मात्ति 12
12
आराम चोक्माना लेनगा हाङ्बा
(मार्कुस २:२३-२८; ३:१-६; लुका ६:१-११)
1इमा येसु नुङ् उका चेलाचि आराम चोक्माना लेन गाउहामगा उलुम-उलुम लेङ्साङ् ङ्खेॽमास्यानिङ् उका चेलाचि साॽङा न्स्या, न्हाङ् गाउगा बाला सेम्चामा#१२:१ लाम्बुबे लाम्नेहेङ्मानुङ् साक तुगाभोङ् लाम्बुबेॽहा चाचिॽया सेम्चामा तोक्माना चालान याहुदिचिबे वाया॥ न्दारोक्तु॥#ब्यावास्था २३:२५ 2ङ्खाॽनिङ्गो फारिसिचिङा न्निसुचिहोङ् येसु न्लु, “सो, आराम चोक्माना लेनबे इहा चोक्मा न्लेङ्मेन, ङ्खा काम ङ्गा चेलाचिङा न्जोक्मासिम्मेहा!”
3येसुङा ङ्खाचि पोलोवा पिचि, “दाउद नुङ् उकाम्निभाकचि साॽङा स्यामासानिङ् उङ् इ चोगाना? न्निङ्दा पोढा न्जोगुम्गान्हा?#१ सामुएल २१:१-६ 4उङ् निङ्वाफुमापाङ्बे उयाहोङ् निङ्वाफुमाबे तिसाहा चालेप्पा उङ् नुङ् उकाम्निभाकचिङा न्जो॥ ङ्खा चालेप्पा ब्यावास्थाबे छेप्ताहा लोॽवा ओमभोङ् हाङ्खुबाचिङा से चामा लेङ्माहा साया॥#लेबि २४:९ 5इना ब्यावास्थाबे खा चेॽया पोढा न्जोगुम्गान्हा? आराम चोक्माना लेन हाङ्खुबाचि निङ्वाफुमापाङ्बे साधाइ काम न्जोङ्मे॥ खाॽला ङ्खाचिङा आराम चोक्माना लेनगा नियाम ङ्येन्वानिन! ङ्खोङ्चा ङ्खाचि दोसि न्लेङ्मेनिन॥#निप २८:९-१० 6का न्निङ्दा लुमेॽनेनिन, निङ्वाफुमापाङ् हाक्निङ्चा माडा एको नाबे वान्नेॽना॥ 7ङ्खाॽनिङ्गो ‘का पोसुगा बोलि मेन्ना, दाया चोक्खुबा लेक्सिगानि बाङ्ना मिमेङ्ना’#मात्ति ९:१३; होसे ६:६ भोङ् निङ्वाफुमाङा कायाहा खा चेॽया आसुम्गानिङ्बि, इहाचा मेङ्खोक्निखुबाचि आप्दिक ङ्ङेन्दुम्चिम्गान्बि॥ 8याॽमिगा उच्या आराम चोक्माना लेनगा चा हाङ्बा ओम॥”
9न्हाङा येसु न्नाभाङ् लोन्दाहोङ् ङ्खाचिगा छुम्पाङ्बे ख्या॥ 10न्नाबे एको उमुक हेराब्याना याॽमि वाया॥ फारिसिचिङा येसु आप्दिक एम्माना निङ्वाङा न्छिम्दु, “आराम चोक्माना लेन तुखाबाङ् नुमेॽमा लेङ्मेॽनायेम न्लेङ्मेन्नायेम?”
