युहान्ना 10
10
येसु नुना गोठाला
1येसुङा लुचि, “जेप्पा का न्निङ्दा लुमेॽनेनिन, इसा सामुङ्चिगा गोठ्का वालाम्बुङ्भाङ् ङ्ङुमेन, ङ्खाॽनिङ्गो हेकोना ठोङ्भाङ् उमे न्ना च्हेन खुन्चाखुबा नुङ् नाम्चाखुबा ओम॥ 2ङ्खाॽनिङ्गो वालाम्बुङ्भाङ् उखुबा च्हेन सामुङ्चिगा गोठाला ओम॥ 3गोठ् कुखुबाङा उका लागि वालाम्बुङ् होसुबिवा, न्हाङ् गोठालाङा उका सामुङ्चि उङ्चि निङ् लासाङ्-लासाङ् कावाचिनिङ् ङ्खाचिङा उका ओसेम्ला ङ्खेप्स्वा, न्हाङा उङा सामुङ्चि पाखा लोन्धेत्वाचि॥ 4उङा उका घाक सामुङ्चि लोन्दिॽवाचिहोङ् उङ् ओन्दाङ्-ओन्दाङ् लाम्मे, न्हाङा सामुङ्चिङा ओहेक्साङ्-ओहेक्साङ् ङ्ङिक्त्वा, इजाङ्बाङ्निङ् ङ्खाचिङा उका ओसेम्ला चिनान्जोग्वा॥ 5ङ्खाचि चिना न्जोगुनिन्ना याॽमिगा हेक्साङ् लान्जोङ्मेनिन, ङ्खाॽनिङ्गो न्नाभाङ् न्लुङ्खेमे, इजाङ्बाङ्निङ् ङ्खाचिङा न्ना सेम्ला चिनान्जोग्वानिन॥”
6येसुङा खा चेॽया ताप्चेॽयाभाङ् लुचि, ङ्खाॽनिङ्गो उङा लुचिहा चेॽया ङ्खाचिङा ङ्ङासुनिन॥
जेप्पागा वालाम्बुङ्
7ङ्खोङ्माङ् येसुङा फेरि लुचि, “जेप्पा का न्निङ्दा लुमेॽनेनिन, सामुङ्चि गोठ्पे उमाना वालाम्बुङ् कामाङ् ओम्ङान॥ 8का हाक्निङ् ओन्दाङ् ताखुबाचि घाक खुसुबाङ्, नाम्चाखुबा न्साया, ङ्खाॽनिङ्गो सामुङ्चिङा उङ्चिगा चेॽया ङ्खेप्सुनिन॥ 9गोठ्पे उमाना वालाम्बुङ् कामाङ् ओम्ङान, इसा काभाङ् उमे न्ना हिङ्मे॥ न्ना गोठ्पे उसाङ् पाखा लोन्साङ् चोक्मा यामे, न्हाङा न्नाङा उचुन्ना खार्काबे चाराचोक्मा तोक्त्वाना॥ 10खुसुबाङ् गो खुन्चासे, सिसे नुङ् नास चोक्से से तामे, ङ्खाॽनिङ्गो का च्हेन ङ्खाचिङा हिङ्लुङ् न्दोक्तुनि, न्ना चा प्याक न्दोक्तुनिभोङ् तायाङ्ना ओम॥
येसु नुना गोठाला
11 “नुना गोठाला कामाङ् ओम्ङान॥ नुना गोठाला च्हेन उका सामुङ्चिगा लागि सिमा चा त्यार लेङ्मेॽना॥ 12ङ्खाॽनिङ्गो सामुङ्चि सोसे युक्साना गोठालाङा च्हेन ब्वासो निस्वानिङ् सामुङ्चि नाॽवाचिहोङ् लुङ्खेमे, इजाङ्बाङ्निङ् सामुङ्चि उका मेनिन॥ न्हाङ् ब्वासोङा सामुङ्चि छोपाचोग्वाचिहोङ् घाक हिन्दाहाक्स्वाचि॥ 13न्ना लुङ्खेमे, इजाङ्बाङ्निङ् न्ना गो सामुङ्चि सोॽमागा जेलाबे युक्साना से ओम॥ न्हाङा न्नाङा सामुङ्चि न्स्वान्चिन॥
