A pi ake 4
4
Ñagadil eetaand ne no gimu we
1Ye Piyeer fa Saŋ a maadna o layaa fa xeet fee, saasadax we fo xe adooxan’ina yeeyetax we no Mbind Roog naa fo Sadusiya we a mbadiida me den. 2Sawar’ee tus yaam ne Piyeeriin a njangnoogna xeet fee, a yegnitaa yee a qontax ale Yeesu xan a tax xon we a nqontoox. 3A mbaara a caf o mbap den na den, a ƥek a den kaso boo no feet olaa, yaam tige kaa yaariidoogu. 4Na waxtu faaga, mayu no we nan’ina fa lay fee Roog a ngim’a, boo goor gimu we fop a mbadat ngap cuni ƥetik.
5No feet olaa, kelfa ke no Yaawuur we fo maak we fo jaajangin we no kebil ke a mbokatoora Yeerusaleem. 6A jeg’a maaga koy: Xaan-Koor fee reeƭna o saasadax o maak oxaa, Kayif fa Saŋ fa Aleksaandar fo fop we mbog’ina no ƥasil naa no saasadax o maak oxaa. 7Maaga, a ndiƈa a Piyeer fa Saŋ a ndeer den, too a laamit a den ee:
«Na pexey sañ-sañ fum ndi no gon an nu mbodandtu o ƥoof oxene?»
8Maaga, Piyeer a maya fo Yiif Tedu le, too a lay a den ee:
«Nuun kelfa ke fo maak we na xeet fee, 9xar taxu nu laamtaa a in xaye kaa farna na pi a paax ake mbi’eena no kiin o ciru xene fo ne ta wodandteena? 10Andyo kene boog nuun fop, too fat xeet fee Isra’el fop a andin itam! Na pexey gon le Yeesu Kiristaa o Naanasaret oxe o kiin oxeeke geenooxna mbaambir nuun a jegtu o wod-fo-ɓaal. Yeesu feene mat nu ndengu took a kurwaa, ndaa Roog a xontooxnooraan a ndeer no xon we. 11Keeke refu ke a Pind a Tedu ke a layna na Yeesu:
‹Nuun maamax we, ɓil le nu ndeɓ’ina
a refata ɓil faraaj le.›#Kt 118:22
12Yaaga boog, no ten soom a muc a waage o jegit, yaam jegee ɗuga asamaan gon lakas laa Roog a ci’itna ndeer no wiin we, ndax i muc.»
13Yaa waa mbog’ina no Mal naa a nga’na njambaar ne Piyeer fa Saŋ, kaaga a beta a den lool, yaam a and’a yee a cang den goƭee. Kaa koy, a and’ata yee no we yoonoogna fa Yeesu a mbogu itam. 14Ne da nga’’ina o koor oxe wodand’eena a geenoox paam den, njeg’ee tus kaa da ndoonna. 15Maaga, a ngebla a den da sutoox o moofand olaa. A nga’ra a ndeer den, too a lay ee:
16«Ndi xar i mbi’kaa wiin weeke? Yaam we ngenna Yeerusaleem fop a anda a qool qac ee o anddiloor ole nannooxna, den o mat mbi’un, too i mbaagiran o nqañ. 17Fat i ngartoox a den, mbañit a den da layat o leng kaa farna no gon Yeesu, ndax ke yegniteena no keene a fañ o siw a ndeer xeet fee.»
18Cinj kaaga, a nqoya a den, too a maƭoox a den a paax ee baa da layat kaa farna na Yeesu mbaat da njangnitaa no gon um. 19Piyeer fa Saŋ a ndoona a den ee:
«Ƭeetyo rek! Xar moƴu jof mbaambir Roog, i nanan a nuun, ndi i nanan a Roog? 20Yaam in o mat, i mbaagee o ñak o layit ke i nga’na fo ke i nanna.»
21Maaga, a ngartooxahina a den, too a mbokit a den da ndet. Nga’ee na den dara kaa da nqawitna a den, yaam xeet fee fop kaa simatoogu a Roog no ke xewna. 22O koor oxe wodand’eena no anddiloor olaaga a hupiɗ’a xa kiid qarɓeen nahik.