11येसुङा पोलोवा पिचि, “न्निङ्दाबे एकोगा एको सामुङ् वान्ने, न्ना सामुङ् आराम चोक्माना लेन होॽलुम्बे आयाख्याभोङ्, इना न्ना सोलोक न्लोन्द्वाम्गान्नायि?#लुका १४:५ 12सामुङ् हाक्निङ् याॽमि इखिङ् मुल्यावान्ना? न्हाङामाङ् आराम चोक्माना लेनबे उचुन्हा काम चोक्मा लेङ्मेहा॥” 13न्हाङा येसुङा न्ना उमुक हेराब्याना याॽमि लु, “म्मुक सोसु!” न्ना याॽमिङा उमुक सोसु॥ ङ्खिङ्बेलामाङ् न्ना याॽमिगा उमुक नुयाहोङ् हेकोना लोॽवा उचुन्माचेक लेक्साब्या॥ 14ङ्खाॽनिङ्गो फारिसिचि छुम्पाङ्भाङ् न्लोन्दाख्याहोङ् येसु इमिन सिसुमभोङ् चेॽया हुप्मा न्दारोक्तु॥
निङ्वाफुमाङा सेगुना सेवाक
(मार्कुस ३:७-१२; लुका ६:१७-१९)
15ङ्खा चेॽया येसुङा था तोक्तुहोङ् न्नाभाङ् लामाब्या॥ प्याक याॽमिचि उका हेक्साङ् लान्जोगा न्हाङ् उका हेक्साङ् लाचोक्खुबा तुखाबाङ्चि घाक उङा नुमेतुचि॥ 16ङ्खाॽनिङ्गो येसुङा ङ्खाचि “खा चेॽयागा उतुम्बे इसा चा न्लुयानुम्चिम्निन” भोङ् आग्गे पिचि॥ 17खाॽला निङ्वाफुमाभाङ् चेक्खुबा यासाइयाङा प्याक ओन्दाङ् कायाहा चेॽया पुरा लेङ्मागा लागिमाङ् खा घाक लेक्साहा ओम–
18“सोयानुम, का सेगुङ्ना आका सेवाक,
आलुङ्मा तुक्तुङ्ना, उङ्भाङ् का तुक्नुङ् चोन्दास्यामाङ्ना,
का उङ् आका आत्मागा साक्ति पिवाङ्,
न्हाङ् उङामाङ् घाक हेकोहा जातिगा याॽमिचि निरिक्का उतुम्बे खेम्मेत्वाचिहा॥
19उङ् ङ्खिमेन, माडा सेम्लाङा ङ्ङोङ्मेन,
इसाङा चा उका ओसेम्ला लाम्बुचिबे ङ्खेप्स्वानिन॥
20वाक्साब्याना मिक्ला चा उङा ङ्ङेग्वान,
सेहेक्साना बात्ति चा उङा न्सिस्वान॥
उङा दुस्टाचि मेहेन्चाले सोम्मा याॽमिचि दाया चोगुनेस्वाचि॥
21न्हाङ् घाक जातिगा याॽमिचिङा उका उनिङ्बे आस ङ्युक्स्वा॥”#यासाइया ४२:१-४
फारिसिचिङा येसु साङ्का न्जोगुना
(मार्कुस ३:२०-३०; लुका ११:१४-२३)
22न्हाङा याॽमिचिङा इसिॽना मुइङा याक्सुहोङ् उमिक मेनिखुबा, चेक्मा मेयाखुबा लेक्साना एको तुखाबाङ् येसु वायानाबे न्दा॥ येसुङा न्ना याॽमि नुमेतुहोङ् निमा याखुबा नुङ् चेक्मा याखुबा लेक्सा॥ 23खा न्निसुहोङ् घाक याॽमिचि आच्चाम्मा एसाङ् खाॽला कामा न्दारोक्तु, “इना ना दाउदका छोङ्गा याॽमि ओम्यि?”
24ङ्खाॽनिङ्गो खा ङ्खेप्सुहोङ् फारिसिचिङा ङ्गाया, “नाङा गो इसिॽहा मुइचिगा खाङ्खाङ्बा बाल्जिबुलगा साक्तिङा से इसिॽहा मुइ लोन्धाक्स्वाचिहा॥”#मात्ति ९:३४; १०:२५
