मेथा 26
26
येशुला सेयेगी ढो़
(मारकु १४:१,२; लुका २२:१,२; योहान्ना ११:४५-५३)
1येशुगी का दे घीरी सुङसारती, राङगी ङेनेक्याला सुवालाक, 2“ङीमा ॱङी स्याम्ने पेसाकगी धी़छेनगो हुङगीलाक ॱनेरी, खेक्याला स्येये हो़तालाक धेनी मी-भु नी ग्याङस्यीङला क्याङयेगी क्षीला, डागी लाकला ची ग्याप्कीलाक।”
3धा क्षो़पो़न क्षेक्या धाङ मीगी गेम्पाक्या कायाफा ॱनागीन, चो क्षो़पो़नगी फोडाङदु जोम्बालाक। 4धेनी खुङक्याई येशुला घाङगी झ्येरी ॱली़री शीम्ये धाङ सेयेगी डो़ मुला झ्येवालाक। 5हीना खुङक्याई ॱनेवालाक, “धी़छेन घाङला शीम्गु मालाक। शीम्ना मीमाङक्या खोकला शीङटाक लाङगीलाक।”
येशु बेथानीरु
(मारकु १४:३-९; योहान्ना १२:१-८)
6धा येशु बेथानीरु जेने सीमोनगी नाङदु श्युक हेती घाङला, 7केमी च्यीक खोङबागी डुङदु धो कामारुगी भुम्पा नाङदु, ॱमीच्यीकी रीङक्षे ढीस्यीमगी ॱनुम खेरती च्यारपालाक। धेनी खोङबा श्येलाक श्येली घाङला, मी़ होदे ॱनुमगो खोङबागी उला ॱलुक्पालाक। 8धेनी ङेनेक्याई होदे थोरी श्येताङ लारी ॱनेवालाक, “दे घीझ्येरी सेला ताङाले? 9दे चोङ हो़ना, ॱमीच्यीकी रीङक्षे खुक्ये हो़क धेनी होदे आलेगो उटेक्याला तेरये हो़तालाक।”
10हीना येशुगी दे खेन्दी खुङक्याला सुवालाक, “खेक्या मोला घीझ्येरी दुक्पु तेरा? मी़ ङी क्षीला ले शाङा च्यीक झ्येदुक। 11घीझ्येरी ॱनाना उटेक्या च्योई खीकीमुला हुङालाक हीना ङा खेक्यामुला च्योई हुङगीमालाक। 12धेनी दे ॱनुम दे ङी शुला ॱलुक्ती, मी़ ङा धी़ठोदु डोयेगी क्षीला डाढीक झ्यीदालाक। 13ङा खेक्याला धेन्पाराङ ॱनाहीन, जीक्तेन नाङदु घारु दे ताम्शाङ दे स्येदीक, होदुरु दे भोमो दी झ्यीगीन तामगोवा मी़ ढेन्सो़गी क्षीला स्येगीलाक।”
युदागी येशुला ॱली़गीनगी कोरला
(मारकु १४:१०-११; लुका २२:३-६)
14धेनी ङेने च्युङङीने युदा ईस्कारीयोत ॱनागीनगो, क्षो़पो़न क्षेक्या चारु सोरी 15श्यी़वालाक, “ङी खोङबाला खीकी लाकला ची ग्याप्ना, ङाला घी तेरये?” धेनी खुङक्याई खोला ॱङुगी टाङगा सुमच्यु तेरपालाक। 16धेनी होदेने ॱहाला, खी़ येशुला खुङक्याई लाकला ची ग्याप्येगी घोकाप चावालाक।
थामे श्येलाक
(मारकु १४:१२-२६; लुका २२:७-२३; योहान्ना १३:२१-३०)
17धा क्युरची मेगीन ग्याङगागी धी़छेनगी ङीमा धाङपोगोला, ङेनेक्या येशु डुङदु च्यारती श्यी़वालाक, “खेराङगी क्षीला पेसाकगी धी़छेनगी, श्येलाक घारु स्यामगु?”
18खोङबागी सुवालाक, “ग्याजा नाङदु मी च्यीक चारु सोरी, खोला देरे ॱनो़, ‘ॱलोपो़नलागी देरे सुङी, ङी धी़चो़ ङ्ये ॱलेप्सादुक। खेराङगी नाङदु, ङा ङी ङेनेक्यामुला पेसाकगी धी़छेन ताङयेहीन।’” 19धेनी ङेनेक्याई येशुगी खुङक्याला सुङगीन च्योक्रे झ्येवालाक धेनी पेसाकगी धी़छेनगी श्येलाक स्याम्बालाक।
20धा घोमोगो खोङबा राङगी, ङेने च्युङङीक्यामुला श्येलाक श्येयेला श्युक्पालाक। 21धेनी खोङबाक्या श्येली घाङला, खोङबागी सुवालाक, “ङा धेन्पाराङ खेक्याला ॱनाहीन, खेक्याने च्यीकगी ङाला डागी लाकदु ची ग्याप्कीलाक।” 22धेनी खुङक्या ॱमीच्यीकी सेम क्योरी, च्यीकगी स्याम्ने च्यीकगी देरे ॱनाये गो चुक्पालाक, “चोवो, होदेगो ङा ले?”
