Lukas 8
8
Akwa en Yesus ake ogagu lagagwa wene
1Andien, At Yesus en Ala avema bisaup Sek Wene ako o kota ombokma inim, madukma inim, yugeregek nagu lagagi. Nagu dugwit, At ane welagwi menda 12 ako inim nagusim, 2it akwa nin madis enendawima nonggagagi ogo, nin aup edup welagagwa ogo, Yesus en sek okbogogi ako andi, inim nagu lagagwa. It akwa sek okbogogi ako andi, hwa Maria inis ambi Makdalena yugu lagagwa endawima en madis eneyave 7 hudi wibogogi ako inim, 3hwa ambi Yohana, agun inis Kusa ap ombok Herodes awi vagago welagagi ako inim, hwa Susana inim, eke, akwa nin wisane inim nagu lagagwa. It akwa ako enangge-enangge vaga At Yesus aswei inim enake ogagu lagagwa.
Ap awi lisilit lagagi wakhegek yugeragagi wene
(Matius 13:1-9; Markus 4:1-9)
4It avakwa wisane yi awi ndi awi en Yesus adema homari wagusigik, At wene wakhegek ambi yugirigya dugwit, 5“Ap awi lisilisiga menda en awi lisiligiluk, winggigi. Wunggu lagagirik, lisilit lagya hegek, nin suvaga wombalit lagagi. Suvaga wombalit lagagi ako avakwa inisok vaga sovalogo baik lagagwarikmu, swa en ovok nenggek lagagwa.”
6“Nin helep iri vaga wombalit lagagi. Helep iri vaga wombalit lagagi ako andi, avuduk inggigi ovara, wen mbuk atma, mbuk agagi.”
7“Nin yoangga hedangga aik werek anggelekma wombalit lagagi. Yoangga hedangga aik werekma wombalit lagagi ako andi, adok-adok angge ako inim inggya dugwit, mbalogo wombanggigi.”
8“Eke, nin wen mudis vaga wombalit lagagi. Wen mudis vaga wombalit lagagi ako andi, avuduk inggya lagagirik mudi-mudis inggya dugwit, adem ambien enggen 100 yugu, ambien 100 yugu, ogagagi o,” yiluk, yugeragagi.
Wene andi yugirigya lagagirik, ane ombok vaga iri dugwit “Avyak! Henaruk werek halok andi, des erogoat hunggu dogones o,” yiluk, yugeragagi.
Nano yiluk Yesus wene wakhegek vaga yugeragagi wene
(Matius 13:10-17; Markus 4:10-12)
9Yugirigya lagagimu, At ane welagwi menda akoen Yesus hemethugu dugwit, “Hat wene wakhegek yukneregen ako adem nggarogo yiluk yukneregen?” 10Yugugu lagagwama, At Yesus en, “Ala avema bigigaup wene At agose endawima hwilago welagagi ako hinilup arovovok yiluk An vagalogo yukheraup ombasiga ovara, it ap nin ako andi:
‘Inil helagwi ovara yedok hegetek,
eke, enaruk hulisagwi ovara enendawima dibagetek,
dogopwak o,’ #8:10: Yesaya 6:9 yokhanes.
yiluk, wene wakhegek vaga atok hwilagago adigat yugeraliga o,” yugeragagi.
Ap awi angge lisinggigi ako adem des erogo yugeragagi wene
(Matius 13:18-23; Markus 4:13-20)
11Yugirigya lagagirik, “Wene wakhegek yukhirigi ako eyave sigam erogo yukherayogon. Awi lisilit lagagi ako andi Ala wene aro. 12Awi suvaga wombagagi ako andi, avakwa en Ala wene hunggu lagaoma, Sile en wagya lagarik, wene hunggugwa ako avyarat ombasagwi vaga enagap wendatya haoen yiluk, wene enendawima yago ako haurogo wolok wilisiga.”