25ङ्खाॽनिङ्गो ङ्खाचिगा निङ्वाबेॽहा चेॽया था तोक्तुहोङ् येसुङा ङ्खाचि लुचि, “हेॽना खाम्युकपे उङ्चि-उङ्चि न्दोङ्मेनिन, न्ना खाम्युक आफाइ नास लेङ्मेॽना॥ ङ्खाॽलामाङ् एको साहारबेॽहा, एको पाङ्बेॽहा याॽमिचि चा उङ्चि-उङ्चि न्दोङ्मेनिन्हा भोङ् ङ्खाचि चा नास न्लेङ्मेहा॥ 26ङ्खाॽला साइतानङा साइतान लोन्धाक्स्वानाभोङ् गो, साइतान आफाइ उका बिरुद्दाबे पोङ्मे॥ ङ्खाॽलाभोङ् न्नागा राज्या इमिन ताप्त्वाना॥ 27न्निङ्दा का बाल्जिबुलगा साक्तिङा इसिॽहा मुइ लोन्धाक्स्वाचिहाभोङ् लुम्मेका, ङ्खाॽलाभोङ् न्निङ्गा याॽमिचिङा च्हेन इसागा साक्तिङा न्लोन्धाक्स्वाचिहा? ङ्खाचिङा न्जोग्वाहा कामभाङ्माङ् न्निङ्दा गाल्ति चोक्मासिइवाघा बाङ्ना चेॽया था लेङ्मेॽना॥ 28ङ्खाॽनिङ्गो बाल्जिबुलगा साक्तिङा मेन्ना का निङ्वाफुमागा आत्मागा साक्तिङा इसिॽहा मुइ लोन्धाक्स्वाङ्चिङ्हा भोङ्, खा चेॽयाभाङ्माङ् न्निङ्दा था तोक्मा यास्वाम्गा निङ्वाफुमागा राज्या न्निङ्लुम्बे तायाब्यामाना॥ 29चात्तुना याॽमि ओन्दाङ् चात्तुनुङ् मेन्थुन्ले इसाङा उपाङ्बे उमेहोङ् उका युबाक्थिङ्खाक नाम्खेॽमा यास्वाहा? न्ना न्थुद्वाहोङ् से उपाङ्बेॽहा घाक थोक नाम्खेॽमा ङ्यास्वाहा॥
30 “इसा कानुङ् मान, न्ना आका बिरुद्दाबे वान्ने॥ इसाङा कानुङ् ङ्खोप्स्वान, न्नाङा का खोप्सुङ्हा चा हिसाहाक्स्वा॥ #
मार्कुस ९:४०
31न्हाङामाङ् का न्निङ्दा लुमेॽनेनिन, याॽमिचिङा न्जोगुहा घाक पाप नुङ् निन्दा छेमा लेङ्मे, ङ्खाॽनिङ्गो पाबित्तारा आत्मागा बिरुद्दाबे चेक्ताहा इसिॽहा चेॽया च्हेन छेमा न्लेङ्मेन्हा॥ 32याॽमिगा उच्यागा बिरुद्दाबे न्जेक्तुहा चेॽया छेमा लेङ्मे, ङ्खाॽनिङ्गो पाबित्तारा आत्मागा निन्दा न्जोगुहा चेॽया च्हेन ना युगपे नुङ् तायेॽना युगपे हेॽनिङ्चा छेमा न्लेङ्मेन्हा॥#लुका १२:१०
सिङ् न्नागा उसाभाङ् चिनातोङ्मेॽना
(लुका ६:४३-४५)
33 “साप्रा चोगाना सिङ्गा उथापङा से साप्रा चोगाहा उसा केक्स्वाहा, साप्रा न्जोगान्ना सिङ्गा उथापङा उसा चा साप्रा न्जोगुन्हामाङ् केक्स्वाहा॥ सिङ्गा उथाप उसाभाङ् माङ् चिना चोङ्मेॽना॥ #
मात्ति ७:२०
34ओ पुछाक्का सान्तानचि! न्निङ्दा आफाइ दुस्टा सिइगान, उचुन्हा चेॽया इमिन चेक्मा यासिॽवाघा? इजाङ्बाङ्निङ् याॽमिगा उनिङ्वा इमिन्हा चेॽयाङा इप्तुक्सु ङ्खामाङ् न्नागा उयाभाङ् लोम्मेहा॥#मात्ति ३:७; २३:३३; १५:१८; लुका ३:७ 35उनिङ्वाबे उचुन मिखुबा याॽमिङा उका निङ्वाभाङ् उचुन्हा चेॽयामाङ् लोन्द्वा, ङ्खाॽनिङ्गो इसिॽना याॽमिङा उनिङ्वाभाङ् इसिॽहा चेॽयामाङ् लोन्द्वाहा॥ 36का न्निङ्दा लुमेॽनेनिन, मेन्हा चेॽया चेक्खुबाचिङा निरिक्का लेनबे ङ्खा एको-एको चेॽयागा पोलोवा पिॽमा पोराचोङ्मेहा॥ 37इजाङ्बाङ्निङ् न्निङ्दा इमिन्हा याॽमिसिगान बाङ्ना चेॽया न्निङ्दा चेक्तुम्घा चेॽयाभाङ्माङ् न्ना लेन न्निङ्गा निरिक लेङ्मेहा॥”
योनागा चिङ्गोगा उतुम्बे
(मार्कुस ८:११-१२; लुका ११:२९-३२)
38न्हाङा एकोहिप्पाङ् धार्मासाप्ला चिन्खुबाचि नुङ् फारिसिचि न्दोङाहोङ् येसु न्लु, “चिन्खुबा, कानिङ् न्दाभाङ् एको आच्चाम्माना चिङ्गो सोॽमा मितुक्सुम्ङाना॥”#मात्ति १६:१; मार्कुस ८:११
