မဿဲ 12
12
ဒန်းနေ့ ပြဿနာကြောန်း
(မာကု ၂.၂၃–၂၈; လုကာ ၆.၁–၅)
1ဒန်းနေ့မာ ယေရှုဟှာ ဂျောင်စဗားလယ်ဂွမ့်လေဟှို ဖြတ်ရှော့‑က်ဟှားဟှယ်။ ကိုယ်တော့်ရဲ့ တဗဲ့တော်လေဟှာ ရရာတိုင်း ဗိုက်ဆာဂေ့ဟှိကြောန့် ဂျောင်စဗားနှံလေဟှို ဆွတ်ဘီးစားဂေ့လေဟှယ်။ 2အယ်မူဇာဟှို ဖာရိရှဲလေဗြင်ဟှူ ခီမာ “ကေ့ဂေ့၊ ကိုယ်တော်ရဲ့ တဗဲ့တော်လေဟှာ ဒန်းနေ့မာ လောက်အပ်ဘဲဟှူဇာလေဟှို လောက်နေဂေ့ဘီ!” ဆိုဘီး ယေရှုဟှို ပြောဂေ့လေဟှယ်။
3ယေရှုဟှ “ဒါဝိဒ်ဟှာ သူ့ပေါန်းဖော်လေနတူးဒူ ဗိုက်ဆာလာဟှူ ခီမာ ဖယ်မူမျိုး လောက်ဟှားဟှယ် ဆိုဇာဟှို နန်းနို့ လောင်းဝ ဖတ်ဖူးဂေ့ဟှလော။ 4သူ့န သူ့ပေါန်းဖော်လေဟှာ ဘုရားသခင်ရဲ့ ဗိမာန်တော်ဟှို ဝမ်ဘီး သူလည်းစားမအပ်၊ သူ့ပေါန်းဖော်လေလည်း စားအပ်ဘဲဟှူ၊ ဘုရားသခင်ဟှို ဆစ်ကပ်ဟှားဟှူ မုဟှို ပညတ်တရားဟှို ဆန့်ကျင်ဘီး စားဂေ့လေဟှယ်။ အယ်မုဟှာ ယဇ်ပုရောဟိတ်လေဘဲ့ စားအပ်လေဟှယ်။ 5ယဇ်ပုရောဟိတ်လေလည်း ဒန်းနေ့မာ ဗိမာန်တော်မာ ဒန်းနေ့နဆိုင်ဟှူ ပညတ်ဟှို ခ္လိုးဖော့‑က်ဟှူလည်းဘဲ့ ပြစ်ဖြစ်ဘဲနေဇာဟှို မောရှေရဲ့ ပညတ္တိကျမ်းစာမာ ဖတ်ဖူးဟှလော။ 6ငါပြောမယ်၊ အယ်ရပ်မာ ဗိမာန်တော်ထတ် ပိုဘီးကီးမြတ်ဟှူဇာ ရှိလေဟှယ်။ 7#မ ၉.၁၃‘ယဇ်ပူဇော်ဇာထတ် သနားကြင်နာမှုဟှို ငါပိုနှစ်သက်ဟှယ်။’ အယ်ကျမ်းစာဟှို နန်းနို့နားလည်ဟှယ် ဆိုဟှာ ပြစ်မှေ့ဘဲဟှူ သူလေဟှို ပြစ်တန်စီရင်လေ့ဟှို့ မှုဟှ။ 8ဖြားဖြစ်ကြောန့်နူးဆိုဟှာ လူ့ရဲ့သားဟှာ ဒန်းနေ့ရဲ့ သခင်ဖြစ်ဟှယ်” ဆိုဘီး မိန့်တော်မူလေဟှယ်။
လတ်တဖတ် သေနေဟှူ လူတယော့‑က်ကြောန်း
(မာကု ၃.၁–၆; လုကာ ၆.၆–၁၁)
9ယေရှုဟှာ အယ်ရပ်ဟှ ကြွဟှားဘီးဟှာ ဝါလယ်ဇရပ်ထဲဟှို ဝမ်လေဟှယ်။ 10အယ်နေရာမာ လတ်တဖတ်သေနေဟှူ လူတယော့‑က်ရှိနေလေဟှယ်။ တချို့လူလေဟှာ ယေရှုဟှို ပြစ်တန်စွပ်စွဲရှင်ဟှိကြောန့် “ဒန်းနေ့မာ နာရောဂါဟှို ကုသပေးဇာဟှာ ပညတ်တော်ဟှို ဆန့်ကျင်ဇာမှုဟှလော” ဆိုဘီး မေးလျှော့‑က်ဂေ့လေဟှယ်။
11 #
လု ၁၄.၅
ယေရှုဟှ “တကယ်ဟှိ နန်းနို့မာ သိုးတကောန်ဘဲ့ရှိဟှယ်။ အယ်သိုးဟှာ ဒန်းနေ့မာ တွမ်းထဲဟှို က္လဟှားဟှယ် ဆိုဟှာ နန်းနို့ဟှာ ဆွဲဒန်ဘဲန နေဟှို့လော။ 12လူဟှာ သိုးထတ်ပိုဘီး မြတ်လေဟှယ်! အယ်ကြောန့် နို့လေရဲ့ ပညတ်တော်ဟှာ ဒန်းနေ့မာ ကယ်တန်ပေးဟှို့ ခွမ့်ပြုဟှားဟှယ်” ဆိုဘီး မိန့်တော်မူလေဟှယ်။ 13အယ်ဘီးန လတ်သေနေဟှူသူဟှို “နန့်ရဲ့ လတ်ဟှို ဆန့်လိုက်” ဆိုဘီး ပြောလေဟှယ်။
အယ်သူဟှာ သူ့လတ်ဟှို ဆန့်လိုက်ဘီးန ကျန်ဟှူလတ်တဖတ်မျိုး ကောန်းတိုင်း ပ္လန်ဖြစ်ဟှားလေဟှယ်။
14အယ်ဘီးန ဖာရိရှဲလေဟှာ ထွပ်ဟှားဘီး ယေရှုဟှို သတ်ဟှို့တွပ် ကြံစည်ဂေ့လေဟှယ်။
