Yohanes 5
5
Inamut Mbeseda yanggadekma Yesus en ap ambi sek ogagagi wene
1Andi okbaluk, hivis it Yakuri menda isogo isagusim, Yesus o Yerusalem wambu wagagi. 2O Yerusalem andoma sup ambi inis Ndomba Enarup Mbanggut horok andenam inamut yanggadek ambi welagagi. Inamut yanggadek ako, Iberani enane vaga inis Mbeseda, yugu lagagwa. Inamut yanggadek ako omban vaga walinogo awi eravo 5 hudi valek welagagi. 3Avakwa wisane aup idup welagagwa ako andi, inil mbuk inim, enerambo weyak inim, ininggis-inisok yidugup inim, ndugurek-ndagarek andenam adigat hora yi lagek yugu lagagwa. [It aup idup ako inamut yanggadek yukul iri haoen yiluk, sok hugu lagagwa. 4Andi, Ala yonggo lakbisa wandiga menda malaikat ambien inamut yanggadekma Mbeseda akoma wambu wakluk, is yukul ogagya halok, ap aup idup ambiat endak ima nunggwigya halok, at adigat aup idup ako degat agya lagagi. Anderogo atma, it aup idup ako inamut yanggadek yukul ogagya haoen yiluk, sok hugu lagagwa.] 5Anderogo ogasagwima ap ambi idup adigat helan 38 tahun welagagi ako ogo, inim andoma-at horaik welagagi. 6Ap ako, o muk erogo anderogoat horaik welagagi Yesus yedok higya lagagirik, at yugugu dugwit, “Avyak wai! Hat sek arup ombasiga a, dek a?”
7Yugugu lagagimu, ap idup warek akoen, “Ai, Nasin! Is avolok ogagya halok, an woknombolok ima wombabani wambup naswei ambi dek atma, an ao wambigya neyagek, it ninen an vokabanilin enendak wambisagwi!”
8Yugugu lagagimu, At Yesus en yugugu dugwit, “Avyak! Mendek yiluk hagone ndalek nogo yiliga menda ako hedelok elak.” 9Anderogo yugugu hegek, ap ako sek agya lagagirik, mendek iri dugwit, agone ndalek nogo yiliga menda ako hedelok lagagi.
Anderogo ogagagi ako andi, it Yakuri samban ogasagwi vaga-at ogagagi. 10Samban ogasagwi vaga ogagagi atma, it ap ombok Yakuri menda en ap sek ogagagi ako yugugu dugwit, “Avyak! O yogak nit Yakuri samban ogasagwi vaga atma, hat hagone ndalek nogo yiliga menda ako wolok laup andi moga!”
11Yugugu lagagwama, at ap akoen it yugirigya dugwit, “Ap an sek oknetas akoen, ‘Hagone ndalek nogo yiliga menda hedelok elak,’ yuknigarikmu yiluk yagalagwi yi?”
12Yugirigya lagagimu, iren at yugugu dugwit, “Saen, ‘Hagone ndalek nogo yiliga menda hedelok elak,’ yukhigas?”
13Yugugu lagagwama, Yesus ako avakwa wisane andoma homago enanggelekma akoma yelemele yagarikmu, ap sek ogagagi akoen, “Ap anderogo en sek oknetas o,” yiluk, vagalogo yugeraup meyanat agagi.
14Andi okbaluk, hivis ap ako Ala awi valekma agarik Yesus il higya lagagirik, at yugugu dugwit, “Avyak! Hat heyave segat agindikmu, idup hivis ombok okhitya haoen, weyak ambi inim ogarubuk o,” yiluk, yugogogi. 15Yugugu lagagimu, ap ako wulu wagya lagagirik, “Dek o. Ap an sek oknetas ako andi, Yesus aro,” yiluk, it ap ombok Yakuri menda vagalogo yugeragagi.
