SAN MATEO 17
17
Tej tcub meltzꞌaj tcyeꞌnc Jesús
(Mr. 9:2-13; Lc. 9:28-36)
1Eltzen wukak kꞌij, bix e xiꞌ tiiꞌn Jesús ja Pedro, tuya Jacobo, bixse Juan twiꞌ jun witz nim. Cyjunalxin e xiꞌkexin. 2Cywitz tzunxin tej tcub meltzꞌaj tcyeꞌnc Jesús. E koptzꞌaj twitz tisen tken kꞌij, bix tzinxsen ntxakakan t-xbalenxin. Otk tzꞌoc sak tilbil t-xbalen te junx maj. 3Bix tujx naj ul jlet Moisés tuya Elías cywitzxin, bix e yolenkexin tuya Jesús. 4Bix e xiꞌ tkbaꞌn Pedro te Jesús:
—Taat, ¡axsen tbanel etoꞌ tzalu! Ka baꞌn tuj twitza, cjaweltzen kbinchaꞌna oxe niꞌ pach, jun te tey, juntl te Moisés, bix juntl te Elías―tz̈i Pedro.
5Mitknaꞌx tbaj yolen Pedro tej tcub jun muj nkoptzꞌaj, bix e cyaj bajkexin tuj muj. Bix jeyꞌ, tuj muj etztzen jun yol. Tz̈i cyjulu:
—Jatzen xinj lu Ncwala n-oc takꞌ weya, bix nimxsen nchin tzalaja tiꞌj. Kꞌoꞌnc cycꞌuꞌja tiꞌ tyol―tz̈i Dios tuj muj.
6Tej cybinte t-xnakꞌatzxin ja yol lu, biꞌxsen e cub ttz̈i cyibaj, bix e cub mutzkꞌajkexin twitz txꞌotxꞌ. 7E tzajtzen lkꞌe Jesús cytxlaj, bix oc tmocoꞌnxin ejeeꞌxin, bix e xiꞌ tkbaꞌnxin:
—Chi weyꞌtzen, bix miꞌn tzaj ttz̈i cyiꞌja.
8Tejtzen toc cycyeꞌyenxin, ya min-altl ke xjal e cyilxin, nuk oꞌcx tjunal Jesús.
9Cyajcatztzen meltzꞌajkexin twiꞌ witz, bix e xiꞌ tkbaꞌn Jesús cyexin:
—Miꞌn txiꞌ cykbaꞌna te jun xjal ti jilel ma cyila, ojxe tjatz itzꞌj tuj cyamecy jxjal Smaꞌn tuꞌn Dios tuꞌn ntena cyxol xjal―tz̈ixin.
10Bix e xiꞌ cykanen t-xnakꞌatzxin texin:
—¿Tikentzenle nbyana cyuꞌn txꞌolbal ley ka il tiꞌj tzul meltzꞌaj jxin Elías twitz txꞌotxꞌ nejl twitzj xin Smaꞌn tuꞌn Dios?―tz̈i tzunkexin.
11Bix aj ttzakꞌbeꞌnxin cyexin:
—Jax cyuꞌn txꞌolbal ley nejl tzul meltzꞌajte Elías te nincꞌul xjal. 12Pero cxeꞌlxixse nkbaꞌna cyey, ya ma tzul Elías, pero min el cyniyꞌ xjal tiꞌjxin, bix juꞌ tzunj e cub cybyoꞌn jaxin. Bix juꞌ pjel weya. Qꞌuiyelx nim qꞌuixcꞌaj wuꞌna cyuꞌn xjal―tz̈ixin.
13Bix el cyniyꞌxin tiꞌj e yolenxin tiꞌj Juan Bautista.
Tej tel tiiꞌn Jesús biman tiꞌj junkꞌa cwal
(Mr. 9:14-29; Lc. 9:37-43)
14Tej tzunj cypon meltzꞌajkexin jaaꞌ eteꞌj ke nimal xjal, ul junxin xjal tuya Jesús bix e cub maje twitzxin. Bix e xiꞌ tkbaꞌn texin:
15—Taat, kꞌakꞌentz tcꞌuꞌja tiꞌj ncwala, cuma ntzaj tuj twiꞌkꞌa bix nim niyꞌx qꞌuixcꞌaj tuꞌnkꞌa. Nim maj nxiꞌ tzꞌak tuj kꞌakꞌ bix tuj aꞌ. 16Xiꞌ wiiꞌna cyuya t-xnakꞌatza, pero mix xkꞌanjakꞌa cyuꞌn―tz̈i tmankꞌa otk tzꞌoc biman tiꞌjkꞌa.
