Maruk 10
10
Yéesu nalob mara efaak buñuuho
(Máca 19.1-12 ; Lúk 16.18)
1Yéesu nápur to najow bu mꞌmof mara Yúde mammee nꞌgaagu gahaja gara eraal yara Suruden. Bandiŋ gayooŋ ngújool guhomenoor to nu ho, nabaañ an ngaliigeniil, naŋ min nja apii mee nakaan. 2Ñeer Efarisiit gucee ngucigulool, mara ebehool fuñut ngucamene. Ngusonkenool teer sensen min amaañen akahen akoñaool. 3Narogiil : « Móyiis fuyuhoum féy nakahuul nꞌwan jisonkenaam mee ? » 4Ngurogool : « Móyiis asensen amaañen bulago min amundum asafer gahiit gara efaak buñuuho, afaak ñeer nájuh akahen akoñaool. » 5Yéesu narogiil : « Bahankeruul gukow bucile min Móyiis asafer fuyuhoum faafu bu mꞌbuguul. 6No nꞌfúcihum faafu nan Atúuha átuut mee waaf waawu peepe, átuutuut kum amaañen nꞌakoña. 7Yo ecil mee amaañen be épur akat paayool nꞌjawool nacin bugo nꞌakoñaool 8min bugo gammee gúruba gukaan an hanur. Mat góoni ñeer bugan gúruba, bare an hanur. 9An jambil ñeer afanjen wan Atúuha ahomen mee. »
10Bare nan gunogen dó mee nꞌyaŋ yaayu, ulagenaool ngubaañ gusonkenool mara wan alob mee. 11Narogiil : « Anooan akahene akoñaool nayab acee, an aahu be ebaj júnube yara jabunjen nꞌakoña átiyaara aahu. 12Eéni may akoña ápur nꞌaraaŋool nañuuho nꞌacee, nakankaan júnube yara jabunjen. »
Yéesu násoonien guleeh
(Máca 19.13-15 ; Lúk 18.15-17)
13Bugan gucee ngúŋarul guleeh min Yéesu agoriil násoonieniil, bare ulagenaool ngon búrotoor bugan gaagu. 14Nan Yéesu añow mee bakaaner ulagenaool, fiiñool nfutiñ. Narogiil : « Jikat guleeh gaagu ngújool bu nꞌínje ! Jambil jiniŋiil mara bugan gammee naŋ guleeh gee gucile Jáyiih Atúuha. 15Iroguulee : Maregen an ayabut mee Jáyiih Atúuha naŋ aleeh, an aahu mat amus anogen dó. » 16Nagaab guleeh gaagu afaak, nariteniil guñenool min ásoonieniil.
Yéesu bugo nꞌasaanum
(Máca 19.16-30 ; Lúk 18.18-30)
17Yéesu nan nejow mꞌbulago'ool, amaañen acee nateyúl átiiŋul, nayah gújuul fácilool narogool : « Aliiga-bugan hásuum mee fukow, waa níjuhe ikaan min ibaj buroŋ bafaagoériit ? » 18Yéesu narogool : « Waa ucile nurogom ásuuma fukow ? Bajut an ásunsuum, Atúuha noonool ásuume. 19Umímir guyuhoum gaagu kum : “Jambil umuk an ; jambil ufiihen akoña hara an ; jambil úkuet ; jambil ubij ukaan apaali aw ngáseedo ; jambil ulaaf anooan ; úkaanum paayi nꞌjaayi.” » 20Amaañen aahu narogool : « Aliiga, dáaru peepe níkaanunkaanum dó kábiriŋ ínje aleeh. » 21Yéesu nañeerool nsúumool. Narogool : « Ŋañoi ekaan waaf wanur : ujow unoomen wan ubaj mee peepe ufaak, nuŋar síkori saasu usen galek mee. Mo aw be ebaj fubaj dó nꞌémit. Ukaan ufaak, nújool ulagenom. » 22Bare nemmee amaañen aahu fubaj fáamak nabaje, nan ajam mee gurim gaagu nabet gawooyool, naat nꞌgáwuusa ró.