16At Yesus en it ap Yakuri samban ogasagwi vaga anderogoat sek oginivit lagagirikmu, it Yakuri menda en Yesus wiyik-edok weyak-edok erogo okbaik lagagwa. 17Andi okbaik lagusigik, At Yesus en it yugirigya dugwit, “An Nasin o endak en mbikit, o yogak yi hudi vaga ndugurek-ndagarek hekbagatek yavup ogasiga atma, an ogo, anderogoat yavup ogasiga o,” yugeragagi.
18At Yesus en it Yakuri samban ogasagwi vaga ogarup moga wene hobalek hegek, ogagagi vaga adigat dek. Ata, “An Nasin eyave andi Ala aro,” iri dugwit, Ala iperen wane-wane okhedagagi vaga it ap ombok Yakuri menda akoen hivis At warup yiluk, ogagu lagagwa.
Asin en Abut ogagya dogop awene yugeragagi wene
19It anderogo ogaguselok, At Yesus en it yugirigya dugwit, “Ala Abut nadik nendawi wenggebaluk en ogarup meyan. An Nasin ogasiga andi an nil higya dugwit adigat ogasiga. Nasin en yi menda ndi menda ogasiga ako andi, Abut An wane-wane-at ogasiga. 20An Nasin andi, Abut An endawi hunik okneraliga atma, At yi menda ndi menda ogasiga ovok erogo Abut An yuknisiga. An ap sek ogagya neyagep yi ako andi, madugat, eke, hit vok yovovok yiluk, hivis evenuk ombok erogo, ‘Ogaru,’ yuknugu halok, ogagya neyagup. 21Nasin en avakwa hombagagwa ako iniluk erogo mondok okbisaliga hak, Abut An nendawi en ap ambi iluk okbaup imbita neyalok andi, iluk okbayogon. 22Eke Nasin en avakwa enowak dilogo onggo okbisaligadek. Avakwa ovok enowak dilogo onggo okbisaup andok andi, Nasin en Abut Anat mondok okbaninggigi. 23Nasin en An avakwa enowak dilogo onggo okbisaup andok mondok okbaninggigi ako andi, avakwa en Ala agayuk wisagwi hak, Abut An ogo wane-wane nagayuk wutu dogopwak yiluk, mondok okbaninggigi. It ap en Ala Abut An nagayuk wutitek halok andi, At lakbani wagagi An Nasin ako agayuk wisagwidek o, yiluk, mondok avyarat yukheraliga.”
24Yugirigya lagagirik, ambi inim yugirigya dugwit, “It avakwa An nane hunggu lagarwik, enendawi At lakbani wagagi ako ovaga vanggabaluk, avyarat ombasagwi ako andi, mondok-mondok iniluk-at dogosogom o. Eke, it avakwa andi, hambuluk lendagwima en iniluk oginivisigama vage endak nonggagagwarikmu, Ala en enowak dilogo weyak onggo okbisayogonbuk o, yiluk, mondok avyarat yukheraliga. 25It ap hambuluk lendagwi menda en Ala Abut An nane hulugup hudi hivis ovara, yogak ovok ari wagarikmu, it avakwa en An nane hulisagwi halok, mondok-mondok iniluk-at dogosogom o. 26An Nasin avakwa iniluk oginivisiga adem andok agarik hak, Abut An ogo, anderogoat iniluk oginipu dogogiluk, adem andok okbaninggigi. 27Abut An Ap-At Endaklagagis atma, avakwa enowak dilogo onggo okbisaup Nasin en awene yuknigigi o, yiluk, mondok avyarat yukheraliga.”
28-29“Anderogo atma, it avakwa hombagagwa menda biselagwima agarwik ako ovok erogo An nane hobaluk, mondok yup hudi horok ari warisogonma, wene yukhirigi yi, ‘Wi!’ yiluk, vok yubuk. It mondok yusogom ako andi, it sek ogasagwi ako mondok-mondok iniluk dogopwak yiluk, mondok okbisayogon. Eke, it weyak ogasagwi ako enowak dilogo weyak onggo okbisaik yiluk, mondok okbisayogon o,” yiluk, yugeragagi.
