SAN LUCAS 19

Jesús bix Zaqueo

1Bix ocx Jesús tuj tnom te Jericó, bix iyꞌxin betel tuj tnom. 2Tujtzen tnom najle junxin xjal Zaqueo tbi. Nejenelxin cye ke chmol chojentj, bix kꞌinaxin. 3Tej xiꞌnin Jesús tuj be, e tajbexin tuꞌn toc tcyeꞌyenxin al tzunj Jesús, pero mix e tilexin tuꞌn tnimal xjal, bix cuma chꞌin tweꞌxin. 4Juꞌ tzunj bixsen iyꞌ nejlxin tuj ajkelbil cywitz xjal, bix e jawxin twiꞌ jun tzeeꞌ sicomoro tbi tuꞌn tcuꞌtz tcyeꞌyenxin tiiꞌn Jesús, cuma el tniyꞌxin tiꞌj tuꞌn tex Jesús t-xeeꞌ jtzeeꞌ. 5Tejtzen tcana Jesús nka t-xeeꞌ jtzeeꞌ jaaꞌ tjaxe Zaqueo, e jaw tcyeꞌyenxin, bix e xiꞌ tkbaꞌnxin:

—Zaqueo, nix tcuꞌtza, cuma il tiꞌj chin pomel posadayina tjay jaꞌlewe―tz̈ixin.

6Tej tbinte Zaqueo juꞌwa, e cuꞌtzxin tuj ajkelbil, bix e tiikꞌxin Jesús tuj tjaxin tuya cykil tcꞌuꞌjxin. 7Pero tej toc cycyeꞌyen xjal juꞌwa, cykilcaxsen xjal e jaw yolen, cuma yaaꞌn baꞌn tuj cywitz. E cykba:

—Ma tzꞌocx Jesús posadayil tuj tja jun aj il―tz̈ikexin.

8Mas yaj, e cub weꞌ Zaqueo, bix e xiꞌ tkbaꞌnxin te Kaaw cywitz xjal:

—Taat, cxeꞌl nkꞌoꞌna jun niyꞌjan te cykilca at wuyena cye mebe, bix cyej xjal o tzꞌel wiiꞌna pwak cye tisen alkꞌal, cxeꞌl nkꞌoꞌna cyaja maj t-xel―tz̈ixin.

9Aj ttzakꞌbeꞌn Jesús texin bix cye xjal:

—Te ja kꞌij jaꞌlewe ma clet ja xjal lu, cuma tisen oc ke tcꞌuꞌj Abraham tiꞌ Dios, jaxse juꞌx ma tzꞌoc ke tcꞌuꞌj ja xjal lu tiꞌ Dios. 10Il tiꞌj qꞌuelel cyniꞌya tiꞌj o chin uꞌla te jyol cyej xjal o cheꞌx tzpet, tuꞌntzen cyclet―tz̈i Jesús.

Jun techel tiꞌj laaj pwak

(Mt. 25:14-30)

11Tuj cywitz kej xjal n-oc cybiꞌn alcyej e xiꞌ tkbaꞌn Jesús, ya tuꞌn ttzyet tcawbil Dios tuꞌn Jesús, cuma ya chꞌitk tpon Jesús Jerusalén. Min el cyniyꞌ tiꞌj il tiꞌj tuꞌn taj nejlxin te mitknaꞌx tocxin te cawel. Juꞌ tzunj e xiꞌ tkbaꞌnxin jun tumel cye. 12E xiꞌ tkbaꞌnxin:

