मति 20
20
अंङगुरक बारिमा काम करलहरानिक दृस्टान्त
1येसुजि मन्सावानिके सिखोइखुनि यसके कहलसि, “स्वरगक राज एगुडा जागाक मालिक नहिँया हखइ, जुने यापन अंङगुरवाक बरियामा काम करावेके तहिँया काम करलाहर मन्से खोजे बिहनहिँ निकडलिय। 2उअ मलिकवा काम करलहरानिसाङे एक दिनक बनिहारि देबहिँ कहके सहमति करके हुनुकाके यापन अंङगुरवाक बरियामा काम करे पठोलिय। 3नउ बजेवरि जब उअ बाहरा निकडलिय, कतेक जन मन्सेके बजरवामा वसहिँ ठडियाइल देखलिय। 4तब उअ हुनुकाके कहलिय, ‘तोहरा फेनि मोर अंङगुरवाक बरियामा काम करे जाह हसे मुइ तोहराके पावे परना बनिहारि देबहिँ।’ 5उहेसे हुनुका काममा गेलइ। उअ मन्सावा फेरि बारह बजेवरि हसे तिन बजेवरि बाहरा निकडके जाके याको मन्सावानिके फेनि काममा लगोलिय। 6वसने, पाँच बजेवरि फेरि उअ मन्सावा बाहरा यवइकि, याको मन्सावानिके फेनि वसहि ठडियाइल देखलिय। तब उअ हुनुकाके कहलिय, ‘तोहरा केहके वसहि दिन भर ठडियाइल बडह?’ 7हुनुका वकरेके कहलइ, ‘कुनहुँ फेनि हमराके बनिहारिमा हइने लगोइ बडइ।’ उअ हुनुकाके कहलिय, ‘तोहरा फेनि जाके मोर अंङगुरवाक बरियामा काम करह न त।’
8 “जब साँझ भेलइ, तब जगहवाक मलिकवा यापन काम करलहरानिक सिरदरवाके बलाके कहलिय, ‘काम करलहरानिके बलाके सबसे पाछा यलहरवासे लेके पहिला यलहरवानिके बनिहारि देहि।’ #
लेवि १९:१३; व्यवस्था २४:१५ 9जब पाँच बजे काममा लगलि काम करलाहराह यलइ, हुनुका जम्मे जन एक दिनक बनिहारि पउलइ। 10वकरपाछा, जब सबसे पहिला कमवामा यलहरवा यलइ, तब हुनुका बहुत बनिहारि पउबहुँ कहके विचार करलइ। बाकि हुनुका जम्मे जन फेनि एक दिनक बनिहारि मतरे पउलइ। 11हुनुका बनिहारि पउलेपर जगहवाक मलिकवाक विरोध करते 12यसके कहलइ, ‘इअ पाछासे यलहरवाह एक घन्टा मतरे काम करलइ हसे हमरा दिन भर घाममा मर-मरके काम करलहुँ। बाकि यपनहुँ हुनुकाके हमार बराबर दिनभरक बनिहारि देलहुँ।’ 13बाकि मलिकवा हुनुकरमधेसे एक जनके जवाफ देके यसके कहलिय, ‘सङहाति, मुइ यपनहुँके अन्याय हइने बडहिँ। कथि यपनहुँ मोरसाङे एक दिनक बनिहारिमा काम करबहि कहके राजि हइने रहलहुँ त? 14यपनहुँ यापन पउलि बनिहारि लेके जाहुँ। इअ पाछासे यलहरवानिके फेनि मुइ यपनहुँक बराबर बनिहारि देवे खोजइ बडहिँ। 15कथि मुइ यापन मन लगलि मन्सावानिके यपने पइसावा देवेके अधिकार मोर हइने बडइ? हसे मुइ दानि भेलेसे यपनहुँ केहके डाहे मरइ बडहुँ’?”
