Lukas 16
16
Ap ombok ayeloman bendahara ako en yewes okbagagi wene
1Andien, hivis At Yesus en At ane welagwi menda ako yugirigya dugwit, “Ap inggi werek ambi ayeloman bendahara at ayoparip vagago welagagi. Vagago werekma, avakwa en, ‘Dek. Hayeloman akoen hangge-hangge ovok degerogo okbalin landiga,’ 2yiluk, asin ako yugugu lagagwama, ayeloman ako yanggup yugogogi wagya lagagimu, yugugu dugwit, ‘Hat ogarit landiga avok hunggis ako, nggarogo yuknirimi? Hat yogak an nawi malogo ambi inim dogop dekma, hat yoma dugwit, ogarit lagya lagen ako mbilinogo yukniru.’”
3“Yugugu lagagimu, ayeloman ako endawi wenggenggu dugwit, ‘Nasin en o malogo dogobuk, yuknigarikmu, an nggarogo ogarik? Nanyedek atma, wen bavunggu dogop andi, meyan. Eke, nambenggino yugeregek lagya dogop andi ogo, nalon haliga. 4Ata, weram wibaninggya halok, avakwa en an woknerapwak yiluk, yerogo ogarup sek ai?’ yiluk, endawi wenggenggigi. 5Wenggenggu lagagirik, at ap ayeloman akoen it avakwa at asin mbalegangge dirup warek welagagwa ako enadik-enadik mbauk erogo at adema warupwak yiluk, yanggup yugeragagi. Yanggup yugirigya lagagimu, ambi endak wagagi ako yugugu dugwit, ‘An nasin mbalegangge wogorup dirup warek agarik ako maren?’”
6“Yugugu lagagimu, ap akoen, ‘Hasin mbalegangge an wogorup andi, saitun amburup 15 nderem nudik warek agarik.’ Yugugu lagagimu, ayeloman akoen, hivis woknerapwak yiluk, ‘Nasin mbalegangge dirup warek hat wogorup andi, wogogo avoloma 7 nderem nudik adigat mbauk erogo hoda dirup waru.’”
7“Yugugu lagagirik, at ayeloman akoen at ambi yugugu dugwit, ‘Eke, hat ogo, nasin mbalegangge dirup warek wogorup andi maren agarik?’ Yugugu lagagimu, ap akoen, ‘Gandum 100 karung yidik dirup warek agarik.’ Yugugu lagagimu, ayeloman en, ‘Nasin mbalegangge dirup warek agarik yi, wogogo avoloma 80 karung adigat mbauk erogo dirup waru,’ yugogogi.”
8“Ayeloman ogagagi ako asin hunggu lagagirik, ayeloman at yewes okbagagi hegek ovara, endawi anggat vaga iya erogo wenggenggu lagagi halok, ayeloman adema ‘Wi!’ yugogogi.”
Wene wakhegek ako yugirigya lagagirik, Yesus en At ane welagwi menda yugirigya dugwit, “It avakwa enendawi ugun wen vaga menda yogak agarwik ako it menda inim ogagu dugwit, enendawi anggat vaga iya erogo wenggelisagwi ovara, it Ala aburi enendawi awiya okbogogi ako andi, it wen vaga menda inim ogagu dugwit, enendawi dek dugwit, horogat wenggenggu sigis,” yiluk, yugeragagi.
9“Henangge-henayoparip wen vaga menda avakwa enendawi hunik okhinivupwak yiluk, yonggar-inigik nagu dogop. Anderogo ogagu hiniselok, dek agya halok, hivis o sekma andoma mondok-mondok dogovovok yiluk heyaga warogo wokhinivisogon, yiluk, yukheraliga.”
10“Ap ambien horogat ogarup menda adik ogagetek des erogo ogagya halok, ombok ogarup menda ogo ndatak des erogo ogagya dogosogon. Eke, ap ambien horogat ogarup menda des erogo ogagetek halok, ombok ogarup menda ogo ndatak des erogo ogarisogonbuk. 11Anderogo atma, henangge-henayoparip wen vaga menda ako des erogo vagago agipikbuk halok, eve sek menda vagago dogovovok yiluk, Ala en okbigigayogonbuk. 12Eke, hiren ap ambi angge des erogo vagago welagetek halok, hit henadik henangge vagago dogovovok yiluk, Ala en wokherayogon embetep? Dek aro.”
13“Ap ambien asini mberen enayeloman akluk, enake ogagya dogop meyan. Iperen enake ogarit lagya halok, ambi anggon imbita dugwit, ambi endawi hunik ombarisogon, eke, ambien ogarup yugugu ako ova seve yiluk ogagya dugwit, ambien ogarup yugugu ako anggon adigat ombarisogon. Hiren At Ala inim, henangge-henayoparip wen vaga menda ako inim, iperen henendawi dambubaluk musek laup andi, meyan,” yiluk, yugeragagi.
