Lukas 1
1
Luryain
1:1-4
1-2Amangw Teofilus,
Tomwatar ketnir koko sir rsalan kabanir monuk lo ma Yesus nose nof luryain. Sir rafwibar monuk kabanir a ne. Ma tomwatar yadin rareke ma rarengi kabanir ma nose ber kit a ne lo. Sir ye rarengi farlan safe ma tdengar lo nof tomwatar ma rsalan a ne. 3Yakw kwenrat kulyole kabanir monuk a ne lo nof luryain. Mpa yakw kdwaun e nangafel farlan yakw kurengi iane monuk ma ralarat mpane sir na kitap sa dalam ber ko. 4Yakw kose farane, nema ko mufai feti safe ma raftutu ber ko a ne lo, botuan desar.
Malaekat Gabriel nafbotin na Yohanes mangadiris ni farawe dalamy
1:5-25
5Noak ma Herodes nose rai na propinsi Yudea, mangsompar sa nof klop Abia ngarany Zakharia. Sawany ngarany Elisabet, i a nbal nof dasdalam mangsompe.#1Taw. 24:10 6Radu nir momorip e, rafsenange Ratu dalamy, ma rlarat monuk Ratu Ni faretar ma tetetkar ma to rlanre fen lese nbal. 7Nempa radu to nir memey, fali Elisabet nmakw ma radu a ramtu lo.
8Na ler sa e, wayat ber Zakharia ni klope, mpa i nafmpwane ni karyae neluk mangsompe na Ratu Ni Das Silai. 9Fali noak ma sir rose onde rlarat mangsompar nir mpampane, onde ne nfufw ber Zakharia ma napu natan na Ratu Ni Das Silai dalam. 10Noak ma i napu natan, tomwatar yadin ramin burit ma rsampayang. 11Metryat e, Ratu Ni malaektar sa nafbotin i ber Zakharia. Malaekat a ne namdir snyompe ain ma napu natan a ne balisya fian. 12Noak ma Zakharia nsalan malaekat a ne i nmetryat ma namtaut. 13Nempa malaekat a ne nfalak ber i, “Zakharia, kete mumtaut! Fali Ratu nsaluk nim tatakar lo. Sawam Elisabet keta namtoranbabe kanak merwane, ma ka mufngare i a na Yohanes. 14Keta ko mswenang resi, ma tomwatar yadin keta rampumpuki sir fali rafrawe dalam kanak ne. 15Fali keta neluk Ratu Ni mangsiduk silai. Keta i to nenum desar anggur nre tuak. Noak ma lolone namin enany kampuny dalam, Ratu Smwangtany norang i lo.#Bil. 6:3 16Keta i nwayat ma tomwat Israelar yadin rbali sir ber Ratu. 17Keta i neluk Ratu Ni mangsiduk ma namkoran ma ni kuase farlan nabi Elia. Ma keta i nbalun ma naflawar dalamtene ber Mangnrur Silai nema tomwat Israelar rasusan nir momorip la rdaf Ratu Ni mamae. Ma keta nafngamone amar ror angkir nema rangamon a rbali. Tomwatar ma to rlarat Ratu keta nwayat ma rlarat Ratu. I nose farane, nema nasusan tomwatar dalmir ma rlangun Ratu.”#Mal. 4:5-6
18Ne Zakharia nenrat malaekat a ne, “Keta kufai farpe? Yakw e kumaken lo, ma sawangw e, nabatmaken a nbal lo.”
19Ne malaekat ne nfalak, “Yakw ye Gabriel. Yakw klwangun Ratu, ma I nsiduk yakw ma kufbwotin Ibar Ngamone ye ber ko.#Dan. 8:16; 9:21 20Keta nait ni tewat e, safe ma yakw kfwalak ye I nafdiat. Fali ko to mulele yakw mpa keta ko mumomou terik safe ma kfwalak ye I nafdiat.”
21Tomwatar rdaf dedesar Zakharia. Sir monuk rafalak na dalmir feti, safema dodo desar i a na Ratu Ni Das Silai dalam ye. 22Noak ma nma burit e, i namomou lo, mpa i nampuat lan limnir ber sir. Tomwatar rsalan farane sir rafai feti i nsalan kabain mpasalan lo na Ratu Ni Das Silai dalam.
23Lama ni wayat omp na Ratu Ni Das Silai, nbali i far das. 24To dodo a nbal e sawany Elisabet a nlenr. I namin lan das dalam doan bulnar lim. 25Ne i nfalak, “Ratu nlompang yakw lo, ma I npote soungw nof tomwatar lo.”
