युहान्ना 8
8
ब्याभिचार चोक्खुमा मामु
1ङ्खाॽनिङ्गो येसु जाइतुन कोङ्गुबे ख्या॥
2हेक्साङ्ना लेन भेनिक येसु निङ्वाफुमापाङ्बे ख्या, न्हाङा घाक याॽमिचि उङ् वायानाबे न्दाया॥ न्हाङ् उङ् युङाहोङ् ङ्खाचि चिन्मा तारोक्तुचि॥
3उङा चिन्मास्यानिङ्, धार्मासाप्ला चिन्खुबाचि नुङ् फारिसिचिङा एको मामु न्दाहोङ् घाक्का ओन्दाङ् ङ्येप्मेतु॥ न्ना मामु ब्याभिचार चोक्मास्यानिङ् न्दुप्सिसिक्सा॥ 4न्हाङा ङ्खाचिङा येसु न्छिम्दु, “चिन्खुबा, ना मामु ब्याभिचार चोक्मास्याहोङ् लाबुराक्सुम्ङाना॥ 5एङ्गा ब्यावास्थाबे मोसाङा खाॽलाहाचि लुङ्खाकङा लेम्सिॽमाना आग्गे पियामा, न्दा च्हेन इ कामेकाना?”#लेबि २०:१०; ब्यावास्था २२:२२-२४
6ङ्खाचिङा येसु फासाचोक्मागा ना छिम्योक न्छिम्दुक्सा॥ येसु उकुरिक उगाहोङ् उमुक खेॽवाङा खामबे छेप्तु॥ 7ङ्खाॽनिङ्गो ङ्खाचिङा येसु न्छिम्दुना-न्छिम्दुना न्जोगुनाङा उङ् पोगाहोङ् खाॽला लुचि, “न्निङ्दाबे इसाङा हेॽनिङ्चा पाप न्जोगुक्सुन, न्नाङामाङ् घाक हाक्निङ् ओन्दाङ् ना मामु लुङ्खाकङा लेप्तुनि॥” 8न्हाङा येसुङा फेरि उकुरिक उगाहोङ् खामबे छेप्तु॥ 9खा चेॽया ङ्खेप्सुहोङ् ङ्खाचि घाक एको-एको चोक्साङ् न्नाभाङ् न्लामाख्या॥ ओन्दाङ् माम्माहा याॽमिचि ङ्ख्या॥ आखेरिबे न्नाबे येसु से ओतोखुमाक लेक्सा, न्हाङ् न्ना ब्याभिचार चोक्खुमा मामु च्हेन उका उयुम्बे येबामासा॥ 10येसु पोगाहोङ् न्ना मामु खाॽला लु, “ओ मामु, ङ्खाचि हेॽने ङ्ख्याहा? इना न्दा इसाङा चा दान्डा म्बियागानिन्ना?”
11न्ना मामुङा पोलोवा पि, “चिन्खुबा, इसाङा चा म्बियान्हा॥”
येसुङा लु, “का चा न्दा दान्डा म्बिमेॽनेन्ना॥ ख्या, हाकु नाहाङ्तो फेरि पाप न्जोगुन॥”
येसु कायुङ्लेनगा जोति
12येसुङा फेरि ङ्खाचि खाॽला लुचि, “का कायुङ्लेनगा जोतिङान॥ आका हेक्साङ् लाचोक्खुबा हेॽनिङ्चा कुइम्नाबे लाम्मा पोरान्जोङ्मेन्ना, इजाङ्बाङ्निङ् न्नाङा हिङ्लुङ्गा जोति तोक्त्वाना॥”#मात्ति ५:१४; युहान्ना ९:५
13खा चेॽया ङ्खेप्सुहोङ् फारिसिचिङा येसु न्लु, “न्दा साधाइ ङ्गा उतुम्बे से चेङ्मेका, न्हाङामाङ् न्दा चेक्तुघा चेॽया जेप्पाहा मेनाहा॥”#युहान्ना ५:३१
14येसुङा ङ्खाचि लुचि, “का आका उतुम्बे चेक्त्वाङ्, ङ्खोङ्चा आका गाबाहि जेप्पागा ओम॥ इजाङ्बाङ्निङ् का हेॽनाहाङ् तायाङ्ना, न्हाङा हेॽने खेॽमासिमेङ्ना, ङ्खा चेॽया का था वेॽना, ङ्खाॽनिङ्गो न्निङ्दा था मान॥ 15न्निङ्दा गो याॽमिगा निङ्वा लोॽवा निरिक चोग्वाम्गा, ङ्खाॽनिङ्गो का गो इसागा चा निरिक न्जोग्वाङान॥ 16का निरिक चोगुङ्भोङ्चा आका निरिक जेप्पा ठारेचोङ्मेहा, इजाङ्बाङ्निङ् निरिक चोक्खुबा का से मेॽङान्ना, ङ्खाॽनिङ्गो का पाङ्खुबा आप्पा कानुङ् वेॽना॥ 17न्निङ्गा ब्यावास्थाबे चा छेप्तामा, ‘हिप्पाङ् याॽमिचिगा चेॽया तोङाभोङ् ङ्खा चेॽया जेप्पा ठारेचोङ्मेहा॥’#ब्यावास्था १९:१५ 18आका उतुम्बे का आफाइ गाबाहि पिमेॽनेनिन, न्हाङा का पाङ्खुबा आप्पाङा आका उतुम्बे गाबाहि पिइवाघा॥”
19ङ्खाचिङा उङ् न्छिम्दु, “म्बा हेॽने वेॽना?”