13“Eke, awi helep iri vaga wombagagi ako andi, it avakwa Ala wene hobaluk enadenggen dugwit, wugu lagarwik, sidok avyarat ombasagwi ovara, enendawima omanggen segerogo yagetekma hivis enendawi avut mbanggya vaga hekbisiluk wilisagwi akoat.”
14“Awi yoangga hedangga aik werek anggelekma wombagagi ako andi, it avakwa wene enaruk hulisagwi ovara, eneyave dogop vaga enendawi anggin vaga wenggelit lagwi, ininggi werek okhedaup adigat enendawi wenggelit lagwi, wen vaga sek dogop adigat enendawi wenggelit lagwi, ogarit lagu dugwit, wene yugup ako mbalogo wombalisagwi aro. Enggen eve sek menda mondok yiligadek.”
15“Eke, awi wen mudis vaga wombagagi ako andi, it avakwa wene hobaluk enendawi eve sek vaga wugu lagarwik, hunik adigat ogagu dugwit, enggen yiliga ako aro,” yiluk, yugeragagi.
Lambu yevedogo sogolowak avema belagwidek wene
(Markus 4:21-25)
16Yugirigya lagagirik, ambi yugirigya dugwit, “Lambu yevedogo baluk sogolowak vaga vi wogogo belagwidek, eke mbanggu avema belagwidek. Ata, yevedogo baluk, it avakwa sup nunggu wendagwi ako awiya hapwak yiluk, winimen sigama belagwi. 17Yi menda ndi menda hwilago agarik halok, sigam agya, eke, wene hose agarik halok, ombok vaga vagalagya, ogarisogon.”
18“Henendawi dibavovok yiluk, An nane henaruk des erogo holek dogwes. It ap avyarat wene dibelagwi halok andi, hivis ambi inim erogo dibapwak yiluk, okbugu dogosogon. Eke, it avyarat wene dibelagwidek halok andi, horogat inilup dugwit, ‘An dibagi,’ ombasagwi andi, hivis mondok inunggut okbisayogon o,” yiluk, yugeragagi.
Yesus isa-aori wagagwa wene
(Matius 12:46-50; Markus 3:31-35)
19Yugirigyama, Yesus isa-aori At adema wagu dugwit, avakwa wisane homagoma, Yesus werekma umwa nunggup meyan agya lagagimu, 20avakwa en, “Hisa-haori bikheyaguluk wagao ovara wasim agarwik,” yugogogwa.
21Yugugu lagagwama, Yesus en, “Nisai-naori andi, it Ala wene hobaluk, ogasagwi yi aro,” yiluk, yugeragagi.
Havut ako Yesus ane hunggigi wene
(Matius 8:23-27; Markus 4:35-41)
22Hivis ndugwis ambi vaga Yesus ane welagwi menda inim mburis vaga nunggugu lagagwarik, yugirigya dugwit, “Inamut yanggadek ambo elavikit lasogom o,” yiluk, lagagwa. 23Lagu dugwit, Yesus ako nogo yogogi. Nogo yugu hegek, inamut yanggadekma o havut endengga ombok wagya dugwit, mburis elola is yanggadi nunggwigya hegek, mburis seve yagan wambup ogagagi.
24Seve yagan wambigya lagagimu, Yesus adema lagu lagagwarik, iluk okbaluk, “Nenasin wai! Nenasin wai! Is mondok ndokal ninivisiga!”
Yugugu lagagwama, At iluk akluk, o havut endengga inim, inamut mogoliluk ogagya inim, mberugu lagagimu, havut mbup iri lagagirik, is ako avolok dek agagi.
25Dek agya lagagimu, Yesus en At ane welagwi menda yugirigya dugwit, “Henendawi novaga vanggabaluk avyarat nombasagwi ako nggayok lagipik yagalagwi?”
Yugirigya lagagimu, enalon en at ambien at ambi yugigik yugu dugwit, “Avyak! Is o havut endengga yugugu hegek, At ane hulisiga yi sa embetep? Wi!” yiluk, vok yagagwa.
