SAN MATEO 3

Tej tkꞌumen Juan Bautista tyol Dios

(Mr. 1:1-8; Lc. 3:1-9, 15-17; Jn. 1:19-28)

1Mas yaj, ultzen junxin xjal Juan Bautista tbi tuj jun lugar tuj Judea jaaꞌ yaaꞌn nim xjal najl tuj. E tkꞌume Juan tyol Dios, bix tz̈i cyjulu:

2—Cykꞌoncja cyila bix chi meltzꞌaja tuya Dios, cuma tzul lkꞌe tcawbil Dios kxol―tz̈i Juan Bautista.

3Juꞌ e tyole Juan, cuma jaxin jxjal e yolen Isaías tiꞌj, jxin tyolel Dios te ootxa. E tkba Isaías cyjulu: “C-yolel jun tyolel Dios jaaꞌ yaaꞌn nim xjal najl tuj. Tz̈itzen tbel cyjulu: ‘Cybincham cyiiba twitz Taaw twitz txꞌotxꞌ. Cyjkom tbexin tuj cyanema,’ tz̈i tbel jxjal c-yolel,” tz̈i Isaías.

4Yaltzen te Juan, jatzen t-xbalen toc ttzmal camello, bix tzꞌuꞌn tqꞌuelbilxin toc. Yaltzen twaxin, cuchiꞌkejil, bix tcꞌaꞌxin taꞌl xiiꞌ e cnet tuꞌnxin tuj cꞌul.

5Bix e pon nim xjal te nin tnom Jerusalén tuya Juan, cyuyax xjal te niyꞌtl tnom tuj Judea, cyuyax jxjal najl ttziiꞌ nimaꞌ Jordán. 6Bix e bautizarj ke xjal tuꞌn Juan tuj nimaꞌ Jordán tej tjatz cykbaꞌn cyil.

7Pero tej tlonte Juan otk chi ul nim xjal tej cloj fariseo bix tej cloj saduceo, tuꞌntzen cybautizarj tuꞌnxin, e xiꞌ tkbaꞌnxin cye:

—Ke cyey cynaabla tisen lbaj. ¿Tikentzen cycyꞌiy tuꞌn tcyaj cykꞌoꞌna cyila? Cyaj cyey tuꞌn cybautizarja wuꞌna nuk tuꞌn miꞌn cub castiwa cyibaja tuꞌn Dios. 8Ka cycyꞌiy tuꞌn tcub castiwa tuꞌn Dios cyibaja, cybinchamtzen alcyej baꞌn, tuꞌntzen tchicꞌajax ka otk cyaj cykꞌoꞌna cyila bix ka otk chi meltzꞌaja tuya Dios. 9Bix miꞌn cub cyximana tuj cyanema: “Cuma tiyꞌjil Abraham koꞌya, mlay tzaj kcastiwiya tuꞌn Dios, cuma t-xjal Dios koꞌya,” tz̈i key. Pero yaaꞌn juꞌwa. Cxeꞌl nkbaꞌna cyey, ka ma chi oc xjal te t-xjal Dios nuk tuꞌnj tiyꞌjil Abrahamke, baꞌntzenle tbint tuꞌnxin tuꞌn cyoc ke xak te t-xjal Dios. 10Tzul castiwa cyibaj kej xjal yaaꞌn baꞌn twitz Dios. Cꞌoquel cycꞌuꞌja tiꞌj ja tumel lu. Taaw cab tken loꞌpj cꞌoquel tcyeꞌyen cyiꞌ cyken loꞌpj. Kej min cyakꞌ cywitz baꞌn, chi jawel txꞌomet ttzi txꞌotxꞌ, bix nuk te tuj kꞌakꞌ chi ajbela. 11Weya, nuk jun xjal kena tuꞌn cybautizarj xjal wuꞌna, ka cyaj xjal txiꞌ cyyeecꞌan ma tzꞌajtz tiꞌ cynaabl twitz Dios. Pero at jun xjal lepch wiꞌja jawnexxsen nwitza. Mintlpetiiꞌ woclena tuꞌn tel npjuꞌna takꞌel t-xaab. Ja tzunj xjal tzul, yaaꞌn nuk jun techel ctkꞌaꞌ tisen weya, sino ctzaal tkꞌoꞌnxin Espíritu Santo te cyej cyey ma cyaj cykꞌoꞌna cyila, bix ctzaal tkꞌoꞌnxin tuꞌn cyxiꞌy tuj kꞌakꞌ te cyej cyey min cyaj cykꞌoꞌna cyila bix min ma tzꞌajtz tiꞌ cynaabla. 12Jun awal triwa qꞌuelel tpaꞌn jtwitz triwa tuya t-xcꞌomel. Jtwitz triwa cꞌoquex tuj txꞌutxꞌ, pero tzunj t-xcꞌomel cꞌoquex tuj jkꞌakꞌ mlay yubtzꞌaj. Juꞌtzen ctemel pjel tpaꞌn jxjal tzul kej xjal at tuꞌn cyclet cyuyaj xjal at tuꞌn cyxiꞌ tuj kꞌakꞌ―tz̈i Juan cye aj fariseo bix cye aj saduceo.

Tej tbautizarj Jesús

(Mr. 1:9-11; Lc. 3:21-22)

13Etztzen Jesús tuj departamento te Galilea, bix ulxin tuya Juan ttziiꞌ nimaꞌ Jordán, tuꞌntzen tbautizarjxin tuꞌn Juan. 14Pero tuj twitz Juan, yaaꞌn tumel tuꞌn tbautizarj Jesús tuꞌnxin. E xiꞌ tkbaꞌnxin te Jesús:

—Il tiꞌj tuꞌn nbautizarja tuꞌna, yaaꞌn tuꞌn tbautizarja wuꞌna―tz̈ixin.

15Pero e xiꞌ tkbaꞌn Jesús texin:

—Jax tuꞌna, pero jaꞌlewe waja tuꞌn tbint jwajbila tuꞌna, tuꞌntzen tbint jma tkba Dios―tz̈i Jesús.

Bix e tcuya Juan.

16Tejtzen tbautizarj Jesús tuꞌn Juan, e jatz Jesús tuj nimaꞌ, bix e jket cyaꞌj, bix e tilxin tcuꞌtz Espíritu Santo tisen junjil cucuꞌ, bix e cub licyꞌpajjil tuj twiꞌ Jesús. 17Bix e tzaj jun yol tuj cyaꞌj. E tkba cyjulu:

—Ja tzunj xjal lu Ncwala n-oc takꞌ weya. Nchin tzalaja tiꞌj―tz̈i Dios.

Currently Selected:

SAN MATEO 3: mamTS

Highlight

Copy