Yohanes 12
12
Yesus isok vaga amburup ndibagagi wene
(Matius 26:6-13; Markus 14:3-9)
1Andien, nogo 5 yikbaluk, isogo ombok Vasika isarup ako vage ari warisogon hegek, At Yesus o Betania ap Lasarus hombagagirikmu en iluk erogo mondok okbagagi ako amwa lagagi. 2Lagya lagagimu, it avakwa andoma en Yesus agasogo isagagwarikmu, Mareta en isogo wogirigya hegek, avakwa Yesus inim hora yiluk erom nunggusim, Lasarus inim nunggugwa. 3Nunggusim, at Maria en yo narwastu amburup amben eve sek menda setengah liter wagagi. Amburup narwastu menda ako andi mondok onggo ombok belagwi menda. Wigya lagagirik Yesus isok vaga ndibagya lagagirik, at iris vaga hutigi. Hutu hegek, amburup amben ako so yagan umwa akoma nonggagagi.
4Andenam werekma, At Yesus ane welagwi menda ambi Yudas Ikariot hivis Yesus warupwak yiluk yugerayogon akoen, 5“Aga! Avyak! Amburup amben eyave sek menda yi ako, onggo ombok yoparip 300 denari vaga onggo hunogo it ininggidek menda wogeraup sek hegek ovara, ogaga yi, nggarogo yiluk, ogaga ombasagwi?” yagagi. 6Wene yagagi ako andi, it ap ininggidek ako enabwa imbita dugwit yagagibuk. Ata, at ap onggop menda atma, it enayoparip yidik ako at bendahara dugwit, nin onggop hidigya lagagi andien yiluk, yagagi.
7-8Iri lagagimu, At Yesus en, “Hwa yi hekbas! It ap ininggidek ako andi, hinim mondok dogogup ovara, An andi hinim mondok dogosogonbuk. Hwa yi, An neyave hambigya neyalok, wimu banilaup atma yiluk, amburup yi okbenanggarikmu, hekbas,” yiluk, yugeragagi.
It ap imam-imam en Lasarus warup yiluk avok yagagwa wene
9Yugirigya hegek, it avakwa Yakuri menda wisane en Yesus o Betania akoma agarik enaruk hunggu lagagwarik, At Yesus adigat inil haguluk lagagwabuk. Ata, ap Lasarus hombagagi Yesus en iluk erogo mondok okbagagi ako ogo inil haguluk, lagagwa. 10-11Lagu lagagwama, Yesus en Lasarus iluk erogo mondok okbagagi vaga it avakwa Yakuri menda wisane enasini enane mbobaluk, enendawi Yesus ovaga vanggabaluk, avyarat umbutugwa. Avyarat umbutu lagagwama, it ap imam-imam enasini en Lasarus ogo, warugen yiluk, wene mbanggugwa.
Yesus o Yerusalem nunggwigyaim inis siyabagagwa wene
(Matius 21:1-11; Markus 11:1-11; Lukas 19:28-40)
12Hutun it avakwa wisane isogo isagusim homagagwa akoen Yesus o Yerusalem wandiga enaruk hunggu lagagwarik, 13#Mazmur 118:25, 26 yokhanes. yo ndila angga hedalogo wolok Yesus adema ari lagu lagagwarik, inim wagu dugwit,
“Hosana!#12:13: Inis Hosana andi, adem mberen werek. Ambi andi, o endak erogo adem andi ‘Nenagap wendaru!’ yugu lagagwa. Eke, hivis, Yesus welagagi hudi, adem andi, ‘Ala inis siyabaup,’ yugu lagagwa.
Nenasin Ala inis vaga wandiga yi, inis siyabelagwi o.”
Nit ap Iserali Nenowa Inis Ombok yi, Inis siyabasogom o,”
yiluk, enane ombok vaga amitmit yagan wagagwa.
14-15 #
Zakharia 9:9 yokhanes. Ala wene ambi endak dirup warek ako At Ala en iri dugwit:
“Hit avakwa o kota Sion agipik menda henalon habuk!
Hit Henowa Inis Ombok keledai eyak ambot vaga hora yiluk wandiga yi hinil yokhanes,”
yiluk, yagagi dirup warek ako wane-wane, At Yesus keledai eyak ambi heyakbagya lagagirik, ambot vaga hora yiluk wagagi.
16Anderogo ogagagwa ako At Yesus ane welagwi menda endak dibagetek welagagwa ovara, hivis Ala en At Yesus hambisagwima en, iluk erogo mondok okbagya lagagirik, siyabagya lagagimu, “At anderogo okbasogom,” yiluk, dirup warek ako, “Nit At okbagyo higyo,” yiluk, umbutugwa.
