaye mukaci ko munu yofoci aye Adama, karo thsivi na thsi reta kufa, dyo na ku yamba kufa anu wahe, inene wahe na tende thsivi. 13Thsivi thsekarire mu kaye murao o ku u shime ku piwa, unone thsivi ka thsi variwire po kupira murao. 14Uno honi kufa kwa tuminine ku tatekera kwa Adama shime ku na kuma kwa Mushe. Mane kwekarire nokoro shaanga peuru thzowa a kanine ku tenda thsivi eci ethsi a tendire Adama, aye thsikupuro thsa Krisitu oyu a ningire Nyambi ci aa keya.
15Uno honi thsipa thsa Nyambi thso kengekenge ka thsi cishokire no murandu wa Adama. Inene murandu oyu munu yofoci, aye Adama, wa reterire anu owangi kufa. Uno honi thsihemo thsa Nyambi no thsipa thsenthzi thsotetero kwanu owangi koyu munu yofoci, aye Yesu Krisitu po ikuru nene. 16Karo ko thzi di thsiano mu kaci ko thsipa thsa Nyambi no thsivi thsoya munu yofoci. Inene thsivi thsa Adama thsa retire raturo thzo humbithso, uno honi thsipa thsa Nyambi thso kengekenge thsaa tu retera ku tendiwa owawawa pa meho a Nyambi, shaanga ci tu di no murandu wevi yoingi. 17Inene ngeci murandu wa munu yofoci wa retire ci kufa kwikare nokoro mukaci ko munu yofoci, yoshemwa awa a na tambura thsihemo thsa Nyambi thsothsikuru no thsipa thsowawa kenge a ku tumina mu mwoyo mukaci ko munu yofoci, aye Yesu Krisitu.
18Mweyo, dyodi wengenithsire murandu ofoci anu wahe mu raturo, no thsitenda thsofoci thsowawa dyo thsi na retera anu wahe ku tendiwa owawawa no ku piwa mwoyo. 19Inene dyodi a tendiwire owangi kwikara anu wevi mukaci ko kukana kuyuvera kwa munu yofoci, dya ku tendiwa owawawa anu owangi mukaci ko kuyuvera kwa munu yofoci.
20Murao wa piwire ci thsivi thsi monahare kongi, uno honi thsivi ou thsa vurire, thsihemo athso thsa vurire kupiterera. 21Mweyo, dyodi thsekarire thsivi nokoro peuru thzanu ko ku wa retera kufa, no thsihemo thsa Nyambi dyo thsa kwikara nokoro kowawa, ku reta mwoyo o diyere ka Yesu Krisitu Fumu wetu.
Currently Selected:
AkwaRoma 5: mho
Highlight
Share
Compare
Copy
Want to have your highlights saved across all your devices? Sign up or sign in
©2023 The Seed Company