Malaekat Gabriel nafbotin na Yesus Ni farawe dalamy
1:26-38
26Nait ma Elisabet nakebansou i ma ni bulnar nem e, Ratu nluan malaekat Gabriel ma nti kote Nasaret, na propinsi Galilea. 27I nti nakmat batdarar sa, ngarany Maria. Batdare ne natnyiman lo nor merwane ngarany Yusuf, nof rai Daud ni dasdalam.#Mat. 1:18 28Malaekat ne nti nakmat Maria ma nfalak, “Ngamone ber ko, Ratu nal nimet ber ko lo ma I nor ko dedesar.”
29Noak ma Maria ndengar ngribatnir a ne i nampriang ma nfalak na dalamy feti, ngribatnir a ne isiny farpe. 30Ne malaekat ne nfalak, “Maria! Kete mumtaut, fali Ratu nal nimet ber ko lo. 31Keta mukebansou ma mumtoranbabe kanak merwane, ma ka mufngare I a na Yesus.#Mat. 1:21 32Keta I neluk tomwat silai ma rtar feti Ratu Anaky Mangamin medase. Ma keta Ratu nfair I neluk Rai farlan empuny nusiny rai Daud.#2Sam. 7:12; 16; Yes. 9:6 33Keta I neluk Rai ma nfarete tomwat Israelar monuk, iane Yakub empuny nusiny, terik ma dedesar. Ma Ni ain farete ne to terik.”
34Ne Maria nfalak ber malaekat a ne, “Yakw to kufsau fuky ma kukebansou farpe?”
35Ne malaekat a ne nfalak, “Keta Ratu Smwangtany ntompur ber ko, ma Ratu Mangamin medase Ni kuase nlitan ko. Iane nwayat ma kanak ma mumtoranbabe I a ne keta rtar I a na Ratu Anaky Manglerap. 36Mswalan, waim Elisabet a ne boloka tomwatar rfalak feti nmakw ma nabatmaken lo, nempa nakebansou i e, kanak merwane, ma ni bulnar nem lo. 37Fali Ratu bise ma nose safe-safe motak.”#Kej. 18:14
38Ne Maria nfalak, “Yakw ye Ratu Ni mangkaryae. Ma klwangun safe motak ma Ratu nal ber yakw.” Mpene malaekat a ne nti a ntate i.
Maria nti naninuk Elisabet
1:39-45
39Lama malaekat a ne nti a ntate Maria, to dodo a nbal e, Maria nasnyalik ma nti kote sa ma namin bubuar na propinsi Yudea. 40Na iano i nti Zakharia ni das. Lama nait das dalam e, nose salam ber Elisabet. 41Noak ma Elisabet ndengar Maria ni salam a ne, anaky ma namin kampuny dalam a ne naforak i. Ma Ratu Smwangtany norang Elisabet. 42Mpa nfalak nor liriny silai, “Ratu nberkat ko lo nlengan nof batar monuk, ma nberkat a nbal ko angkam ma namin kampum dalam! 43Ise yakw ye, mampe ningw Mangnrur Silai enany ko mwa muninuk yakw? 44Noak ma mose salam ber yakw e kanak ma namin kampungw dalam ye naforak i fali nsenang resi. 45Ngamone ber ko fali mulele feti safe ma Mangnrur Silai ma nfalak ber ko a ne la I nafdiat!”
Maria nbeu la ndangin Ratu
1:46-56
46Ne Maria nleru,
“Yakw kdwangin Ratu ninr Mangnrure kor dalangw kateman,#1Sam. 2:1-10
47yakw kswenang resi, fali Ratu nma ma nfair yakw.
48Yakw ye Ni mangkaryae ma to ubany sasaf nempa I dedesar ma nsalan yakw.
Ntabw nof lere ye keta tomwatar monuk rfalak feti, ngamone desar ber yakw.#1Sam. 1:11
49Fali Ratu Mangkuase nose kabain silayar ber yakw lo. Ma ngarany a ne nanglerap.
50Ratu nfatutu Ni ngamone dedesar ber tomwatar ma ralang I titerik empnir nusnir.#Kej. 22:12
51I nose kabain silayar nor Ni kuase,
ma nakese nasame tomwatar ma dalmir medase.
52I ntolar rayar nof nir kaderar, ma nal kuase ber tomwat marumtar.