17It avakwa wisane Yesus inim dugwit, Lasarus hombagagi iluk erogo mendek okbagya lagagirik, wimu en wulu warupwak yiluk, “Wuluma,” yugugu hagagwa akoen, “Yesus anderogo ogagya higyo o,” yiluk, avakwa vagalogo yugeregek lagagwa. 18Vagalogo yugeregek lagu lagagwama, nggarogo ogarubuk menda At ogagagi andi, it avakwa wisane erogo hunggu lagagwarik, At Yesus adema hawunggugwa. 19Adema hawunggu lagagwama, it Varisi menda en ir-it wene mbanggu dugwit, “Ap yoma wai! Yi avakwa ndi avakwa ovok erogo At amusek lagusim, nit ambi okbaup mondok meyan yi helagwi?” yiluk, yagagwa.
It Yunani menda Yesus belalit wagagwa wene
20Ala inis siyabaguluk, isogo isagusim wagagwa ako andi, it avakwa Yunani menda inim wagagwa. 21Wagagwarikmu, ap o Galilea awi Mbesaida menda inis Pilipus ako adema lagu lagagwarik, yugugu dugwit, “Nenasin wai! Nit Yesus inim wene ambi yuguluk, wagyo.” 22Yugugu lagagwama, at Pilipus en Andereas yuguri lagya lagagirik, iperen Yesus yuguri lagagwa.
23Yugugu lagagwama, At Yesus en, “An Ap-At Endaklagagis ako siyabanup andi vage horok yiat ari waga. 24Iwabuk enggen wen elola wombabaluk, sanggitek halok, enggen ambiat dogosogon. Eke awi enggen wen elola sangguselok, avuduk wunggu halok andi, enggen wisane erogo yiliga. 25Ap ambi saen at eyave iluk dogop endawi hunik okhidigya halok, at eyave yelemele-at yisogon. Eke, o wen vaga yoma dugwit, at eyave iluk dogop anggon imbita halok, iluk mondok-mondok-at dogosogon. 26Ap ambi saen An nake ogarup imbita halok, mondok namusek-at wagya dogopwak. An hivis dogopim akoma nayeloman ogo niperen andoma-at dogosogom. Eke, An nake ogagya halok, Nasin en at siyabayogon, yiluk, mondok avyarat yukheraliga o,” yugeragagi.
“An hambisogon o,” yiluk, yugeragagi wene
27Yugirigya lagagirik, Aren iri dugwit, “Yogak nendawi mondok anggin agirik atma, An nggarogo yik? ‘Nasin, it yogak okbanup ombasagwi ako, okbanunggu saoen, degerogo baluk nagap wendakneran o,’ Nasin yugirik a? Dek. An anderogo okbanupwak yiluk wagagis atma, An anderogo yugisogonbuk. 28Halok, Nasin, Hat hinis siyabetoman,” yiluk, yugogogi.
Yugugu lagagimu, mbogot vaga en ane iri dugwit, “Ninis ovok siyabitigi atma, ambi inimat siyabetayogon,” yiluk, yagagi. 29Iri lagagimu, it avakwa wisane andenam welagagwa ako mbogot vaga en ane iris enaruk hunggu lagagwarik, “Wi! Andi o unggulane yagaliga,” yugwi, eke, it ninen, “Dek. Malaikat en wene ambi yugisiga,” yugwi, yagagwa.
30Anderogo yugu lagagwama, At Yesus en, “Ap yoma! Wene hunggip ako andi, An nake yiluk, yegetek. Hit henake-at yagas. 31It avakwa o wen vaga yoma agarwik enowak dilogo anggin enovaga bisaup ako, o yogak yiat. At o wen vaga yoma vagago agarik ako haryogo wibaup yogak yiat. 32Anderogo ovara, An wema yoma en siyabanungguselok andi, Anen yi avakwa ndi avakwa ovok erogo enendawi An nadema amor ari warupwak yiluk, oginivisogon o,” yiluk, yugeragagi. 33Wene yugeragagi ako, it avakwa en At yo vaga ilik baguselok, hambisogon inilup arupwak yiluk, yugeragagi.
34Yugirigya lagagimu, it avakwa akoen At yugugu dugwit, “Ala en, ‘An denogo mondok okbagagis Keretus ako andi, iluk mondok-mondok-at dogosogon o,’ yiluk, yagagi. Yagagi dirup watigi ako, nit nenaruk hunggugup ovara, ‘At Ap-At Endaklagagi hivis wema yoma en siyabasogom,’ yegen andi, nggarogo yiluk yegen? Ap-At Endaklagagi andi, sa?”
