Lukas 7
7
Ap ayegen werek ayeloman sek ogagagi wene
(Matius 8:5-13)
1At Yesus en avakwa wisane homago ako wene ovok yugirigya lagagirik, o Kapernaum lagagi. 2Lagya lagagirik, werekma, it ap enayegen werek Oroma menda enasin ambi ayeloman mondok endawi hunik, aup edup mondok hambigiluk ogagagi. 3Ap yegen werek enasin ako Yesus ogarit lagya aruk hunggu lagagirik, ayeloman sek okba warupwak yiluk, Yakuri enasini nin yuguri lapwak yiluk yonggo lakbogogi. 4-5Yonggo Yesus adema lakbogogi, lagu lagagwarik, it Yakuri enasini akoen enane enabwa edik enabwa edok seve erogo Yesus yugugu dugwit, “Ai, at ap enayegen werek enasin andi, nit avakwa Yakuri menda ninim endawi mondok hunik okninivisigama, eke, arenen nit Yakuri samban ogasagwima o vabininggigirikmu, anderogo atma, ayeloman sek ogari laup andi sek o.” 6Yugugu lagagwama, Yesus inim lagagwa.
It ako ao enamwa ari wagetekma, ap enayegen werek enasin akoen aswemuni it nin yonggo lakbogogi. Lakbogogi, Yesus adema lagu lagagwarik, “Ai, Nenasin! Ap nenaswe yegen werek en iri dugwit, ‘At un anggodo warugwi en. An ap maduk atma, Yesus an namwa nunggu warup meyan. 7Eke, an ap horok atma, At adema laup ogo, ombasigadek. Ata, suvaga lagya dugwit “Sek aru,” ane iri halok nayeloman sek asogon. 8An ogo, nasini enavema dugwit, enane hunggu, eke, an naori enayegen werek ako navema dugwit, an nane hunggwis, ogasagwima, naori ambi, “Elak,” yugugu neyalok andi, lagya, ambi, “Oma,” yugugu neyalok andi, wagya, eke, nayeloman, “Yi ogaru,” yugugu neyalok andi, ogagya, ogasagwima, [Yesus ogo “Sek aru,” iri halok, atma asogon, yiluk,] yuguri elales,’ yiluk, lakbinina wagarikmu yukhisagwi,” yiluk, yugogogwa.
9Yugogogwa Yesus aruk hunggu lagagirik, “At endawi avyarat nembetas, wi!” yiluk, vok yagagi. Vok iri lagagirik, avakwa At ambetaga lagwi ako ena endenogo biginigu dugwit, “It avakwa Iserali menda ogo, enendawi horogat avyarat numbutusigik, at weram Yakuri dek menda andi adigat novaga vanggabaluk avyarat ombok erogo nembetas, yiluk, yukheraliga.” 10Yugirigya lagagimu, yonggo lagagwa ako eneyami vaga enamwa wagu lagagwarik, ayeloman aup warek ako vage sek akluk werekma, ha wagagwa.
Hwa sogwa eyak iluk ogagagi wene
11Andien, hivis Yesus o kota ambi inis Nain lagyama, At ane welagwi menda inim, avakwa wisane inim, lagagwa. 12O kota sup mbanggut leget wogoma ari lagusim, hwa sogwa ambi eyak ap adik ambengga hambigya lagagimu, yo duriluk wulu wagusim, it avakwa wisane o kota andoma agarwik inim, isa inim, lagu sogogi. 13Nenowa Yesus en hwa ako higya lagagirik, abwa wisane imbita dugwit, “Yup yarubuk,” yugogogi.
14Yugugu lagagirik, apsawe nggorak yo durik wolok wagusim vanggo yi lagya lagagirik, inggis vagatigi. Inggis vagatya lagagimu, apsawe yo durik wolok wagwi ako mbup yugu lagagwama, Yesus en, “Nabut! Hiluk aru! An Yesus en yukhisiga.”
15Yugugu lagagimu, apsawe hombagagi ako iluk akluk yo durik ako vaga hora iri lagagirik, ane yagagi. Ane iri lagagimu, Yesus en apsawe ako isa wogogogi.
16Wogugu lagagimu, it avakwa wisane enalon akluk, Ala siyabagu dugwit, “Ap navi Ala en yugugu hegek yugeraliga menda ap ombok ambi nenanggelekma en mendek yagas o,” yugu lagagwarik, “At Ala en At aburi bikninisa waga higyo,” yiluk, yagagwa.
17Eke, Yesus ogagagi wene ako o Yudea avilis ambot ovok wigalagagi.
Yesus hemethaguluk, ima Wombabisaliga menda Yohanes en aori lakbogogi wene
(Matius 11:2-19)
18Yesus ogagagi wene yagan nagwis ako Yohanes ane welagwi menda en Yohanes [heda mago werekma] yugiri lagagwa. Yugiri lagu lagagwama, Yohanes en At ane welagwi menda mberen yanggup yugirigya lagagirik, 19wagu lagagwama, it yugirigya dugwit, “At warup ako Arat waga a, ata adik ambi wasogon yiluk sok hugu dogomwi a? Yesus ako hemethelales,” yiluk, At Nenasin adema lakbogogi.
