Yohanes 5
5
Yesus nafngamone mangamluktwar sa na ler Sanari
5:1-18
1Lama Yesus nose monuk ngrimpasalan a ne I nti kote Yerusalem ma nose tomwat Yahudyar nir ler silai. 2Na Yerusalem kloloku sa namin iane. Ma na seriny baldu e sifloyar lim a ramin. Kloloku ne ma Ibrani liriny e nfalak feti Betesda. Kloloku ne nlosir kote ne ni finru matan. Finru matan ye ma rafngare feti: “Finru matan Domba.” 3Na sifloyar a ne mangafansar yadin rarwa iane far matbolar, sabaloyar, ma mangamluktwar. [Sir ramin iane la rdaf ma weye ne nawawan. 4Fali far mpene ne biase Ratu Ni malaekat ntompur far kloloku ne ma nose ma weye ne nawawan. Ma ise ma ntompur baluan far kloloku ne dalam noak ma weye ne nawawan e keta nangamon desar boloka ni maninik safe-safe motak.] 5Na iane tomwat sabaloi sa ma namaninik ngarak buty tel resin wal e lo. 6Noak ma Yesus nsalan tomwate ne, I nafai feti namaninik dodo lo. Mpa nfalak, “Ko mpweang ma mungamon e?”
7Ne tomwate ne nfalak, “Maken noak ma weye ne nawawan to tomwate fen lese ma ntulung yakw ma ktwompur far kloloku ne dalam. Ma noak ma ktwi kloloku ne tomwat walyetar rtompur baluan lo.”
8Ne Yesus nfalak, “Mpwote ko, ma mwal nim mpeluk ma mpwan lo.” 9Nof a ne tomwate ne nangamon desar, mpe nal ni mpeluk ma nmpan.
Nempa lere ne Yahudyar nir ler Sanari. 10Mpe mangfaret Yahudyar rfalak ber tomwate ma betno nangamon a ne, “Lere ye Yahudyar nir ler Sanari. Na Yahudyar nir ler Sanari tomwatar to bise ma rkarya, mpa kete mubare nim kire ne.”
11Nempa i nfalak, “Tomwate ma nafngamone yakw ne, ma nluan ma kubare ningw kire ma kmpwan.”
12Ne sir renrat, “Ise ma nluan ko ma mwal nim kire ma mpwan?”
13Nempa tomwate ma betno nangamon a ne to nafai feti ise ma nafngamone i fali tomwatar yadin mpa metryat motak e to nkeban Yesus lo.
14To dodo nof a ne Yesus natungan nor i a nbal na Ratu Ni Das Silai. Ne I nfalak ber i, “Mdwengar, mungamon lo nre? Mpa kete mose sale lo, nema kete kabain yatkar sa diat ko nlengan nof luryain a ne.”
15Ne tomwate ne nma burit ma nfalak ber mangfaret Yahudyar, “Makenar a kmi, tomwate ma nafngamone yakw ne iane Yesus.” 16Iane nwayat ma mangfaret Yahudyar rareke ma rose suse Yesus, fali I nafngamone tomwatar na tomwat Yahudyar nir ler Sanari.
17Nempa Yesus nfalak ber sir, “Amangw dedesar ma nkarya terik lere ye, mpa ka kose farane nbal.”
18Iane nwayat ma mangfaret Yahudyar rtafal ma rose ma rfen I. Sir rose farane fali I nlangas tetetkar na Yahudyar ni ler Sanari. To lan iane nempa nfalak a nbal feti Amany ber Ratu. Yesus nfalak farane iane feti I nose felany farlan Ratu.