Madis ap endawima en wibagagi wene
(Matius 8:28-34; Markus 5:1-20)
26Andoma en, is Galilea mbalogo ambo elavikit en avakwa Nggerasa menda werekma wombagagwa. 27Wambugu lagagwarik, At Yesus mburis vaga en wen vaga wunggu lagagimu, ap ambi kota andoma menda madis endawima nonggagagi Yesus adema wagagi. O muk en umwa welagetek ayum yirikdek, avakwa hambuguselok wimu bisa lendagwima andoma welagagi. 28Aren Yesus higya lagagirik, avema seve iri lagagirik, ane ombok vaga, “Yesus wai! At Mondok Siyalek Adigat Agarik Ala Abut Hat Yesus yi, an nggarogo okbanigiluk wagen? An edup-mbedup okbaninggya heyaoen yiluk, yukhisiga,” yugogogi. 29Yugogogi ako andi, Yesus en madis edup agoda werek menda ap endawima en wulupwak yiluk, yuguguma, ap akoen Yesus yugogogi. O muk erogo madis en ap ako vagari wagek adigat ogagya halok, inggis-isok mbusi heda vaga makbaluk, malogo inigik ovara heda libilogo hekbaluk madis en ap ako viyaliluk o avakwa dekma andoma balagek ogagya lagagi.
30Madis akoen Yesus yugugu lagagimu, Yesus en, “Hat hinis iru!”
Yugugu lagagimu, madis eneyave wisane ap ako endawima nonggagagwarik werekma, “An ninis Wisane o,” 31yiluk, “Ap yi, endawima en wunggu niniselok, nggilin elola wombabininabuk,” enane ngges erogo yugogogwa.
32Hulik avirup andoma wam wisane ambekma buris yigik nagusim werekma, it madis akoen “Ai, wam enendawima andoma nungguguluk lakbininin,” yiluk, enane anye vaga Yesus yugugu lagagwama, Yesus en “E o. Andoma nunggwilales.” 33Yugirigya lagagimu, madis ako ap endawima en wunggu lagagwarik, wam enendawima nunggugu lagagwama, wam ovok erogo lapik-lapikmu andoma en yulup yagan inamut yanggadekma nunggugu lagagwama, is akoen ndokalinipigi.
34It wam woginiviluk nagu lagagwa akoen wam is ndokalinipu ako hugu lagagwarik hoda sak yagan wunggu dugwit, wam is ndokalinipigi wene ako o ombokma inim, o madukma inim, yugeregek nagu lagagwa. 35Yugeregek nagu lagagwama, ogagagi ako avakwa bikhaguluk enamwa en wunggu lagagwarik, Yesus adema lagagwa. Lagu lagagwarik, ap madis endawima en wunggugwa ako eve ap endawi sek agya lagagirik, yum yikbetaluk werekma, Yesus avema horaik werekma hagagwa. Hugu lagagwarik, enalon umbutugwa.
36Enalon umbutu lagagwama, it ap endak oklagagi inil hagagwa akoen, madis wisane ap endawima nonggagagwa Yesus en wibogogi wene ako mbilinogo yugeragagwa.
37Yugurugu lagagwama, it avakwa o Nggerasa menda yi awi ndi awi andoma ovok erogo mondok enalon wisane agu lagagwarik, Yesus it enamwa andoma en hekbaluk wulupwak yiluk, yugogogwa. Yugugu lagagwama, Yesus mburis vaga nunggwigya lagagirik eyami vaga winggigi.
38Wungguma, at ap madis endawima wunggugwa akoen, “An ninim lasogom adigat,” yiluk, yugogogi ovara, Yesus en at amwa lakbagya dugwit, 39“Hamwa heyami vaga lagya dogomindik, Ala en okbagagas ako mbilinogo yugerelak.” Yugugu lagagimu, lagya lagagirik, at amwa o kota andoma ovok erogo, “Yesus en yerogo okbenanggas,” yiluk, mbilinogo yugeregek nagu lagagi.