14 “नुना गोठाला काङान, का आका सामुङ्चि चिनाचोग्वाङ्चिङ्, न्हाङ् उङ्चिङा का चिनाचोङ्मेहा॥ 15का आप्पाङा चिनाचोङ्मेङ्ना लोॽवा का चा आप्पा चिनाचोग्वाङ्, न्हाङ् आका सामुङ्चिगा लागि का आका हिङ्लुङ् बोलि पिवाङ्ना॥#मात्ति ११:२७; लुका १०:२२ 16आका हेकोहाचा सामुङ्चि ङ्वान्ने, ङ्खाचि ना गोठ्पेॽहा मेनिन्हा॥ ङ्खाचि चा का ताॽमा पोर्नेङान॥ ङ्खाचिङा चा आका आसेम्ला ङ्खेप्स्वा, न्हाङा आका घाक सामुङ्चि न्नाबे एको बागाल न्लेङ्मे न्हाङ् ङ्खाचिगा गोठाला चा एको लेङ्मेॽना॥
17 “आप्पाङा का उलुङ्मा तुङ्मेङ्, इजाङ्बाङ्निङ् का आका हिङ्लुङ् फेरि लियाचोक्माना हिसापङा आर्पान चोग्वाङ्॥ 18इसाङा चा काभाङ् आका हिङ्लुङ् लियाचोक्मा ङ्यास्वानिन्ना, ङ्खाॽनिङ्गो का आनिङ्वाङा आर्पान चोग्वाङ्ना॥ आका हिङ्लुङ् आर्पान चोक्माना नुङ् फेरि लियाचोक्माना चोक्तोक कानुङ् वेॽना॥ आप्पाङा का पियाङ्ना आग्गे चा नामाङ् ओम॥”
19खा चेॽया ङ्खेप्सुहोङ् फेरि चा याहुदि हाङ्गुम्बाचिबे निङ्वा न्दोङान॥ 20प्याकङा ङ्गाया, “ना इसिॽना मुइङा याक्सुक्सु, न्हाङ् बाउला चोगामाना॥ न्निङ्दा इजाङ् न्नागा ओचेॽया खेप्स्वाम्घा?”
21ङ्खाॽनिङ्गो हेकोहा इखिङ्ङा ङ्गाया, “इसिॽना मुइङा याक्सुक्सुना याॽमिङा खाॽलाहा चेॽया न्जेक्त्वान्हा! इना इसिॽना मुइङा याक्सुना याॽमिङा चा मिक्सुरुम्बागा उमिक नुमेॽमा यास्वानायि?”
याहुदि हाङ्गुम्बाचिङा येसु उङ्चि साप न्थाक्तुनिन्ना
22हाकु यारुसालेमबे एको होक्नामगा बेला तायामासा, न्ना होक्नाम निङ्वाफुमापाङ् आर्पानगा होक्नाम#१०:२२ ना च्हेन येसु सिमा हाक्निङ् ओन्दाङ् लागभाग १८६ फिम्बिलिङ् ओन्दाङ् याहुदिचिङा निङ्वाफुमापाङ् पाबित्तारा न्जोगुना उत्साब्बे ता लेन सोम्मा मानाचोक्माना होक्नाम साया॥ साया॥ ङ्खिङ्बेला चुङ्नाम साया॥ 23येसु निङ्वाफुमापाङ्गा सोलोमान बाङ्ना दालानबे कोॽमास्यानिङ् 24याहुदि हाङ्गुम्बाचि उका इघुरुम न्छुप्साहोङ् खाॽला न्छिम्दु, “हेॽनिङ् सोम्मा न्दा कानिङ् आल्माले चोङ्मेकाहा? कानिङ् लुया, इना न्दा जेप्पामाङ् खिरिस्ट ओम्गान?”