53Ratu nal tnyam ngafelar ma nlie nlengan ber tomwatar ma ramlafar, ma natian mangoskayar ma to ronry sasaf.
54-55Ratu ntulung Ni tomwat Israelar.
I nanremi Ni yoyoding ma nose ber nusninrar Abraham ma ni dasdalam feti keta I nfatutu Ni ngamone dedesar ber sir.”#Kej. 17:7
56Maria namin Elisabet ni das ketla bulnar tel, betno nbali i far ni pnue.
Ramtoranbabe Yohanes mangadiris
1:57-66
57Nait ni tewat ma Elisabet namtoranbab. Ne namtoranbabe kanak merwane. 58Tomwatar na ni das seriny baldu ma urany wainy rdengar feti Ratu nfatutu dalamy ngamone ber Elisabet lo, mpa dalmir senange ror i a nbal.
59Noak ma memeye ne ni lerar wal, sir a ne rma ma rsalan ma rsunat i. Sir rose ma rafngare i a na Zakharia, rlarat amany ngarany,#Im. 12:3 60nempa enany nfalak, “Kete! Ka mifngare i a na Yohanes.”
61Ne sir rfalak, “Uram waim e, to kekes ma ngarnir farane.” 62Ne sir rampuat limnir ma renrat Zakharia, “Ko mpweang ma rafngare i a na ise?”
63Ne Zakharia nampuat limnir ma ntak batyar sa ma narengi ngarany a na. I narengi feti, “Ngarany Yohanes.” Mpa sir monuk rampriang. 64Lama narengi monuk ngare ne bise ma natanuk desar, ma ndangin Ratu.
65Tomwatar monuk ma ramin ain a ne ramtaut ma rose alang ber Ratu ma ansaur a ne nsor monuk buburir na propinsi Yudea. 66Tomwatar monuk ma rdengar farane, raenrat na dalmir, “Keta ler famudi e, i neluk safe ye!” Sir rfalak farane fali rafai feti Ratu Ni kuase nor i.
Zakharia nbeu la ndangin Ratu
1:67-80
67Ratu Smwangtany norang Yohanes amany Zakharia, mpa nafbotin snyurat nof Ratu ma nfalak,
68“Mya ma tdangin Ratu ninr Mangnrure, I a ne tomwat Israelar nir Ratu,
fali I nma lo ma nfair Ni tomwatar kit.
69I nsiduk Tomwatar sa ma Ni kuase silai ma nma ma nfair kit.
I ye rai Daud ni dasdalam. Ma rai Daud ye Ratu Ni mangkarya luryain a ne.
70Luryain a ne Ratu nfalak ber Ni nabyar
ma nfil sir a ne lo feti,
71Keta I nalin kalin kit nof ninr muswar
ma nof tomwatar monuk ma to rmpeang kit.
72I nfatutu Ni dalamy ngamone ber nusninrar a ne
ma nafdiat Ni yoyoding lelerap.
73-74Ratu nyoding lo ber nusninrar Abraham feti,
keta I nalin kalin kit nof ninr muswar
nema to tamtaut ma tsampayang.
75Noak ma lolone tmorip a na saryamprene ye, kit teluk Ratu Ni tomwatar ma tkarya ber lan I ma tose lan kabain ngamonar ma tafsenange dalamy.
76Ma Yohanes, yakw anakw ko, keta tomwatar rfalak ‘Ko ye, Ratu Mangamin medase Ni mangsiduk.’#Mal. 3:1
Fali keta ko mbwalun ma muflawar dalamtene ber Mangnrur Silai ma keta nlanre.
77Keta ko mufbotin ber Ratu Ni tomwatar feti Ratu bise nlure nir salar ma nfair sir.
78Kit ninr Ratu nma ma nfair kit,
fali dalamy nangamon resi ma nkamis kit a nbal.
Ma keta Tomwate ma Ratu nsiduk I ma nfair kit a ne farlan lere ma nma das na bobolisin,
79ma nodir tomwatar ma rmorip a na makrokap dalam ma ramtaut mamate. I nrure kit far dalamten maline.”#Yes. 9:1
80Zakharia anaky a ne ntafal ma naslyai ma ni andaun ngamone. Ma dalamy e namkoran a nbal. I namin ain letkape, titerik ni tewat ma nbotin ma nafbotin Ratu Ni snyurat ber tomwat Israelar.