16येसुजि याखिरमा यसके कहलसि, “उहेसे यखनि पहिला भेलहरवा बहुत जन पाछा हतइ हसे यखनि पाछा हखलहरा पहिला हतइ।”#मति १९:३०; मरकुस १०:३१; लुका १३:३०
येसुजि यापन मृत्युक बारेमा फेरि कहलसि
(मरकुस १०:३२-३४; लुका १८:३१-३४)
17जब येसुजि यरुसलेमवरि जाइरहलसि, हुने यापन बारह जन चेलवानिके एकोरियाहे बलाके कहलसि, 18“हेरह, हमरा यरुसलेम जाइबडहुँ। याबे मुइ मन्सेक पुतर मुख्य पुजेरियानि हसे व्यवस्थाक-गुरुसभक हथवामा सपेबहिँ। हुनुका मोरके मृत्यु दन्डक दोसि ठहरोतइ। 19मोरके अयहुदियानिक हथवामा सपदेतइ। हुनुका मोर खिल्लि उडोतइ, मोरके कोडा लगोतइ हसे क्रुसवामा टाङदेतइ। बाकि तिसरि दिनवामा मुइ मरलिसे फेरि जिइ उठबहिँ।”
एगुडा दाओक बिन्ति
(मरकुस १०:३५-४५; लुका २२:२४-२७)
20वकरपाछा जब्दियाक बेटवाक दाओ, यापन बेटवाह, याकुब हसे युहन्नासाङे येसुजि लघिना यलिय। हुनुकर दाओ येसुजिक यागा ठेहुँनाके बिन्ति करलिय। 21येसुजि वकरेके पुछलसि, “मुइ तोर तहिँया कथि करदेउ कहके तुइ बिन्ति करलहिँ?” तब उअ येसुजिके कहलिय, “यपनहुँक राजमा मोर इअ दु जन बेटवामधे एगुडाके यपनहुँक दहिनिकलहरावा हसे दोसरिके यपनहुँक लबडिकलहरवा बइठे देहुँ।” 22बाकि येसुजि कहलसि, “तोहरा कथि मङइ बडह कहके तोहरा हइने जनसह। जुन कस्टक कचोरवा मुइ पिय जाइ बडहिँ, कथि तोहरा उअ पिय सकबह?” हुनुका कहलइ, “हमरा सकबहुँ।” 23तब येसुजि हुनुकाके कहलसि, “मोर कचोरवासे तोहरा पिय सकबह, बाकि मोर दहिने हसे लबडिकलहरवा बइठे देवेके अधिकार मोर हइने बडइ। इअ ठउरियाह हुनुकर तहिँया हखइ, जाकर तहिँया मोर पिता तयार पारले बडसि।”
24इअ सुनके, याको दस जन चेलवाह उअ दु जनसाङे खिसियलइ। 25बाकि येसुजि हुनुका जम्मे जनके बलाके कहलसि, “तोहार थाह बडइ कि, अयहुदि मन्सावानिक सासकसभ यापन परजावानिक वपरा मनपरि सासन चलोसइ हसे हुनुकर बडकि हकिमवाह हुनुकर तरक मन्सावानि वपरा यापन अधिकार जमोसइ। 26बाकि तोहार बिचा यसनुक झिन हखइ। तोहारमधे जुने महान हखे खोजबह, उअ तोहार याको जनक सेवक हखे परतइ,#लुका २२:२५-२६ 27हसे जुने तोहारमधे सबसे पहिला हखे खोजतइ, उअ तोहार याको जनक दास हखे परतइ।#मति २३:११; लुका २२:२६ 28वसने मुइ मन्सेक पुतर सेवा पावेके हइने, बरु सेवा करेके तहिँया हसे बहुत जनके छुटकारा देवेके तहिँया यपने प्रान देवे याइल हखहि।”
येसुजि दु जन यान्हर मन्सेके डउल बनोलसि
(मरकुस १०:४६-५२; लुका १८:३५-४३)
29जब येसुजि हसे हुनेक चेलवाह यरिहो सहरवासे जाइ रहलइ, तब एगुडा जबड मन्सेक भिड हुनेक पाछा लगलइ। 30तब पइडवाक तिरवामा दु जन यान्हर मन्से बइठल रहलइ। येसुजि उहे पइडवामाहे जाइबडसि कहके सुनके हुनुका यसके कहते चिलेलइ, “हे प्रभु, दाउदक पुतर, यपनहुँ हमराके दाया करहुँ!” 31तब भिडवाक मन्सावाह हुनुकाके चुप लाग कहके डटलइ, बाकि हुनुका झन चिल्लाके कहलइ, “हे दाउदक पुतर, हमराके दाया करहुँ!” 32तब येसुजि ठप्पे ठडियलसि हसे हुनुकाके बलाके कहलसि, “मुइ तोहार तहिँया कथि करदेहि कहके तोहरा चाहइ बडह?” 33हुनुका येसुजिके कहलइ, “हे प्रभु, हमार यखिया खोल देहुँ।” 34हुनुकाके देखके येसुजिक दाया लगलइ हसे हुनुकर यखिया छुदेलसि। वइघरहिँ हुनुका देखाह भेलइ हसे हुनेक पाछा लगलइ।