25येसुङा लुचि, “का खेम्माङ् लुॽनिनुङ्नेनिन्हा, ङ्खाॽनिङ्गो न्निङ्दा बिस्वास न्जोङ्मेकान॥ का आप्पागा चोक्तोक तोक्तुङ्होङ् चोगुङ्हा आच्चाम्माहा कामङामाङ् का इसाङान बाङ्ना चेॽयागा गाबाहि पिइवाघा॥ 26ङ्खाॽनिङ्गो न्निङ्दा का बिस्वास न्जोङ्मेकान, इजाङ्बाङ्निङ् न्निङ्दा आका सामुङ्चि मेतिसिगान॥ 27आका सामुङ्चिङा आका आसेम्ला ङ्खेप्स्वा, न्हाङा ङ्खाचि का चिनाचोग्वाङ्चिङ्, न्हाङ् ङ्खाचिङा का आहेक्साङ्-आहेक्साङ् इङ्मे॥ 28का ङ्खाचि हेॽनिङ्चा मेन्सिमाना हिङ्लुङ् पिवाङ्चिङ्, न्हाङा ङ्खाचि हेॽनिङ्चा नास न्लेङ्मेनिन्हा॥ ङ्खाचि इसाङा चा आमुकपाहाङ् नाम्खेॽमा ङ्यामेन्हा॥ 29ङ्खाचि आप्पाङा का जिम्मा पियामाङ्, उङ् घाक हाक्निङ् साक्तिसालिना॥ आप्पागा उमुकपाहाङ् गो झान इसाङा चा नाम्खेॽमा ङ्यास्वान्चिनिन्हा॥ 30आप्पा नुङ् का एकोचिङान॥”
31खा चेॽया ङ्खेप्सुहोङ् फेरि याहुदि हाङ्गुम्बाचिङा येसु लेम्सिॽमागा लुङ्खाक ङ्गोबु॥ 32ङ्खाॽनिङ्गो येसुङा ङ्खाचि लुचि, “आप्पाङा चोक्मेताङ्हा प्याक उचुन्हा काम का न्निङ्युम्बे चोगुङ्, ङ्खा माध्येबे हेखा कामगा लागि का लुङ्खाकङा लेप्मा योङ्मेकाहा?”
33याहुदि हाङ्गुम्बाचिङा न्लु, “न्दा चोगुघा उचुन्हा कामगा लागि कानिङ् लुङ्खाकङा लेप्मा योक्नेनिन्हा मेन्ना, ङ्खाॽनिङ्गो न्दा निङ्वाफुमागा निन्दा चोगुगा, ङ्खागा लागि च्हेन लेप्मा योक्नेनिन्ना ओम॥ न्दा गो याॽमिगान, ङ्खाॽनिङ्गो न्दा आफाइ निङ्वाफुमा लेङ्मा योङ्मेका॥”#लेबि २४:१६
34येसुङा ङ्खाचि लुचि, “इना न्निङ्गा धार्मासाप्लाबे, ‘का लुॽनेनिन, न्निङ्दा माङ्चि#१०:३४ देउता सिगान’#छेम ८२:६ भोङ् न्छेप्तामान्हायि? 35निङ्वाफुमा नाबे इसानुङ् चेक्तामासा, ङ्खाचि उङा माङ्चि सिगान लुचि॥ धार्मासाप्लाबे मेन्हा चेॽया न्छेप्तामान्हा॥ 36आप्पाङा पाबित्तारा चोगाङ्होङ् कायुङ्लेनबे पाक्साङ्ना याॽमिङा ‘का निङ्वाफुमागा उच्याङान’ कायाङ्निङ् इमिन निङ्वाफुमागा निन्दा लेक्साना? 37का आप्पागा काम न्जोगुक्सुङान्हाभोङ् का बिस्वास न्जोगान॥ 38ङ्खाॽनिङ्गो का आप्पागा काम चोग्वाङ् ङ्खोङ्चा न्निङ्दा का बिस्वास न्जोङ्मेकान्हाभोङ् खा कामबे बिस्वास चोगानुम॥ न्हाङा आप्पा काबे नुङ् का उङ्बे वेॽङाना चेॽया था तोक्त्वाम्गा न्हाङ् आस्वाम्घा॥” 39खा चेॽया ङ्खेप्सुहोङ् ङ्खाचिङा उङ् फेरि लाप्मागा न्जोगु, ङ्खाॽनिङ्गो उम्का चोगाख्या॥
40न्हाङ् येसु फेरि यार्दान होङ्मागा योप्पारिक ओन्दाङ् युहान्नाङा बाप्तिस्मा पिचिना ठोङ्बे ख्या, न्हाङ् न्नाबे वाया॥#युहान्ना १:२८ 41प्याक याॽमिचि उङ् वायानाबे न्दाया, न्हाङ् उङ्चि-उङ्चि खाॽला ङ्गाया, “युहान्नाङा गो इहाचा आच्चाम्माहा चिङ्गो न्जोगुन, ङ्खाॽनिङ्गो उङा येसुगा उतुम्बे कायाहा घाक चेॽया जेप्पा राइछो॥” 42न्हाङा न्नाबे ङ्वायाहा प्याक याॽमिचिङा येसुबे बिस्वास न्जोगु॥
Currently Selected:
युहान्ना 10: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