Currently Selected:
Lukas 1: YMD
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
Lukas 1
1
Luryain
1:1-4
1-2Amangw Teofilus,
Tomwatar ketnir koko sir rsalan kabanir monuk lo ma Yesus nose nof luryain. Sir rafwibar monuk kabanir a ne. Ma tomwatar yadin rareke ma rarengi kabanir ma nose ber kit a ne lo. Sir ye rarengi farlan safe ma tdengar lo nof tomwatar ma rsalan a ne. 3Yakw kwenrat kulyole kabanir monuk a ne lo nof luryain. Mpa yakw kdwaun e nangafel farlan yakw kurengi iane monuk ma ralarat mpane sir na kitap sa dalam ber ko. 4Yakw kose farane, nema ko mufai feti safe ma raftutu ber ko a ne lo, botuan desar.
Malaekat Gabriel nafbotin na Yohanes mangadiris ni farawe dalamy
1:5-25
5Noak ma Herodes nose rai na propinsi Yudea, mangsompar sa nof klop Abia ngarany Zakharia. Sawany ngarany Elisabet, i a nbal nof dasdalam mangsompe.#1Taw. 24:10 6Radu nir momorip e, rafsenange Ratu dalamy, ma rlarat monuk Ratu Ni faretar ma tetetkar ma to rlanre fen lese nbal. 7Nempa radu to nir memey, fali Elisabet nmakw ma radu a ramtu lo.
8Na ler sa e, wayat ber Zakharia ni klope, mpa i nafmpwane ni karyae neluk mangsompe na Ratu Ni Das Silai. 9Fali noak ma sir rose onde rlarat mangsompar nir mpampane, onde ne nfufw ber Zakharia ma napu natan na Ratu Ni Das Silai dalam. 10Noak ma i napu natan, tomwatar yadin ramin burit ma rsampayang. 11Metryat e, Ratu Ni malaektar sa nafbotin i ber Zakharia. Malaekat a ne namdir snyompe ain ma napu natan a ne balisya fian. 12Noak ma Zakharia nsalan malaekat a ne i nmetryat ma namtaut. 13Nempa malaekat a ne nfalak ber i, “Zakharia, kete mumtaut! Fali Ratu nsaluk nim tatakar lo. Sawam Elisabet keta namtoranbabe kanak merwane, ma ka mufngare i a na Yohanes. 14Keta ko mswenang resi, ma tomwatar yadin keta rampumpuki sir fali rafrawe dalam kanak ne. 15Fali keta neluk Ratu Ni mangsiduk silai. Keta i to nenum desar anggur nre tuak. Noak ma lolone namin enany kampuny dalam, Ratu Smwangtany norang i lo.#Bil. 6:3 16Keta i nwayat ma tomwat Israelar yadin rbali sir ber Ratu. 17Keta i neluk Ratu Ni mangsiduk ma namkoran ma ni kuase farlan nabi Elia. Ma keta i nbalun ma naflawar dalamtene ber Mangnrur Silai nema tomwat Israelar rasusan nir momorip la rdaf Ratu Ni mamae. Ma keta nafngamone amar ror angkir nema rangamon a rbali. Tomwatar ma to rlarat Ratu keta nwayat ma rlarat Ratu. I nose farane, nema nasusan tomwatar dalmir ma rlangun Ratu.”#Mal. 4:5-6
18Ne Zakharia nenrat malaekat a ne, “Keta kufai farpe? Yakw e kumaken lo, ma sawangw e, nabatmaken a nbal lo.”
19Ne malaekat ne nfalak, “Yakw ye Gabriel. Yakw klwangun Ratu, ma I nsiduk yakw ma kufbwotin Ibar Ngamone ye ber ko.#Dan. 8:16; 9:21 20Keta nait ni tewat e, safe ma yakw kfwalak ye I nafdiat. Fali ko to mulele yakw mpa keta ko mumomou terik safe ma kfwalak ye I nafdiat.”
21Tomwatar rdaf dedesar Zakharia. Sir monuk rafalak na dalmir feti, safema dodo desar i a na Ratu Ni Das Silai dalam ye. 22Noak ma nma burit e, i namomou lo, mpa i nampuat lan limnir ber sir. Tomwatar rsalan farane sir rafai feti i nsalan kabain mpasalan lo na Ratu Ni Das Silai dalam.