20Lakbogogi ako Yesus adema lagu lagagwarik, At yugugu dugwit, “Ap Ima Wombabisaliga menda Yohanes en yuknirigya dugwit, ‘Ala en lakba warup yagagi ako Harat wagen a, ata adik ambi wasogon yiluk, sok hugu dogomwi a? yiluk, hemethelales,’ yuknirigya lagama, yukhiri wagyo,” yiluk, yugogogwa.
21O andi hudi Yesus en avakwa wisane aup warek inim, aup edup yagan warit lagwi inim, madis edup agoda werek enendawima nonggagagi inim, sek okbugu, inil mbuk wisane sek okbugu, ogagyama, lagagwa.
22Lagagwa akoen Yesus yugugu lagagwama, Yesus en, “Ogagya hinil neyagep inim, yagan lagya henaruk hunggip inim, andi, heneyami vaga Yohanes yugurilales. Inil mbuk menda inil hugwi, inisok weyak menda sup sek erogo lagwi, amu hunik menda sek agwi, enaruk nggulup menda enaruk hunggwis, hombagao menda iniluk erogo mondok okbugu, eke, ap ininggidek ako Sek Wene yugirigya, ogasiga ako yugurilales. 23Eke, hit An henanggon nombakluk hekbanenggetek halok andi, Ala en adenggen okbugugu dogosogon o,” yiluk, yugeragagi.
24Yugirigya lagagimu, it Yohanes en yonggo lakbogogi ako enamwa lagusigik, Yesus en Yohanes avok avakwa yugirigya dugwit, “Hit nano menda haguluk, o harumu avakwa dekma lagep? Don angga havut en wolok lagek-wagek yagaliga hak, ap endawi ndaik anderogo haguluk, lagep? 25Dek! Ap endawi modo haguluk lagep. Nano menda haguluk lagep? Ap ambi asum sek yirik haguluk, lagep? Avyak! It enasum sek adigat yikhidugwi, segedok amburup werek menda adigat nunggwi, ogasagwi ako andi, ap ininis werek enamwa akoma adigat agarwik. 26Nano haguluk, lagep? Ap navi Ala en yugirigya hegek yugeraliga menda ambi haguluk, lagep? Avyak! Hit hegep ako andi, at navi ovara, it navi nin andi, un sovalek inigik, at ako andi, mondok eve iya-at hegep, yiluk, yukheraliga. 27#Maleakhi 3:1 yokhanes. At Ala en iri dugwit:
‘Hat laup sup yarogo bagapwak yiluk,
Anen nayonggo endak ambi lakbagya neyayogon’
yiluk, yagagi dirup warek ako, at Yohanes yiluk, yagagi. 28Avakwa ovok erogo inisa en endaginivit wagagwa menda andi, ininis sovalek inigik, at Yohanes ima wombabisaliga menda adigat inis werek. Anderogo ovara, Ala avema dugwit ininis sovalek agarwik andi, Yohanes horogat sovalek hegek, it mondok ombok ininis werek dogosogom o,” yiluk, Yesus en avakwa yugeragagi.
29(At Yesus yugeragagi ako, it avakwa ovok erogo ap pemerintah enake yoparip wonggalisagwi menda inim, hunggu lagagwarik, Yohanes en it endak ima wombabogogirikmu, “Ala andi, endawi sek adigat agarik,” yiluk, yagagwa. 30Anderogo ovara, it ap Varisi menda inim, Ala wene vagago welagagwa menda inim, it ako andi, Yohanes en it ima wombabininaup nenanggon umbutugwarikmu, Ala en it ogagu dogop inimbitigi ako ogo mbobagagwa.)
31Yesus en wene ambi yugirigya dugwit, “It avakwa o yogak agarwik yi, nano vaga wal okhaik? It ngga hak ogasagwi? 32Dek. Avyak mariduk avakwa pasar ogasagwima hora yiluk, wene onggo-onggo yugu dugwit,
‘Nit ndawi viyanggup ovara, hit eyave yegetek.
Eke, de wene viyanggup ovara, hit yup yagatek,’
yiluk, yagalagwi andi hak, hit anderogoat ogagu hinisaliga.”
