Pin'ilʋg 22

Wina'am da kpans Abraham si'em

1Ka lina wʋsa nya'aŋ ka Wina'am gban'e ye o kpans Abraham yadda niŋiri gɔs, ka buol o ye, “Abraham!” Ka Abraham siak ye, “Naa! Manɛ nwa'.” 2Ka Wina'am yɛl ye, “Nɔkimi fʋ biyimmir Isaak onɛ ka fʋ nɔŋ la mɔri keŋ Moria teŋin ka m na pa'alif zuokanɛ ka fʋ na nɔk o maal nyu'or maannɛ tis mam.” 3Bɛogʋ da nie la Abraham da isigi nɔk o yammis ayi' nɛ o biig Isaak ka bɔ daad linɛ na maal maan la ka ban' o buŋi gban'e suori ken zin'ikanɛ ka Wina'am yɛl o la. 4Abraham da keŋi daba atan', ka daba atan' daar la o da ʋk o zugʋ gɔsi nyɛ zin'ig la ka li bɛ lallisa. 5Ka Abraham yɛl o yammis la ye, “Kpɛlimmi kpɛla nɛ bʋŋ la, ka mam nɛ biig la keŋi pʋ'ʋs ka lɛb na.” 6Ka Abraham nɔk daad linɛ na maal maan la ziil o biig Isaak ka o mɛŋ mɔr sʋ'ʋg nɛ bugum, ka babayi' la dɔl taaba ken. 7Ka Isaak yɛl ye, “M ba', bugum nɛ daadi nwa', amaa pɛ'og kanɛ na maal maan la bɛ ya?” 8Ka Abraham lɛbis ye, “M biiga, Wina'am na gɔs pɛ'og kanɛ na maal maan la yɛla.” Ka babayi' la dɔl taaba keŋ.

9Ban da paae zin'ikan ka Wina'am pa'ali ba la, ka Abraham mɛ' maan bimbim ka kɔ' daadi pa'ali li zugin, ka lɔɔ o biig Isaak n pa'al daad linɛ bɛ bimbim la zug. 10Ka tiɛn o nu'ugʋ nɔk sʋ'ʋg ye o kɔdig biig la maal maannɛ tis Zugsɔb la. 11Ka Zugsɔb maliak naan saazugʋ buol o ye, “Abraham, Abraham!” Ka o siak ye, “Naa! Manɛ nwa'.” 12Ka maliak la ye, “Digilim sʋ'ʋg la, ka da si'is biig la. Nannanna, m baŋ ye fʋ sid zɔt man Wina'am, fʋn pʋ mɔŋimi fʋ biyimmir la.” 13Ka Abraham gɔs mɔɔgin la nyɛ pɛraug ka gɛnda vil o iila zi'el. Ka o keŋ nɔk pɛraug la maal maan la ka bas o biig la. 14Ka Abraham pʋd zin'ig la ye Zugsɔb Na Bɔɔ Tis. Ka lin yi saŋkan la paae zina nidib yɛt ye, “Zugsɔb zuorin la o na bɔɔ tis.”

15Zugsɔb maliak da lɛm buol Abraham ya'as 16ka yɛl ye, “Zugsɔb yɛlif ye, ‘Fʋn siak ka pʋ mɔŋimi fʋ biyimmir la zugɔ, m pɔya ye 17m na niŋi fʋ zug bareka bɛdegʋ, ka kɛ ka fʋ yaas na ti zu'oe bɛdegʋ wʋʋ nwadbibis banɛ bɛɛ agɔla bɛɛ titanbin'isʋg kanɛ bɛ atɛuk nɔɔrin la; ba na nyaŋi ba bi'emnam wʋsa ka faaɛn ba tɛɛns. 18Fʋ yaas la ma'asim zug dunia buudi wʋsa na paam bareka, fʋn siak mam nɔɔr la yɛla.’” 19Ka Abraham lɛb o yammis la san'an ka ba dɔl taaba lɛb Beerseba n zin'in anina bi'ela.

20Lin nya'aŋ ka Abraham wʋm ye o pitʋ Nahor pu'a Milika du'a biribis. 21Nahor bikpɛɛm la yʋ'ʋri da buon Uz, ka onɛ tia'al la an Buz, ka onɛ tia'al Buz la an Kemuel ka Kemuel da du'a Aram. 22Nahor biisi da lɛn an Kesed, nɛ Hazo, nɛ Pilidas, nɛ Jidilaf nɛ Betuel. 23Ka Betuel mɛ du'a Rebɛka. Biis anii nwa' ka Milika da du'a tis Abraham pitʋ Nahor. 24Ka Nahor pu'abil onɛ yʋ'ʋri da buon Reuma mɛ da du'a biribis anaasi, ka ba yʋda anɛ Teba nɛ Gaham nɛ Tahas nɛ Maaka.

Currently Selected:

Pin'ilʋg 22: kus_gh

Highlight

Copy