ဘုရားသခင် ဝီးချယ်ဟှူ စေခံကြောန်း
15အယ်မျိုး ကြံစည်ဟှားဇာဟှို ယေရှုသိတော်မူဟှူ ခီမာ တခြားနေရာဟှို ထွပ်ကြွဟှားလေဟှယ်။ လူအောက်ဂီးလည်းဘဲ့ နော့‑က်တော်ဟှို လိုက်ဟှားဂေ့ဟှယ်။ ကိုယ်တော်ဟှာ သူးနို့လေရဲ့ နာရောဂါလေ အားလောင်းဂူဟှို ပျော့‑က်ကင်းစေလေဟှယ်။ 16သူ့ကြောန်းရာလေဟှို ဖယ်သူ့ဟှိုလည်း ပြောဂေ့ဘဲဟှို့တွပ် မိန့်ပေးတော်မူလေဟှယ်။ 17အယ်မူမျိုး မိန့်ပေးဟှားဇာဟှာ ပရောဖက် ဟေရှာယအားဖြင့် ဘုရားသခင် ပေးဟှားဟှူ ဗျာဒိတ်တော် ပ္လဲ့ဇောင်ဟှို့တွပ် ဖြစ်လေဟှယ်။ ဗျာဒိတ်တော်ဟှ၊
18“ငါမြတ်နိုးဘီး ရှစ်ရဟှူ၊ ငါဝီးချယ်ဟှားဟှူ
ငါ့ရဲ့ စေခံဟှို ကေ့ရှုဂေ့ပါ။
ငါ့ဝိညာဉ်တော်ဟှို အယ်သူထတ်ဟှို ငါစေလွှတ်မယ်။
အယ်သူဟှာ လူမျိုးတကာလေဟှို တရားပေးလေ့မယ်။
19ငြင်းခူဇာလေ၊ အော်ဟစ်ဇာလေဟှို လောက်ဟှ။
လမ်းမာလည်း သူ့ရဲ့အသံဟှို ဖယ်သူဟှိုလည်း ကြားစေဟှ။
20သူဟှာ ကွေ့ကော့‑က်ဟှူ ကျူဗန်ဟှိုမခ္လိုး၊
မီးခိုးများဟှူ မီးဇာဟှိုလည်း သတ်ဘဲန၊
တရားမျှတမှုဟှို အောန်မြင်ဟှို့တွပ် ပို့ဆောန်လေ့မယ်၊
21သူ့ရဲ့နာမဟှိုလည်း လူမျိုးတကာလေ မျှော်လင့်လေ့မယ်” ဆိုဘီး ဟောဟှားလေဟှယ်။
ယေရှုန ဗေလဇေဗုလကြောန်း
(မာကု ၃.၂၀–၃၀; လုကာ ၁၁.၁၄–၂၃)
22အယ်ခီမာ နတ်ဆိုးဝမ်ပူးနေဟှူ မျစ်စိကန်းဘီး စကားအနေဟှူ လူတယော့‑က်ဟှို ယေရှုနားဟှို ခေါ်ဆောန်လာဂေ့လေဟှယ်။ ယေရှုဟှာ နတ်ဆိုးဟှို နှန်ထုလိုက်ဟှူကြောန့် အယ်သူဟှာ မျစ်စိဗြင်လာဘီး စကားပြောလေဟှယ်။ 23လူအောက်ဂီးဟှာ ရရာတိုင်း အံ့ဩဟှားဘီးဟှာ “အယ်သူဟှာ ဒါဝိဒ်ရဲ့သားတော် ဖြစ်လေ့မယ်လော” ဆိုဘီး မေးဂေ့လေဟှယ်။
24 #
မ ၉.၃၄; ၁၀.၂၅ အယ်မူဇာလေဟှို ဖာရိရှဲလေကြားဟှူ ခီမာ “အယ်သူဟှာ နတ်ဆိုးခေါန်းဆောန် ဗေလဇေဗုလဟှို အားကိုးဘီးဟှာ နတ်ဆိုးလေဟှို နှန်ထုဟှယ်” ဆိုဘီး ပြောဆိုဂေ့လေဟှယ်။
25ယေရှုဟှာ အယ်သူလေရဲ့ စိနေသဘောထားဟှို သိနေဟှိကြောန့် “နိုင်ငံတနိုင်ငံဟှာ ရှင်းရှင်း တိုက်ခိုက်ဘီး ကွဲပြားနေမယ် ဆိုဟှာ အယ်နိုင်ငံဟှာ ကြာခန် ပျစ်စီးလေ့မယ်။ အယ်မူမျိုးဘဲ့ လူလေစိဝန်းကွဲပြားဘီး ရှင်းရှင်း တိုက်ခိုက်နေမယ် ဆိုဟှာ အယ်ဗြို့၊ အယ်အီထောန်ဟှာ ပျစ်စီးလေ့မယ်။ 26စာတန်ရဲ့ အောက်စိုးမှုဟှို ဝန်ခံဟှူသူလေဟှာ ရှင်းရှင်း တိုက်ခိုက်ဘီး ကွဲပြားနေမယ် ဆိုဟှာ သူးနို့နိုင်ငံဟှာ ဖယ်မူမျိုးလည်း တည်မြဲနိုင်ဟှို့မှုဟှ! 27ငါဟှာ နတ်ဆိုးခေါန်းဆောန် ဗေလဇေဗုလဟှို အားကိုးဘီးဟှာ နတ်ဆိုးလေဟှို နှန်ထုဟှယ် ဆိုဟှာ နန်းနို့တဗဲ့လေဟှာ ဖယ်သူ့ဟှို အားကိုးဘီးဟှာ နှန်ထုဂေ့နူး။ နန်းနို့လေ မှားယွင်းနေဟှယ် ဆိုဇာဟှို နန်းနို့တဗဲ့လေ ပြုမူဟှ သတ်သေပြနေဟှယ်! 28ငါဟှာ ဘုရားသခင်ရဲ့ ဝိညာဉ်တော်ဟှို အားကိုးဘီးဟှာ နတ်ဆိုးလေဟှို နှန်ထုဟှယ် ဆိုဟှာ နန်းနို့လေတွပ် ဘုရားသခင်ရဲ့ နိုင်ငံတော် တည်ဟှို့ခီ ရော့‑က်လေဘီ။”