23येशुगी सुवालाक, “ङीमुला फोरा च्यीकगी नाङने शागीनगी़, ङाला डागी लाकला ची ग्याप्कीलाक। 24मी-भुला खी़ कोरला ढीक हो़गीन दे च्योक्रे, झ्युङघोगुलाक हीना मी-भुला डागी लाकला ची ग्याप्कीनगो ॱङ्याली। मी दे जीक्तेनदु केवाले ॱमाके हो़ना, घा हुङयेहो़क।”
25डागी लाकला ची ग्याप्ये झ्यीगीन युदागी श्यी़वालाक, “राब्बी, होदेगो ङा ले?”
धेनी येशुगी खोला सुवालाक, “ख्यी़राङ ॱनेजुङ।”
26धा खुङक्या शी घाङला येशुगी ग्याङगा क्षाकला ॱनुम्दी, ॱमो़लाम श्यी़री चाक जेपालाक धेनी ङेनेक्याला तेरती सुवालाक, “दे ङी ली़ हीन। लेन्दी शो।”
27धेनी खोङबागी फोरा च्यीक ॱनुम्दी, को़न्क्षोकला काटीन्क्षे श्यी़वालाक। धेनी खुङक्याला तेरती सुवालाक, “खेक्या घीरी देने थुङ। 28घीझ्येरी ॱनाना दे नी, धाम्चा साबागी ङी ठाक हीन। ठाक दे माङक्षेगी, धीक्पा सेयेगी क्षीला थो़न्गीलाक। 29ङा खेक्याला ॱनाहीन, ङी यापगी ग्यासी नाङदु घुन्क्षाङ साबा खीकीमुला ॱमीथुङगीन ङीमा थुक्पे, ङा घुन्क्षाङ दे धाब्ले ॱमीथुङ।”
30धेनी खोङबाक्याई तो़याङ च्यीक पुरी, क्युरुस्यीङगी री स्योकला फेप्पालाक।
पेटोगी ङोलेन मीझ्यीगीनगी कोरला
(मारकु १४:२७-३१; लुका २२:३१-३४; योहान्ना १३:३६-३८)
31धेनी येशुगी खुङक्याला सुवालाक, “धीरीङ छेमु ङी केनगी खेक्या घीरी, ङाने डारी डो़री डुगीलाक। घीझ्येरी ॱनाना देरे ढीक हो़तालाक,
‘ङा झीउला दुङयेहीन,
धेनी लुकगी ख्यु घीरी थोरकीलाक।’#जेकारीयास १३:७
32“हीना स्याम्ला ङा छीवाने सो़न्दी, खेक्याने एन्ला ङा गालीलदु डोयेहीन।”
33पेटोगी श्यी़वालाक, “घीरीगी खेराङला ग्याप ॱलोक्नाः, ङा नामा खेराङला ग्याप लोक्ती मेडो।”
34येशुगी खोला सुवालाक, “ङा ख्यो़ला धेन्पाराङ ॱनाहीन, धीरीङ छेमुराङ, झ्याफो केक ग्याप्ये एन्ला, ख्यी़ ङाला थेङमा सुम थुक्पे ङो ॱमेस्येहो़क ॱनेरी ॱनागीलाक।”
35हीना पेटोगी खोङबाला श्यी़वालाक, “ङा खेराङमुला स्यी घोनाः, ङा खेराङला ग्याप मेलोक।” धेनी ङेने घीरीगी देरेराङ श्यी़वालाक।
गेदसेमानी दुम्रादु सोवा धेप्पा
(मारकु १४:३२-४२; लुका २२:३९-४६)
36धेनी येशु राङगी ङेनेक्यामुला गेदसेमानी ॱनागीन, साजारु फेप्पालाक धेनी खोङबागी खुङक्याला सुवालाक, “ङा ॱहाला सोरी सोवा ग्याप्येहीन। खेक्या दुरुराङ धो़क।” 37खोङबागी पेटो धाङ जेबेदीगी भीजा ॱङीउ राङगीमुला ठीया जेपालाक। धेनी खोङबा ॱमीच्यीकी थुक क्योवा जेदी, दुङागी खावालाक। 38धेनी खोङबागी खुङक्याला सुवालाक, “ङी सेम सेम्दुकगी झ्येरी, स्यीस्या च्योक्रे झ्युदुक। खेक्या दुरु ङीमुला ॱङी मालोक्वा धो़क।”
