Tite 2
2
Erongithsa yo shemwa
1Uno honi, owe o rongithse erongithsa yo shemwa. 2O tongwere akwerume owakuru ci a cihenge, ekare o ku remekiwa, a cikuteke karo ekare no maano. Aa roera kwikara no thsitawo thso shemwa, thsishimo nothzui. 3Mofoci, ambuyama owakuru nawo o wa tongwere ci ekare no mikarero thzo ku remekiwa. Ka roerire kwipithsa anu amweya mathzina nji ku pikuriwa ku waine. Unone aa roera ku rongithsa yoiwa. 4Awa ambuyama owakuru aa roera ku ronga ambanda ku shima anuwo nano, 5a cihenge no kwikara owakenu, ci a kwame mu myanda thzo, kwikara no thsihemo, no ku cipaka kushi thzanuwo, ci diywi dya Nyambi dyepithsiwa dithzina.
6Mofoci kengeyo no mishumba, o wa karaethze ci a cikuteke. 7Owe othsinda o wa monithse muro mwinu yoihe ko ku tenda yoiwa. Erongithsa yoe ikare yo shemwa no ku remekiwa. 8O ambe maywi o shemwa ci kwekara o ku a shomorora, ci awa a ku rwithsa a ene, inene ka di neyi yoimango yo ku amba keyi yetu.
9O tongwere apika ci a cihuthse kushi thzañathsire wo mwinu yoihe, no ku kwama momuhe omu a na twethsera ci a wa roerithse. Karo ka roerire ku cikanyekano, 10nji ku wethzera, unone thsikati thsothsihe a wa monithse owa norurami, ci eyi a tenda yoihe i retithsere erongithsa ya Nyambi aye Muyoyithsi wetu ku roerithsa anu wahe.
11Inene thsihemo thsa Nyambi na thsi monahara, na thsi rete kuyoyithsa kwanu wahe. 12Thsihemo thsenthzi thsaa tu rongithsa ku thsia mwoyo o kupira thsitawo necikumbwethza yo kaye. Karo thsaa tu rongithsa ku yoya ko ku cihenga, nowawa no mwoyo o thsitawo mo kano kaye ko rerodino. 13Thsihemo thsa Nyambi thsaa tu rongithsa ku taterera okurupero o thsiyauthzi, ako kuhokoka ko kutethzima kwa Nyambi wetu Shokuru no Muyoyithsi Yesu Krisitu. 14Aye oyu wa shuvire mwoyo wenthzi mukaci ketu ci a tu pature kumango ouhe no ku cikenithsera yothsinda anuenthzi shemwa, awa a na shimi nene ku tenda ekwama yoiwa.
15Waa roera ku rongithsa eyi enu, o kwamithse okoro woe ouhe ko ku karaethza no ku kuturura. Wa tawethza ngara munu ku ku shomorora.
Currently Selected:
Tite 2: mho
Highlight
Copy
Compare
Share
Want to have your highlights saved across all your devices? Sign up or sign in
©2023 The Seed Company