မဿဲ 8
8
နူနာသယ် တယော့‑က်ကြောန်း
(မာကု ၁.၄၀–၄၅; လုကာ ၅.၁၂–၁၆)
1ယေရှုဟှာ တောန်ထတ်ဟှနေဘီး ဆင်းလာဟှူ ခီမာ လူအောက်ဂီးဟှာ ကိုယ်တော်နော့‑က်ဟှို လိုက်ဂေ့ဟှယ်။ 2အယ်ခီမာ နူနာသယ် တယော့‑က်ဟှာ လာဘီးဟှာ ကိုယ်တော်ရှေ့မာ ပျပ်ဝပ်ဘီး “သခင်၊ လိုတော်ရှိမယ် ဆိုဟှာ ကျွန်တော့်ဟှို အယ်ရောဂါဟှနေ သန့်ရှင်းပေးပါ”#၈.၂ ကျွန်တော့်ဟှို အယ်ရောဂါဟှနေ သန့်ရှင်းပေးပါ၊ အယ်ရောဂါဟှာ ထောင်းဒမ်းစဉ်လာအရ လူတယော့‑က်ဟှို ညစ်ညူးစေဟှယ် ဆိုဘီး ယူဆရှိဟှယ်။ ဆိုဘီး တောန်းလျှော့‑က်ဟှယ်။
3ယေရှုဟှလည်း လတ်တော်ဟှို ဆန့်ဘီးဟှာ “ငါလိုရှိဟှယ်။ သန့်ရှင်းစေ!” ဆိုဘီး မိန့်တော်မူဟှယ်။ ရှစ်ရှင်းဘဲ့ နူနာရောဂါဟှာ ပျော့‑က်ဟှားဘီး သူဟှာ သန့်ရှင်းဟှားလေဟှယ် 4ယေရှုဟှ “အယ်ကြောန်းဟှို ဖယ်သူဟှိုလည်း ပြောန။ ဒိထားပါ! ယဇ်ပုရောဟိတ်နားဟှို သွားဘီး ကိုယ်ဟှိုပြလိုက်ပါ။ လူလေရှေ့မာ သတ်သေဖြစ်ဟှို့တွပ် မောရှေပညတ်ဟှားဟှူတိုင်း ပူဇော်သကာဟှို ဆစ်သပါ” ဆိုဘီး မိန့်တော်မူလေဟှယ်။
တပ်မှူးရဲ့ ယောင်ကြည်ဇာကြောန်း
(လုကာ ၇.၁–၁၀)
5ယေရှုဟှာ ကပေရနောင်ဗြို့ဟှို ဝမ်လာဟှူ ခီမာ ရောမတပ်မှူးတယော့‑က်ဟှ ကိုယ်တော်နားဟှို လာဘီး တောန်းဗန်ဇာဟှ 6“သခင်၊ ကျွန်တော်ရဲ့ စေခံတယော့‑က်ဟှာ လတ်ခေသေဟှူရောဂါန ရရာတိုင်း နာကျင်ဘီးဟှာ အီမာ ထနိုင်ဘဲ ဖြစ်နေပါဟှယ်။ ကယ်မတော်မူပါ” ဆိုဘီး ဖြစ်ဟှယ်။
7ယေရှုဟှ “ငါလာဘီးဟှာ ရောဂါဟှို ပျော့‑က်ကင်းစေမယ်” ဆိုဘီး မိန့်တော်မူလေဟှယ်။
8တပ်မှူးဟှ “သခင်၊ ကျွန်တော်ရဲ့ အီးခေါန်မိုးအော့‑က်ဟှို ကိုယ်တော်ဝမ်ရှင်း ကျေးဇူးဟှို ကျွန်တော်ခံထိုက်ဟှ။ မိန့်ပေးလိုက်န ကျွန်တော်ရဲ့ စေခံဟှာ ကျန်းမာရပါလေ့မယ်။ 9ဥပမာ ကျွန်တော် ကိုယ်တိုင်လည်း အာဏာပိုင် လတ်အော့‑က်မာ ရာရှိတယော့‑က်ဖြစ်ဘီး ကျွန်တော်ရဲ့ လတ်အော့‑က်မာရှိဟှူ စစ်သားလေဟှို အောက်ချောက်ရပါဟှယ်။ တယော့‑က်ဟှို ‘သွား!’ ဆိုဟှာ သွားပါဟှယ်။ တယော့‑က်ဟှို ‘လာ!’ ဆိုဟှာ လာပါဟှယ်။ အယ်ဘီးဟှာ ကျွန်တော်ဟှာ ကျွန်တော့်ရဲ့ ကျွန်ဟှို မိန့်ပေးလိုက်ဟှယ် ‘အယ်မူဇာဟှို လောက်လိုက်!’ ဆိုဟှာ လောက်လေဟှယ်” ဆိုဘီး လျှော့‑က်လေဟှယ်။
10အယ်စကားဟှို ယေရှုကြားဟှူ ခီမာ အံ့ဩဟှားဘီး “ငါ မှန်တိုင်းပြောမယ်၊ အယ်မျှလော့‑က်ကီးဟှူ ယောင်ကြည်ရှင်းမျိုး ဣသရေလ လူမျိုးထဲမှာဟှို ငါတွိဖူးဟှ။ 11#လု ၁၃.၂၉ငါပြောမယ်။ လူလေဘောင်ဂီးဟှာ ရှေ့ရပ်၊ နော့‑က်ရပ်ဟှလာဘီး ကောန်းဂန်နိုင်ငံတော်မာ အာဗြဟံ၊ ဣဇာက်၊ ယာကုပ်လေနတူးဒူ စားသော့‑က်ဗွဲမာ လာဘီးထိုင်လေ့မယ်။ 12#မ ၂၂.၁၃; ၂၅.၃၀; လု ၁၃.၂၈အယ်ဘေမဲ့ နိုင်ငံတော်သားလေလည်း ငိုကြွေးဘီး အံသွားခဲက္လိဟှူ နေရာ ပ္လန်ရပ် မှောန်မိုက်ထဲမာ နေရလေ့မယ်” ဆိုဘီး တဗဲ့တော်လေဟှို မိန့်တော်မူလေဟှယ်။ 13အယ်ဘီးမှ ယေရှုဟှ “နန်သွားဝေါ့။ နန်ယောင်ကြည်တိုင်း ဖြစ်လေ့မယ်” ဆိုဘီး ပြောလိုက်ခီမာဘဲ့ တပ်မှူးရဲ့စေခံလည်း ရောဂါပျော့‑က်ဟှားလေဟှယ်။
ရောဂါသယ်လေဟှို ကျန်းမာစေဟှူကြောန်း
(မာကု ၁.၂၉–၃၄; လုကာ ၄.၃၈–၄၁)
14ယေရှုဟှာ ပေတရုရဲ့အီဟှို ရော့‑က်ဟှားဟှူ ခီမာ ပေတရုရဲ့ ယောက္ခမဟှာ ဖျားနာဘီး အိရာထဲမာလဲနေဇာဟှို ဗြင်တော်မူလေဟှယ်။ 15ယေရှုဟှလည်း အယ်မီးမရဲ့ လတ်ဟှို တို့ထိလိုက်ဟှူ ခီမာ ဖျားနာပျော့‑က်ဟှားကြောန့် ထထိုင်ဘီးဟှာ ဧည့်ဝတ်ပြုလေဟှယ်။
16နေဒန်ပိုင်းဟှို ရော့‑က်ဟှူ ခီမာ နတ်ဆိုး ဝမ်ပူးခံရဟှူ လူလေဟှို ယေရှုနားဟှို ခေါ်လာဂေ့လေဟှယ်။ ယေရှုဟှ စကားတခွန်းဒဲန မိန့်ပေးဘီးဟှာ နတ်ဆိုးလေဟှို နှန်ထုလိုက်ဟှူ ခီမာ လူနာလေလည်း ကျန်းမာသွားဂေ့လေဟှယ်။ 17အယ်မူကြောန်းရာဟှ “အယ်သူဟှာ နို့လေရဲ့ နာရောဂါန ဝေဒနာလေဟှို ယူဆောန်ဟှားလေဟှယ်” ဆိုဘီး ပရောဖက် ဟေရှာယ ပြောဟှားတိုင်းဘဲ့ ပ္လဲ့ဇောင်လာဟှို့တွပ် ဖြစ်လေဟှယ်။
