Lukas 9

At Yesus ane welagwi 12 ako lakbogogi wene

(Matius 10:5-15; Markus 6:7-13)

1Ndugwis ambi vaga, At Yesus en it ap 12 menda ako homari warupwak yiluk, yanggup yugirigya lagagirik, wagu lagagwama, At anye vaga it enanye okbisiluk, yi madis ndi madis ovok erogo avakwa enendawima en nggigilogo wibugwis, yi aup ndi aup edup halok, sek okbugwis, At inis vaga oginivit nagu dogopwak yiluk, awene yugeragagi. 2Awene yugirigya lagagirik, Ala avema bisaup wene yugeregek lagwi, avakwa aup edup iniselok, sek okbugwis, ogarit nagu dogopwak yiluk, lakbugu dugwit, 3“Hit lagu dugwit, yi menda ndi menda henowanggun inim, yerek-terek wokhiruguselok yekhedamunda yum inim, henagarom henayoparip inim, henasum pakian mberen inim, wolok labuk heneyave adigat elales. 4O ambima lamundikmu, wokhinipuselok, hinim andoma dogomundik, elalo. 5Yi awi ndi awi lamundikmu, heyaga warogo wokhinipitek halok andi, enamwa o kota en wunggu dugwit, inivaga inilamundinek hinisok vaga mupwak hak horogo baluk, andoma en wilitalo.”

6Yugirigya lagagimu, lakbogogi ako lagu lagagwarik, yi awi ndi awi lagu dugwit, Sek Wene yugurugwi, avakwa sek okbugwis, ogarit nagu lagagwa.

Ap Herodes endawi obak agagi wene

(Matius 14:1-12; Markus 6:14-29)

7-8Ogarit lagwi ako it avakwa en inigu lagagwarik, Yesus andi sa yiluk, it ninen “At andi, at Yohanes Herodes en mondok watigirikmu hambuluk bisa lendagwima en iluk akluk, mendek yagas ai,” yugwi, eke, it ninen, “Dek. Ap navi endak welagagi Elia ako sigam aga ai,” yugwi, eke, it ninen, “Dek. Ap muk Ala en yugirigya hegek yugurugu lagagwa navi-navi akoma menda ambi iluk akluk, mendek yagas o,” yugwi, yagan lagwi ako ap inis ombok Herodes ako aruk hunggu lagagirik, endawi obak agagi. 9Endawi obak dugwit, “Anen Yohanes unggul mbalupwak yiluk yugirigya lagagimu, mondok watugwa ovara, ogarit landiga naruk hunggis yi, saen ogarit landiga?” yiluk, Yesus bikhagiluk, ogagagi.

Ap 5.000 erom ugurogo wogeragagi wene

(Matius 14:13-21; Markus 6:30-44; Yohanes 6:1-14)

10It ap lakbogogi ako eneyami vaga wagu lagagwarik, ogarit nagu lagagwa ako Yesus mbilinogo yugogogwa. Yugugu lagagwama, At Yesus en woginiviluk o kota ambi inis Mbesaida enadikmu ari lagagwa. 11Enadikmu ari lagagwa ovara, avakwa wisane “Yesus andoma laga,” enaruk hunggu lagagwarik, amusek lagagwa. Amusek lagu lagagwama, Yesus en heyaga wakbugu lagagirik, Ala avema bisaup wene yugirigya, eke, eneyave aup edup halok, sek okbugu, ogagagi.

12Ogagya hegek, mo il vage huruk yigiluk ogagya hegek, it ap 12 ako At adema wagu lagagwarik, yugugu dugwit, “Nenasin. O yoma avakwa enawi dekma wagyo atma, it avakwa wisane homari wagao yi, o ombokma inim, o madukma inim, andoma enagarom onggo hunogombo nunggwi nogo yupwak en, lakbisin.”

13Yugugu lagagwama, At Yesus en iri dugwit, “Enagarom napwak yiluk, hirenat wogeranes.”

Yugirigya lagagimu, iren, “Nit un erom roti 5, eke, ikan mberenat agarik atma, avakwa wisane yi, enagarom huni laup sek yiluk yagaliga a?” yiluk, yugogogwa. 14(Yugogogwa andi, ap eneyave adigat 5.000 hudi werek yiluk, yugogogwa.)

Yugugu lagagwama, Yesus en At ane welagwi menda ako yugirigya dugwit, “It avakwa enaori adik-adik 50-50 hora yupwak yiluk, yugeranes.” 15Yugirigya lagagimu, anderogoat horakbogogwa.