Currently Selected:
मति 20: CTHR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
मति 20
20
अंङगुरक बारिमा काम करलहरानिक दृस्टान्त
1येसुजि मन्सावानिके सिखोइखुनि यसके कहलसि, “स्वरगक राज एगुडा जागाक मालिक नहिँया हखइ, जुने यापन अंङगुरवाक बरियामा काम करावेके तहिँया काम करलाहर मन्से खोजे बिहनहिँ निकडलिय। 2उअ मलिकवा काम करलहरानिसाङे एक दिनक बनिहारि देबहिँ कहके सहमति करके हुनुकाके यापन अंङगुरवाक बरियामा काम करे पठोलिय। 3नउ बजेवरि जब उअ बाहरा निकडलिय, कतेक जन मन्सेके बजरवामा वसहिँ ठडियाइल देखलिय। 4तब उअ हुनुकाके कहलिय, ‘तोहरा फेनि मोर अंङगुरवाक बरियामा काम करे जाह हसे मुइ तोहराके पावे परना बनिहारि देबहिँ।’ 5उहेसे हुनुका काममा गेलइ। उअ मन्सावा फेरि बारह बजेवरि हसे तिन बजेवरि बाहरा निकडके जाके याको मन्सावानिके फेनि काममा लगोलिय। 6वसने, पाँच बजेवरि फेरि उअ मन्सावा बाहरा यवइकि, याको मन्सावानिके फेनि वसहि ठडियाइल देखलिय। तब उअ हुनुकाके कहलिय, ‘तोहरा केहके वसहि दिन भर ठडियाइल बडह?’ 7हुनुका वकरेके कहलइ, ‘कुनहुँ फेनि हमराके बनिहारिमा हइने लगोइ बडइ।’ उअ हुनुकाके कहलिय, ‘तोहरा फेनि जाके मोर अंङगुरवाक बरियामा काम करह न त।’
8 “जब साँझ भेलइ, तब जगहवाक मलिकवा यापन काम करलहरानिक सिरदरवाके बलाके कहलिय, ‘काम करलहरानिके बलाके सबसे पाछा यलहरवासे लेके पहिला यलहरवानिके बनिहारि देहि।’ #
लेवि १९:१३; व्यवस्था २४:१५ 9जब पाँच बजे काममा लगलि काम करलाहराह यलइ, हुनुका जम्मे जन एक दिनक बनिहारि पउलइ। 10वकरपाछा, जब सबसे पहिला कमवामा यलहरवा यलइ, तब हुनुका बहुत बनिहारि पउबहुँ कहके विचार करलइ। बाकि हुनुका जम्मे जन फेनि एक दिनक बनिहारि मतरे पउलइ। 11हुनुका बनिहारि पउलेपर जगहवाक मलिकवाक विरोध करते 12यसके कहलइ, ‘इअ पाछासे यलहरवाह एक घन्टा मतरे काम करलइ हसे हमरा दिन भर घाममा मर-मरके काम करलहुँ। बाकि यपनहुँ हुनुकाके हमार बराबर दिनभरक बनिहारि देलहुँ।’ 13बाकि मलिकवा हुनुकरमधेसे एक जनके जवाफ देके यसके कहलिय, ‘सङहाति, मुइ यपनहुँके अन्याय हइने बडहिँ। कथि यपनहुँ मोरसाङे एक दिनक बनिहारिमा काम करबहि कहके राजि हइने रहलहुँ त? 14यपनहुँ यापन पउलि बनिहारि लेके जाहुँ। इअ पाछासे यलहरवानिके फेनि मुइ यपनहुँक बराबर बनिहारि देवे खोजइ बडहिँ। 15कथि मुइ यापन मन लगलि मन्सावानिके यपने पइसावा देवेके अधिकार मोर हइने बडइ? हसे मुइ दानि भेलेसे यपनहुँ केहके डाहे मरइ बडहुँ’?”