39धेनी ॱहाला फेप्ती, खोङबा क्षाक क्षारी सोवा दे धेप्पालाक, “ङी याप, देरे झ्युङ थुक्ये हो़ना, दे दुक्ङेलगी फोरा ङाने ॱहाला लेन्दा जे। हीना ङी दो़पा मेन्दा, खेराङगी थुकोङ डुपास्योक।”
40धेनी खोङबा ङेने सुम्पोचारु लोक्ती फेई घाङला, खुङक्या ङ्यारी धेता शीक्पालाक। धेनी खोङबागी पेटोला सुवालाक, “खेक्या ङीमुला छुची च्यीया लारी धे ॱमीथुक्वाई? 41खेक्या छो़ताला ॱमाली़वास्योक ॱनेरी, ॱङी मालोक्वा सोवा ग्योप। सेमगो नी डाढीक दुक हीना ली़गो क्योवा दुक।”
42धेनी याङ थेङमा ॱङीवागोला खोङबा फेप्ती, सोवा दे धेप्पालाक, “ङी याप, दुक्ङेलगी फोरा दे, ङी ॱमाथुङगीन थुक्पे झ्युङये मेना, खेराङगी थुकोङ डुप्पास्योक।” 43धेनी खोङबा फेई घाङला, खुङक्या धाब्ले ङ्यारी धेता शीक्पालाक घीझ्येरी ॱनाना खुङक्या ॱङीगी शी हो़तालाक।
44होझ्येरी खुङक्याला भोरती, खोङबा फेप्ती थेङमा सुम्बागोला होदे छीकक्याराङ सुरी सोवा धेप्पालाक। 45धेनी खोङबागी ङेनेक्याचारु फेप्ती सुवालाक, “खेक्या धोराङा ङ्यारी ॱङा सुरी धेताले? तो़दाङ, धी़चो़गो ॱलेप्सादुक। मी-भु धीक्चेनक्याई लाकदु ची ग्याप्कीलाक। 46लोङ, ता डो। तो़दाङ, ङाला डागी लाक्पाला ची ग्याप्कीनगो ङ्येलाराङ दुक।”
येशुला शीम्पा
(मारकु १४:४३-५०; लुका २२:४७-५३; योहान्ना १८:३-१२)
47येशु कामो़न सुङी घाङला, ङेने च्युङङीने च्यीक युदा ॱनागीनगो क्षो़पो़न क्षेक्या धाङ मी गेम्पाक्याई ताता मीछोक माङा च्यीक राडी धाङ ग्युक्पा खेरती, हुङगीनक्यामुला होवालाक। 48धा ग्याप्तो़ झ्यीगीनगी़, खुङक्याला देरे ॱनेरी ताक तेर हो़तालाक, “ङी सुला ओ झ्यीदी, खोङराङ होदे मीगो लाक। खोङला शीम।” 49धेनी खो लाम्साङ येशु दोङदु च्यारती, खोङला “राब्बी” ॱनेरी ओ झ्येरी, छाम्डी श्यी़वालाक।
50येशुगी खोला सुवालाक, “ढोक्पो, ख्यो़ घी झ्यीदु हुङगीनगो झ्यी।” धेनी मीक्या होरी, खोङबाला लाक्पा क्यारी खोङला शीम्बालाक।
51धेनी होदुरु येशुमुला हो़गीनक्याने, च्यीकगी राङगी राल्डी तो़न्दी, चो क्षो़पो़नगी ॱयोक्पो च्यीकला डी ग्याप्ती, खी़ आमच्योक च्येपालाक। 52धेनी येशुगी खोला सुवालाक, “राङगी राल्डी नाङला चुक। घीझ्येरी ॱनाना राल्डी भो़चे झ्यीगीनगो, राल्डीगीराङ सेगीलाक। 53ख्यी़ साम्बाला ङा ङी यापला श्यी़ ॱमीथुक्वालाक सामी? धेनी ङी श्यी़ना खोङगी ङाला नाम्खे भाङछेनगी ॱमाक्पुङ च्युङङीने, ल्हाक ताङ ॱमीथुक्कीले? 54हीना देरे झ्युहो़ना, सुङरापला झ्युङ घो़गुलाक ॱनागीनगो, घाङगी झ्येरी डुप्कीले?”