Yesus natanuk na Ni karyayar ma Ni kuase
5:19-30
19Yesus nfalak ber mangfaret Yahudyar a ne, “Mdyengar fen ngamone safe ma kfwalak ye! Ni botuan e Yakw, Ratu Anaky to bise ma kose safe-safe klwarat Ningw mpempeang. Nempa ka kswalan safe ma Amangw nose ne, betno kose klwarat. Fali safe ma Amangw nose ne iane ma Ratu Anaky Yakw kose kbwal. 20Yakw kfwalak farane fali Amangw nkamis Anaky Yakw. Ma I nfatutu ber Yakw safe-safe ma koko I a nose. Ma keta I nfatutu ber Yakw kabain mpasalan silai ma nlengan nof a ne nbal, nema mimpriang ma msyalan kabanir a ne. 21Feleles farlan Amangw ma nafmorip a nbali tomwatar ma rmat lo, ma nal momorip ber sir, keta Yakw kose farane nbal ma kufmworip a kbwali ise motak klwarat Ningw mpempeang. 22Amangw to ntetak tomwate fen lese nir ngriar a nbal, nempa I nal kuase monuk ber Yakw ma ktwetak tomwatar nir ngriar. 23Amangw nose farane nema tomwatar monuk ralang Yakw farlan ma ralang I. Ise ma to nalang Anaky Yakw, iane feti i to nalang Amangw ma nsiduk Yakw nbal.
24Mdyengar fen ngamone safe ma kfwalak ye. Ni botuan e ise ma ndengar safe ma kfwalak ye, ma nalele I ma nsiduk Yakw, la nonri momorip dedesar. Ma Ratu keta to nukun i, fali nfair i nof mamate ma nal momorip dedesar ber i. 25Mdyengar fen ngamone safe ma kfwalak ye. Ni botuan e keta nait ni tewat, ma lere ye ni tewat lo feti tomwatar ma smwangtir a rmat a ne keta rdengar safe ma Yakw, Ratu Anaky kfwalak. Ma sir ma rdengar ma rose rlarat safe ma kfwalak a ne, keta ronri momorip dedesar. 26Ma feleles farlan Amangw Ni kuase ma nal momorip dedesar ber tomwatar, mpe I nal kuase ne ber Yakw nbal ma kal momorip ber tomwatar. 27Ma I nal kuase ber Yakw nbal ma ktwetak tomwatar nir ngriar, fali Yakw ye Tomwate Anaky. 28Mpa ka kete mimpriang safe ma kfwalak a ne, fali keta ni tewat e tomwatar monuk ma rmat a ne rdengar safe ma kfwalak. 29Sir ma rose kabain ngamonar a ne keta rmorip a rbali ma ronri momorip dedesar. Nempa sir ma rose kabain yatkar a ne keta rmorip a rbali ma Ratu nukun sir.
30Yakw to bise ma kose safe-safe klwarat koko Yakw Ningw mpempeang. Mpa ktwetak tomwatar nir ngriar klwarat safe ma Amangw nfatutu ber Yakw. Ma safe ma ktwetak a ne, ktwetak kor malonri fali to kose klwarat Ningw mpempeang nempa kose klwarat I ma nsiduk Yakw ne.”
Yesus nfalak na sir ma rafbotin na I
5:31-47
31“Farlan koko Yakw ma kfwalak safe-safe na Yakw, keta tomwatar to ralele safe ma kfwalak a ne. 32Nempa tomwat sa ma nfalak safe-safe na Yakw, iane Amangw. Ma Yakw kufai feti safe ma nfalak na Yakw ne botuan. 33Noak a ne kmi msyiduk tomwatar ketnir ma rti rakmat Yohanes ma renrat safe-safe na Yakw. Ma safe-safe ma nfalak na Yakw ne botuan. 34Nempa Yakw e to kpwerlu ma tomwatar rfalak safe-safe na Yakw la rafdiat Yakw nema tomwatar ralele. Yakw kfwalak safe ma Yohanes nfalak ber a kmi a ne, nema milele Yakw ma Ratu nfair a kmi. 35Noak ma Yohanes nor a kmi a ne, i farlan damar ma idak ma nodir a kmi. Kmi dalmir a rsenang ma msyalan ngaodir a ne nempa to dodo. 36Ma safe-safe ma Yakw kose ne nfatutu feti ise Yakw, mpa iane ma ubany nlengan nof safe ma Yohanes nfalak na Yakw. Fali safe-safe ma Ratu nal ber Yakw ma kwaryae ne la nfatutu feti I nsiduk Yakw. 37Ma Amangw ma nsiduk Yakw ne, ma I nfalak safe-safe na Yakw nbal. To lain sa ma mdyengar liriny, ma msyalan felany a fuky. 38Ma to mnyau Ni ngribatnir a ne na dalmir, fali to milele Yakw ma I nsiduk ber a kmi a ne. 39Kmi mireke ma mkyaul myal Kitap Lelerap dalam, fali mdyaun feti myose farane nema myonri momorip dedesar. Safo Kitap Lelerap a ne nfalak na Yakw. 40Nempa kmi to mpyeang ma mikmat Yakw ma myonri momorip dedesar a ne.
