Lukas 13
13
Enasam hegetek halok dek okbisaup wene
1O andi hudi avakwa ninen, “Avakwa Galilea menda en Ala ake warogo hali bagusim, ap Gubernur Pilatus en enetas,” yiluk, Yesus yuguri wagagwa. 2Yuguri wagu lagagwama, At Yesus en, “It ap Galilea menda nin enomaduk horogat halok, hekbugu, eke, it enetas andi, enomaduk wisane ogagu lagagwarikmu, anderogo enatya, ogaga embetep?”
3“Mondok dek. It enomaduk andi it nin ndatak welagao. Anderogo ovara, hit weyak ogasagwi ako henasam helok, mbobagetek hiniselok, hit ogo, anderogo dek okbugugu hagup, yiluk, yukheraliga. 4O Siloam o adup valek ndun iri dugwit, it ap 18 hudi sopalinipigi ako andi, it avakwa ugun Yerusalem agarwikmu andi, weyak ogagetek enomaduk horogat inigik, eke, it sopalinipigi andi, enomaduk wisane erogo ogagagwarikmu, sopalinipigi embetep? 5Mondok dek. It enomaduk ndatak aro. Anderogo ovara, hit weyak ogasagwi ako henasam helok, mbobagetek hiniselok, hit ogo, anderogoat dek okbugugu hagup, yiluk, yukheraliga,” yugeragagi.
Yo widis enggen yigitek halok, wakhegek yugeragagi wene
6Yugirigya lagagirik, wene wakhegek yi, yugirigya dugwit, “Ap ambi eyavumu, yo widis ambi yago welagagi. Welagagirikmu, enggen yugup mbaligiluk, bikhelagagi ovara, enggen yugup dek adigat higya lagagi. 7Enggen yugup dek adigat higya lagagirik, at ayeloman eyavup ogasiga ako yugugu dugwit, ‘Yo widis yi ako enggen yugup mbaligiluk, bikha wagek ogagya neyagek, 3 tahun ogagi ovara, enggen yugup dek adigatma, wen enam warogo dogogwi en, murogo bain.’”
8“Yugugu lagagimu, at ayeloman akoen, ‘Nasin! Tahun yi vaga anen va yugu, adem mogot mbanggya, ogarup imbitirikmu, hekbaup. 9Eke, tahun yi okbaluk, ambi agya vaga enggen yugu halok andi sek. Eke, enggen yigitek halok andi, murogo banok,’ yiluk, yugogogi,” yugeragagi.
Yakuri samban ogasagwi vaga hwa ambi sek okbagagi wene
10Andien, hivis At Yesus it Yakuri samban ogasagwi vaga it samban ogasagwima ambi wene mamulirigyama, 11hwa ambi madis endawima nunggwigya lagagirik, aup edup hegek, 18 tahun ogagagirikmu, ambot hedalek atma mendek yup meyanat welagagi.
12Meyanat werekma, At Yesus en hwa ako il higya lagagirik, yanggup yugogogi wagya lagagimu, yugugu dugwit, “Hwa yi wai! Edup ako mondok dek okbagagi o,” yiluk, 13inggis ao vakbagya hegek, hwa ako ambot edup ako dek agya lagagimu mendek yiluk, Ala inis siyabagagi.
14Andi ogagya lagagimu, ap Yakuri samban ogasagwima enasin ako it samban ogasagwi vaga Yesus en hwa ako sek okbagya higya lagagirik, aninis en avakwa yugirigya dugwit, “Yavup ogarup yiluk ndugwis 6 hudi denek werekma, ndugwis 6 hudi denek andi vaga edup sek okbigigapwak yiluk, wagu dogop andi sek. Eke, nit samban ogasagwi yi vaga edup sek okbigigapwak yiluk wagu dogobuk.”
15Yugirigya lagagimu, Nenowa Yesus akoen at yugugu dugwit, “Hit avakwa henendawi henagavoval ovagak yugerelagwi yi wai! Hit ovok samban ogasagwi vaga henanggom sapi a, henanggom keledai a, davoma larikmu, is napwak yiluk, sogop hurogo baluk woginiviluk lendagwi ako dek? 16Eke, andi halok, hwa Averakam ombao yi, Sile en heda marogo vagago welagagi hegek, 18 tahun ogagagirikmu, hit samban ogasagwi vaga heda visilogo hekbaup andi, moga atma yiluk, yagalagwi? Heda visilogo hekbaup andi, segat.”
17Anderogo yugeragagi vaga At inim ogorek welagagwa ako enanggadi erogo bogogi ovara, it avakwa ninen At Yesus eve iya nggarogo ogarubuk menda ogarit lagya lagagi ako vaga enadenggen umbutu lagagwa.