55होदे धी़चो़ला येशुगी मीछोकक्याला सुवालाक, “झ्याक्पा च्यीकला शीम्दु डुगीन च्योक्रे, राल्डी धाङ ग्युक्पा खेरती खेक्या ङाला शीम्दु हुङाले? श्याक्मो-श्याक्मोला ङा को़न्क्षोकगी क्षो़खाङदु धेती ॱलाबालाक धेनी खेक्याई ङाला शीम्गी मीदुक। 56हीना दे घीरी ॱङो़नस्येखेनक्याई सुङरापला ढीक्टाक्या, डुप्तु च्युक्येला झ्युवालाक।” धेनी ङेने घीरी खोङबाला भोरती डो़वालाक।
येशु छोक्तेनगी दोङदु
(मारकु १४:५३-६५; लुका २२:५४-५५,६२-७१; योहान्ना १८:१३,१४,१९-२४)
57येशुला शीम्गीनक्याई खोङबाला चो क्षो़पो़न कायाफागी नाङदु जोम्जा, क्षो़ठीमगी ॱलोपो़नक्या धाङ गेम्पाक्याई चारु ठीक्पालाक। 58धेनी पेटो थाक्रीङाने चो क्षो़पो़नगी घोरा थुक्पे, खोङबागी स्याम्बाला डावालाक धेनी स्याम्ला घी झ्युङडी़ ॱनेरी तायेला, खो नाङला जुरी घोरेक्यामुला धेपालाक। 59धा क्षो़पो़न क्षेक्या धाङ छोक्दी़गी मी घीरीगी, येशुला सेदु च्युक्येला खोङबागी ग्याप्तो़ला पाङपो शोक्पोक्या चावालाक। 60पाङपो शोक्पो तेरकीनक्या माङा होवालाक हीना खुङक्याई क्यो़न च्यीया ॱमाङेबालाक। स्याम्ला मी ॱङी दोङला होरी 61ॱनेवालाक, “दे मी देगी ‘ङा को़न्क्षोकगी क्षो़खाङ स्यीक्ती, श्याक्मो सुमला चीक थुक्येहो़क।’ ॱनेरी ॱनेजुङ।”
62धेनी चो क्षो़पो़न याला लारी येशुला ॱनेवालाक, “ख्यो़ला लेन ग्याप्येला घीया मेते? दे मी देगी ख्यी़ कोरला, देरे पाङपो तेरकीन दे घी ले?”
63हीना येशुगी घीया ॱमासुवालाक। धेनी चो क्षो़पो़नगी खोङबाला ॱनेवालाक, “ङा को़न्क्षोक सो़न्पोला ॱना क्यारी ॱनाहीन, ख्यो़ को़न्क्षोकगी से मास्यीकागो हीने, हेक्याला स्यो़क?”
64येशुगी खोला सुवालाक, “खेराङगीराङ सुजुङ। हीना ङा खेराङला ॱनाहीन, देने ॱहाला खेराङगी मी-भु कुवाङगी क्षाक ॱयेला श्युक्कीन धाङ ॱनामगी ॱरीङगी खाला फेप्कीनगो थोङगीलाक।”
65धेनी चो क्षो़पो़नगी खोरी घो़ रारी ॱनेवालाक, “ख्यी़ को़न्क्षोकला कुरवा ताप्यी! धा देने ल्हाक पाङपो होराङला घी घोये दुओ? खी़ को़न्क्षोकला कुरवा ताप्कीनगो खेक्याई घोरजुङ। 66खेक्याई साम्लो घी हेतो?”
खुङक्याई ॱनेवालाक, “खो स्यीघोगुलाक।” 67धेनी खुङक्याई खोङबागी श्यालला छीमाक तोरती खोङला दुवालाक। धेनी रीङगागी खोङबाला डाम्चाक श्युरती, 68ॱनेवालाक, “मास्यीका ख्यो़, ख्यो़ला श्युरकीनगो सुले? ॱङो़नस्ये स्यो़क!”
पेटोगी येशुला खेमालाङवा
(मारकु १४:६६-७२; लुका २२:५६-६२; योहान्ना १८:१५-१८,२५-२७)
69धा पेटो फीला घोरारु धेती श्याक हो़तालाक। धेनी ॱयोक्मो च्यीक खोचारु होरी ॱनेवालाक, “ख्यो़या गालीलपा येशुमुला दुक।”
70हीना खी़ घीरीगी दोङदु खेमालेन्पा ॱनेवालाक, “ख्यी़ घी ॱनागीनगो ङाला स्येयेमेक।” 71धेनी खो घोच्चा स्योकला डी़ घाङला, ॱयोक्मो श्येम्मा च्यीकगी खोला थोरी, होदुरु हो़गीनक्याला ॱनेवालाक, “दे मी दे नाजारेपा येशुमुला दुक।”
72याङ धाब्ले देरे ॱना क्यारी, खी़ खेमालेन्बालाक, “ङा होदे मीला ॱमेस्येहो़क!”