येसुङा पोलोवा पिचि, “न्निङ्दा का चा चिनान्जोङ्मेकान, न्हाङ् आप्पा चा चिना न्जोग्वाम्गान्ना॥ न्निङ्दा का चिनाचोगागानिङ्बि आप्पा चा चिनाचोगुम्गाबि॥”
20खा चेॽया येसुङा निङ्वाफुमापाङ्बे चिन्दुचिनिङ् भेटि तिमाना ठोङ्गा उयुम्बे लुचि॥ ङ्खोङ्चा इसाङा चा उङ् लाप्मा ङ्यासुनिन, इजाङ्बाङ्निङ् हाकुचा उका बेला न्दायामासान॥
येसुगा उतुम्बे ङ्ङासुनिन्हा
21येसुङा ङ्खाचि फेरि लुचि, “का माङ्दु खेन्दिमेङ्, न्हाङ् न्निङ्दा का योङ्मेका, ङ्खाॽनिङ्गो न्निङ्दा न्निङ्गा पापपे सिइवागा॥ का खेमेङ्ना ठोङ्बे न्निङ्दा तामा ङ्यासिॽवागान्हा॥”
22खा ङ्खेप्सुहोङ् याहुदि हाङ्गुम्बाचिङा ङ्गाया, “ना बाङ्ना इनालाए? ‘का खेमेङ्ना ठोङ्बे न्निङ्दा तामा ङ्यासिॽवागान्हा’ कामेॽना! ना गो आफाइ ले सेहेक्साना लेम्बा?”
23येसुङा लुचि, “न्निङ्दा गो मोहा सिगान, का च्हेन तोन्धाङ् उक्साङ्ना ओम॥ न्निङ्दा ना कायुङ्लेनबेॽहा सिगान, ङ्खाॽनिङ्गो का च्हेन मेॽङान्ना॥ 24ङ्खोङ्माङ् का ‘न्निङ्दा न्निङ्गा पापपे सिइवाघा’ लुॽनेनिन्हा ओम, इजाङ्बाङ्निङ् न्निङ्दा ‘का इसाङान, न्नामाङ् ओम्ङान’ भोङ् बिस्वास न्जोगागान्भोङ् न्निङ्दा न्निङ्गा पापपे सिइवाघा॥”
25ङ्खाचिङा येसु न्छिम्दु, “न्दा इसागान?”
येसुङा पोलोवा पिचि, “न्ना गो का न्निङ्दा ओन्दाङ् नाहाङ्तोमाङ् लुॽमासिमेॽनेनिन्हा॥ 26का न्निङ्गा उतुम्बे कामाहा नुङ् निरिक चोक्माहा गो प्याक वान्नेहा॥ ङ्खाॽनिङ्गो का पाङ्खुबा सात्याना, न्हाङ् का उङ्भाङ् खेप्सुङ्हा चेॽयामाङ् का कायुङ्लेनबेॽहा याॽमिचि ल्वाङ्चिङ्हा॥”
27येसुङा निङ्वाफुमा पागा उतुम्बे कामासिमेॽना भोङ् ङ्खाचिङा ङ्ङासुनिन॥ 28न्हाङामाङ् येसुङा ङ्खाचि खाॽला लुचि, “न्निङ्दा याॽमिगा उच्या कुरुसपे तो चोन्द्वाम्गाहोङ्, ‘का न्नामाङ् ओम्ङान’ भोङ् न्निङ्दा था तोङ्मेकाहा॥ का आका आनिङ्वाङा इहाचा न्जोग्वाङान, ङ्खाॽनिङ्गो आप्पाङा चिन्दाङ्हा चेॽया से चेक्त्वाङ्हा बाङ्ना चेॽया न्निङ्दा था तोक्त्वाम्घा॥ 29का पाङ्खुबा कानुङ् वेॽना॥ उङा का आतोखुमाक न्नाॽयामाङान्ना, इजाङ्बाङ्निङ् का साधाइ उङ् चोन्सिमेॽमाहा कामसे चोग्वाङ्॥” 30येसुङा लुचिहा खा चेॽया ङ्खेप्सुहोङ् प्याकङा उङ्बे बिस्वास न्जोगु॥
आब्राहामगा सान्तान
31येसुङा उङ्बे बिस्वास चोक्खुबा याहुदिचि खाॽला लुचि, “न्निङ्दा का लुॽनेनिन्हा चेॽया येनुम्गाभोङ् न्निङ्दा जेप्पा आका चेलासिगान॥ 32न्हाङा न्निङ्दा सात्या इना ओम था तोक्त्वाम्गा, न्हाङ् सात्याङा न्निङ्दा स्वातान्तारा चोगिॽवाघा॥”