Yairus abut inim, hwa Yesus asum vagatigi inim, sek oginipigi wene
(Matius 9:18-26; Markus 5:21-43)
40It avakwa wisane Yesus warupwak yiluk, sok hugusim, eyami vaga inggya lagagimu, heyaga warogo wogogwa. 41Wugu lagagwama, ap ambi it Yakuri samban ogasagwima enasin inis Yairus, Yesus adema wagya lagagirik, avema seve yiluk, “An namwa niperen lasogom en, oma o,” yiluk, ane avuput vaga Yesus yugogogi. 42At abut adik ambengga hwavyak endago sawe hegek 12 tahun ogagagirikmu, mondok hambigiluk ogagyama yugogogi.
Yugugu lagagimu, Yesus ako lagya hegek, it avakwa wisane inim linggililuk lagagwa. 43Lagusim, hwa ambi amuya ogagya hegek, 12 tahun ogagagirikmu, sek oknerapwak yiluk angge ovok erogo dokter wogeragagi ovara, sek agetek welagagi. 44Hwa ako Yesus ambukmu lagya dugwit, asum atok inggis vagatya lagagimu, amuya ogagya lagagi ako dek agagi. 45Dek agya lagagimu, Yesus en, “Saen vaknetas?”
Yugirigya lagagimu, it wisane erogo dik-dek yugusigik, Peterus en At yugugu dugwit, “Nasin o. It avakwa wisane yi linggilherelok wagu dugwit, sagambit erogo bagagu sigis!”
46Yugugu lagagimu, Yesus en, “Dek. An nanye ambi dek agya higirikmu, saen vaknetas?”
47Yugugu lagagimu, hwa akoen, “Vage yedok neyagas higi o,” yiluk, alon en owak dede iri dugwit, Yesus avema seve iri lagagirik, avakwa ovok inivaga adem ngga vaga Yesus ayum vagatigi inim, eke ao vagatya hegek eyave sek agagi ako inim, vagalogo yugogogi. 48Yugugu lagagimu, Yesus en, “Nabut o. Hendawi An novaga vanggabaluk avyarat nembeten vaga sek agindikmu, hendawi ugun hamwa elak,” yugogogi.
49Ao yugugu hegek, ap ambi it Yakuri samban ogasagwima enasin amwa akoma en wagya lagagirik, ap Yairus ako yugugu dugwit, “Habut vage hombagarikmu Nenasin ngguru yi sup enam warogo wolok lagun en.”
50Yugugu ako At Yesus aruk hobaluk, Yairus yugugu dugwit, “Halon habuk. Hendawi novaga vanggabaluk avyarat nombasiga halok, habut sek asogon,” yugukluk, 51ap ako amwa lagagwa.
Lagu lagagwarik, it avakwa ovok erogo wasim dogopwak yiluk, yugirigya lagagirik, Peterus o, Yohanes o, Yakobus o, hwavyak isa-asin o, ako adigat woginiviluk amwa nonggagagi. 52Nunggwigya lagagirik, avakwa ovok erogo de wene yugwi, yup yagwi, inugu lagagirik, “Yup yarubuk. Hwavyak yi hombagabuk un nogo yiligama, yup yarubuk.”
53Yugirigya lagagimu, it avakwa en hwavyak ako hombagas ovok inilup atma, At aganda yagagwa. 54Aganda yagagwa ovara, Yesus en hwavyak ako inggis vagatya dugwit, “Nabut mendek iru!” 55Yugugu lagagimu, hwavyak ako [avyarat hombagagi ovara] endawi yaklari wagya dugwit, mendek yagagi. Mendek iri lagagimu Yesus en, “Hwavyak yi erom napwak yiluk wogeres.” 56Yugirigya lagagimu, hwavyak isa-asin akoen, “Wi!” yiluk, vok yugu lagagwama, Yesus en, “Ogagya neyagep ako avakwa mondok yugerabuk,” yiluk, inaruk watigi.