29“ဖယ်သူလည်း ခွန်အားကီးဟှူလူဟှို ရင်ဦးဆောင်း ကြိုးန တောက်ဘဲန သူ့အီထဲဟှို ဝမ်ဘီးဟှာ သူ့ပစ်စီးလေဟှို လုယူနိုင်ဟှို့မှုဟှ။ သူ့ဟှို ရင်ဦးဆောင်း တောက်ဘီးမှ သူ့အီမာရှိဟှူ ပစ်စီးလေဟှို လုယူနိုင်လေ့မယ်။”
30 #
မာ ၉.၄၀
“ငါ့ဖတ်မာ နေဘဲဟှူသူဟှာ ငါ့ရန်ဖတ်ဖြစ်ဟှယ်။ ငါ့နတူးဒူ စုသီးဘဲဟှူသူဟှာ ကြဲဖြန့်နေဟှူသူ ဖြစ်လေဟှယ်။ 31အယ်ကြောန့် ငါပြောမယ်။ ပြစ်မှားပြောဆိုဟှူပြစ်န ကဲ့ရဲ့ဟှူ ပြစ်ဘောန်းဇောင်#၁၂.၃၁ ကဲ့ရဲ့ဟှူ ပြစ်ဘောန်းဇောင်၊ အယ်မျိုးမှုဘဲနေဟှာ ဘုရားဟှို ကဲ့ရဲ့ဘီး ပြောဇာလေ။တွပ် လူလေဟှာ ခွမ့်လွှတ်ခံရနိုင်ဘေမဲ့ သန့်ရှင်းဟှူဝိညာဉ်တော်ဟှို ပြစ်မှားဘီး ပြောဆိုဟှူ သူဟှာ ခွမ့်လွှတ်ခံရဟှို့ မှုဟှ။ 32#လု ၁၂.၁၀လူ့ရဲ့သားဟှို နှောက်နပြစ်မှားဘီး ပြောဆိုဟှူသူရဲ့ ပြစ်ဟှိုလည်း လွတ်နိုင်ဟှယ်။ သန့်ရှင်းဟှူဝိညာဉ်တော်ဟှို ပြစ်မှားဘီး ပြောဆိုဟှူ သူဟှာ ခုဘဝ နော့‑က်ဘဝ လွတ်နိုင်ဟှ။”
ပန်န သီးကြောန်း
(လုကာ ၆.၄၃–၄၅)
33 #
မ ၇.၂၀; လု ၆.၄၄ “သီးကောန်းဟှို လိုရှင်ဟှယ် ဆိုဟှာ သစ်ပန်ကောန်းဟှို စိုက်ရဟှယ်။ သစ်ပန်ကောန်းဟှာ သီးကောန်းဟှိုဘဲ့ သီးလေ့မယ်။ သီးဟှို ကေ့လိုက်ဟှူန သစ်ပန်ရဲ့ သဘောဟှို သိရလေဟှယ်။ 34#မ ၃.၇; ၂၃.၃၃; လု ၃.၇; မ ၁၅.၁၈; လု ၆.၄၅ဝှေ့ မွီဗွေးလေ နန်းနို့လေဟှာ ယောက်ညံ့ဟှူသူလေ ဖြစ်ဟှူကြောန့် ကောန်းမြတ်ဟှူ စကားလေဟှို ဖယ်မူမျိုး ပြောနိုင်ဂေ့မယ်နူး။ စိနှလောင်းထဲမာ ရှိဟှူတိုင်းဘဲ့ နှောက်ဟှ ပြောတတ်လေဟှယ်။ 35ကောန်းမြတ်ဟှူသူလေဟှာ ကောန်းမြတ်ဟှူ စိနှလောင်းဘဏ္ဍာတိုက်ထဲဟှ ကောန်းမြတ်ဟှူဇာလေဟှို ထုဖော်တတ်ဘီး ယောက်ညံ့ဟှူသူလေဟှာ ယောက်ညံ့ဟှူ စိနှလောင်းဘဏ္ဍာတိုက်ထဲဟှနေဘီး ယောက်ညံ့ဟှူဇာလေဟှိုဘဲ့ ထုဖော်တတ်လေဟှယ်။”
36“နန်းနို့လေဟှို ငါပြောမယ်၊ တရားစီရင်ဟှူနေ့မာ လူတိုင်း ကျိုးမှေ့ဘဲဟှူ စကားလေတွပ် စစ်ကြောစီရင်ခံရလေ့မယ်။ 37နန်းနို့ရဲ့ စကားအားဖြင့် ပြစ်လွတ်ခံရဘီး နန်းနို့ရဲ့ စကားအားဖြင့်ဘဲ့ ပြစ်စီရင်ဇာဟှို ခံရလေ့မယ်” ဆိုဘီး မိန့်တော်မူလေဟှယ်။
နိမိတ်လတ်ခဏာဟှို တောန်းဆိုဂေ့ကြောန်း
(မာကု ၈.၁၁,၁၂; လုကာ ၁၁.၂၉–၃၂)
38 #
မ ၁၆.၁; မာ ၈.၁၁; လု ၁၁.၁၆ အယ်ခီမာ ကျမ်းပြုဆရာတချို့န ဖာရိရှဲလေဟှ “ဆရာ၊ ကျွန်တော်ဟှားလေ ကိုယ်တော်ပြဟှူ နိမိတ်လတ်ခဏာတခုခုဟှို ဗြင်ရှင်ပါဟှယ်” ဆိုဘီး လျှော့‑က်ဂေ့ဟှယ်။
39 #