41Ma to kunriak ma tomwatar ralang Yakw. 42Fali kufai dalmir feti kmi to mkyamis Ratu. 43Amangw nsiduk Yakw ma nal Ni kuase ber Yakw, nempa kmi to mlyangun Yakw. Ma tomwat walyetar rma ror nir kuase e kmi mlyangun sir safo I to nsiduk sir. 44Ma keta kmi milele Yakw farpe? Kmi mpyeang lan ma tomwatar ralang a kmi, ma kmi myalang sir a nbal, nempa kmi to mireke ma Ratu nalang a kmi. 45Kmi mifliak feti keta kswoi kmi, ma Musa ye ma nafdiat a kmi na Amangw sounlury e? Tate nre! Fali ni botuan e Musa ye ma keta nsoi kmi. 46Farlan kmi milele Musa, botuan feti keta kmi milele Yakw nbal, fali i ye ma luryain e narengi safe-safe na Yakw lo. 47Nempa farlan kmi to milele safe ma Musa narengi na Yakw, keta to milele safe ma Yakw kfwalak a nbal.”
Currently Selected:
Yohanes 5: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
Yohanes 5
5
Yesus nafngamone mangamluktwar sa na ler Sanari
5:1-18
1Lama Yesus nose monuk ngrimpasalan a ne I nti kote Yerusalem ma nose tomwat Yahudyar nir ler silai. 2Na Yerusalem kloloku sa namin iane. Ma na seriny baldu e sifloyar lim a ramin. Kloloku ne ma Ibrani liriny e nfalak feti Betesda. Kloloku ne nlosir kote ne ni finru matan. Finru matan ye ma rafngare feti: “Finru matan Domba.” 3Na sifloyar a ne mangafansar yadin rarwa iane far matbolar, sabaloyar, ma mangamluktwar. [Sir ramin iane la rdaf ma weye ne nawawan. 4Fali far mpene ne biase Ratu Ni malaekat ntompur far kloloku ne ma nose ma weye ne nawawan. Ma ise ma ntompur baluan far kloloku ne dalam noak ma weye ne nawawan e keta nangamon desar boloka ni maninik safe-safe motak.] 5Na iane tomwat sabaloi sa ma namaninik ngarak buty tel resin wal e lo. 6Noak ma Yesus nsalan tomwate ne, I nafai feti namaninik dodo lo. Mpa nfalak, “Ko mpweang ma mungamon e?”
7Ne tomwate ne nfalak, “Maken noak ma weye ne nawawan to tomwate fen lese ma ntulung yakw ma ktwompur far kloloku ne dalam. Ma noak ma ktwi kloloku ne tomwat walyetar rtompur baluan lo.”
8Ne Yesus nfalak, “Mpwote ko, ma mwal nim mpeluk ma mpwan lo.” 9Nof a ne tomwate ne nangamon desar, mpe nal ni mpeluk ma nmpan.
Nempa lere ne Yahudyar nir ler Sanari. 10Mpe mangfaret Yahudyar rfalak ber tomwate ma betno nangamon a ne, “Lere ye Yahudyar nir ler Sanari. Na Yahudyar nir ler Sanari tomwatar to bise ma rkarya, mpa kete mubare nim kire ne.”