33ङ्खाचिङा न्लु, “कानिङ् आब्राहामगा सान्तानसिङान, न्हाङा खिङ् सोम्मा इसागा चा बान्धानबे ङ्ङाइमिङान्हा॥ ना ‘सात्याङा न्निङ्दा फोक्सिॽवाघा’ बाङ्ना च्हेन इना ओम?”#मात्ति ३:९; लुका ३:८
34येसुङा ङ्खाचि पोलोवा पिचि, “का जेप्पा लुमेॽनेनिन, पाप चोक्खुबा घाक याॽमि पापका नोकोर ओम्चि॥ 35नोकोर साधाइ पाङ्बे ङ्वामेन्ना, ङ्खाॽनिङ्गो न्ना पाङ्बेॽना उच्या च्हेन साधाइ पाङ्बे वामा तोक्त्वाना॥ 36ङ्खोङ्माङ् उच्याङा न्निङ्दा स्वातान्तारा चोगिगाभोङ् न्निङ्दा जेप्पा स्वातान्तारा लेक्सिॽवाघा॥ 37का था वान्ने, न्निङ्दा आब्राहामगा सान्तानसिगान॥ ङ्खोङ्चा न्निङ्दा का सिमा योङ्मेका, इजाङ्बाङ्निङ् का लुॽनेनिनाहा चेॽया न्निङ्दा आङ्मा ङ्यास्वाम्गान॥ 38आप्पागा उयुम्बे वायाङ्निङ् का इहा-इहा चेॽया निसुङ् ङ्खामाङ् का चेक्त्वाङ्, न्हाङा न्निङ्दा च्हेन न्निङ्पाभाङ् खेप्सुम्घा चेॽया चोग्वाम्गा॥”
39ङ्खाचिङा उङ् न्लु, “आनिङ्गा पा गो आब्राहाम ओम!”
येसुङा लुचि, “न्निङ्दा जेप्पा आब्राहामगा सान्तान साइगानिङ्बि उङा चोगुहा लोॽवा काम चोगुम्गाबि॥ 40ङ्खाॽनिङ्गो का निङ्वाफुमाभाङ् खेप्सुङ्हा जेप्पाहा चेॽया लुॽनेनिन्निङा गो न्निङ्दा सिमा योङ्मेका॥ खाॽलाहा काम गो आब्राहामङा न्जोगुन! 41न्निङ् पाङा इहा काम चोगु, न्निङ्दा चा ङ्खा काम चोक्मासिइवागा॥”
ङ्खाचिङा न्लु, “कानिङ् ब्याभिचारभाङ् वाइङ्हा म्मेतिसिङान्हा॥ निङ्वाफुमामाङ् आनिङ्गा एको सेॽना पा ओम॥”
42येसुङा ङ्खाचि लुचि, “निङ्वाफुमामाङ् न्निङ्पा सायानिङ्बि न्निङ्दा का लुङ्मा तुक्तागाबि, इजाङ्बाङ्निङ् का निङ्वाफुमाभाङ् तायाङ्ना ओम॥ का आफाइ तायाङ्ना मेन्ना, ङ्खाॽनिङ्गो उङामाङ् का पाक्साङ्ना ओम॥ 43का लुॽनेनिन्हा चेॽया न्निङ्दा इजाङ् ङ्ङास्वाम्गान्हा? इजाङ्बाङ्निङ् का लुॽनेनिन्हा चेॽया न्निङ्दा खेम्मा ङ्यास्वाम्गान॥ 44न्निङ्दा न्निङ्पा दियाबालासका सान्तानसिगान, न्हाङा न्निङ्पागा उनिङ्वा लोॽवा चोक्मागा न्निङ्दा साधाइ त्यार वेतिगा॥ न्ना गो उथुक नाहाङ्तोमाङ् याॽमि सिखुबा ओम॥ न्ना गो सात्या चेॽयाबे हेॽनिङ्चा वामा ङ्यामेन्ना, इजाङ्बाङ्निङ् न्नाबे सात्या माङ् मान्ना॥ न्नाङा लेम्चामाहा चेॽया चेक्त्वा, उका सोभाब माङ् ङ्खाॽलाना ओम॥ इजाङ्बाङ्निङ् न्ना लेम्चाखुबा ओम न्हाङा लेम्चाखुबागा उप्पा ओम॥ 45ङ्खाॽनिङ्गो का जेप्पा चेॽया चेक्त्वाङ्, ङ्खोङ्चा न्निङ्दा बिस्वास न्जोङ्मेकान॥ 46न्निङ्दाबे इसाङा का पापका आप्दिक एम्मा यामेकाहा? न्हाङा का जेप्पा चेॽया चेङ्मेङ्नाभोङ्, इजाङ् का बिस्वास न्जोङ्मेकान्हा? 47निङ्वाफुमागा सान्तानङा निङ्वाफुमागा चेॽया खेप्स्वा, ङ्खाॽनिङ्गो न्निङ्दा निङ्वाफुमागा सान्तान मेतिसिगान्हा, ङ्खोङ्माङ् उका चेॽया ङ्खेप्स्वाम्गान्हा॥”