Currently Selected:
Lukas 8: nbq2013
Highlight
Share
Copy
Want to have your highlights saved across all your devices? Sign up or sign in
Lukas 8
8
Akwa en Yesus ake ogagu lagagwa wene
1Andien, At Yesus en Ala avema bisaup Sek Wene ako o kota ombokma inim, madukma inim, yugeregek nagu lagagi. Nagu dugwit, At ane welagwi menda 12 ako inim nagusim, 2it akwa nin madis enendawima nonggagagi ogo, nin aup edup welagagwa ogo, Yesus en sek okbogogi ako andi, inim nagu lagagwa. It akwa sek okbogogi ako andi, hwa Maria inis ambi Makdalena yugu lagagwa endawima en madis eneyave 7 hudi wibogogi ako inim, 3hwa ambi Yohana, agun inis Kusa ap ombok Herodes awi vagago welagagi ako inim, hwa Susana inim, eke, akwa nin wisane inim nagu lagagwa. It akwa ako enangge-enangge vaga At Yesus aswei inim enake ogagu lagagwa.
Ap awi lisilit lagagi wakhegek yugeragagi wene
(Matius 13:1-9; Markus 4:1-9)
4It avakwa wisane yi awi ndi awi en Yesus adema homari wagusigik, At wene wakhegek ambi yugirigya dugwit, 5“Ap awi lisilisiga menda en awi lisiligiluk, winggigi. Wunggu lagagirik, lisilit lagya hegek, nin suvaga wombalit lagagi. Suvaga wombalit lagagi ako avakwa inisok vaga sovalogo baik lagagwarikmu, swa en ovok nenggek lagagwa.”
6“Nin helep iri vaga wombalit lagagi. Helep iri vaga wombalit lagagi ako andi, avuduk inggigi ovara, wen mbuk atma, mbuk agagi.”
7“Nin yoangga hedangga aik werek anggelekma wombalit lagagi. Yoangga hedangga aik werekma wombalit lagagi ako andi, adok-adok angge ako inim inggya dugwit, mbalogo wombanggigi.”
8“Eke, nin wen mudis vaga wombalit lagagi. Wen mudis vaga wombalit lagagi ako andi, avuduk inggya lagagirik mudi-mudis inggya dugwit, adem ambien enggen 100 yugu, ambien 100 yugu, ogagagi o,” yiluk, yugeragagi.
Wene andi yugirigya lagagirik, ane ombok vaga iri dugwit “Avyak! Henaruk werek halok andi, des erogoat hunggu dogones o,” yiluk, yugeragagi.
Nano yiluk Yesus wene wakhegek vaga yugeragagi wene
(Matius 13:10-17; Markus 4:10-12)
9Yugirigya lagagimu, At ane welagwi menda akoen Yesus hemethugu dugwit, “Hat wene wakhegek yukneregen ako adem nggarogo yiluk yukneregen?” 10Yugugu lagagwama, At Yesus en, “Ala avema bigigaup wene At agose endawima hwilago welagagi ako hinilup arovovok yiluk An vagalogo yukheraup ombasiga ovara, it ap nin ako andi:
‘Inil helagwi ovara yedok hegetek,
eke, enaruk hulisagwi ovara enendawima dibagetek,
dogopwak o,’ #8:10: Yesaya 6:9 yokhanes.
yiluk, wene wakhegek vaga atok hwilagago adigat yugeraliga o,” yugeragagi.
Ap awi angge lisinggigi ako adem des erogo yugeragagi wene
(Matius 13:18-23; Markus 4:13-20)
11Yugirigya lagagirik, “Wene wakhegek yukhirigi ako eyave sigam erogo yukherayogon. Awi lisilit lagagi ako andi Ala wene aro. 12Awi suvaga wombagagi ako andi, avakwa en Ala wene hunggu lagaoma, Sile en wagya lagarik, wene hunggugwa ako avyarat ombasagwi vaga enagap wendatya haoen yiluk, wene enendawima yago ako haurogo wolok wilisiga.”