39येसुङा लुचि, “इसिॽहा नुङ् बिस्वास लेप्निखुबा पुस्तागा याॽमिचिङा चिङ्गो सोॽमा ङ्योग्वा॥ ङ्खाॽनिङ्गो ङ्खाचिङा निङ्वाफुमाभाङ् चेक्खुबा योनागा चिङ्गो हाक्निङ् हेकोहा इहाचा निमा न्दोक्त्वानिन्हा॥#मात्ति १६:४; मार्कुस ८:१२ 40इजाङ्बाङ्निङ् इमिन योना माडा नासागा ओफोक होङ्बे सुम लेन लेॽनिसेॽनि वाया, ङ्खाॽलामाङ् याॽमिगा उच्या चा सुम लेन लेॽनिसेॽनि खामहोङ्बे वामेॽना॥#योना १:१७ 41निरिक्का लेनबे निनाबे साहारबेॽहा याॽमिचि ना पुस्तागा याॽमिचिनुङ् ङ्येम्मेहोङ् ना पुस्तागा याॽमिचि आप्दिक ङ्ङेन्द्वाचिहा॥ इजाङ्बाङ्निङ् योनाङा निङ्वाफुमागा चेॽया खेम्मेतुचिनिङ् ङ्खाचि पास्चाताप न्जोगा॥ ङ्खाॽनिङ्गो सोयानुम, योना हाक्निङ्चा माडा एको नाबे वेॽना॥#योना ३:५ 42निरिक्का लेनबे सेबा खाम्युक्का हाङ्माङा ना पुस्तागा याॽमिचिनुङ् येम्मेहोङ् उङ्चि आप्दिक एन्द्वाचि॥ इजाङ्बाङ्निङ् उङ् सोलोमान हाङ्गा बुद्दिगा चेॽया खेम्से ताम्दाङ्फुमागा योना उलाप्पाहाङ् ताया॥ ङ्खाॽनिङ्गो सोयानुम, सोलोमान हाक्निङ्चा माडा एको नाबे वान्नेॽना॥#१ हाङ् १०:१-१०; २ उथुक्साला ९:१-१२
इसिॽना मुइ लामेॽना
(लुका ११:२४-२६)
43 “याॽमिभाङ् इसिॽना मुइ लोङ्खेमेहोङ् आराम चोक्माना ठोङ् योक्साङ् फुक्कोना ठोङ्बे कोङ्घोमे, ङ्खाॽनिङ्गो हेॽने चा न्दोक्त्वान॥ 44न्हाङा खाॽला कामे, ‘का ओन्दाङ् वायाङ्ना याॽमिबेॽमाङ् लाङ्खेमेङ्ना॥’ न्नाबे लान्दारामेॽनिङ् उङा न्ना ओन्दाङ्ना पाङ् खालि, उचुन्माचेक सेक्साहोङ् तोक्साना तुप्स्वा॥ 45खा निस्वाहोङ् न्ना खेमे न्हाङ् उङ् हाक्निङ्चा इसिॽहा ला ओटा इसिॽहा मुइचि कारावाचि, न्हाङा ङ्खा घाक न्नाहोङ्बे ङ्ङुमेहोङ् ङ्वामे॥ न्हाङ् खे न्ना याॽमिगा तुखि ओन्दाङ्हा हाक्निङ्चा झान तुक्नुङ् इसिॽनुङ् लेङ्मेहा॥ ना दुस्टा पुस्तागा याॽमिचिगा हालात चा ङ्खाॽलामाङ् लेङ्मेहा॥”
येसुगा उमा नुङ् उनुन्छाचि
(मार्कुस ३:३१-३५; लुका ८:१९-२१)
46येसु प्याक याॽमिनुङ् चेक्मास्यानिङ्, उका उमा नुङ् उनुन्छाचि न्दायाब्या॥ उङ्चिङा “येसुनुङ् साला लेन्माहा वेॽहा” कासाङ् पाखाबे ङ्गुसुक्सा॥ 47न्हाङा एको याॽमिङा येसु लु, “चिन्खुबा, ङ्गा म्मा नुङ् न्नुन्छाचिङा न्दानुङ् साला लेम्मा वेॽहा कासाङ् पाखाबे ङ्गुसानेसागाना॥”
48ङ्खाॽनिङ्गो सालेन ताखुबा याॽमि येसुङा लु, “आका आमा नुङ् आनुन्छाचि इसा ओम्चि?” 49न्हाङ् उमुकङा उका चेलाचि सोॽमेसाङ् लुचि, “आका आमा नुङ् आनुन्छाचि खामाङ् ओम्चि॥ 50इजाङ्बाङ्निङ् वालोकपे वाखुबा आप्पागा उनिङ्वा लोॽवा चोक्खुबाचिमाङ् आका आमा, आनुन्छा ओम्चि॥”
Currently Selected:
मात्ति 12: YAKH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