येसु नुङ् आब्राहाम
48याहुदिचिङा येसु न्लु, “कानिङ् लुॽनेनिन्हा ठिक्माङ् ओम, न्दा सामारि ओम्गान न्हाङ् न्दा इसिॽना मुइङा तेप्सिॽयामागाना॥”
49येसुङा लुचि, “का इसिॽना मुइङा न्देप्सिॽयामाङान्ना, का आप्पागा आदार चोग्वाङ्, ङ्खाॽनिङ्गो न्निङ्दा का आदार न्जोङ्मेकान॥ 50का आफाइङा आका माहिमा ङ्योग्वाङान, ङ्खाॽनिङ्गो आका माहिमा योक्खुबा नुङ् आका निरिक चोक्खुबा हेकोना वान्नेॽना॥ 51जेप्पा का न्निङ्दा लुमेॽनेनिन, का लुॽनेनिन्हा चेॽया येन्खुबा च्हेन हेॽनिङ्चा न्सिमेन्ना॥”
52याहुदिचिङा न्लु, “हाकु कानिङ् जेप्पा था तोक्तुम्ङाहा, न्दा इसिॽना मुइङामाङ् तेप्सिॽयामागाना॥ आब्राहाम स्या, निङ्वाफुमाभाङ् चेक्खुबाचि चा न्स्या, ङ्खाॽनिङ्गो न्दा च्हेन ‘का लुॽनेनिन्हा चेॽया येन्खुबा हेॽनिङ्चा न्सिमेन्ना’ कामेका! 53इना न्दा स्याख्याना एङ्गा पुर्खा आब्राहाम नुङ् निङ्वाफुमाभाङ् चेक्खुबाचि हाक्निङ्चा मागानयि? न्दा आफाइ का इसाङान मिम्मेकाना?”
54येसुङा लुचि, “आका माहिमा का आफाइ चोगुङ्भोङ् न्ना बित्थागा लेङ्मे, ङ्खाॽनिङ्गो आका माहिमा चोक्खुबा आप्पा वान्ने, न्निङ्दा उङ्माङ् ‘आनिङ्गा निङ्वाफुमा’ ल्वाम्गा॥ 55न्निङ्दा उङ् चिना न्जोगुक्सुम्गान्ना, ङ्खाॽनिङ्गो का च्हेन उङ् उचुन चिनाचोग्वाङ्ना॥ का उङ् चिनान्जोग्वाङान्ना कायाङ्निङ्बि, का चा न्निङ्दा लोॽवा लेम्चाखुबा लेक्साङ्बि॥ ङ्खाॽनिङ्गो का उङ् चिनाचोग्वाङ् न्हाङ् उङा लुयाङ्हा चेॽया का येन्वाङ्हा॥ 56न्निङ्गा पुर्खा आब्राहामङा का तामाना लेन इखिङ् प्याक सोॽमा मितुक्सा, न्हाङा निसुहोङ् उङ् तुक्नुङ् चोन्दास्या॥”
57न्हाङ् याहुदिचिङा न्लु, “न्दा फाखेङ् फिम्बिलिङ् चा न्दासुक्सुगान, ङ्खोङ् न्दा इमिन आनिङ्गा पुर्खा आब्राहाम निसुगाना?”
58न्हाङ् येसुङा लुचि, “जेप्पा का न्निङ्दा लुमेॽनेनिन, आब्राहाम वायाना हाक्निङ् ओन्दाङ् नाहाङ्तो का वेॽङाना॥”
59न्हाङा ङ्खाचिङा उङ् लुङ्खाकङा लेम्सिॽमागा लुङ्खाक ङ्गोबु, ङ्खाॽनिङ्गो उङ् स्वाक निङ्वाफुमापाङ्भाङ् लोन्दाख्या॥
Currently Selected:
युहान्ना 8: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
