Ruuta 4
4
Ŋgərən ŋga Bowaz tə Rutə da pon tə Obed
4
Ndzaan ŋga Rutə ka min ŋga Bowaz
1Bowaz a dzə a uura mayi ŋga dəməgin aasəkə vəran, ca ndzaa das davə. Makə ndzaa cə, wata ma ne cə, waan maluwətə shi kəya waɓi agyanəkəy ka pitəgin. Bowaz a 'wa tə cə, əŋki cə ka cə: «Shiwa! Nda ndzaawə gan.» Wata əndətə a shi ca ndzaan. 2Bowaz a taɗə ŋguyirən pu'u agi gayin ŋga vəran, ca ba ka tii: Ndzaam gan! Wata təya ndzaan. 3Ca waɓə ka maluwəta, ca ba: «Kə ənya Na'omi an hanyin ŋga Mo'ab, ŋga'ə ka ki nə ɗərəmagin də ha ŋga ndzəkuŋushi'inaam Elimelek. 4Cə mwayi nyi ban ka hə akuŋwacii gayin ŋga vəran, da ənjənə gan pat kaa ha pərapaa. Maɗa poshə, bawə ken kena shii, acii hə nə təkuŋwatə əndətə da baawəɗa ŋga ɗa ətsa, nyi nə ŋga bəra'in əs». Wata əndətə a ba ka cə: «Kə luuvə nyi, ka pərapaan nə nyi hakəy.» 5Bowaz a ba ka əndəta: «Maɗa kə ɗərəgi hə hatsə acii Na'omi, ka ŋgərən nə hə tə Rutə mitə Mo'ab, mitə moryafiina, kaa kya ndzaa ka minaaku. Maɗa kə ɗii ha'ə, poshə ləm ŋga ndzəkuŋushi'inaam ka zagin acii ka upaan nə cə mazəm ya». 6Maluwətə a ba: «Maɗa ha'ə ɗiya, poshə nyi ka mben ka pərapaa hatsə kaa ca ndzaa ka naaki, acii ka saawen nə nyi ka gənaaki. Ma əndzə'i, kə vii nyi ka hə rəgwa, ɗərəgi, poshə nyi ka mben ma'ə.»
7Ma ŋga ŋukə də Isərayiila, ma ənjə a ɗa ɗəra, taa pəra də uushə'in, ka səɗəgin nə əndə rəŋwə ɓiɓinaakəy ahadatii, ca vii ka əndə'i ənda. Cə ca ɓaarii ban o'i kə ɗii tii ɗəra. 8Maluwəta a ba ka Bowaz: «Ɗərəgi hatsa!» Wata ca shi'yagi ɓiɓinaakəy. 9Bowaz a ba ka gayin da masariin da ənjətə davə pat: «Sedawanyin nuun ənshin, o'i kə ɗərəgi nyi uushə'in ŋga Elimelek acii Na'omi, da ŋga manjevənatə Kiliyon da Mahəlon. 10Ka ŋgərən nə nyi tə Rutə, mitə Mo'abətə ŋga Mahəlon ka minaaki. Ma ətsa, ka ndzaan ləməkəy an uushə'inaakəy poshə ləm ŋga əndənə əntəgi ka zagin ahada ndzəkuŋushi'inəkəy. Sedawanyin nuun ənshin.»
11Wata gayin da ənjətə nji davə a makuvə pat a ba: «Awwa, sedawanyin niin! Wa Yaawe a ɗa ka miitsə ca dəm aa haku aasii, a ndzaan makə ŋga Rashel da Leya, da shi makiitsə ŋga Yakubu bəra'i shigi ənjə Isərayiila pat. Ka əndə gəna ndzaanəku, agi duurə ŋga Efərata, ma shii əndə ndzaanəku an hanyin ŋga Bayitilaama əs. 12Wa Yaawe a vii kon da miitsə manjevən laŋ, kaa yaaku a ndzaa makə ŋga Peres, uuzən ŋga Yahuda da Tamar.»
Pon tə Obed jijin ŋga Na'omi
13Də ha'ə ŋgirə Bowaz tə Rutə ka minaakəy. Makə guŋu tii, kə ɗii Yaawe kaa Rutə a ɗasəka, kya po uundzə ŋgura. 14Əŋki makkin ka Na'omi: «Əndə barəkaan nə Yaawe, acii ma təŋatəgim cə ka hə də maluwa, kaa ca nəhəgi tə hə. Ka 'wan nə ənjə ləməkəy də Isərayiila pat. 15Ka tsakən nə cə tə hə, ca vii ka hə kura ndzaan agi iiriinaaku. Kə pale maɗaatsaaku ka manjevən məɗəfə, kə uu'i ki tə hə. Aciikəy ha'ə, kə pwayi ki ka hə jijin.» 16Na'omi a ŋgərə uuzəəta, kya rabətə tə cə a ədzəmətə, ki gərətə tə cə əs.
17Guvayinyin ŋga Na'omi a dza də na, təya ba: «Kə upaa Na'omi jijin!» Təya ɗəkə ka cə ləm Obed. Ma Obed, cə nə dii Jaasi, Jaasi əs, cə nə dii Dawuda.
18Wiin po ŋga Peres: Ma Peres kə pwayi cə tə Hesəron, 19Hesəron a po tə Ram, Ram a po tə Aminadaba, 20Aminadaba a po tə Nashon. Nashon a po tə Saləma, 21Saləma a po tə Bowaz, Bowaz a po tə Obed. 22Obed a po tə Jaasi, Jaasi a po tə Dawuda.
Currently Selected:
Ruuta 4: Ruth BGD
Highlight
Share
Copy
Want to have your highlights saved across all your devices? Sign up or sign in
All rights reserved