—At junxin xjal nintzaj. Ja tzunxin e xiꞌ tuj jun tnom nakch, tuꞌntzen tkꞌoj texin tuꞌn jxin rey tibaj cykilca tnom tuꞌn tocxin te cawel tuj ttanemxin tej tpon meltzꞌajxin. 13Tej mitknaꞌx tajxin, e xiꞌ ttxcoꞌnxin laaj t-akꞌanalxin, bix e cyaj tkꞌoꞌnxin junelne pwak te juun, bix e xiꞌ tkbaꞌnxin cyexin: “Ja pwak ma cyaj nkꞌoꞌna cyey, chi akꞌananxa tiꞌj tuꞌn cycamana mas,” tz̈ixin, bix ajxin. 14Yal tzunkej xjal te ttanemxin, el cyiiqꞌuen jaxin, bix e xiꞌ cysmaꞌnxin ke cysanjelxin te rey te kbalte cyjulu: “Kcyꞌiya tuꞌn tcawen ja xjal lu kibaja,” tz̈ikexin. 15Pero e kꞌoj texin tuꞌn tocxin te cawel tibaj ttanemxin, bix tej tpon meltzꞌajxin, e xiꞌ ttxcoꞌnxin kej laaj t-akꞌanalxin otk cyaj tkꞌoꞌnxin pwak cye, tuꞌntzen tbintexin jteꞌ pwak otk tcaman jaca juun. 16Ul jtneel t-akꞌanalxin, bix e xiꞌ tkbaꞌnxin te cawel: “Taat, jpwak e cyaj tkꞌoꞌna weya, ma japan tuj laaj,” tz̈ixin. 17E xiꞌ tkbaꞌn cawel texin: “Jay jun baꞌn akꞌanal. Cuma baꞌn ma bint tuꞌna tiꞌj chꞌin e cyaj nkꞌoꞌna tey, juꞌ tzunj cxeꞌl nkꞌoꞌna tey tuꞌn tcawena tibaj laaj tnom,” tz̈i cawel. 18Bix ul tcab t-akꞌanalxin twitzxin, bix e xiꞌ tkbaꞌn te cawel: “Taat, jpwak e cyaj tkꞌoꞌna weya, ma japan tuj jweꞌ,” tz̈ixin. 19Jax e xiꞌ tkbaꞌn cawel texin: “Cuma baꞌn ma bint tuꞌna tiꞌj chꞌin e cyaj nkꞌoꞌna tey, juꞌ tzunj cxeꞌl nkꞌoꞌna tey tuꞌn tcawena tibaj jweꞌ tnom,” tz̈i cawel. 20Bix ul juntl twitzxin, bix e xiꞌ tkbaꞌn te cawel, “Taat, lu jpwak e cyaj tkꞌoꞌna weya. Biꞌx e cub nẍpoꞌna tuj jun suꞌtj. 21Min in akꞌanana tiꞌ tpwaka tuꞌn ttz̈ꞌiy, cuma at ttz̈i wiꞌja jacꞌa otk txiꞌ tzꞌak, cuma tey cyiw tnaabla. Nuk taja tuꞌn ttz̈ꞌiy tpwaka. Ntz̈ꞌiy tpwaka nuk tuꞌn cyakꞌmal xjal, bix njtxꞌona tuj j-e cuꞌx tawaꞌn juntl,” tz̈ixin. 22Bix aj ttzakꞌbeꞌnxin te: “Tey jun akꞌanal yaaꞌn baꞌn. Jtey tyol cꞌajbel tuꞌn tchicꞌajax at tpalta. Ka tuj twitza inayena jun xjal at il tiꞌj tuꞌn ttz̈ꞌiy npwaka, bix tuꞌn ncamana tuꞌn cyakꞌmal juntl wik xjal, 23¿tikentzen min e xiꞌ tkꞌoꞌna npwaka tuj banco, tuꞌntzen ttz̈ꞌiy tuj tkꞌab juntl xjal? Nuket e bint tuꞌna juꞌwa, otetle ttz̈ꞌiy tuya tal tej wul meltzꞌaja,” tz̈i cawel. 24Bix e xiꞌ tkbaꞌn cawel cyej xjal eteꞌcꞌa twitzxin: “Cyimel jpwak tej xjal lu, bix cykꞌonx tej xjal e caman laaj e japana tuꞌn,” tz̈ixin. 25E xiꞌ cykbaꞌn te cawel: “Taat, pero ya ma japan tuj laaj tuꞌn,” tz̈ikexin. 26Aj ttzakꞌbeꞌn cawel: “Cxeꞌl nkbaꞌna cyey, jxjal e caman tiꞌj e kꞌoj te, mastl ckꞌojel te, pero ja tzunj xjal mintiiꞌ e tcama, tiꞌj e kꞌoj te, qꞌuelel kꞌiꞌntl te. 27Yaltzen cyej xjal el cyxooꞌn inayena bix cycyꞌi tuꞌn ncawena cyibaj, cyiiꞌntzke tzalu bix cybyoꞌncꞌake nwitza,” tz̈i cawel―tz̈i Jesús cye xjal.

Tej tocx Jesús tuj tnom Jerusalén

(Mt. 21:1-11; Mr. 11:1-11; Jn. 12:12-19)

28Tej tbaj tkbaꞌn Jesús kej yol lu, bix exxin tuj Jericó, tuꞌntzen tponxin Jerusalén. 29Tujtzen be at caꞌba cocꞌ tnom Betfagé tbi bix Betania tbi juntl. Eteꞌc t-xeeꞌ jwitz Olivos tbi. Tej tponxin cytxaꞌnj niyꞌ tnoma, e xiꞌ tkbaꞌnxin te caꞌba t-xnakꞌatzxin:

30—Waja tuꞌn cyxiꞌy tuj niꞌ tnom lu. Oj cypona, cꞌoquel cycyeꞌyena yoꞌlcꞌa jun bur. Jatzen jun burja min-al xjal o jax ke tibaj. Cypjumeltzen, bix cyiiꞌntz. 31Ka at xjal ma tzꞌoc kanente cyey: “¿Titzen n-ela cypjuꞌna jjil bur?” ka tz̈ike juꞌwa, bix cxeꞌl cykbaꞌna: “Ja jilja cꞌajbel te Kaawa,” tz̈i cybela―tz̈i Jesús.

32Bix e xiꞌ kej caꞌba t-xnakꞌatzxin, bix oc noj jbur yoꞌlcꞌa cywitz, tisenx otk tkba Jesús. 33Tej tel cypjuꞌnxin, bix oc noj ke taaw bur cyiꞌjxin, bix e xiꞌ cykanen cyexin:

—¿Titzen n-ela cypjuꞌna jjil bur?―tz̈ike.