33“Hit avakwa yogak agipik ako andi avyak ndatak agipik. Andi, at Yohanes Ima Wombabisaliga ako erom inim, anggur agas inim, nenggetek welagagi ovara, hiren, ‘Madis endawima nonggagas,’ yagalagwi. 34Eke, An Ap-At Endaklagagis yi erom inim, anggur agas inim, ugun nenggek wagya neyalok, hiren yugu dugwit, ‘Erom inim, is anggur agas inim, ovadek en nenggek lagya dugwit, it ap pemerintah enake yoparip wonggalisagwi menda inim, ap weyak ogasagwi menda inim, it inim hunik oginivit landiga yi, hinil hanes o,’ yiluk, yagalagwi [atma, Anen, ‘Hit avyak ndatak agipik,’ yiluk, yukheraliga. 35Hit avyak ndatak agipik] ovara, Ala endawi werek en ombasiga ako andi, it ogasagwi ovok erogo ogagwi vaga, segat hugu dogosogom,” yiluk, yugeragagi.
Hwa weyak ogagya lagagi menda ako Yesus en omaduk dek okbagagi wene
36Ap Varisi menda ambi inis Simon en Yesus inim erom naguluk, “Oma,” yugugu lagagimu, at amwa nunggwigya lagagirik, inim erom naguluk, hora yagagi. 37Hora iri lagagimu, o kota andoma hwa weyak ogagya lagagi menda ambien Yesus ap Varisi menda amwa erom naliga aruk hunggigi. Aruk hunggu lagagirik, amburup amben segedok menda iwak helep vaga mendagoma, nudik wolok nonggagagi. 38Wolok nunggwigya lagagirik, Yesus ambukmu andenam mendek yiluk, yup yagya dugwit, yup o angga vaga Yesus isok min okbagagi. Okbagya lagagirik, iris vaga hutu, isok vaga virik-verek iris, ogagya lagagirik, amburup segedok ako isok vaga ndibagagi.
39Ap Varisi menda, “Yesus ninim erom naup,” yugogogi akoen hwa ako ogagya higya lagagirik, endawi imbita dugwit, “Hwa yi, weyak ogasiga menda atma, ap Yesus yi ako navi avyarat duklipmu en, ‘Hwa weyak ogasiga menda en vaknitya higi,’ yiluk, andi vage yedok helap,” imbitigi.
40Imbita hegek, Yesus en, “Simon wai. An wene ambi yukhirup imbitirikmu, yukhisogon.” Yugugu lagagimu, at akoen, “Yukniru, Nasin.”
41Yugugu lagagimu, Yesus en, “Ap mberen en ap ambi mbalegangge wogirup welagagwa. Ambi yoparip 500 denari#7:41: O Iserali andoma it enayoparip inis andi, Denari welagagi. Denari ambiat andi, yavup satu hari onggo ndatak wogurugu lagagwa. mbalek, eke, ambi yoparip 50 denari mbalek welagagwa. 42Iperen mbalegangge onggo wogorup meyan halok, enabwa en, ‘Asugen. Un onggodek hedomanes,’ yiluk, yugeragagi. At asugen yugeragagi ako andi, ap eneyave mberen ako, mbalegangge ombok welagagi akova mondok endawi hunik imbitigi a, ata mbalegangge maduk welagagi akova mondok endawi hunik imbitigi a?”
43Yugugu lagagimu, Simon en, “Dek. Ap mbalegangge ombok welagagi akoen mondok endawi hunik imbitigi ai?” yugugu lagagimu, Yesus en, “Yegen andi aro.”
44Yugugu lagagirik, Yesus en hwa ako bikhigya lagagirik, Simon yugugu dugwit, “Simon wai. Hwa yi hil hegen a? An hamwa nunggu wagya lagima, nisok hurigiluk, haren is woknigitek ovara, at hwa yi ako andi, yup o angga vaga nisok min okbagya, iris vaga hotnitya, ogaga. 45Haren An dinggik-hambuk oknetetek ovara, at andi, An nunggu wagi hudien yogak yi hudi mbup yegetek nisok vaga virik-verek adigat okneraliga. 46Haren amburup nunggul vaga erabanenggetek ovara, at ako andi, amburup amben sek onggo ombok menda nisok vaga ndibaluk hogabenanggas. 47Andi vaga hwa yi, weyak wisane ogagya laga ovara, omaduk degerogo bagirikmu, mondok endawi hunik iya erogo oknetas. It avakwa weyak horogat ogagu lagagwa ako enomaduk degerogo bugu halok andi, enendawi hunik horogat ombasagwi.”
48Yugugu lagagirik, hwa ako yugugu dugwit, “Homaduk degerogo bagagi,” yugogogi.
49Yugogogi ako, it erom naguluk inim horaik welagagwa ako ir-it yugu dugwit, “Avakwa enomaduk degerogo bisaliga ako andi Ala adigatma, ap yi sa ombasagwi?”
50Yugusigik, Yesus en hwa ako yugugu dugwit, “Hendawi novaga vanggabaluk avyarat nembeten vaga Ala en hagap wendakhetas, hendawi ugun hamwa elak,” yiluk, yugogogi.
Currently Selected:
Lukas 7: nbq2013
Highlight
Share
Copy
Want to have your highlights saved across all your devices? Sign up or sign in