မ ၁၆.၄; မာ ၈.၁၂ ယေရှုဟှ “ဆိုးညစ်ဘီး ဉာဏ်များဟှူ အယ်နေ့ခေတ်ရဲ့ အဓမ္မလူလေ! နန်းနို့လေ တောန်းနေဟှူ နိမိတ်လတ်ခဏာဟှာ ပရောဖက်ယောနရဲ့ နိမိတ်လတ်ခဏာဟှလွဲဘီး ဖယ်မျိုး နိမိတ်လတ်ခဏာလည်း ဗြင်တွိရဟှို့ မှုဟှ။ 40ယောနဟှာ ငါးဂီးဗိုက်ထဲမာ သောင်းရစ် လောင်းလောင်း နေရဟှူမျိုး လူ့ရဲ့သားဟှာ မ္လေဂီးထဲမာ သောင်းရစ်နေရလေ့မယ်။ 41တရားစီရင်ဟှူနေ့မာ နိနဝေဗြို့သားလေဟှာ အယ်လူမျိုးလေဟှို ထဘီးဟှာ ပြစ်တန်ဂေ့လေ့မယ်။ ဖြားဖြစ်ကြောန့်နူးဆိုဟှာ သူးနို့လေဟှာ ယောနဟောပြောဟှူ စကားကြောန့် နောန်ဒရဂေ့ဟှယ်။ အယ်နေရာမာ ယောနထတ် ပိုဘီးကီးမြတ်ဟှူသူ ရှိနေလေဟှယ်။ 42တရားစီရင်ဟှူနေ့မာ ရှေဘပြည်ရဲ့ မိဖုရားဟှာ အယ်လူမျိုးလေဟှို ထဘီးဟှာ ပြစ်တန်လေ့မယ်။ ဖြားဖြစ်ကြောန့်နူးဆိုဟှာ အယ်မိဖုရားဟှ ရှောလမုန် မန်းဂီးရဲ့ ပညာစကားဟှို နားထောန်ရှင်ကြောန့် ရေခြားမ္လေခြားဟှနေဘီး လာလေဟှယ်။ အယ်နေရာမာ ရှောလမုန် မန်းဂီးထတ် ကီးမြတ်ဟှူသူရှိလေဟှယ်။
ညစ်ညူးဟှူနတ် ပ္လန်လာဟှူကြောန်း
(လုကာ ၁၁.၂၄–၂၆)
43“ညစ်ညူးဟှူနတ်လေဟှာ လူရဲ့ကိုယ်ထဲဟှ ထွပ်ဟှားဘီးခီမာ ခြော့‑က်သွိဟှူနေရာလေမာ သူးနို့နေဟှို့နေရာလေဟှို လိုက်ရှာတတ်လေဟှယ်။ ရှာတွိနိုင်ဟှ ဆိုဟှာ 44‘ငါ့အီဟှို ပ္လန်သွားအူးမယ်။’ အယ်ကြောန့် ပ္လန်ရော့‑က်ဟှားဘီးန အယ်အီဟှာ သပ်သပ်ရပ်ရပ် ရှင်းလန်းဟှားဇာဟှို တွိရဟှယ်။ 45အယ်ဘီးန သူ့ထတ် ပိုဘီးညစ်ညူးဟှူ နတ်ဆိုးခွန်နှေ့ကောန်ဟှို ခေါ်လာဘီးဟှာ အယ်လူထဲဟှို ဝမ်လေဟှယ်။ အယ်သူရဲ့ နော့‑က်ဖြစ်ဟှူဇာဟှာ ရှေ့ဖြစ်ဟှူဇာထတ် ပိုဘီးဆိုးဝါးလေဟှယ်။ ဆိုးညစ်ဟှူ အယ်လူမျိုးလေဟှာ အယ်မူမျိုးခံစားရလေ့မယ်” ဆိုဘီး မိန့်တော်မူလေဟှယ်။
ယေရှုရဲ့မိခင်န ညီလေကြောန်း
(မာကု ၃.၃၁–၃၅; လုကာ ၈.၁၉–၂၁)
46ယေရှုဟှာ ပရိသတ်လေဟှို ပြောနေဒူး မိန ညီလေဟှာ ရော့‑က်လာဟှယ်။ ကိုယ်တော့်ဟှို တွိရှင်ဟှူကြောန့် သူးနို့ဟှာ ပ္လန်မာ စောန့်နေဂေ့လေဟှယ်။ 47အယ်ကြောန့် လူတယော့‑က်ဟှ “ကိုယ်တော်ရဲ့ မိန ညီလေဟှာ ကိုယ်တော့်ဟှို တွိရှင်ဟှူကြောန့် ပ္လန်မာ စော့န်နေဂေ့ဟှယ်” ဆိုဘီး လျှော့‑က်လေဟှယ်။#၁၂.၄၇ တချို့ မူရင်းလတ်ရေးမူလေမာ ခန်းငယ် ၄၇ မှေ့ဟှ။
48ယေရှုဟှလည်း “ငါ့မိ၊ ငါ့ညီလေဟှ ဖယ်သူနူး” ဆိုဘီး မေးလေဟှယ်။ 49အယ်ဘီးန တဗဲ့တော်လေဟှို ညွှန်ပြဘီးဟှာ “ကေ့ဂေ့! ငါ့မိ၊ ငါ့ညီလေဟှာ အယ်သူလေဘဲ့ ဖြစ်လေဟှယ်! 50ကောန်းဂန်ဘောင်မာ ရှိတော်မူဟှူ ငါ့ဖရဲ့ လိုတော်ဟှို ဆောန်ရွက်ဟှူ သူမှန်ဟှူမျှဟှာ ငါ့ညီ၊ ငါ့ညီမန ငါ့မိလေဘဲ့ ဖြစ်ဟှယ်” ဆိုဘီး မိန့်တော်မူလေဟှယ်။
Currently Selected:
မဿဲ 12: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