16येसुजि याखिरमा यसके कहलसि, “उहेसे यखनि पहिला भेलहरवा बहुत जन पाछा हतइ हसे यखनि पाछा हखलहरा पहिला हतइ।”#मति १९:३०; मरकुस १०:३१; लुका १३:३०
येसुजि यापन मृत्युक बारेमा फेरि कहलसि
(मरकुस १०:३२-३४; लुका १८:३१-३४)
17जब येसुजि यरुसलेमवरि जाइरहलसि, हुने यापन बारह जन चेलवानिके एकोरियाहे बलाके कहलसि, 18“हेरह, हमरा यरुसलेम जाइबडहुँ। याबे मुइ मन्सेक पुतर मुख्य पुजेरियानि हसे व्यवस्थाक-गुरुसभक हथवामा सपेबहिँ। हुनुका मोरके मृत्यु दन्डक दोसि ठहरोतइ। 19मोरके अयहुदियानिक हथवामा सपदेतइ। हुनुका मोर खिल्लि उडोतइ, मोरके कोडा लगोतइ हसे क्रुसवामा टाङदेतइ। बाकि तिसरि दिनवामा मुइ मरलिसे फेरि जिइ उठबहिँ।”
एगुडा दाओक बिन्ति
(मरकुस १०:३५-४५; लुका २२:२४-२७)
20वकरपाछा जब्दियाक बेटवाक दाओ, यापन बेटवाह, याकुब हसे युहन्नासाङे येसुजि लघिना यलिय। हुनुकर दाओ येसुजिक यागा ठेहुँनाके बिन्ति करलिय। 21येसुजि वकरेके पुछलसि, “मुइ तोर तहिँया कथि करदेउ कहके तुइ बिन्ति करलहिँ?” तब उअ येसुजिके कहलिय, “यपनहुँक राजमा मोर इअ दु जन बेटवामधे एगुडाके यपनहुँक दहिनिकलहरावा हसे दोसरिके यपनहुँक लबडिकलहरवा बइठे देहुँ।” 22बाकि येसुजि कहलसि, “तोहरा कथि मङइ बडह कहके तोहरा हइने जनसह। जुन कस्टक कचोरवा मुइ पिय जाइ बडहिँ, कथि तोहरा उअ पिय सकबह?” हुनुका कहलइ, “हमरा सकबहुँ।” 23तब येसुजि हुनुकाके कहलसि, “मोर कचोरवासे तोहरा पिय सकबह, बाकि मोर दहिने हसे लबडिकलहरवा बइठे देवेके अधिकार मोर हइने बडइ। इअ ठउरियाह हुनुकर तहिँया हखइ, जाकर तहिँया मोर पिता तयार पारले बडसि।”
24इअ सुनके, याको दस जन चेलवाह उअ दु जनसाङे खिसियलइ। 25बाकि येसुजि हुनुका जम्मे जनके बलाके कहलसि, “तोहार थाह बडइ कि, अयहुदि मन्सावानिक सासकसभ यापन परजावानिक वपरा मनपरि सासन चलोसइ हसे हुनुकर बडकि हकिमवाह हुनुकर तरक मन्सावानि वपरा यापन अधिकार जमोसइ। 26बाकि तोहार बिचा यसनुक झिन हखइ। तोहारमधे जुने महान हखे खोजबह, उअ तोहार याको जनक सेवक हखे परतइ,#लुका २२:२५-२६ 27हसे जुने तोहारमधे सबसे पहिला हखे खोजतइ, उअ तोहार याको जनक दास हखे परतइ।#मति २३:११; लुका २२:२६ 28वसने मुइ मन्सेक पुतर सेवा पावेके हइने, बरु सेवा करेके तहिँया हसे बहुत जनके छुटकारा देवेके तहिँया यपने प्रान देवे याइल हखहि।”
येसुजि दु जन यान्हर मन्सेके डउल बनोलसि
(मरकुस १०:४६-५२; लुका १८:३५-४३)
29जब येसुजि हसे हुनेक चेलवाह यरिहो सहरवासे जाइ रहलइ, तब एगुडा जबड मन्सेक भिड हुनेक पाछा लगलइ। 30तब पइडवाक तिरवामा दु जन यान्हर मन्से बइठल रहलइ। येसुजि उहे पइडवामाहे जाइबडसि कहके सुनके हुनुका यसके कहते चिलेलइ, “हे प्रभु, दाउदक पुतर, यपनहुँ हमराके दाया करहुँ!” 31तब भिडवाक मन्सावाह हुनुकाके चुप लाग कहके डटलइ, बाकि हुनुका झन चिल्लाके कहलइ, “हे दाउदक पुतर, हमराके दाया करहुँ!” 32तब येसुजि ठप्पे ठडियलसि हसे हुनुकाके बलाके कहलसि, “मुइ तोहार तहिँया कथि करदेहि कहके तोहरा चाहइ बडह?” 33हुनुका येसुजिके कहलइ, “हे प्रभु, हमार यखिया खोल देहुँ।” 34हुनुकाके देखके येसुजिक दाया लगलइ हसे हुनुकर यखिया छुदेलसि। वइघरहिँ हुनुका देखाह भेलइ हसे हुनेक पाछा लगलइ।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society