17Bix e xiꞌ tkbaꞌn Jesús:
—¿Mimpatzen-al xjal n-oc ke cycꞌuꞌj wiꞌja? ¿Cykilpakey min tzꞌel cyniꞌya tiꞌj? ¿Jaaꞌtzen taꞌ cyocslabla? ¿Jteꞌtltzen maj cxeꞌl nyeecꞌana wipemala tuꞌntzen toc ke cycꞌuꞌja wiꞌja? Cyiiꞌntzna wuyena―tz̈i Jesús.
18Bix oc cawenxin tiꞌ biman, bix ex biman tex hora, bix e kꞌanj neeꞌ.
19Yajcꞌatltzen tej cycyajxin cyjunalxxin, e xiꞌ cykanen t-xnakꞌatzxin texin:
—¿Tikentzen min xko xcyeya tuꞌn tel klojoꞌna biman?―tz̈ikexin.
20Bix aj ttzakꞌbeꞌnxin cyexin:
—Tuꞌnj yaaꞌn nimxix cyocslabla, mix s-etza biman cyuꞌna. Jaxxix cxeꞌl nkbaꞌna cyey, nuket tzꞌoc ke cycꞌuꞌja tiꞌ Dios, ikchetle juꞌ chꞌin cyocslabla tisen jun twitz mostaza, jacꞌatzen txiꞌ cykꞌumena tej witz lu tuꞌn tjaw kꞌukpaj tuꞌn t-xiꞌ maa chix, ctcuyate witz. Ka min ma baj cycꞌuꞌja, cykilca baꞌn tbint tuꞌn Dios cyey. 21Pero tej jun wik biman lu mlay tzꞌel ka mitkx nchi naꞌney Dios bix ka mitkx ncwaꞌ cypaꞌna weyaj―tz̈i Jesús.
Tej tyole Jesús tiꞌj tcyamecy
(Mr. 9:30-32; Lc. 9:43-45)
22Bix iyꞌkexin tuj departamento te Galilea, bix tej toc cychmon cyiibxin, e xiꞌ tkbaꞌn Jesús cye t-xnakꞌatzxin:
—Inayena, Jsmaꞌn tuꞌn Dios tuꞌn ntena cyuya xjal, chin xeꞌl kꞌoꞌna tuj cykꞌab xjal. 23Chin byetela cyuꞌn, bix chin jawetz itzꞌja te toxen kꞌij nbyetlenxitla―tz̈ixin. Bix nim e tzaj cybisxin tej cybintexin ja yol lu.
Jaj jun chojentj tuꞌn tajben tuj tja Dios
24Tejtzen cyponxin tuj Capernaum, ul kej xin chmol chojentj te nin tja Dios tuya Pedro, bix e xiꞌ cykanenxin texin:
—Yajtzen cyey Cyxnakꞌtzal, ¿miꞌmpale tzaj tkꞌoꞌnxin jchojbil tuꞌn tajben tuj tja Dios?―tz̈ikexin.
25E xiꞌ tkbaꞌn Pedro:
—Tzin tkꞌoꞌnxin.
Tejtzen tocx Pedro tuj jaaꞌ jaaꞌ e ten Jesús, e tzaj yolen Jesús nejl te Pedro:
—¿Ti toc tuꞌna, Pedro? Ke cawel at twitz txꞌotxꞌ, ¿te alej chojentj tzin cykanen? ¿Cyepale cycwalxin, bix ka cyej niyꞌtl xjal?―tz̈i Jesús.
26Aj ttzakꞌbeꞌn Pedro:
—Min. Nuk cye cyej niyꞌtl xjal n-el cykanen.
Bix e xiꞌ tkbaꞌn Jesús:
—Juꞌ tzunj, mintiiꞌ il tiꞌj tuꞌn t-xiꞌ tkꞌoꞌn Tcwal Cawel twitz txꞌotxꞌ alcabala. 27Pero kcyꞌi tuꞌn koc ten cyakwusalte ke chmol chojentj. Juꞌ tzunj, cutxa tey ttziiꞌ tnijabel aꞌ, bix xooꞌnx tuj aꞌ jun ganch te tzyul quis̈. Jtneel quis̈ ctzyetel tuꞌna, jkonwa ttzijil. Cneteltzen jun pwak tuj ttzijil tuꞌna. Kꞌintza, bix kꞌonxa cye chmol chojentj, tuꞌntzen tchjet chojentj te weya bix te tey―tz̈i Jesús te Pedro.
Currently Selected:
SAN MATEO 17: mamTS
Highlight
Share
Copy
Want to have your highlights saved across all your devices? Sign up or sign in
© 2000, Wycliffe Bible Translators, Inc. All rights reserved.