13“Eke, awi helep iri vaga wombagagi ako andi, it avakwa Ala wene hobaluk enadenggen dugwit, wugu lagarwik, sidok avyarat ombasagwi ovara, enendawima omanggen segerogo yagetekma hivis enendawi avut mbanggya vaga hekbisiluk wilisagwi akoat.”
14“Awi yoangga hedangga aik werek anggelekma wombagagi ako andi, it avakwa wene enaruk hulisagwi ovara, eneyave dogop vaga enendawi anggin vaga wenggelit lagwi, ininggi werek okhedaup adigat enendawi wenggelit lagwi, wen vaga sek dogop adigat enendawi wenggelit lagwi, ogarit lagu dugwit, wene yugup ako mbalogo wombalisagwi aro. Enggen eve sek menda mondok yiligadek.”
15“Eke, awi wen mudis vaga wombagagi ako andi, it avakwa wene hobaluk enendawi eve sek vaga wugu lagarwik, hunik adigat ogagu dugwit, enggen yiliga ako aro,” yiluk, yugeragagi.
Lambu yevedogo sogolowak avema belagwidek wene
(Markus 4:21-25)
16Yugirigya lagagirik, ambi yugirigya dugwit, “Lambu yevedogo baluk sogolowak vaga vi wogogo belagwidek, eke mbanggu avema belagwidek. Ata, yevedogo baluk, it avakwa sup nunggu wendagwi ako awiya hapwak yiluk, winimen sigama belagwi. 17Yi menda ndi menda hwilago agarik halok, sigam agya, eke, wene hose agarik halok, ombok vaga vagalagya, ogarisogon.”
18“Henendawi dibavovok yiluk, An nane henaruk des erogo holek dogwes. It ap avyarat wene dibelagwi halok andi, hivis ambi inim erogo dibapwak yiluk, okbugu dogosogon. Eke, it avyarat wene dibelagwidek halok andi, horogat inilup dugwit, ‘An dibagi,’ ombasagwi andi, hivis mondok inunggut okbisayogon o,” yiluk, yugeragagi.
Yesus isa-aori wagagwa wene
(Matius 12:46-50; Markus 3:31-35)
19Yugirigyama, Yesus isa-aori At adema wagu dugwit, avakwa wisane homagoma, Yesus werekma umwa nunggup meyan agya lagagimu, 20avakwa en, “Hisa-haori bikheyaguluk wagao ovara wasim agarwik,” yugogogwa.
21Yugugu lagagwama, Yesus en, “Nisai-naori andi, it Ala wene hobaluk, ogasagwi yi aro,” yiluk, yugeragagi.
Havut ako Yesus ane hunggigi wene
(Matius 8:23-27; Markus 4:35-41)
22Hivis ndugwis ambi vaga Yesus ane welagwi menda inim mburis vaga nunggugu lagagwarik, yugirigya dugwit, “Inamut yanggadek ambo elavikit lasogom o,” yiluk, lagagwa. 23Lagu dugwit, Yesus ako nogo yogogi. Nogo yugu hegek, inamut yanggadekma o havut endengga ombok wagya dugwit, mburis elola is yanggadi nunggwigya hegek, mburis seve yagan wambup ogagagi.
24Seve yagan wambigya lagagimu, Yesus adema lagu lagagwarik, iluk okbaluk, “Nenasin wai! Nenasin wai! Is mondok ndokal ninivisiga!”
Yugugu lagagwama, At iluk akluk, o havut endengga inim, inamut mogoliluk ogagya inim, mberugu lagagimu, havut mbup iri lagagirik, is ako avolok dek agagi.
25Dek agya lagagimu, Yesus en At ane welagwi menda yugirigya dugwit, “Henendawi novaga vanggabaluk avyarat nombasagwi ako nggayok lagipik yagalagwi?”
Yugirigya lagagimu, enalon en at ambien at ambi yugigik yugu dugwit, “Avyak! Is o havut endengga yugugu hegek, At ane hulisiga yi sa embetep? Wi!” yiluk, vok yagagwa.