23Lama ni wayat omp na Ratu Ni Das Silai, nbali i far das. 24To dodo a nbal e sawany Elisabet a nlenr. I namin lan das dalam doan bulnar lim. 25Ne i nfalak, “Ratu nlompang yakw lo, ma I npote soungw nof tomwatar lo.”
Malaekat Gabriel nafbotin na Yesus Ni farawe dalamy
1:26-38
26Nait ma Elisabet nakebansou i ma ni bulnar nem e, Ratu nluan malaekat Gabriel ma nti kote Nasaret, na propinsi Galilea. 27I nti nakmat batdarar sa, ngarany Maria. Batdare ne natnyiman lo nor merwane ngarany Yusuf, nof rai Daud ni dasdalam.#Mat. 1:18 28Malaekat ne nti nakmat Maria ma nfalak, “Ngamone ber ko, Ratu nal nimet ber ko lo ma I nor ko dedesar.”
29Noak ma Maria ndengar ngribatnir a ne i nampriang ma nfalak na dalamy feti, ngribatnir a ne isiny farpe. 30Ne malaekat ne nfalak, “Maria! Kete mumtaut, fali Ratu nal nimet ber ko lo. 31Keta mukebansou ma mumtoranbabe kanak merwane, ma ka mufngare I a na Yesus.#Mat. 1:21 32Keta I neluk tomwat silai ma rtar feti Ratu Anaky Mangamin medase. Ma keta Ratu nfair I neluk Rai farlan empuny nusiny rai Daud.#2Sam. 7:12; 16; Yes. 9:6 33Keta I neluk Rai ma nfarete tomwat Israelar monuk, iane Yakub empuny nusiny, terik ma dedesar. Ma Ni ain farete ne to terik.”
34Ne Maria nfalak ber malaekat a ne, “Yakw to kufsau fuky ma kukebansou farpe?”
35Ne malaekat a ne nfalak, “Keta Ratu Smwangtany ntompur ber ko, ma Ratu Mangamin medase Ni kuase nlitan ko. Iane nwayat ma kanak ma mumtoranbabe I a ne keta rtar I a na Ratu Anaky Manglerap. 36Mswalan, waim Elisabet a ne boloka tomwatar rfalak feti nmakw ma nabatmaken lo, nempa nakebansou i e, kanak merwane, ma ni bulnar nem lo. 37Fali Ratu bise ma nose safe-safe motak.”#Kej. 18:14
38Ne Maria nfalak, “Yakw ye Ratu Ni mangkaryae. Ma klwangun safe motak ma Ratu nal ber yakw.” Mpene malaekat a ne nti a ntate i.
Maria nti naninuk Elisabet
1:39-45
39Lama malaekat a ne nti a ntate Maria, to dodo a nbal e, Maria nasnyalik ma nti kote sa ma namin bubuar na propinsi Yudea. 40Na iano i nti Zakharia ni das. Lama nait das dalam e, nose salam ber Elisabet. 41Noak ma Elisabet ndengar Maria ni salam a ne, anaky ma namin kampuny dalam a ne naforak i. Ma Ratu Smwangtany norang Elisabet. 42Mpa nfalak nor liriny silai, “Ratu nberkat ko lo nlengan nof batar monuk, ma nberkat a nbal ko angkam ma namin kampum dalam! 43Ise yakw ye, mampe ningw Mangnrur Silai enany ko mwa muninuk yakw? 44Noak ma mose salam ber yakw e kanak ma namin kampungw dalam ye naforak i fali nsenang resi. 45Ngamone ber ko fali mulele feti safe ma Mangnrur Silai ma nfalak ber ko a ne la I nafdiat!”
Maria nbeu la ndangin Ratu
1:46-56
46Ne Maria nleru,
“Yakw kdwangin Ratu ninr Mangnrure kor dalangw kateman,#1Sam. 2:1-10
47yakw kswenang resi, fali Ratu nma ma nfair yakw.
48Yakw ye Ni mangkaryae ma to ubany sasaf nempa I dedesar ma nsalan yakw.
Ntabw nof lere ye keta tomwatar monuk rfalak feti, ngamone desar ber yakw.#1Sam. 1:11
49Fali Ratu Mangkuase nose kabain silayar ber yakw lo. Ma ngarany a ne nanglerap.
50Ratu nfatutu Ni ngamone dedesar ber tomwatar ma ralang I titerik empnir nusnir.#Kej. 22:12
51I nose kabain silayar nor Ni kuase,
ma nakese nasame tomwatar ma dalmir medase.