73तीते च्यीक स्याम्ने होदुरु लारी धेताक्या, पेटोचारु होरी ॱनेवालाक, “ख्यो़ खुङक्याने च्यीक ॱङोन्ने हीन्दाराक। ख्यी़ केनेराङ स्येली।”
74धेनी पेटोगी ॱनेवालाक, “ङा धेन्पा ॱनाहीन ॱनेरी ॱना क्यालाहीन। मेन्ना को़न्क्षोकगी ङेपा ङाला फोवास्योक। ङा होदे मीला ॱमेस्येहो़क!” धेनी लाम्साङ झ्याफोगो केक ग्याप्पालाक।
75धेनी पेटोगी येशुगी देरे सुङगीनगो ढेन सो़वालाक, “झ्याफोगी केक ग्याप्कीन एन्लाराङ, ख्यी़ ङाला थेङमा सुम खेलेन्गीमालाक।” धेनी खो फीला सोरी ॱमीच्यीकी ङी़वालाक।
Currently Selected:
मेथा 26: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
मेथा 26
26
येशुला सेयेगी ढो़
(मारकु १४:१,२; लुका २२:१,२; योहान्ना ११:४५-५३)
1येशुगी का दे घीरी सुङसारती, राङगी ङेनेक्याला सुवालाक, 2“ङीमा ॱङी स्याम्ने पेसाकगी धी़छेनगो हुङगीलाक ॱनेरी, खेक्याला स्येये हो़तालाक धेनी मी-भु नी ग्याङस्यीङला क्याङयेगी क्षीला, डागी लाकला ची ग्याप्कीलाक।”
3धा क्षो़पो़न क्षेक्या धाङ मीगी गेम्पाक्या कायाफा ॱनागीन, चो क्षो़पो़नगी फोडाङदु जोम्बालाक। 4धेनी खुङक्याई येशुला घाङगी झ्येरी ॱली़री शीम्ये धाङ सेयेगी डो़ मुला झ्येवालाक। 5हीना खुङक्याई ॱनेवालाक, “धी़छेन घाङला शीम्गु मालाक। शीम्ना मीमाङक्या खोकला शीङटाक लाङगीलाक।”
येशु बेथानीरु
(मारकु १४:३-९; योहान्ना १२:१-८)
6धा येशु बेथानीरु जेने सीमोनगी नाङदु श्युक हेती घाङला, 7केमी च्यीक खोङबागी डुङदु धो कामारुगी भुम्पा नाङदु, ॱमीच्यीकी रीङक्षे ढीस्यीमगी ॱनुम खेरती च्यारपालाक। धेनी खोङबा श्येलाक श्येली घाङला, मी़ होदे ॱनुमगो खोङबागी उला ॱलुक्पालाक। 8धेनी ङेनेक्याई होदे थोरी श्येताङ लारी ॱनेवालाक, “दे घीझ्येरी सेला ताङाले? 9दे चोङ हो़ना, ॱमीच्यीकी रीङक्षे खुक्ये हो़क धेनी होदे आलेगो उटेक्याला तेरये हो़तालाक।”
10हीना येशुगी दे खेन्दी खुङक्याला सुवालाक, “खेक्या मोला घीझ्येरी दुक्पु तेरा? मी़ ङी क्षीला ले शाङा च्यीक झ्येदुक। 11घीझ्येरी ॱनाना उटेक्या च्योई खीकीमुला हुङालाक हीना ङा खेक्यामुला च्योई हुङगीमालाक। 12धेनी दे ॱनुम दे ङी शुला ॱलुक्ती, मी़ ङा धी़ठोदु डोयेगी क्षीला डाढीक झ्यीदालाक। 13ङा खेक्याला धेन्पाराङ ॱनाहीन, जीक्तेन नाङदु घारु दे ताम्शाङ दे स्येदीक, होदुरु दे भोमो दी झ्यीगीन तामगोवा मी़ ढेन्सो़गी क्षीला स्येगीलाक।”
युदागी येशुला ॱली़गीनगी कोरला
(मारकु १४:१०-११; लुका २२:३-६)
14धेनी ङेने च्युङङीने युदा ईस्कारीयोत ॱनागीनगो, क्षो़पो़न क्षेक्या चारु सोरी 15श्यी़वालाक, “ङी खोङबाला खीकी लाकला ची ग्याप्ना, ङाला घी तेरये?” धेनी खुङक्याई खोला ॱङुगी टाङगा सुमच्यु तेरपालाक। 16धेनी होदेने ॱहाला, खी़ येशुला खुङक्याई लाकला ची ग्याप्येगी घोकाप चावालाक।
थामे श्येलाक
(मारकु १४:१२-२६; लुका २२:७-२३; योहान्ना १३:२१-३०)
17धा क्युरची मेगीन ग्याङगागी धी़छेनगी ङीमा धाङपोगोला, ङेनेक्या येशु डुङदु च्यारती श्यी़वालाक, “खेराङगी क्षीला पेसाकगी धी़छेनगी, श्येलाक घारु स्यामगु?”
18खोङबागी सुवालाक, “ग्याजा नाङदु मी च्यीक चारु सोरी, खोला देरे ॱनो़, ‘ॱलोपो़नलागी देरे सुङी, ङी धी़चो़ ङ्ये ॱलेप्सादुक। खेराङगी नाङदु, ङा ङी ङेनेक्यामुला पेसाकगी धी़छेन ताङयेहीन।’” 19धेनी ङेनेक्याई येशुगी खुङक्याला सुङगीन च्योक्रे झ्येवालाक धेनी पेसाकगी धी़छेनगी श्येलाक स्याम्बालाक।
20धा घोमोगो खोङबा राङगी, ङेने च्युङङीक्यामुला श्येलाक श्येयेला श्युक्पालाक। 21धेनी खोङबाक्या श्येली घाङला, खोङबागी सुवालाक, “ङा धेन्पाराङ खेक्याला ॱनाहीन, खेक्याने च्यीकगी ङाला डागी लाकदु ची ग्याप्कीलाक।” 22धेनी खुङक्या ॱमीच्यीकी सेम क्योरी, च्यीकगी स्याम्ने च्यीकगी देरे ॱनाये गो चुक्पालाक, “चोवो, होदेगो ङा ले?”