A qeƭ ale no gimu we
23Yaa Piyeer fa Saŋ a mbokteena, a ndeta maa no yoon den, too a mbetandoox ke saasadax maak waa fo maak waa a lay’ina a den fop. 24Yaa da nanuuna, a nqeɗandoora a Roog a maak, too a lay ee:
«O Yaal oxe, wo saku asamaan fee fo lanq ke fo o maag ole fo fop ke refna teen,#Sut 20:11; Neh 9:6; Kt 146:6 25wo lay’u na pexey Yiif Tedu le, reefandin no don no taan in Dawid fee refna o tag of ee:
‹Xar taxu a saax ake a nootoox,
qeet ke a mbof a qalaat a cegee xoox?#Kt 2:1-2
26Kaam ee xar taxu maad we na adna fee a mbapoox,
kelfa ke a ngukranaa o Yaal oxe fo xe ta ɗuumna?›
27A woora yee, na teeru feeke Herood fa Poons Pilaat, den fo a saax ake fa xeet fee Isra’el a ngukranit’u a Yeesu fee o tag o tedu xe wo ɗuumoona nen o Muumucil oxe regteena.#Mace 27:1-2; Mark 15:1; Lik 23:1, 7-11; Saŋ 18:28-29 28Neene o mat a fadnitu ke yuuɓ’oona yaaga no katil of fo no bug of. 29Ndiiki koy o Yaal oxe, ɗeeti ne da ngartoortaa a in, ci’i a in, in we na mbaɗooxang, i yegnitik fa lay of fo njambaar! 30Letni o ɓay of, ndax jiru we a mbodandeel, xa anddiloor fo comlaand a nqew no gon Yeesu fee o tag o tedu xe wo.»
31Yaa da nqeɗna boo a ƈut, lanq kaa no mbiñ onqaa da moof’ina a yo’nooxa. Den fop a maya fo Yiif Tedu le, a yegnitaa fa lay fee Roog fo njambaar.
Gimu we Yeerusaleem fop kaa mbokatoogu o jeg den
32Mbokatax naa no waa ngim’ina fop kaa mbog’u xeeñ leng fo yiif leng. O leng layoogee yee kene mi jegun, mbaat kaana wo jegun, ndaa o jeg den fop kaa mbokatoogun.#2:44-45 33Apootar we kaa laytoogu doole fa maak no ke da seede’na na qontax ale no Yaal oxe Yeesu. Maaga, yirmande fa maak fee Roog a reeƭa fa den fop. 34O leng na den ñak’ee ke ta soxla’na. Fop we njeg’ina xa qol mbaat pind kaa njikooxoogu den, 35a ƥisiid njigand ne no ke da njikooxna na xa ƥay axe no apootar we. Xaaliis feene koy, a nqaajanooga teen o kiin oo kiin ke ta soxla’na.
36A jeg’a koy o Leelewi xaa rim’eena Sipere. O koor oxaaga Yoseef a ne’’e. Apootar we kaa lastitoogun Barnabaas, tekitna yee «Oxe na saƭakinaa». 37Kaa jikoox’u o qol um, a ɓis xaaliis fee, a doonin na xa ƥay axe no apootar we.
Currently Selected:
A pi ake 4: SRR23
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal
A pi ake 4
4
Ñagadil eetaand ne no gimu we
1Ye Piyeer fa Saŋ a maadna o layaa fa xeet fee, saasadax we fo xe adooxan’ina yeeyetax we no Mbind Roog naa fo Sadusiya we a mbadiida me den. 2Sawar’ee tus yaam ne Piyeeriin a njangnoogna xeet fee, a yegnitaa yee a qontax ale Yeesu xan a tax xon we a nqontoox. 3A mbaara a caf o mbap den na den, a ƥek a den kaso boo no feet olaa, yaam tige kaa yaariidoogu. 4Na waxtu faaga, mayu no we nan’ina fa lay fee Roog a ngim’a, boo goor gimu we fop a mbadat ngap cuni ƥetik.
5No feet olaa, kelfa ke no Yaawuur we fo maak we fo jaajangin we no kebil ke a mbokatoora Yeerusaleem. 6A jeg’a maaga koy: Xaan-Koor fee reeƭna o saasadax o maak oxaa, Kayif fa Saŋ fa Aleksaandar fo fop we mbog’ina no ƥasil naa no saasadax o maak oxaa. 7Maaga, a ndiƈa a Piyeer fa Saŋ a ndeer den, too a laamit a den ee:
«Na pexey sañ-sañ fum ndi no gon an nu mbodandtu o ƥoof oxene?»
8Maaga, Piyeer a maya fo Yiif Tedu le, too a lay a den ee:
«Nuun kelfa ke fo maak we na xeet fee, 9xar taxu nu laamtaa a in xaye kaa farna na pi a paax ake mbi’eena no kiin o ciru xene fo ne ta wodandteena? 10Andyo kene boog nuun fop, too fat xeet fee Isra’el fop a andin itam! Na pexey gon le Yeesu Kiristaa o Naanasaret oxe o kiin oxeeke geenooxna mbaambir nuun a jegtu o wod-fo-ɓaal. Yeesu feene mat nu ndengu took a kurwaa, ndaa Roog a xontooxnooraan a ndeer no xon we. 11Keeke refu ke a Pind a Tedu ke a layna na Yeesu:
‹Nuun maamax we, ɓil le nu ndeɓ’ina
a refata ɓil faraaj le.›#Kt 118:22
12Yaaga boog, no ten soom a muc a waage o jegit, yaam jegee ɗuga asamaan gon lakas laa Roog a ci’itna ndeer no wiin we, ndax i muc.»