11Nempa i nfalak, “Tomwate ma nafngamone yakw ne, ma nluan ma kubare ningw kire ma kmpwan.”
12Ne sir renrat, “Ise ma nluan ko ma mwal nim kire ma mpwan?”
13Nempa tomwate ma betno nangamon a ne to nafai feti ise ma nafngamone i fali tomwatar yadin mpa metryat motak e to nkeban Yesus lo.
14To dodo nof a ne Yesus natungan nor i a nbal na Ratu Ni Das Silai. Ne I nfalak ber i, “Mdwengar, mungamon lo nre? Mpa kete mose sale lo, nema kete kabain yatkar sa diat ko nlengan nof luryain a ne.”
15Ne tomwate ne nma burit ma nfalak ber mangfaret Yahudyar, “Makenar a kmi, tomwate ma nafngamone yakw ne iane Yesus.” 16Iane nwayat ma mangfaret Yahudyar rareke ma rose suse Yesus, fali I nafngamone tomwatar na tomwat Yahudyar nir ler Sanari.
17Nempa Yesus nfalak ber sir, “Amangw dedesar ma nkarya terik lere ye, mpa ka kose farane nbal.”
18Iane nwayat ma mangfaret Yahudyar rtafal ma rose ma rfen I. Sir rose farane fali I nlangas tetetkar na Yahudyar ni ler Sanari. To lan iane nempa nfalak a nbal feti Amany ber Ratu. Yesus nfalak farane iane feti I nose felany farlan Ratu.
Yesus natanuk na Ni karyayar ma Ni kuase
5:19-30
19Yesus nfalak ber mangfaret Yahudyar a ne, “Mdyengar fen ngamone safe ma kfwalak ye! Ni botuan e Yakw, Ratu Anaky to bise ma kose safe-safe klwarat Ningw mpempeang. Nempa ka kswalan safe ma Amangw nose ne, betno kose klwarat. Fali safe ma Amangw nose ne iane ma Ratu Anaky Yakw kose kbwal. 20Yakw kfwalak farane fali Amangw nkamis Anaky Yakw. Ma I nfatutu ber Yakw safe-safe ma koko I a nose. Ma keta I nfatutu ber Yakw kabain mpasalan silai ma nlengan nof a ne nbal, nema mimpriang ma msyalan kabanir a ne. 21Feleles farlan Amangw ma nafmorip a nbali tomwatar ma rmat lo, ma nal momorip ber sir, keta Yakw kose farane nbal ma kufmworip a kbwali ise motak klwarat Ningw mpempeang. 22Amangw to ntetak tomwate fen lese nir ngriar a nbal, nempa I nal kuase monuk ber Yakw ma ktwetak tomwatar nir ngriar. 23Amangw nose farane nema tomwatar monuk ralang Yakw farlan ma ralang I. Ise ma to nalang Anaky Yakw, iane feti i to nalang Amangw ma nsiduk Yakw nbal.
24Mdyengar fen ngamone safe ma kfwalak ye. Ni botuan e ise ma ndengar safe ma kfwalak ye, ma nalele I ma nsiduk Yakw, la nonri momorip dedesar. Ma Ratu keta to nukun i, fali nfair i nof mamate ma nal momorip dedesar ber i. 25Mdyengar fen ngamone safe ma kfwalak ye. Ni botuan e keta nait ni tewat, ma lere ye ni tewat lo feti tomwatar ma smwangtir a rmat a ne keta rdengar safe ma Yakw, Ratu Anaky kfwalak. Ma sir ma rdengar ma rose rlarat safe ma kfwalak a ne, keta ronri momorip dedesar. 26Ma feleles farlan Amangw Ni kuase ma nal momorip dedesar ber tomwatar, mpe I nal kuase ne ber Yakw nbal ma kal momorip ber tomwatar. 27Ma I nal kuase ber Yakw nbal ma ktwetak tomwatar nir ngriar, fali Yakw ye Tomwate Anaky. 28Mpa ka kete mimpriang safe ma kfwalak a ne, fali keta ni tewat e tomwatar monuk ma rmat a ne rdengar safe ma kfwalak. 29Sir ma rose kabain ngamonar a ne keta rmorip a rbali ma ronri momorip dedesar. Nempa sir ma rose kabain yatkar a ne keta rmorip a rbali ma Ratu nukun sir.