23येशुगी सुवालाक, “ङीमुला फोरा च्यीकगी नाङने शागीनगी़, ङाला डागी लाकला ची ग्याप्कीलाक। 24मी-भुला खी़ कोरला ढीक हो़गीन दे च्योक्रे, झ्युङघोगुलाक हीना मी-भुला डागी लाकला ची ग्याप्कीनगो ॱङ्याली। मी दे जीक्तेनदु केवाले ॱमाके हो़ना, घा हुङयेहो़क।”
25डागी लाकला ची ग्याप्ये झ्यीगीन युदागी श्यी़वालाक, “राब्बी, होदेगो ङा ले?”
धेनी येशुगी खोला सुवालाक, “ख्यी़राङ ॱनेजुङ।”
26धा खुङक्या शी घाङला येशुगी ग्याङगा क्षाकला ॱनुम्दी, ॱमो़लाम श्यी़री चाक जेपालाक धेनी ङेनेक्याला तेरती सुवालाक, “दे ङी ली़ हीन। लेन्दी शो।”
27धेनी खोङबागी फोरा च्यीक ॱनुम्दी, को़न्क्षोकला काटीन्क्षे श्यी़वालाक। धेनी खुङक्याला तेरती सुवालाक, “खेक्या घीरी देने थुङ। 28घीझ्येरी ॱनाना दे नी, धाम्चा साबागी ङी ठाक हीन। ठाक दे माङक्षेगी, धीक्पा सेयेगी क्षीला थो़न्गीलाक। 29ङा खेक्याला ॱनाहीन, ङी यापगी ग्यासी नाङदु घुन्क्षाङ साबा खीकीमुला ॱमीथुङगीन ङीमा थुक्पे, ङा घुन्क्षाङ दे धाब्ले ॱमीथुङ।”
30धेनी खोङबाक्याई तो़याङ च्यीक पुरी, क्युरुस्यीङगी री स्योकला फेप्पालाक।
पेटोगी ङोलेन मीझ्यीगीनगी कोरला
(मारकु १४:२७-३१; लुका २२:३१-३४; योहान्ना १३:३६-३८)
31धेनी येशुगी खुङक्याला सुवालाक, “धीरीङ छेमु ङी केनगी खेक्या घीरी, ङाने डारी डो़री डुगीलाक। घीझ्येरी ॱनाना देरे ढीक हो़तालाक,
‘ङा झीउला दुङयेहीन,
धेनी लुकगी ख्यु घीरी थोरकीलाक।’#जेकारीयास १३:७
32“हीना स्याम्ला ङा छीवाने सो़न्दी, खेक्याने एन्ला ङा गालीलदु डोयेहीन।”
33पेटोगी श्यी़वालाक, “घीरीगी खेराङला ग्याप ॱलोक्नाः, ङा नामा खेराङला ग्याप लोक्ती मेडो।”
34येशुगी खोला सुवालाक, “ङा ख्यो़ला धेन्पाराङ ॱनाहीन, धीरीङ छेमुराङ, झ्याफो केक ग्याप्ये एन्ला, ख्यी़ ङाला थेङमा सुम थुक्पे ङो ॱमेस्येहो़क ॱनेरी ॱनागीलाक।”
35हीना पेटोगी खोङबाला श्यी़वालाक, “ङा खेराङमुला स्यी घोनाः, ङा खेराङला ग्याप मेलोक।” धेनी ङेने घीरीगी देरेराङ श्यी़वालाक।
गेदसेमानी दुम्रादु सोवा धेप्पा
(मारकु १४:३२-४२; लुका २२:३९-४६)
36धेनी येशु राङगी ङेनेक्यामुला गेदसेमानी ॱनागीन, साजारु फेप्पालाक धेनी खोङबागी खुङक्याला सुवालाक, “ङा ॱहाला सोरी सोवा ग्याप्येहीन। खेक्या दुरुराङ धो़क।” 37खोङबागी पेटो धाङ जेबेदीगी भीजा ॱङीउ राङगीमुला ठीया जेपालाक। धेनी खोङबा ॱमीच्यीकी थुक क्योवा जेदी, दुङागी खावालाक। 38धेनी खोङबागी खुङक्याला सुवालाक, “ङी सेम सेम्दुकगी झ्येरी, स्यीस्या च्योक्रे झ्युदुक। खेक्या दुरु ङीमुला ॱङी मालोक्वा धो़क।”