“An anderogo o,” yiluk, yugeragagi wene
30Yesus en ambi inim yugirigya dugwit, “An nadik nendawi wenggebaluk en ambi ogarup dek o. Ata, Ala yuknugu hobaluk adigat enowak dilogo onggo okbisaliga. An nendawi ombasiga menda ogasigadek. Ata, At lakbani wagagi An Nasin endawi ombasiga menda ako adigat ogasigama, An avakwa enowak dilogo onggo okbisaliga ako andi, atma des erogoat okbisaliga.
31An nadik enat navok vagalogo yukhirigya neyalok andi, huluk weneat yagaliga, yiluk, nombarusogom. 32Anderogo ovara, An Nasin Ala en An navok vagalogo yukheraliga atma, At An navok vagalogo yukheraliga ako andi, avyarat yukheraliga An nilup.”
33“Hit ap ombok Yakuri menda yonggo Yohanes adema lakbugugup ako, lagu lagagwama, An navok wene avyarat adigat vagalogo yukheragagi. 34An navok it avakwa en vagalogo yukheraup ako An iya ombasigadek ovara, hit henagap wendarisogon yiluk, wene yi yukheraliga. 35Ap Yohanes andi, hali yevedek abya wisane ogasiga hak welagagi. Dugwit, awiya okbisaliga hak yukhirigya lagagi vaga henendawi adenggen sidok embetep ovara, 36at Yohanes en An navok vagalogo yukheraliga andi, iya dek. An mondok atok weralogo ogagya dogogiluk, Nasin en yuknugu lagagimu ogasiga. Ogasiga ako vaga Nasin en lakbani wagagi navok sigam asiga ako andi, mondok iya aro.”
37“An Nasin lakbani wagagi ogo navok vagalogo yukheragagi ovara, hit At ane henaruk hunggwis, eke, At elose ogo, hinil hugwi, mondok ogagetek-at agipik. 38At lakbani wagagi An ako, henendawi novaga vanggabaluk, avyarat embetetekma, At ane andi, henendawima mondok evedek-at agarik. 39Hit ap ombok Yakuri menda en Ala wene dirup warek vaga mondok niniluk okninivisogon, umbutu dugwit, des erogo mamulhedelagwi. Ala wene dirup warek andi, An navok sigam ogarek ako dirup warek atma, 40hit hiniluk okhinivisogon yiluk, An nadema warup sek ovara, henanggon ombasagwi.”
41“Avakwa en An siyabanup andi, ombasigadek. 42Hit andi, Ala hinim henendawi hunik dek An mondok nilup-at agirik. 43Nasin en lakbani wagagi An ako, hit woknetetek ovara, ap ambi at adik endawi wenggebaluk wagya halok andi, hiren ap andi wugu hinisaliga. 44Ap yoma wai! Hikirat wogobetugu hiniselok andi, henendawi sek ombasagwi ovara, Ala adigat agarik andien sek nenombarupwak yiluk, okhedelagwidek atma hit nggarogonggan henendawi novaga vanggabaluk, avyarat nombarup?”
45“Hiren, ‘Aren Asin ivaga nenanggadi warogo yuknerayogon,’ ombarubuk. At henanggadi wakbigigaup andi, henendawi at ovaga vanggabaluk agipik ap Musa ako aro. 46Hit henendawi Musa ovaga vanggabaluk avyarat ombaklipikmu en, aren An navok vagalogo dirup watigirikmu, henendawi vage An novaga vanggabaluk, avyarat nombaklip. 47Ap Musa wene dirup watigi ako hit avyarat ombasagwidek halok, An nane yukheraliga yi, nggarogonggan avyarat ombarusogom? Dek aro,” yiluk, yugeragagi.
Currently Selected:
Yohanes 5: nbq2013
Highlight
Share
Copy
Want to have your highlights saved across all your devices? Sign up or sign in