34E xiꞌ cykbaꞌnxin:

—Ja jilja cꞌajbel te Kaawa―tz̈ikexin.

35Bix e xiꞌ cyiiꞌnxin bur twitz Jesús, bix e jax cykꞌoꞌnxin cycapẍeyenxin tuj tzaltiꞌjjil te jun kꞌukbil, bix e jax cykꞌoꞌnxin Jesús tibajjil. 36Bix e xiꞌ bet bur, bix e baj cub cyliyꞌpa xjal cycapẍeyen tuj tbe bur tuya Jesús, tisex tten oj n-ocx jun cawel. 37Tej tpon lkꞌe Jesús nka tibaj tnom te Jerusalén, tejtzen cubnenx tcubxin tibaj tnom tcꞌuꞌj jwitz te Olivos, cykilca kej xjal lepchec tiꞌjxin bix akꞌ najke nimsaljawte tbi Dios tuꞌnj cytzalajebl. Otk cyil jjawnex tipemal e xiꞌ tyeecꞌan Jesús, bix tuya nim s̈itz̈ꞌbil 38e xiꞌ cykbaꞌn:

—¡Tzajxit nim xtalbil tibaj ja kcawel smaꞌn tuꞌn Dios lu! ¡Chjonte te Dios! ¡At-xit tzalajebl tuj cyaꞌj, bix jawxit nimset tbi Dios!―tz̈i ke xjal tuya nim s̈itz̈ꞌbil.

39Cyxoltzen tnimal xjal tocxe cabxin fariseo, ejeeꞌj xin oc ke cycꞌuꞌj te nimlte ley. E xiꞌ cykbaꞌnxin te Jesús:

—Taat Xnakꞌtzal, kꞌumenx cyej xjala tuꞌn miꞌn chi cub ten s̈-il ka jay Jcawel smaꞌn tuꞌn Dios―tz̈ikexin.

40Aj ttzakꞌbeꞌn Jesús cyexin:

—Cxeꞌl nkbaꞌna cyey, ka cꞌoquel cymayoꞌna tuꞌn tkꞌumj cyuꞌn xjal ma tzul Jcawel smaꞌn tuꞌn Dios, ejeeꞌtzen xak chi jawel yolel te kbalte, cuma il tiꞌj tuꞌn tkꞌumj tpocbal―tz̈i Jesús.

41Tejtzen tpon lkꞌe Jesús ttxaꞌn tnom te Jerusalén, oc tcyeꞌyenxin tiꞌ tnom, bix akꞌxin ookꞌel. 42Bix e xiꞌ tkbaꞌnxin:

—Key aj Jerusalén, nuket tzꞌel cyniꞌya tiꞌj alcyej tuꞌn tbint cyuꞌna tuꞌn cytena tuj ttz̈yal. Tex ja kꞌij jaꞌlewe matketle nxiꞌ nkꞌoꞌna cyey tuꞌn cytena tuj ttz̈yal nuket nchi ocslana wiꞌja, pero min tzꞌel cyniꞌya tiꞌj al kena. 43Nuket tzꞌel cyniꞌya tiꞌj, cuma tzul jun kꞌij oj cyul te kꞌojlel cyiꞌja kej xjal n-el cyiiqꞌuen ejeeꞌy. Cꞌoquel cysutꞌen cyiib ke soldado tiꞌj cytanema, tuꞌntzen mlay chi el oka. 44Ejeeꞌtzen chi cwel xitente cytanema, bix pjel cybyoꞌn cykilca xjal tuj. Mi nuket jun xak bix cyaj tibaj juntl. Pjel juꞌwa cuma te ja kꞌij jaꞌlewe min xcyocslay tej sul Dios te onlte cyey―tz̈i Jesús.

Tej tetz tlojoꞌn Jesús ke qꞌueyel tuj tja Dios

(Mt. 21:12-17; Mr. 11:15-19; Jn. 2:13-22)

45Tej tpon Jesús tuj Jerusalén, ocxxin tuj tja Dios, bix etz tlojoꞌnxin kej xjal eteꞌcx qꞌueyel tuj. 46E xiꞌ tkbaꞌnxin cye:

—Tzꞌiꞌben tuj tyol Dios cyjulu: “Il tiꞌj tuꞌn tajben njaya te naablte nbiꞌya,” tz̈i Dios. Pero cyey, ma tzꞌoc cykꞌoꞌna te jun cyja alakꞌ―tz̈i Jesús.

47Jaca kꞌij ocx Jesús tuj tja Dios te xnakꞌtzal cye xjal. Pero ejeeꞌ tzunj xin nejenel cye pala cyuya txꞌolbal ley bix ke nejenel te tnom e cyajbe tuꞌn tbyet-xin, bix oc cyipenxin tiꞌj tuꞌn ti ctemela tuꞌn tbyet. 48Pero min e cnet ttxolan cyuꞌnxin ti tten tuꞌn ttzyet cyuꞌnxin, cuma cykilcatl te xjal toc ebil texin, bix baꞌn tyolxin tuj cywitz.

Currently Selected:

SAN LUCAS 19: mamTS

Highlight

Copy