52I ntolar rayar nof nir kaderar, ma nal kuase ber tomwat marumtar.
53Ratu nal tnyam ngafelar ma nlie nlengan ber tomwatar ma ramlafar, ma natian mangoskayar ma to ronry sasaf.
54-55Ratu ntulung Ni tomwat Israelar.
I nanremi Ni yoyoding ma nose ber nusninrar Abraham ma ni dasdalam feti keta I nfatutu Ni ngamone dedesar ber sir.”#Kej. 17:7
56Maria namin Elisabet ni das ketla bulnar tel, betno nbali i far ni pnue.
Ramtoranbabe Yohanes mangadiris
1:57-66
57Nait ni tewat ma Elisabet namtoranbab. Ne namtoranbabe kanak merwane. 58Tomwatar na ni das seriny baldu ma urany wainy rdengar feti Ratu nfatutu dalamy ngamone ber Elisabet lo, mpa dalmir senange ror i a nbal.
59Noak ma memeye ne ni lerar wal, sir a ne rma ma rsalan ma rsunat i. Sir rose ma rafngare i a na Zakharia, rlarat amany ngarany,#Im. 12:3 60nempa enany nfalak, “Kete! Ka mifngare i a na Yohanes.”
61Ne sir rfalak, “Uram waim e, to kekes ma ngarnir farane.” 62Ne sir rampuat limnir ma renrat Zakharia, “Ko mpweang ma rafngare i a na ise?”
63Ne Zakharia nampuat limnir ma ntak batyar sa ma narengi ngarany a na. I narengi feti, “Ngarany Yohanes.” Mpa sir monuk rampriang. 64Lama narengi monuk ngare ne bise ma natanuk desar, ma ndangin Ratu.
65Tomwatar monuk ma ramin ain a ne ramtaut ma rose alang ber Ratu ma ansaur a ne nsor monuk buburir na propinsi Yudea. 66Tomwatar monuk ma rdengar farane, raenrat na dalmir, “Keta ler famudi e, i neluk safe ye!” Sir rfalak farane fali rafai feti Ratu Ni kuase nor i.
Zakharia nbeu la ndangin Ratu
1:67-80
67Ratu Smwangtany norang Yohanes amany Zakharia, mpa nafbotin snyurat nof Ratu ma nfalak,
68“Mya ma tdangin Ratu ninr Mangnrure, I a ne tomwat Israelar nir Ratu,
fali I nma lo ma nfair Ni tomwatar kit.
69I nsiduk Tomwatar sa ma Ni kuase silai ma nma ma nfair kit.
I ye rai Daud ni dasdalam. Ma rai Daud ye Ratu Ni mangkarya luryain a ne.
70Luryain a ne Ratu nfalak ber Ni nabyar
ma nfil sir a ne lo feti,
71Keta I nalin kalin kit nof ninr muswar
ma nof tomwatar monuk ma to rmpeang kit.
72I nfatutu Ni dalamy ngamone ber nusninrar a ne
ma nafdiat Ni yoyoding lelerap.
73-74Ratu nyoding lo ber nusninrar Abraham feti,
keta I nalin kalin kit nof ninr muswar
nema to tamtaut ma tsampayang.
75Noak ma lolone tmorip a na saryamprene ye, kit teluk Ratu Ni tomwatar ma tkarya ber lan I ma tose lan kabain ngamonar ma tafsenange dalamy.
76Ma Yohanes, yakw anakw ko, keta tomwatar rfalak ‘Ko ye, Ratu Mangamin medase Ni mangsiduk.’#Mal. 3:1
Fali keta ko mbwalun ma muflawar dalamtene ber Mangnrur Silai ma keta nlanre.
77Keta ko mufbotin ber Ratu Ni tomwatar feti Ratu bise nlure nir salar ma nfair sir.
78Kit ninr Ratu nma ma nfair kit,
fali dalamy nangamon resi ma nkamis kit a nbal.
Ma keta Tomwate ma Ratu nsiduk I ma nfair kit a ne farlan lere ma nma das na bobolisin,
79ma nodir tomwatar ma rmorip a na makrokap dalam ma ramtaut mamate. I nrure kit far dalamten maline.”#Yes. 9:1
80Zakharia anaky a ne ntafal ma naslyai ma ni andaun ngamone. Ma dalamy e namkoran a nbal. I namin ain letkape, titerik ni tewat ma nbotin ma nafbotin Ratu Ni snyurat ber tomwat Israelar.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.