မဿဲ 12
12
ဒန်းနေ့ ပြဿနာကြောန်း
(မာကု ၂.၂၃–၂၈; လုကာ ၆.၁–၅)
1ဒန်းနေ့မာ ယေရှုဟှာ ဂျောင်စဗားလယ်ဂွမ့်လေဟှို ဖြတ်ရှော့‑က်ဟှားဟှယ်။ ကိုယ်တော့်ရဲ့ တဗဲ့တော်လေဟှာ ရရာတိုင်း ဗိုက်ဆာဂေ့ဟှိကြောန့် ဂျောင်စဗားနှံလေဟှို ဆွတ်ဘီးစားဂေ့လေဟှယ်။ 2အယ်မူဇာဟှို ဖာရိရှဲလေဗြင်ဟှူ ခီမာ “ကေ့ဂေ့၊ ကိုယ်တော်ရဲ့ တဗဲ့တော်လေဟှာ ဒန်းနေ့မာ လောက်အပ်ဘဲဟှူဇာလေဟှို လောက်နေဂေ့ဘီ!” ဆိုဘီး ယေရှုဟှို ပြောဂေ့လေဟှယ်။
3ယေရှုဟှ “ဒါဝိဒ်ဟှာ သူ့ပေါန်းဖော်လေနတူးဒူ ဗိုက်ဆာလာဟှူ ခီမာ ဖယ်မူမျိုး လောက်ဟှားဟှယ် ဆိုဇာဟှို နန်းနို့ လောင်းဝ ဖတ်ဖူးဂေ့ဟှလော။ 4သူ့န သူ့ပေါန်းဖော်လေဟှာ ဘုရားသခင်ရဲ့ ဗိမာန်တော်ဟှို ဝမ်ဘီး သူလည်းစားမအပ်၊ သူ့ပေါန်းဖော်လေလည်း စားအပ်ဘဲဟှူ၊ ဘုရားသခင်ဟှို ဆစ်ကပ်ဟှားဟှူ မုဟှို ပညတ်တရားဟှို ဆန့်ကျင်ဘီး စားဂေ့လေဟှယ်။ အယ်မုဟှာ ယဇ်ပုရောဟိတ်လေဘဲ့ စားအပ်လေဟှယ်။ 5ယဇ်ပုရောဟိတ်လေလည်း ဒန်းနေ့မာ ဗိမာန်တော်မာ ဒန်းနေ့နဆိုင်ဟှူ ပညတ်ဟှို ခ္လိုးဖော့‑က်ဟှူလည်းဘဲ့ ပြစ်ဖြစ်ဘဲနေဇာဟှို မောရှေရဲ့ ပညတ္တိကျမ်းစာမာ ဖတ်ဖူးဟှလော။ 6ငါပြောမယ်၊ အယ်ရပ်မာ ဗိမာန်တော်ထတ် ပိုဘီးကီးမြတ်ဟှူဇာ ရှိလေဟှယ်။ 7#မ ၉.၁၃‘ယဇ်ပူဇော်ဇာထတ် သနားကြင်နာမှုဟှို ငါပိုနှစ်သက်ဟှယ်။’ အယ်ကျမ်းစာဟှို နန်းနို့နားလည်ဟှယ် ဆိုဟှာ ပြစ်မှေ့ဘဲဟှူ သူလေဟှို ပြစ်တန်စီရင်လေ့ဟှို့ မှုဟှ။ 8ဖြားဖြစ်ကြောန့်နူးဆိုဟှာ လူ့ရဲ့သားဟှာ ဒန်းနေ့ရဲ့ သခင်ဖြစ်ဟှယ်” ဆိုဘီး မိန့်တော်မူလေဟှယ်။
လတ်တဖတ် သေနေဟှူ လူတယော့‑က်ကြောန်း
(မာကု ၃.၁–၆; လုကာ ၆.၆–၁၁)
9ယေရှုဟှာ အယ်ရပ်ဟှ ကြွဟှားဘီးဟှာ ဝါလယ်ဇရပ်ထဲဟှို ဝမ်လေဟှယ်။ 10အယ်နေရာမာ လတ်တဖတ်သေနေဟှူ လူတယော့‑က်ရှိနေလေဟှယ်။ တချို့လူလေဟှာ ယေရှုဟှို ပြစ်တန်စွပ်စွဲရှင်ဟှိကြောန့် “ဒန်းနေ့မာ နာရောဂါဟှို ကုသပေးဇာဟှာ ပညတ်တော်ဟှို ဆန့်ကျင်ဇာမှုဟှလော” ဆိုဘီး မေးလျှော့‑က်ဂေ့လေဟှယ်။
11 #
လု ၁၄.၅
ယေရှုဟှ “တကယ်ဟှိ နန်းနို့မာ သိုးတကောန်ဘဲ့ရှိဟှယ်။ အယ်သိုးဟှာ ဒန်းနေ့မာ တွမ်းထဲဟှို က္လဟှားဟှယ် ဆိုဟှာ နန်းနို့ဟှာ ဆွဲဒန်ဘဲန နေဟှို့လော။ 12လူဟှာ သိုးထတ်ပိုဘီး မြတ်လေဟှယ်! အယ်ကြောန့် နို့လေရဲ့ ပညတ်တော်ဟှာ ဒန်းနေ့မာ ကယ်တန်ပေးဟှို့ ခွမ့်ပြုဟှားဟှယ်” ဆိုဘီး မိန့်တော်မူလေဟှယ်။ 13အယ်ဘီးန လတ်သေနေဟှူသူဟှို “နန့်ရဲ့ လတ်ဟှို ဆန့်လိုက်” ဆိုဘီး ပြောလေဟှယ်။
အယ်သူဟှာ သူ့လတ်ဟှို ဆန့်လိုက်ဘီးန ကျန်ဟှူလတ်တဖတ်မျိုး ကောန်းတိုင်း ပ္လန်ဖြစ်ဟှားလေဟှယ်။
14အယ်ဘီးန ဖာရိရှဲလေဟှာ ထွပ်ဟှားဘီး ယေရှုဟှို သတ်ဟှို့တွပ် ကြံစည်ဂေ့လေဟှယ်။