14Yugirigya lagagimu, it ap Varisi en Yesus wene yugeragagi ako hunggu lagagwarik, yoparip enendawi hunik atma, Yesus aganda yagagwa. 15Aganda yagu lagagwama, At Yesus en it yugirigya dugwit, “Hiren avakwa sek henombarupwak yiluk, henanggangga hedelagwi ovara, Ala en andi, henendawi ombasagwi ako ilup agarik. Yi menda ndi menda iya ombasagwi andi, At Ala anggon ombasiga,” yiluk, yugeragagi.
Yesus en Musa wene ako dek arisogonbuk yiluk, yugeragagi wene
(Matius 11:12-13; 5:31-32; Markus 10:11-12)
16Yugirigya lagagirik, ambi yugirigya dugwit, “Ap Yohanes wagetek hegek, Musa wene dirup warek ako inim, it navi-navi enane dirup warek ako inim, ogarit nagu lagagwa. Eke, ap Yohanes wagagi andi hudi, avakwa Ala avema bisaup Sek Wene ako yugeregek nagusim, it avakwa ovok erogo dilwatu dugwit, Ala avema bisaligama nunggu wendagwi. 17Anderogo ogasagwi ovara, wen inim, mbogot inim, dek arup andi, ndak ovara, Ala wene Musa en dirup watigi ako andi, nin maduk ambiat warek ogo mondok dek arisogonbuk.”
18“Ap ambi ogwa hekbaluk, hwa adik ambi wigya halok andi, aren hwa endak ako alyak waliga. Eke, ap ambi hwa bonggalek ako wigya halok, at ogo, alyak waliga,” yiluk, yugeragagi.
Ap inggi werek inim, Lasarus inim ogagagwa wene
19Yugirigya lagagirik, Yesus en wene ambi yugirigya dugwit, “Ap ambi inggi werek menda, asum sek onggo ombok menda adigat yikhidigya lagagi. At ndugurek-ndagarek sek menda mendangge adigat ninggya dugwit, adenggen wisane welagagi. 20Eke, ap adik ambi ambenggino iri lagagi menda inis Lasarus eyave vaga amu hunik atma, ap inggi werek awi sup mbanggutmu andenam horaik adigat welagagi. 21At akoen, ‘Ap inggi werek ako agarom ninggya dugwit, iluvulu wambigya ako, naik ai,’ imbita lagagi. Eke, yangge wagu dugwit, at amu ako enabya vaga melan nunggu lagagwa.”
22“Andien, ndugwis ambi vaga ap ambenggino yagaliga menda ako hombagagi. Hambigya lagagimu, it malaikat akoen eyave wolok Averakam adema balagagwa. Balagagwa hegek, hivis ap inggi werek ako ogo hombagagi. Hambigya lagagimu, eyave wen sabalagagwa. 23Saba lagu lagagwama, hali hunikmu ari lakluk, andoma yagan watya dugwit, il ilik higya lagagimu, o adumu andoma ap Lasarus Averakam iperen horaik enogogi. 24Inugu lagagirik, At ane ombok vaga yugugu dugwit, ‘Nasin Averakam wai! An hali abya edup wisane en yagan wasiga atma, nabwa nimbita dugwit, ap Lasarus en inggis atok vaga is erabaluk, nabya eraba warupwak yiluk, yuguru o!’”
25“Yugogogi ovara, Averakam en at yugugu dugwit, ‘Nabut. Hat hiluk dugwit, sek adigat welagagin. Eke, Lasarus yi andi, edup-mbedup ovaga welagagi ako hape wenggelu. Yogak Lasarus yoma dugwit, endawi seyo yagas ovara, hat andi, yagan wasiga. 26Eke, ambi, it ap yoma en hat hadoma wagwi, andoma en nit nenadoma wagwi, ogarup ombasagwi ako meyan hapwak yiluk, ilim andoma nggedek ombok bagagi.’”
27-28“Yugugu lagagimu, ap inggi werek akoen, ‘Eke, andi halok nasin. An nowa-naot eneyave 5 nasin amwa agarwik atma, yagan wasagwima yoma wagu saoen, an nasini enamwa hurimbis yugeralapwak yiluk, ap Lasarus andi, lakbanyok yiluk, yukhisiga.’”
29“Yugugu lagagimu, Averakam en at yugugu dugwit, ‘Musa dirup watigi wene inim, it navi-navi enane inim, yugerelagwi ako hunggu dogopwak.’”
30“Yugugu lagagimu, ap akoen, ‘Meyan, nasin Averakam. Ap ambi hambuluk lendagwima en yugeralagya halok andi, it weyak ogasagwi ako enasam helok, mbobasogom!’”
31“Yugugu lagagimu, Averakam en, ‘It howa-hasin akoen Musa yagagi wene inim, it navi-navi enane inim, hulisagwidek halok, ap ambi hambuluk lendagwima en iluk akluk, yugeralagya halok ogo, it weyak ogasagwi ako enasam helok, mbobasogombuk,’ yugogogi,” yiluk, Yesus en yugeragagi.
Currently Selected:
Lukas 16: nbq2013
Highlight
Share
Copy
Want to have your highlights saved across all your devices? Sign up or sign in