Vudok enggen vaga wakhegek yugeragagi wene
(Matius 13:31-32; Markus 4:30-32)
18Andi, At Yesus en, “Ala avema bisaup ako andi, nano ndatak? Eke, nano vaga wakhaik? 19Dek. Ala avema bisaup ako andi, ap ambien yo vudok enggen wogogo eyavumu yagagi ako wane-wane. Vudok enggen yatya lagagimu, avuduk inggya dugwit, yo ako ombok agagi. Ombok agya lagagarik, abwak vaga yirwa-ndirwa enawi valheda nunggugu lagagwa o,” yugeragagi.
Ragi roti virisiga menda wakhegek yugeragagi wene
(Matius 13:33)
20Andi yugirigya lagagirik, ambi yugirigya dugwit, “Ala en avakwa At avema bugu lagagimu, eneyave wisane wigalarup ako nano vaga wakhaik? 21Avakwa Ala avema bisaup ako andi, ragi roti virisiga menda ovagak. Andi, hwa ambien ragi roti virisiga menda ako horok madugat tepung wisane 25 kilogram inim hudilogo wombabaluk, ragi roti virisiga menda ako menda inim mudinggu halok, ovok erogo virisiga o,” yiluk, yugeragagi.
Sup maduk vaga nunggup wene
(Matius 7:13-14, 21-23)
22Andien, At Yesus ako o Yerusalem lagya dugwit, o kota ombokma inim, o madukma inim, ambima nonggegek ogarit lagya dugwit, wene mamuleregek lagagi. 23Lagyama, ap ambi en, “Nasin wai! Avakwa ovok erogo enagap wendarimi a, ata ambitap adigat enagap wendarimi a?”
Yugugu lagagimu, At Yesus en it yugirigya dugwit, 24“Sumbanggut maduk yendalek vaga nunggup yiluk, dilwatu dogones. It avakwa wisane nunggup yiluk, ogarugup ovara, meyanat hagup o, yiluk, yukheraliga. 25At awi werek akoen mendek yiluk, sup latya dogomima, hit weram sup dolen-dolen ogagu dugwit, ‘Nasin! Sup hutneran,’ yugurugup ovara, Aren, ‘Hit ap nggoma en wagep? Hit An ninggut,’ yukheragwi. 26Yukhirigya halok, hiren At yugugu dugwit, ‘Dek. Isogo ninim nunggu lagyo ako. Dek. Nenawi mbumbumu wene mamulnirigya lagagin ako,’ At yugurugup ovara, 27Aren, ‘Hit nggoma en wagep? Hit An ninggut. Hit weyak ogasagwi menda yi, hodo wilitales,’ yiluk, 28weram wikbigigagwi. Weram wibigigamindikmu, andoma dugwit, ap Averakam o, Isak o, Yakup o, eke, it ap Ala en yugirigya hegek yugeralagwi menda navi-navi ovok erogo Ala avema agarwik inugu dogogupik, yup yagwi, edup en wakhidugwi, ogagu dogogup o.
29It avakwa o timur-barat en, o utara-selatan en, Ala avema bisaligama isogo naguluk, homari warugup. 30Homari wagu dogogupik, it ap hivis agarwik ako andi, nin enendak agwi, eke, enendak agarwik ako andi, nin hivis agwi, agu sagup,” yugeragagi.
Avakwa o Yerusalem menda enabwa imbitigi wene
(Matius 23:37-39)
31O andi vaga, it ap Varisi menda ninen Yesus adema wagu lagagwarik, At yugugu dugwit, “Ap Herodes harup ombasiga atma, yoma en hodorogo wilin.”
32Yugugu lagagwama, Yesus en, “At ap yangge do ovagak andi, wene yi yuguri elales: An yogak inim, heveret inim, madis ap enendawima agarwik halok, nggigilogo wibugu, aup edup halok, sek okbugu, ogagya dogomindik, ndugwis mberen dukluk ndugwis ambi vaga An ogarigiluk wagagis ako andi, mondok wotok erogo ogasogon. 33Anderogo ovara, ap navi ambi o hunogoma en hambup meyan, o Yerusalem adigat hambup sek atma, yogak inim, heveret inim, ndogovit inim, An andoma adigat lagya dogosogon.”
34“Ai! Yerusalem, Yerusalem! Hiren it ap navi-navi ako initwis, ap Ala en yonggo henadema lakbisa wagagi andi, helep vaga initwis, ogasagwi menda atma ai! Swa ayam inisa en eyagi alup amik avema sovabisiluk agarik hak, Anen hit heneyagi anderogoat wonggalogo bisaup ndugurek-ndagarek imbita lagagis ovara, hiren, ‘Nenanggon,’ umbutu lagagup andi, ai! 35Hit Yerusalem menda hit henawi yoma Ala en hekbigigamima, hit hinil nggale yusogom. Hiren, ‘Nenasin Ala inis vaga wandiga yi, inis siyabelagwi o,’ yiluk, yegetek hinigik, hinil mondok neyagetek-at dogosogom o, yiluk, yukheraliga,” yugeragagi.
Currently Selected:
Lukas 13: nbq2013
Highlight
Share
Copy
Want to have your highlights saved across all your devices? Sign up or sign in