ယေရှုနော့‑က်ဟှို လိုက်ရှင်းရဲ့ ဖိုးခလေကြောန်း
(လုကာ ၉.၅၇–၆၂)
18ယေရှုဟှာ သူ့နားပတ်လည်မာ လူအောက်ဂီး ဝိုင်းနေဂေ့ဇာဟှို ဗြင်ရဟှူ ခီမာ အိုင်ဟှိုဖတ်ကမ်းဟှို ကူးဟှို့တွပ် တဗဲ့တော်လေဟှို မိန့်တော်မူလေဟှယ်။ 19အယ်ခီမာ ကျမ်းပြုဆရာတယော့‑က် လာဘီးဟှာ “ဆရာ၊ ကိုယ်တော်သွားမယ့် နေရာလေဟှို ကျွန်တော်လည်း လိုက်ရှင်ပါဟှယ်” ဆိုဘီး လျှော့‑က်လေဟှယ်။
20ယေရှုဟှလည်း “မ္လေခွီးမာ တွမ်းရှိဟှယ်။ မိုးကောန်းဂန်ဟှ ငှတ်မာလည်း သိုက်ရှိဟှယ်။ လူ့ရဲ့သားမာဟှ ခေါန်းခ္လဟှို့တွပ် နေရာ မှေ့ဟှ” ဆိုဘီး မိန့်တော်မူလေဟှယ်။
21တခြားတဗဲ့တော် တယော့‑က်ဟှလည်း “သခင်၊ ကျွန်တော့်ဖဟှို ရင်ဦးဆောင်း သွားဘီးသင်္ဂြိုဟ်ဟှို့တွပ် ခွမ့်ပေးပါ” ဆိုဘီး လျှော့‑က်လေဟှယ်။
22ယေရှုဟှလည်း “ငါ့နော့‑က်ဟှိုလိုက်ပါ။ လူသေလေဟှို လူသေလေဘဲ့ သင်္ဂြိုဟ်ပါစေ” ဆိုဘီး မိန့်တော်မူလေဟှယ်။
လေမှောန်ဒိုင်းဟှို ဆောင်းမဟှူကြောန်း
(မာကု ၄.၃၅–၄၁; လုကာ ၈.၂၂–၂၅)
23ယေရှုဟှာ လှေထဲဟှို ဝမ်တော်မူဘီး တဗဲ့တော်လေလည်း ကိုယ်တော်နတူးဒူ လိုက်ဂေ့လေဟှယ်။ 24ရောက်တရစ် အိုင်ထဲမာ ကြမ်းတမ်းဟှူ လေမှောန်ဒိုင်းတိုက်လာဘီး လှေဟှာ နစ်မ္လောက်ခါနီး ဖြစ်ဟှားလေဟှယ်။ အယ်ခီမာ ကိုယ်တော်ဟှ လှေထဲမာ အိနေတော်မူဟှယ်။ 25တဗဲ့တော်လေလည်း ကိုယ်တော့်ဟှို နှိုးဘီးဟှာ “သခင်၊ ကယ်တန်တော်မူပါ! ကျွန်တော့်ဟှားလေ သေဟှို့ဖြစ်နေဂေ့ဘီ!” ဆိုဘီး လျှော့‑က်ဂေ့လေဟှယ်။
26ကိုယ်တော်ဟှလည်း “ယောင်ကြည်ရှင်း အားနဲဟှူလူလေ! ဖြားဖြစ်ကြောန့် ကြော့‑က်နေဂေ့နူး” ဆိုဘီး ထလာဘီးန လေနလှိုင်းဟှို ဆောင်းမဟှူ ခီမာ လေနလှိုင်းလည်း ငြီဟှားဘီး သာယာဟှားလေဟှယ်။
27တဗဲ့တော်လေလည်း ရရာတိုင်း အံ့ဩဘီး “အယ်လူဟှ ဖယ်သူနူး။ လေနလှိုင်းလေတောန်မှ သူ့ဟှို နားထောန်ဂေ့ဟှယ်!” ဆိုဘီး ပြောဂေ့လေဟှယ်။