30Yakw to bise ma kose safe-safe klwarat koko Yakw Ningw mpempeang. Mpa ktwetak tomwatar nir ngriar klwarat safe ma Amangw nfatutu ber Yakw. Ma safe ma ktwetak a ne, ktwetak kor malonri fali to kose klwarat Ningw mpempeang nempa kose klwarat I ma nsiduk Yakw ne.”
Yesus nfalak na sir ma rafbotin na I
5:31-47
31“Farlan koko Yakw ma kfwalak safe-safe na Yakw, keta tomwatar to ralele safe ma kfwalak a ne. 32Nempa tomwat sa ma nfalak safe-safe na Yakw, iane Amangw. Ma Yakw kufai feti safe ma nfalak na Yakw ne botuan. 33Noak a ne kmi msyiduk tomwatar ketnir ma rti rakmat Yohanes ma renrat safe-safe na Yakw. Ma safe-safe ma nfalak na Yakw ne botuan. 34Nempa Yakw e to kpwerlu ma tomwatar rfalak safe-safe na Yakw la rafdiat Yakw nema tomwatar ralele. Yakw kfwalak safe ma Yohanes nfalak ber a kmi a ne, nema milele Yakw ma Ratu nfair a kmi. 35Noak ma Yohanes nor a kmi a ne, i farlan damar ma idak ma nodir a kmi. Kmi dalmir a rsenang ma msyalan ngaodir a ne nempa to dodo. 36Ma safe-safe ma Yakw kose ne nfatutu feti ise Yakw, mpa iane ma ubany nlengan nof safe ma Yohanes nfalak na Yakw. Fali safe-safe ma Ratu nal ber Yakw ma kwaryae ne la nfatutu feti I nsiduk Yakw. 37Ma Amangw ma nsiduk Yakw ne, ma I nfalak safe-safe na Yakw nbal. To lain sa ma mdyengar liriny, ma msyalan felany a fuky. 38Ma to mnyau Ni ngribatnir a ne na dalmir, fali to milele Yakw ma I nsiduk ber a kmi a ne. 39Kmi mireke ma mkyaul myal Kitap Lelerap dalam, fali mdyaun feti myose farane nema myonri momorip dedesar. Safo Kitap Lelerap a ne nfalak na Yakw. 40Nempa kmi to mpyeang ma mikmat Yakw ma myonri momorip dedesar a ne.
41Ma to kunriak ma tomwatar ralang Yakw. 42Fali kufai dalmir feti kmi to mkyamis Ratu. 43Amangw nsiduk Yakw ma nal Ni kuase ber Yakw, nempa kmi to mlyangun Yakw. Ma tomwat walyetar rma ror nir kuase e kmi mlyangun sir safo I to nsiduk sir. 44Ma keta kmi milele Yakw farpe? Kmi mpyeang lan ma tomwatar ralang a kmi, ma kmi myalang sir a nbal, nempa kmi to mireke ma Ratu nalang a kmi. 45Kmi mifliak feti keta kswoi kmi, ma Musa ye ma nafdiat a kmi na Amangw sounlury e? Tate nre! Fali ni botuan e Musa ye ma keta nsoi kmi. 46Farlan kmi milele Musa, botuan feti keta kmi milele Yakw nbal, fali i ye ma luryain e narengi safe-safe na Yakw lo. 47Nempa farlan kmi to milele safe ma Musa narengi na Yakw, keta to milele safe ma Yakw kfwalak a nbal.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.