13Yaa waa mbog’ina no Mal naa a nga’na njambaar ne Piyeer fa Saŋ, kaaga a beta a den lool, yaam a and’a yee a cang den goƭee. Kaa koy, a and’ata yee no we yoonoogna fa Yeesu a mbogu itam. 14Ne da nga’’ina o koor oxe wodand’eena a geenoox paam den, njeg’ee tus kaa da ndoonna. 15Maaga, a ngebla a den da sutoox o moofand olaa. A nga’ra a ndeer den, too a lay ee:
16«Ndi xar i mbi’kaa wiin weeke? Yaam we ngenna Yeerusaleem fop a anda a qool qac ee o anddiloor ole nannooxna, den o mat mbi’un, too i mbaagiran o nqañ. 17Fat i ngartoox a den, mbañit a den da layat o leng kaa farna no gon Yeesu, ndax ke yegniteena no keene a fañ o siw a ndeer xeet fee.»
18Cinj kaaga, a nqoya a den, too a maƭoox a den a paax ee baa da layat kaa farna na Yeesu mbaat da njangnitaa no gon um. 19Piyeer fa Saŋ a ndoona a den ee:
«Ƭeetyo rek! Xar moƴu jof mbaambir Roog, i nanan a nuun, ndi i nanan a Roog? 20Yaam in o mat, i mbaagee o ñak o layit ke i nga’na fo ke i nanna.»
21Maaga, a ngartooxahina a den, too a mbokit a den da ndet. Nga’ee na den dara kaa da nqawitna a den, yaam xeet fee fop kaa simatoogu a Roog no ke xewna. 22O koor oxe wodand’eena no anddiloor olaaga a hupiɗ’a xa kiid qarɓeen nahik.
A qeƭ ale no gimu we
23Yaa Piyeer fa Saŋ a mbokteena, a ndeta maa no yoon den, too a mbetandoox ke saasadax maak waa fo maak waa a lay’ina a den fop. 24Yaa da nanuuna, a nqeɗandoora a Roog a maak, too a lay ee:
«O Yaal oxe, wo saku asamaan fee fo lanq ke fo o maag ole fo fop ke refna teen,#Sut 20:11; Neh 9:6; Kt 146:6 25wo lay’u na pexey Yiif Tedu le, reefandin no don no taan in Dawid fee refna o tag of ee:
‹Xar taxu a saax ake a nootoox,
qeet ke a mbof a qalaat a cegee xoox?#Kt 2:1-2
26Kaam ee xar taxu maad we na adna fee a mbapoox,
kelfa ke a ngukranaa o Yaal oxe fo xe ta ɗuumna?›
27A woora yee, na teeru feeke Herood fa Poons Pilaat, den fo a saax ake fa xeet fee Isra’el a ngukranit’u a Yeesu fee o tag o tedu xe wo ɗuumoona nen o Muumucil oxe regteena.#Mace 27:1-2; Mark 15:1; Lik 23:1, 7-11; Saŋ 18:28-29 28Neene o mat a fadnitu ke yuuɓ’oona yaaga no katil of fo no bug of. 29Ndiiki koy o Yaal oxe, ɗeeti ne da ngartoortaa a in, ci’i a in, in we na mbaɗooxang, i yegnitik fa lay of fo njambaar! 30Letni o ɓay of, ndax jiru we a mbodandeel, xa anddiloor fo comlaand a nqew no gon Yeesu fee o tag o tedu xe wo.»
31Yaa da nqeɗna boo a ƈut, lanq kaa no mbiñ onqaa da moof’ina a yo’nooxa. Den fop a maya fo Yiif Tedu le, a yegnitaa fa lay fee Roog fo njambaar.
Gimu we Yeerusaleem fop kaa mbokatoogu o jeg den
32Mbokatax naa no waa ngim’ina fop kaa mbog’u xeeñ leng fo yiif leng. O leng layoogee yee kene mi jegun, mbaat kaana wo jegun, ndaa o jeg den fop kaa mbokatoogun.#2:44-45 33Apootar we kaa laytoogu doole fa maak no ke da seede’na na qontax ale no Yaal oxe Yeesu. Maaga, yirmande fa maak fee Roog a reeƭa fa den fop. 34O leng na den ñak’ee ke ta soxla’na. Fop we njeg’ina xa qol mbaat pind kaa njikooxoogu den, 35a ƥisiid njigand ne no ke da njikooxna na xa ƥay axe no apootar we. Xaaliis feene koy, a nqaajanooga teen o kiin oo kiin ke ta soxla’na.
36A jeg’a koy o Leelewi xaa rim’eena Sipere. O koor oxaaga Yoseef a ne’’e. Apootar we kaa lastitoogun Barnabaas, tekitna yee «Oxe na saƭakinaa». 37Kaa jikoox’u o qol um, a ɓis xaaliis fee, a doonin na xa ƥay axe no apootar we.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright © 2015-2023 by Eglise luthérienne du Sénégal