39धेनी ॱहाला फेप्ती, खोङबा क्षाक क्षारी सोवा दे धेप्पालाक, “ङी याप, देरे झ्युङ थुक्ये हो़ना, दे दुक्ङेलगी फोरा ङाने ॱहाला लेन्दा जे। हीना ङी दो़पा मेन्दा, खेराङगी थुकोङ डुपास्योक।”
40धेनी खोङबा ङेने सुम्पोचारु लोक्ती फेई घाङला, खुङक्या ङ्यारी धेता शीक्पालाक। धेनी खोङबागी पेटोला सुवालाक, “खेक्या ङीमुला छुची च्यीया लारी धे ॱमीथुक्वाई? 41खेक्या छो़ताला ॱमाली़वास्योक ॱनेरी, ॱङी मालोक्वा सोवा ग्योप। सेमगो नी डाढीक दुक हीना ली़गो क्योवा दुक।”
42धेनी याङ थेङमा ॱङीवागोला खोङबा फेप्ती, सोवा दे धेप्पालाक, “ङी याप, दुक्ङेलगी फोरा दे, ङी ॱमाथुङगीन थुक्पे झ्युङये मेना, खेराङगी थुकोङ डुप्पास्योक।” 43धेनी खोङबा फेई घाङला, खुङक्या धाब्ले ङ्यारी धेता शीक्पालाक घीझ्येरी ॱनाना खुङक्या ॱङीगी शी हो़तालाक।
44होझ्येरी खुङक्याला भोरती, खोङबा फेप्ती थेङमा सुम्बागोला होदे छीकक्याराङ सुरी सोवा धेप्पालाक। 45धेनी खोङबागी ङेनेक्याचारु फेप्ती सुवालाक, “खेक्या धोराङा ङ्यारी ॱङा सुरी धेताले? तो़दाङ, धी़चो़गो ॱलेप्सादुक। मी-भु धीक्चेनक्याई लाकदु ची ग्याप्कीलाक। 46लोङ, ता डो। तो़दाङ, ङाला डागी लाक्पाला ची ग्याप्कीनगो ङ्येलाराङ दुक।”
येशुला शीम्पा
(मारकु १४:४३-५०; लुका २२:४७-५३; योहान्ना १८:३-१२)
47येशु कामो़न सुङी घाङला, ङेने च्युङङीने च्यीक युदा ॱनागीनगो क्षो़पो़न क्षेक्या धाङ मी गेम्पाक्याई ताता मीछोक माङा च्यीक राडी धाङ ग्युक्पा खेरती, हुङगीनक्यामुला होवालाक। 48धा ग्याप्तो़ झ्यीगीनगी़, खुङक्याला देरे ॱनेरी ताक तेर हो़तालाक, “ङी सुला ओ झ्यीदी, खोङराङ होदे मीगो लाक। खोङला शीम।” 49धेनी खो लाम्साङ येशु दोङदु च्यारती, खोङला “राब्बी” ॱनेरी ओ झ्येरी, छाम्डी श्यी़वालाक।
50येशुगी खोला सुवालाक, “ढोक्पो, ख्यो़ घी झ्यीदु हुङगीनगो झ्यी।” धेनी मीक्या होरी, खोङबाला लाक्पा क्यारी खोङला शीम्बालाक।
51धेनी होदुरु येशुमुला हो़गीनक्याने, च्यीकगी राङगी राल्डी तो़न्दी, चो क्षो़पो़नगी ॱयोक्पो च्यीकला डी ग्याप्ती, खी़ आमच्योक च्येपालाक। 52धेनी येशुगी खोला सुवालाक, “राङगी राल्डी नाङला चुक। घीझ्येरी ॱनाना राल्डी भो़चे झ्यीगीनगो, राल्डीगीराङ सेगीलाक। 53ख्यी़ साम्बाला ङा ङी यापला श्यी़ ॱमीथुक्वालाक सामी? धेनी ङी श्यी़ना खोङगी ङाला नाम्खे भाङछेनगी ॱमाक्पुङ च्युङङीने, ल्हाक ताङ ॱमीथुक्कीले? 54हीना देरे झ्युहो़ना, सुङरापला झ्युङ घो़गुलाक ॱनागीनगो, घाङगी झ्येरी डुप्कीले?”