23Ñeer Yéesu nañeeroor ulagenaool gagongenool mee, narogiil : « Táañitaañi bu nꞌasaanum búnogen nꞌJáyiih Atúuha ! » 24Gurim gaagu ngujaahali ulagenaool máamak. Nabaañ arogiil : « Buganom, táañitaañi búnogen nꞌJáyiih Atúuha ! 25Búnogen eñonkome mꞌbusun ebendaŋo burege básuum asaanum búnogen nꞌJáyiih Atúuha. » 26Ulagenaool ngureg ngujaahalie ban nak gurogoor : « Ñeer ay pére ájuhe apak ? » 27Yéesu nañeeriil, narogiil : « Mꞌbugan júhut kaan, bare nꞌAtúuha waaf waawu peepe újuhe ukaan. »
28Ñeer Piyeer narogool : « Elí kum ukahulokat waafóli peepe nulageni. » 29Yéesu narogool : « Iroguulee : Eéni an akat yaŋool, gutiool, gúliinool, jawool, paayool, guleehool, nꞌetaamool mara ínje son Furim Fásuum mee, 30ho be eyab ñoono eceme mꞌburoŋ be siyaŋ, gutiaay, gúliinaay, sijaayaay, guleeh, nꞌetaam, haani mbil gúlaamenool. Funak fucee fambo néjool, ho be eyab may buroŋ baabu bafaagoériit mee. 31Gameeŋe mꞌbugan gammee gútiyaara bu gáani gúsola min gameeŋe nꞌgammee gúsola bu gáani gútiyaara. »
Yéesu nalob áfaaten mara ecehool son gayiho'ool
(Máca 20.17-19 ; Lúk 18.31-34)
32Púr to, Yéesu nꞌgupaalool ngujow nꞌgara Yéruusalem. Nalohiil fácil. Ulagenaool njogiil ŋáar, ban galageniil mee mꞌbúsol ngúsebi. Ñeer Yéesu nabaañ ahomen ulagenaool gammee guñen nꞌgúruba to nu ho min aam negaaniil wabilool mee ebaj. 33Narogiil : « Alaal ubugu nejow nꞌgara Yéruusalem ban Aleeh An abil mee ebehi nꞌguñen unafaan úsimena waawu nꞌúpajula fuyuhoum Atúuha. Bugo be ecafool ngujok bu jamugool, ngusenool bugan galet mee Esúiif, 34min gúfookulool, ngumasenool, ngukaruwaasool gufaak, ngumugool. Bare ho be ecet baj gunak gúfaajiir, ho bu gayihoúl dó nꞌgacet mee. »
Saak bugo nꞌSaŋ ngúciin Yéesu
(Máca 20.20-28)
35Ñeer guleeh gumaañen bugara Sébede, gammee Saak nꞌSaŋ, ngucik Yéesu ngurogool : « Anafaanóli, ucamencamen mbil ukaanóli wan ubil mee éciini. » 36Narogiil : « Waa njicamene ikaanuul ? » 37Ngurogool : « Nan ubil mee galako nꞌétalum yara Jáyiihi, mbil újioli min ulako aahu nꞌgañeni gárib, aahu nꞌgañeni gamay. » 38Narogiil : « Buguul jímirut waa njon néciin. Jíjuhe pére jirem nꞌéraanum yara sílaam yan ínje ibil mee marem, mba njiyab gábatiise gara sílaam gan gubilaam mee gábatiise ? » 39Ngurogool : « Eem, újuhe ! » Narogiil : « Maregen maregen, buguul bu marem nꞌéraanum yan ibil mee marem, ban may buguul be eyab gábatiise gan ibil mee gábatiisei. 40Bare mara galako nꞌgañenom gárib son gañenom gamay, yo let ínje ibiluul yo esen. Sítalum saasu, sara bugan gan Atúuha acaap mee bu nu so. »
41Nan ulagenaool bugaagu gammee guñen gujam mee gurim gaagu, ngúñigen bu nꞌSaak bugo nꞌSaŋ. 42Ñeer Yéesu nawooguliil bugo peepe, narogiil : « Jímimir set mara bugan gan nja ujogaal mee naŋ unafaan sísuk, bugo nja gúlaamen mee sísuk saasu, ban bugan búgaamak nja guliiliik bugaagu mara sembe ngubaje. 43Bare etuhooruul ebiloot ganogoor mee. Dó mꞌbuguul an acamen mee gujogool an háamak, amundum akaan ájagagauul. 44Ban may dó mꞌbuguul an acamen mee eloh fácil, mbil akaan amiigeel hara bugan gaagu peepe. 45Aleeh An mo najaalo mee, let mbil abaj emiigeel, bare mimbil ho fannaool áani amiigeel ban nasen buroŋool naŋ bacaam bu gapagen bugan gamemmeeŋ. »
Yéesu násonten an ápimpiim
(Máca 20.29-34 ; Lúk 18.35-43)
46Púr to, Yéesu nꞌulagenaool ngujow jaram gútiiŋ nꞌésuk yan guroge mee Sériko. Nan ammee népur nꞌésuk yaayu bugo nꞌulagenaool nꞌgayooŋ gáamak ró, amaañen acee hápimpiim, gajaool Barutime, aleeh Time, nan nꞌgapana bulago baabu nalakoe min an éciin esarah. 47Nan Yéesu hara Nasaret ammee newuj, Barutime najam, nak akaaw arok : « Yéesu, Aleeh Dawid, uñeerom nubonket ! » 48Gameeŋe nguyaaŋenool mimbil ánif, bare nareg nakaawe arok : « Aleeh Dawid, uñeerom nubonket ! » 49Yéesu nayiho, narok : « Jiwoogulomool ! » Ñeer ngúwoogul an aahu ápiim mee ngurogool nu mo ró : « Uhanken ! Uyiho, aw nawooge. » 50Ñeer an aahu ápiim mee nabehen gákoohool, nayiho puc, najow bu bo nꞌYéesu.
51Nan átiiŋ mee, Yéesu narogool : « Waa nucamene ikaani ? » Narogool : « Aliiga, ukaanom min ibaañ iñow. » 52Ñeer Yéesu narogool : « Ujow. Gáyineni gupagenipagen. » To bújooŋoor, amaañen aahu nabaañ añow, nalagen Yéesu ban ammee nejow.
Currently Selected:
Maruk 10: gsl
Highlight
Copy
Compare
Share
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