လူနှေ့ယော့‑က်ထဲဟှ နတ်ဆိုးလေဟှို နှန်ထုဟှူကြောန်း
(မာကု ၅.၁–၂၀; လုကာ ၈.၂၆–၃၉)
28အိုင်ဟှိုဖတ်ကမ်း ဂါဒရပြည်ဟှို ရော့‑က်ဟှူ ခီမာ နတ်ဆိုးဝမ်ပူးနေဟှူ လူနှေ့ယော့‑က်ဟှာ သန်းခ္လိုင်းထဲဟှနေ ထွပ်လာဘီး ကိုယ်တော်န ဆောင်တွိလေဟှယ်။ အယ်သူလေဟှာ ရာရာတိုင်း ခွန်အားကီးဘီး ဆိုးသွန်းဂေ့ကြောန့် ဖယ်သူလေလည်း အယ်လမ်းဟှနေဘီး သွားဟှိရဲဂေ့ဟှ။ 29အယ်သူလေဟှလည်း “ဘုရားသခင်ရဲ့ သားတော်၊ ကျွန်တော်ဟှားလေဟှို ဖြားလောက်ရှင်ကြောန့်နူး။ ခီရော့‑က်ခန်မာ ညှင်းဆဲဟှို့တွပ် ကြွလာဟှူဇာလော” ဆိုဘီးဟှာ သံက္လယ်ဂီးန လျှော့‑က်ဂေ့လေဟှယ်။
30အယ်သူလေရဲ့ လော့က်ဂီးဝီးဘဲဟှူ နေရာမာလည်း ဝပ်အောက်ဂီးဟှာ စာစားနေဂေ့ဟှယ်။ 31နတ်ဆိုးလေဟှလည်း “ကျွန်တော်ဟှားလေဟှို နှန်ထုမယ် ဆိုဟှာ အယ်ဝပ်လေထဲဟှို ဝမ်ခွမ့်ပေးတော်မူပါ” ဆိုဘီး ယေရှုဟှို တောန်းဗန်ဂေ့ဟှယ်။
32ကိုယ်တော်ဟှလည်း “သွားဂေ့” ဆိုဘီး မိန့်တော်မူဟှယ်။ နတ်ဆိုးလေလည်း ထွပ်ဟှားဘီးဟှာ ဝပ်လေထဲဟှို ဝမ်ဟှားဟှယ်။ ဝပ်အောက်ဂီးဟှာ အိုင်ကမ်းနားဟှို ပ္လေးဆင်းဟှားဘီး ရေမ္လောက်သေဟှားလေဟှယ်။
33ဝပ်ထီးမားလေလည်း ဗြို့ထဲဟှို ဝမ်ပ္လေးဘီးဟှာ နတ်ဆိုးဝမ်ပူးနေဟှူ လူနှေ့ယော့‑က်ကြောန်းန သူးနို့လေဗြင်တွိရဟှူ ကြောန်းရာလေ အားလောင်းဂူဟှို ပြောပြဂေ့လေဟှယ်။ 34အယ်ဘီးန တဗြို့လောင်းမာရှိဟှူ လူလေလည်း ယေရှုဟှို တွိရှင်ကြောန့် ဗြို့ပ္လန်ဟှို ထွပ်လာဂေ့ဟှယ်။ ကိုယ်တော့်ဟှို တွိဟှူ ခီမာ သူးနို့လေရဲ့ ဒေသဟှနေဘီး ထွပ်ဟှားဟှို့တွပ် တောန်းဗန်ဂေ့ဟှယ်။
Currently Selected:
မဿဲ 8: NTDWB24
Highlight
Share
Copy
Want to have your highlights saved across all your devices? Sign up or sign in
The New Testament in Dawei Language © The Word for the World International and The Dawei Bible Translation Committee, 2024.