ဘုရားသခင် ဝီးချယ်ဟှူ စေခံကြောန်း
15အယ်မျိုး ကြံစည်ဟှားဇာဟှို ယေရှုသိတော်မူဟှူ ခီမာ တခြားနေရာဟှို ထွပ်ကြွဟှားလေဟှယ်။ လူအောက်ဂီးလည်းဘဲ့ နော့‑က်တော်ဟှို လိုက်ဟှားဂေ့ဟှယ်။ ကိုယ်တော်ဟှာ သူးနို့လေရဲ့ နာရောဂါလေ အားလောင်းဂူဟှို ပျော့‑က်ကင်းစေလေဟှယ်။ 16သူ့ကြောန်းရာလေဟှို ဖယ်သူ့ဟှိုလည်း ပြောဂေ့ဘဲဟှို့တွပ် မိန့်ပေးတော်မူလေဟှယ်။ 17အယ်မူမျိုး မိန့်ပေးဟှားဇာဟှာ ပရောဖက် ဟေရှာယအားဖြင့် ဘုရားသခင် ပေးဟှားဟှူ ဗျာဒိတ်တော် ပ္လဲ့ဇောင်ဟှို့တွပ် ဖြစ်လေဟှယ်။ ဗျာဒိတ်တော်ဟှ၊
18“ငါမြတ်နိုးဘီး ရှစ်ရဟှူ၊ ငါဝီးချယ်ဟှားဟှူ
ငါ့ရဲ့ စေခံဟှို ကေ့ရှုဂေ့ပါ။
ငါ့ဝိညာဉ်တော်ဟှို အယ်သူထတ်ဟှို ငါစေလွှတ်မယ်။
အယ်သူဟှာ လူမျိုးတကာလေဟှို တရားပေးလေ့မယ်။
19ငြင်းခူဇာလေ၊ အော်ဟစ်ဇာလေဟှို လောက်ဟှ။
လမ်းမာလည်း သူ့ရဲ့အသံဟှို ဖယ်သူဟှိုလည်း ကြားစေဟှ။
20သူဟှာ ကွေ့ကော့‑က်ဟှူ ကျူဗန်ဟှိုမခ္လိုး၊
မီးခိုးများဟှူ မီးဇာဟှိုလည်း သတ်ဘဲန၊
တရားမျှတမှုဟှို အောန်မြင်ဟှို့တွပ် ပို့ဆောန်လေ့မယ်၊
21သူ့ရဲ့နာမဟှိုလည်း လူမျိုးတကာလေ မျှော်လင့်လေ့မယ်” ဆိုဘီး ဟောဟှားလေဟှယ်။
ယေရှုန ဗေလဇေဗုလကြောန်း
(မာကု ၃.၂၀–၃၀; လုကာ ၁၁.၁၄–၂၃)
22အယ်ခီမာ နတ်ဆိုးဝမ်ပူးနေဟှူ မျစ်စိကန်းဘီး စကားအနေဟှူ လူတယော့‑က်ဟှို ယေရှုနားဟှို ခေါ်ဆောန်လာဂေ့လေဟှယ်။ ယေရှုဟှာ နတ်ဆိုးဟှို နှန်ထုလိုက်ဟှူကြောန့် အယ်သူဟှာ မျစ်စိဗြင်လာဘီး စကားပြောလေဟှယ်။ 23လူအောက်ဂီးဟှာ ရရာတိုင်း အံ့ဩဟှားဘီးဟှာ “အယ်သူဟှာ ဒါဝိဒ်ရဲ့သားတော် ဖြစ်လေ့မယ်လော” ဆိုဘီး မေးဂေ့လေဟှယ်။
24 #
မ ၉.၃၄; ၁၀.၂၅ အယ်မူဇာလေဟှို ဖာရိရှဲလေကြားဟှူ ခီမာ “အယ်သူဟှာ နတ်ဆိုးခေါန်းဆောန် ဗေလဇေဗုလဟှို အားကိုးဘီးဟှာ နတ်ဆိုးလေဟှို နှန်ထုဟှယ်” ဆိုဘီး ပြောဆိုဂေ့လေဟှယ်။
25ယေရှုဟှာ အယ်သူလေရဲ့ စိနေသဘောထားဟှို သိနေဟှိကြောန့် “နိုင်ငံတနိုင်ငံဟှာ ရှင်းရှင်း တိုက်ခိုက်ဘီး ကွဲပြားနေမယ် ဆိုဟှာ အယ်နိုင်ငံဟှာ ကြာခန် ပျစ်စီးလေ့မယ်။ အယ်မူမျိုးဘဲ့ လူလေစိဝန်းကွဲပြားဘီး ရှင်းရှင်း တိုက်ခိုက်နေမယ် ဆိုဟှာ အယ်ဗြို့၊ အယ်အီထောန်ဟှာ ပျစ်စီးလေ့မယ်။ 26စာတန်ရဲ့ အောက်စိုးမှုဟှို ဝန်ခံဟှူသူလေဟှာ ရှင်းရှင်း တိုက်ခိုက်ဘီး ကွဲပြားနေမယ် ဆိုဟှာ သူးနို့နိုင်ငံဟှာ ဖယ်မူမျိုးလည်း တည်မြဲနိုင်ဟှို့မှုဟှ! 27ငါဟှာ နတ်ဆိုးခေါန်းဆောန် ဗေလဇေဗုလဟှို အားကိုးဘီးဟှာ နတ်ဆိုးလေဟှို နှန်ထုဟှယ် ဆိုဟှာ နန်းနို့တဗဲ့လေဟှာ ဖယ်သူ့ဟှို အားကိုးဘီးဟှာ နှန်ထုဂေ့နူး။ နန်းနို့လေ မှားယွင်းနေဟှယ် ဆိုဇာဟှို နန်းနို့တဗဲ့လေ ပြုမူဟှ သတ်သေပြနေဟှယ်! 28ငါဟှာ ဘုရားသခင်ရဲ့ ဝိညာဉ်တော်ဟှို အားကိုးဘီးဟှာ နတ်ဆိုးလေဟှို နှန်ထုဟှယ် ဆိုဟှာ နန်းနို့လေတွပ် ဘုရားသခင်ရဲ့ နိုင်ငံတော် တည်ဟှို့ခီ ရော့‑က်လေဘီ။”