55होदे धी़चो़ला येशुगी मीछोकक्याला सुवालाक, “झ्याक्पा च्यीकला शीम्दु डुगीन च्योक्रे, राल्डी धाङ ग्युक्पा खेरती खेक्या ङाला शीम्दु हुङाले? श्याक्मो-श्याक्मोला ङा को़न्क्षोकगी क्षो़खाङदु धेती ॱलाबालाक धेनी खेक्याई ङाला शीम्गी मीदुक। 56हीना दे घीरी ॱङो़नस्येखेनक्याई सुङरापला ढीक्टाक्या, डुप्तु च्युक्येला झ्युवालाक।” धेनी ङेने घीरी खोङबाला भोरती डो़वालाक।
येशु छोक्तेनगी दोङदु
(मारकु १४:५३-६५; लुका २२:५४-५५,६२-७१; योहान्ना १८:१३,१४,१९-२४)
57येशुला शीम्गीनक्याई खोङबाला चो क्षो़पो़न कायाफागी नाङदु जोम्जा, क्षो़ठीमगी ॱलोपो़नक्या धाङ गेम्पाक्याई चारु ठीक्पालाक। 58धेनी पेटो थाक्रीङाने चो क्षो़पो़नगी घोरा थुक्पे, खोङबागी स्याम्बाला डावालाक धेनी स्याम्ला घी झ्युङडी़ ॱनेरी तायेला, खो नाङला जुरी घोरेक्यामुला धेपालाक। 59धा क्षो़पो़न क्षेक्या धाङ छोक्दी़गी मी घीरीगी, येशुला सेदु च्युक्येला खोङबागी ग्याप्तो़ला पाङपो शोक्पोक्या चावालाक। 60पाङपो शोक्पो तेरकीनक्या माङा होवालाक हीना खुङक्याई क्यो़न च्यीया ॱमाङेबालाक। स्याम्ला मी ॱङी दोङला होरी 61ॱनेवालाक, “दे मी देगी ‘ङा को़न्क्षोकगी क्षो़खाङ स्यीक्ती, श्याक्मो सुमला चीक थुक्येहो़क।’ ॱनेरी ॱनेजुङ।”
62धेनी चो क्षो़पो़न याला लारी येशुला ॱनेवालाक, “ख्यो़ला लेन ग्याप्येला घीया मेते? दे मी देगी ख्यी़ कोरला, देरे पाङपो तेरकीन दे घी ले?”
63हीना येशुगी घीया ॱमासुवालाक। धेनी चो क्षो़पो़नगी खोङबाला ॱनेवालाक, “ङा को़न्क्षोक सो़न्पोला ॱना क्यारी ॱनाहीन, ख्यो़ को़न्क्षोकगी से मास्यीकागो हीने, हेक्याला स्यो़क?”
64येशुगी खोला सुवालाक, “खेराङगीराङ सुजुङ। हीना ङा खेराङला ॱनाहीन, देने ॱहाला खेराङगी मी-भु कुवाङगी क्षाक ॱयेला श्युक्कीन धाङ ॱनामगी ॱरीङगी खाला फेप्कीनगो थोङगीलाक।”
65धेनी चो क्षो़पो़नगी खोरी घो़ रारी ॱनेवालाक, “ख्यी़ को़न्क्षोकला कुरवा ताप्यी! धा देने ल्हाक पाङपो होराङला घी घोये दुओ? खी़ को़न्क्षोकला कुरवा ताप्कीनगो खेक्याई घोरजुङ। 66खेक्याई साम्लो घी हेतो?”
खुङक्याई ॱनेवालाक, “खो स्यीघोगुलाक।” 67धेनी खुङक्याई खोङबागी श्यालला छीमाक तोरती खोङला दुवालाक। धेनी रीङगागी खोङबाला डाम्चाक श्युरती, 68ॱनेवालाक, “मास्यीका ख्यो़, ख्यो़ला श्युरकीनगो सुले? ॱङो़नस्ये स्यो़क!”
पेटोगी येशुला खेमालाङवा
(मारकु १४:६६-७२; लुका २२:५६-६२; योहान्ना १८:१५-१८,२५-२७)
69धा पेटो फीला घोरारु धेती श्याक हो़तालाक। धेनी ॱयोक्मो च्यीक खोचारु होरी ॱनेवालाक, “ख्यो़या गालीलपा येशुमुला दुक।”
70हीना खी़ घीरीगी दोङदु खेमालेन्पा ॱनेवालाक, “ख्यी़ घी ॱनागीनगो ङाला स्येयेमेक।” 71धेनी खो घोच्चा स्योकला डी़ घाङला, ॱयोक्मो श्येम्मा च्यीकगी खोला थोरी, होदुरु हो़गीनक्याला ॱनेवालाक, “दे मी दे नाजारेपा येशुमुला दुक।”
72याङ धाब्ले देरे ॱना क्यारी, खी़ खेमालेन्बालाक, “ङा होदे मीला ॱमेस्येहो़क!”
73तीते च्यीक स्याम्ने होदुरु लारी धेताक्या, पेटोचारु होरी ॱनेवालाक, “ख्यो़ खुङक्याने च्यीक ॱङोन्ने हीन्दाराक। ख्यी़ केनेराङ स्येली।”
74धेनी पेटोगी ॱनेवालाक, “ङा धेन्पा ॱनाहीन ॱनेरी ॱना क्यालाहीन। मेन्ना को़न्क्षोकगी ङेपा ङाला फोवास्योक। ङा होदे मीला ॱमेस्येहो़क!” धेनी लाम्साङ झ्याफोगो केक ग्याप्पालाक।
75धेनी पेटोगी येशुगी देरे सुङगीनगो ढेन सो़वालाक, “झ्याफोगी केक ग्याप्कीन एन्लाराङ, ख्यी़ ङाला थेङमा सुम खेलेन्गीमालाक।” धेनी खो फीला सोरी ॱमीच्यीकी ङी़वालाक।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society