Madis ap endawima en wibagagi wene
(Matius 8:28-34; Markus 5:1-20)
26Andoma en, is Galilea mbalogo ambo elavikit en avakwa Nggerasa menda werekma wombagagwa. 27Wambugu lagagwarik, At Yesus mburis vaga en wen vaga wunggu lagagimu, ap ambi kota andoma menda madis endawima nonggagagi Yesus adema wagagi. O muk en umwa welagetek ayum yirikdek, avakwa hambuguselok wimu bisa lendagwima andoma welagagi. 28Aren Yesus higya lagagirik, avema seve iri lagagirik, ane ombok vaga, “Yesus wai! At Mondok Siyalek Adigat Agarik Ala Abut Hat Yesus yi, an nggarogo okbanigiluk wagen? An edup-mbedup okbaninggya heyaoen yiluk, yukhisiga,” yugogogi. 29Yugogogi ako andi, Yesus en madis edup agoda werek menda ap endawima en wulupwak yiluk, yuguguma, ap akoen Yesus yugogogi. O muk erogo madis en ap ako vagari wagek adigat ogagya halok, inggis-isok mbusi heda vaga makbaluk, malogo inigik ovara heda libilogo hekbaluk madis en ap ako viyaliluk o avakwa dekma andoma balagek ogagya lagagi.
30Madis akoen Yesus yugugu lagagimu, Yesus en, “Hat hinis iru!”
Yugugu lagagimu, madis eneyave wisane ap ako endawima nonggagagwarik werekma, “An ninis Wisane o,” 31yiluk, “Ap yi, endawima en wunggu niniselok, nggilin elola wombabininabuk,” enane ngges erogo yugogogwa.
32Hulik avirup andoma wam wisane ambekma buris yigik nagusim werekma, it madis akoen “Ai, wam enendawima andoma nungguguluk lakbininin,” yiluk, enane anye vaga Yesus yugugu lagagwama, Yesus en “E o. Andoma nunggwilales.” 33Yugirigya lagagimu, madis ako ap endawima en wunggu lagagwarik, wam enendawima nunggugu lagagwama, wam ovok erogo lapik-lapikmu andoma en yulup yagan inamut yanggadekma nunggugu lagagwama, is akoen ndokalinipigi.
34It wam woginiviluk nagu lagagwa akoen wam is ndokalinipu ako hugu lagagwarik hoda sak yagan wunggu dugwit, wam is ndokalinipigi wene ako o ombokma inim, o madukma inim, yugeregek nagu lagagwa. 35Yugeregek nagu lagagwama, ogagagi ako avakwa bikhaguluk enamwa en wunggu lagagwarik, Yesus adema lagagwa. Lagu lagagwarik, ap madis endawima en wunggugwa ako eve ap endawi sek agya lagagirik, yum yikbetaluk werekma, Yesus avema horaik werekma hagagwa. Hugu lagagwarik, enalon umbutugwa.
36Enalon umbutu lagagwama, it ap endak oklagagi inil hagagwa akoen, madis wisane ap endawima nonggagagwa Yesus en wibogogi wene ako mbilinogo yugeragagwa.
37Yugurugu lagagwama, it avakwa o Nggerasa menda yi awi ndi awi andoma ovok erogo mondok enalon wisane agu lagagwarik, Yesus it enamwa andoma en hekbaluk wulupwak yiluk, yugogogwa. Yugugu lagagwama, Yesus mburis vaga nunggwigya lagagirik eyami vaga winggigi.
38Wungguma, at ap madis endawima wunggugwa akoen, “An ninim lasogom adigat,” yiluk, yugogogi ovara, Yesus en at amwa lakbagya dugwit, 39“Hamwa heyami vaga lagya dogomindik, Ala en okbagagas ako mbilinogo yugerelak.” Yugugu lagagimu, lagya lagagirik, at amwa o kota andoma ovok erogo, “Yesus en yerogo okbenanggas,” yiluk, mbilinogo yugeregek nagu lagagi.