29“ဖယ်သူလည်း ခွန်အားကီးဟှူလူဟှို ရင်ဦးဆောင်း ကြိုးန တောက်ဘဲန သူ့အီထဲဟှို ဝမ်ဘီးဟှာ သူ့ပစ်စီးလေဟှို လုယူနိုင်ဟှို့မှုဟှ။ သူ့ဟှို ရင်ဦးဆောင်း တောက်ဘီးမှ သူ့အီမာရှိဟှူ ပစ်စီးလေဟှို လုယူနိုင်လေ့မယ်။”
30 #
မာ ၉.၄၀
“ငါ့ဖတ်မာ နေဘဲဟှူသူဟှာ ငါ့ရန်ဖတ်ဖြစ်ဟှယ်။ ငါ့နတူးဒူ စုသီးဘဲဟှူသူဟှာ ကြဲဖြန့်နေဟှူသူ ဖြစ်လေဟှယ်။ 31အယ်ကြောန့် ငါပြောမယ်။ ပြစ်မှားပြောဆိုဟှူပြစ်န ကဲ့ရဲ့ဟှူ ပြစ်ဘောန်းဇောင်#၁၂.၃၁ ကဲ့ရဲ့ဟှူ ပြစ်ဘောန်းဇောင်၊ အယ်မျိုးမှုဘဲနေဟှာ ဘုရားဟှို ကဲ့ရဲ့ဘီး ပြောဇာလေ။တွပ် လူလေဟှာ ခွမ့်လွှတ်ခံရနိုင်ဘေမဲ့ သန့်ရှင်းဟှူဝိညာဉ်တော်ဟှို ပြစ်မှားဘီး ပြောဆိုဟှူ သူဟှာ ခွမ့်လွှတ်ခံရဟှို့ မှုဟှ။ 32#လု ၁၂.၁၀လူ့ရဲ့သားဟှို နှောက်နပြစ်မှားဘီး ပြောဆိုဟှူသူရဲ့ ပြစ်ဟှိုလည်း လွတ်နိုင်ဟှယ်။ သန့်ရှင်းဟှူဝိညာဉ်တော်ဟှို ပြစ်မှားဘီး ပြောဆိုဟှူ သူဟှာ ခုဘဝ နော့‑က်ဘဝ လွတ်နိုင်ဟှ။”
ပန်န သီးကြောန်း
(လုကာ ၆.၄၃–၄၅)
33 #
မ ၇.၂၀; လု ၆.၄၄ “သီးကောန်းဟှို လိုရှင်ဟှယ် ဆိုဟှာ သစ်ပန်ကောန်းဟှို စိုက်ရဟှယ်။ သစ်ပန်ကောန်းဟှာ သီးကောန်းဟှိုဘဲ့ သီးလေ့မယ်။ သီးဟှို ကေ့လိုက်ဟှူန သစ်ပန်ရဲ့ သဘောဟှို သိရလေဟှယ်။ 34#မ ၃.၇; ၂၃.၃၃; လု ၃.၇; မ ၁၅.၁၈; လု ၆.၄၅ဝှေ့ မွီဗွေးလေ နန်းနို့လေဟှာ ယောက်ညံ့ဟှူသူလေ ဖြစ်ဟှူကြောန့် ကောန်းမြတ်ဟှူ စကားလေဟှို ဖယ်မူမျိုး ပြောနိုင်ဂေ့မယ်နူး။ စိနှလောင်းထဲမာ ရှိဟှူတိုင်းဘဲ့ နှောက်ဟှ ပြောတတ်လေဟှယ်။ 35ကောန်းမြတ်ဟှူသူလေဟှာ ကောန်းမြတ်ဟှူ စိနှလောင်းဘဏ္ဍာတိုက်ထဲဟှ ကောန်းမြတ်ဟှူဇာလေဟှို ထုဖော်တတ်ဘီး ယောက်ညံ့ဟှူသူလေဟှာ ယောက်ညံ့ဟှူ စိနှလောင်းဘဏ္ဍာတိုက်ထဲဟှနေဘီး ယောက်ညံ့ဟှူဇာလေဟှိုဘဲ့ ထုဖော်တတ်လေဟှယ်။”
36“နန်းနို့လေဟှို ငါပြောမယ်၊ တရားစီရင်ဟှူနေ့မာ လူတိုင်း ကျိုးမှေ့ဘဲဟှူ စကားလေတွပ် စစ်ကြောစီရင်ခံရလေ့မယ်။ 37နန်းနို့ရဲ့ စကားအားဖြင့် ပြစ်လွတ်ခံရဘီး နန်းနို့ရဲ့ စကားအားဖြင့်ဘဲ့ ပြစ်စီရင်ဇာဟှို ခံရလေ့မယ်” ဆိုဘီး မိန့်တော်မူလေဟှယ်။
နိမိတ်လတ်ခဏာဟှို တောန်းဆိုဂေ့ကြောန်း
(မာကု ၈.၁၁,၁၂; လုကာ ၁၁.၂၉–၃၂)
38 #
မ ၁၆.၁; မာ ၈.၁၁; လု ၁၁.၁၆ အယ်ခီမာ ကျမ်းပြုဆရာတချို့န ဖာရိရှဲလေဟှ “ဆရာ၊ ကျွန်တော်ဟှားလေ ကိုယ်တော်ပြဟှူ နိမိတ်လတ်ခဏာတခုခုဟှို ဗြင်ရှင်ပါဟှယ်” ဆိုဘီး လျှော့‑က်ဂေ့ဟှယ်။
39 #