35Yugugu lagagwama, At Yesus en it yugirigya dugwit, “Awiya okbisaliga menda ako sidogat hinim dogosogon. Henendawi o hup ovagak okhinivi wagya haoen, awiya okbugu hegek, nagu dogones. Ap ambi saen o hwiserek vaga nagu halok, ‘Andoma ari laup,’ ao inggut hegek, landiga. 36An awiya okbisaliga ako hinim dugwit, An naburi arovovok yiluk, henendawi awiya okbisaliga ako novaga vanggabaluk, avyarat nombares,” yiluk, yugeragagi. Wene ako yugirigya lagagirik, At Yesus ako avakwa hekbisiluk, At heyak banunggu saoen yiluk, hwilaklari lagagi.
It Yakuri avyarat embetetek welagagwa wene
37At Yesus en avakwa inilup arup enalon werek menda wisane it inivaga ogagya lagagi ovara, it ako, enendawi At ovaga vanggabaluk, avyarat embetetek welagagwa. 38Avyarat embetetek welagagwa ako andi, wene ambi ap navi Yesaya akoen o muk erogo iri lagagi menda dirup watigi ako, atma des yupwak yiluk, it avyarat embetetek welagagwa. Wene ap navi Yesaya en yagagi ako yi:
“Nenasin o.
Wene nit yagan wagyo ako, sanien avyarat umbutugwa?
Eke, Hat hinggis anye agindik ako, sanien inil heyagagwa,
embetep? Dek o,”
yiluk, yagagi dirup watigi ako, atma des yagagi.
39-40Eke, wene ambi Ala en iri dugwit:
“It avakwa ako andi, inil hugwi, enendawi dibagwi,
okbaluk,
enasam huguselok, Anen segerogo okbugu neyaoen,
inil mbuk erogo bugu, enendawi apik erogo bugu,
ogagagis o,”
yiluk, yagagi Yesaya en dirup watigi ako wane-wane, enendawi apik erogo bogogi andien, it enendawi Yesus ovaga vanggabaluk, avyarat ombarup ako mondok degat welagagwa.
41At Yesaya wene yugeragagi ako andi, o muk erogo Yesus ao wagetek hegek, Keretus hivis warisogon ako mondok siyalek agarik higya lagagirik, avok mbilinggu dugwit, yugeragagi.
42At Yesaya anderogoat dirup watigi ovara, it Yakuri enasini ap ombok-ombok nin wisane enendawi Yesus ovaga vanggabaluk, avyarat umbutugwa. Avyarat umbutugwa ovara, it Varisi menda ako Yakuri samban ogasagwima en wibinunggu saoen, enalon en, “Nit At ane welagwi menda aro,” yiluk, sigam erogo yegetek-at welagagwa. 43It ako andi, Ala en sek nenombarupwak yiluk, embetetek dugwit, “Avakwa en sek nenombarup,” adigat enendawi sek umbutu lagagwa andi vaga, “Nit At ane welagwi menda aro,” yiluk, sigam erogo yegetek-at welagagwa.
Wene yugeragagi vaga anggin enovaga bisaup wene
44Andien, At Yesus ane ombok vaga it yugirigya dugwit, “Hit ambi henendawi novaga vanggabaluk, avyarat numbutu hiniselok, An nadigat henendawi avyarat nombasagwidek. Ata, At lakbani wagagi akoat henendawi ovaga vanggabaluk, avyarat ombasagwi. 45Hit ap sanien heyak banilagwi halok, At lakbani wagagi akoat heyakbelagwi. 46Hit ambien henendawi novaga vanggabaluk, avyarat numbutu hiniselok, o hwiserekma dogoguven yiluk, o awiya vaga dogovovok yiluk, An awiya ovagak o wen vaga yoma wagagis.”
47“Hit avakwa ovok erogo wen vaga agipik ako, henowak dilogo anggin henovaga bigigagiluk, wagetek. Henagap wendarigiluk wagagis atma, hit ambien An nane hobaluk, ogasagwidek halok, Anen henowak dilogo anggin henovaga bigigayogonbuk. 48Hit ambien An mbobanunggu dugwit, An nane wegetek hiniselok, henowak dilogo anggin onggo henovaga bigigaup ako ambi agarik. Andi, o hivis oklarugwi vaga An wene yukhirigya lagi ako vaga Nasin en henowak dilogo anggin onggo henovaga bigigayogon. 49An nendawi wenggebaluk en wene yukhirigya lagetek. Ata, An Nasin lakbani wagagi akoen, ‘Yerogo eru, nderogo eru,’ yiluk, yuknugu halok, yukheraliga. 50Eke, At wene yerogo ogarup, nderogo ogarup, yukneraliga andi, hit mondok hiniluk dogovovok yiluk yukheraliga andi, An nilup-at. An yukheraliga andi, An Nasin en yuknisiga wane-wane-at yukheraliga o,” yiluk, yugeragagi.
Currently Selected:
Yohanes 12: nbq2013
Highlight
Share
Copy
Want to have your highlights saved across all your devices? Sign up or sign in