Yairus abut inim, hwa Yesus asum vagatigi inim, sek oginipigi wene
(Matius 9:18-26; Markus 5:21-43)
40It avakwa wisane Yesus warupwak yiluk, sok hugusim, eyami vaga inggya lagagimu, heyaga warogo wogogwa. 41Wugu lagagwama, ap ambi it Yakuri samban ogasagwima enasin inis Yairus, Yesus adema wagya lagagirik, avema seve yiluk, “An namwa niperen lasogom en, oma o,” yiluk, ane avuput vaga Yesus yugogogi. 42At abut adik ambengga hwavyak endago sawe hegek 12 tahun ogagagirikmu, mondok hambigiluk ogagyama yugogogi.
Yugugu lagagimu, Yesus ako lagya hegek, it avakwa wisane inim linggililuk lagagwa. 43Lagusim, hwa ambi amuya ogagya hegek, 12 tahun ogagagirikmu, sek oknerapwak yiluk angge ovok erogo dokter wogeragagi ovara, sek agetek welagagi. 44Hwa ako Yesus ambukmu lagya dugwit, asum atok inggis vagatya lagagimu, amuya ogagya lagagi ako dek agagi. 45Dek agya lagagimu, Yesus en, “Saen vaknetas?”
Yugirigya lagagimu, it wisane erogo dik-dek yugusigik, Peterus en At yugugu dugwit, “Nasin o. It avakwa wisane yi linggilherelok wagu dugwit, sagambit erogo bagagu sigis!”
46Yugugu lagagimu, Yesus en, “Dek. An nanye ambi dek agya higirikmu, saen vaknetas?”
47Yugugu lagagimu, hwa akoen, “Vage yedok neyagas higi o,” yiluk, alon en owak dede iri dugwit, Yesus avema seve iri lagagirik, avakwa ovok inivaga adem ngga vaga Yesus ayum vagatigi inim, eke ao vagatya hegek eyave sek agagi ako inim, vagalogo yugogogi. 48Yugugu lagagimu, Yesus en, “Nabut o. Hendawi An novaga vanggabaluk avyarat nembeten vaga sek agindikmu, hendawi ugun hamwa elak,” yugogogi.
49Ao yugugu hegek, ap ambi it Yakuri samban ogasagwima enasin amwa akoma en wagya lagagirik, ap Yairus ako yugugu dugwit, “Habut vage hombagarikmu Nenasin ngguru yi sup enam warogo wolok lagun en.”
50Yugugu ako At Yesus aruk hobaluk, Yairus yugugu dugwit, “Halon habuk. Hendawi novaga vanggabaluk avyarat nombasiga halok, habut sek asogon,” yugukluk, 51ap ako amwa lagagwa.
Lagu lagagwarik, it avakwa ovok erogo wasim dogopwak yiluk, yugirigya lagagirik, Peterus o, Yohanes o, Yakobus o, hwavyak isa-asin o, ako adigat woginiviluk amwa nonggagagi. 52Nunggwigya lagagirik, avakwa ovok erogo de wene yugwi, yup yagwi, inugu lagagirik, “Yup yarubuk. Hwavyak yi hombagabuk un nogo yiligama, yup yarubuk.”
53Yugirigya lagagimu, it avakwa en hwavyak ako hombagas ovok inilup atma, At aganda yagagwa. 54Aganda yagagwa ovara, Yesus en hwavyak ako inggis vagatya dugwit, “Nabut mendek iru!” 55Yugugu lagagimu, hwavyak ako [avyarat hombagagi ovara] endawi yaklari wagya dugwit, mendek yagagi. Mendek iri lagagimu Yesus en, “Hwavyak yi erom napwak yiluk wogeres.” 56Yugirigya lagagimu, hwavyak isa-asin akoen, “Wi!” yiluk, vok yugu lagagwama, Yesus en, “Ogagya neyagep ako avakwa mondok yugerabuk,” yiluk, inaruk watigi.
Currently Selected:
:
Highlight
Share
Copy
Want to have your highlights saved across all your devices? Sign up or sign in