မ ၁၆.၄; မာ ၈.၁၂ ယေရှုဟှ “ဆိုးညစ်ဘီး ဉာဏ်များဟှူ အယ်နေ့ခေတ်ရဲ့ အဓမ္မလူလေ! နန်းနို့လေ တောန်းနေဟှူ နိမိတ်လတ်ခဏာဟှာ ပရောဖက်ယောနရဲ့ နိမိတ်လတ်ခဏာဟှလွဲဘီး ဖယ်မျိုး နိမိတ်လတ်ခဏာလည်း ဗြင်တွိရဟှို့ မှုဟှ။ 40ယောနဟှာ ငါးဂီးဗိုက်ထဲမာ သောင်းရစ် လောင်းလောင်း နေရဟှူမျိုး လူ့ရဲ့သားဟှာ မ္လေဂီးထဲမာ သောင်းရစ်နေရလေ့မယ်။ 41တရားစီရင်ဟှူနေ့မာ နိနဝေဗြို့သားလေဟှာ အယ်လူမျိုးလေဟှို ထဘီးဟှာ ပြစ်တန်ဂေ့လေ့မယ်။ ဖြားဖြစ်ကြောန့်နူးဆိုဟှာ သူးနို့လေဟှာ ယောနဟောပြောဟှူ စကားကြောန့် နောန်ဒရဂေ့ဟှယ်။ အယ်နေရာမာ ယောနထတ် ပိုဘီးကီးမြတ်ဟှူသူ ရှိနေလေဟှယ်။ 42တရားစီရင်ဟှူနေ့မာ ရှေဘပြည်ရဲ့ မိဖုရားဟှာ အယ်လူမျိုးလေဟှို ထဘီးဟှာ ပြစ်တန်လေ့မယ်။ ဖြားဖြစ်ကြောန့်နူးဆိုဟှာ အယ်မိဖုရားဟှ ရှောလမုန် မန်းဂီးရဲ့ ပညာစကားဟှို နားထောန်ရှင်ကြောန့် ရေခြားမ္လေခြားဟှနေဘီး လာလေဟှယ်။ အယ်နေရာမာ ရှောလမုန် မန်းဂီးထတ် ကီးမြတ်ဟှူသူရှိလေဟှယ်။
ညစ်ညူးဟှူနတ် ပ္လန်လာဟှူကြောန်း
(လုကာ ၁၁.၂၄–၂၆)
43“ညစ်ညူးဟှူနတ်လေဟှာ လူရဲ့ကိုယ်ထဲဟှ ထွပ်ဟှားဘီးခီမာ ခြော့‑က်သွိဟှူနေရာလေမာ သူးနို့နေဟှို့နေရာလေဟှို လိုက်ရှာတတ်လေဟှယ်။ ရှာတွိနိုင်ဟှ ဆိုဟှာ 44‘ငါ့အီဟှို ပ္လန်သွားအူးမယ်။’ အယ်ကြောန့် ပ္လန်ရော့‑က်ဟှားဘီးန အယ်အီဟှာ သပ်သပ်ရပ်ရပ် ရှင်းလန်းဟှားဇာဟှို တွိရဟှယ်။ 45အယ်ဘီးန သူ့ထတ် ပိုဘီးညစ်ညူးဟှူ နတ်ဆိုးခွန်နှေ့ကောန်ဟှို ခေါ်လာဘီးဟှာ အယ်လူထဲဟှို ဝမ်လေဟှယ်။ အယ်သူရဲ့ နော့‑က်ဖြစ်ဟှူဇာဟှာ ရှေ့ဖြစ်ဟှူဇာထတ် ပိုဘီးဆိုးဝါးလေဟှယ်။ ဆိုးညစ်ဟှူ အယ်လူမျိုးလေဟှာ အယ်မူမျိုးခံစားရလေ့မယ်” ဆိုဘီး မိန့်တော်မူလေဟှယ်။
ယေရှုရဲ့မိခင်န ညီလေကြောန်း
(မာကု ၃.၃၁–၃၅; လုကာ ၈.၁၉–၂၁)
46ယေရှုဟှာ ပရိသတ်လေဟှို ပြောနေဒူး မိန ညီလေဟှာ ရော့‑က်လာဟှယ်။ ကိုယ်တော့်ဟှို တွိရှင်ဟှူကြောန့် သူးနို့ဟှာ ပ္လန်မာ စောန့်နေဂေ့လေဟှယ်။ 47အယ်ကြောန့် လူတယော့‑က်ဟှ “ကိုယ်တော်ရဲ့ မိန ညီလေဟှာ ကိုယ်တော့်ဟှို တွိရှင်ဟှူကြောန့် ပ္လန်မာ စော့န်နေဂေ့ဟှယ်” ဆိုဘီး လျှော့‑က်လေဟှယ်။#၁၂.၄၇ တချို့ မူရင်းလတ်ရေးမူလေမာ ခန်းငယ် ၄၇ မှေ့ဟှ။
48ယေရှုဟှလည်း “ငါ့မိ၊ ငါ့ညီလေဟှ ဖယ်သူနူး” ဆိုဘီး မေးလေဟှယ်။ 49အယ်ဘီးန တဗဲ့တော်လေဟှို ညွှန်ပြဘီးဟှာ “ကေ့ဂေ့! ငါ့မိ၊ ငါ့ညီလေဟှာ အယ်သူလေဘဲ့ ဖြစ်လေဟှယ်! 50ကောန်းဂန်ဘောင်မာ ရှိတော်မူဟှူ ငါ့ဖရဲ့ လိုတော်ဟှို ဆောန်ရွက်ဟှူ သူမှန်ဟှူမျှဟှာ ငါ့ညီ၊ ငါ့ညီမန ငါ့မိလေဘဲ့ ဖြစ်ဟှယ်” ဆိုဘီး မိန့်တော်မူလေဟှယ်။
Currently Selected:
:
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.