16Horakbugu lagagwama, At Yesus en roti 5, ikan mberen inim, inggimu wigya lagagirik, elese mbogot vaga ilik lagya dugwit, “Nasin Ala wa!” yiluk, ugutigi. Ugurogo At ane welagwi menda en avakwa homago ako menagerapwak yiluk, wogeragagi. 17Wogeragagi menagirugu lagagwama, it ovok erogo nunggu lagagwarik, enagaum agagi. Enagaum agya lagagimu, nin higitlagagi ako mburiyum yedogo 12 hudi mbin erogo bagagwa.

Peterus en, “Hat Keretus aro,” yugogogi wene

(Matius 16:13-20; Markus 8:27-29)

18Andien, hivis ndugwis ambi vaga Yesus adikmu samban ogagyama, At ane welagwi menda ako adema wagu lagagwama, Yesus en enaigwakma wigya dugwit, “It avakwa en An sa numbutu dugwit, yagalagwi?”

19Yugirigya lagagimu, iren yugugu dugwit, “Avakwa ninen, ‘At Yohanes Ima Wombabugu lagagi menda ako aro,’ yugwi, eke ninen, ‘Elia-at,’ yugwi, eke, ninen, ‘Ap muk Ala en yugirigya hegek yugurugu lagagwa navi-navi ako menda ambi iluk akluk, mendek yagas,’ yugwi, yagalagwi o.”

20Yugugu lagagwama, Aren it yugirigya dugwit, “Eke, hit andi, An sa numbutu dugwit, yagalagwi?”

Yugirigya lagagimu, at Peterus en, “Ala en denogo bagagi Keretus andi Harat higyo o.”

21Yugugu lagagimu, At Yesus en, “An navok yegep andi, avakwa mondok yugeralabuk,” yiluk, enaruk watigi.

“Anggin-mbanggin erogo narusogom,” yugeragagi wene

(Matius 16:21-28; Markus 8:31—9:1)

22Enaruk wakbaluk, yugirigya dugwit, “An Ap-At Endaklagagis ako mondok novaga anggin-mbanggin erogo banusogom. It ap ombok-ombok inim, it imam-imam enasini inim, Ala wene vagago agarwik menda inim, enanggon en hekbanunggu dugwit, narusogom. Natu dogomima, hambigya dogomindik ndugwis mberen dukluk ndugwis ambi vaga Ala en niluk erogo mondok okbanisogon o.”

23Yugirigya lagagirik, it avakwa ovok erogo wene yugirigya dugwit, “Hit An nane wokbaluk ninim nagu dogop umbutu dugwit halok, yi menda ndi menda ogarup ombasagwi ako hekbisiluk, ndugurek-ndagarek yo winik vaga lobalogo bigigaup ako hedelok, An ninim nagu dogosogom.#9:23: Ndugurek-ndagarek yo winik vaga lobalogo bigigaup ako hedelok, An ninim nagu dogosogom Yesus yagagi ako, adem andi, Yesus yo winik vaga yagan watigi ako hak, nit Yesus ake hambup sek yiluk nenendawi sek vaga o ndugurek-ndagarek Yesus eyavup ogarit lagu dogop. 24Hit heneyave hinidi okhidugu dugwit, An nane mbobamwi halok, heneyave yelemele yusogom. Eke, An ninis ombok arupwak yiluk, heneyave idi dek okbetamwi halok, hinidi erek dogosogom. 25Hit yi awi ndi awi ovok erogo andok okhidugu dogomundik, heneyave yelemele yusogom halok, andi vaga nano okhedaguluk, ogarit nagu dogop ombasagwi? 26Ap ambi saen An ninis inim, An nane inim, avakwa inivaga alon en yegetek dogosogon halok, hivis An ninim, an Nasin inim, it Ala ake ogagu dogop denek agarwik malaikat inim, mondok nenabinak werek dugwit niniris nenovagangge yikhedelok wagu dugwit, An Ap-At Endaklagagis yien ap ako inis yisogonbuk. 27Dibas! Hit avakwa yoma agipik andi, nin ao hambegetek hinigik, avakwa Ala avema bisagiluk warisogon ako hinil hasogom o,” yiluk, yugeragagi.

Yesus ndom vaga en elese adik agagi wene

(Matius 17:1-8; Markus 9:2-8)

28Wene andi yugirigya lagagirik, samban ambi okbaluk, Yesus en Peterus o, Yohanes o, Yakobus o, woginiviluk samban ogaruguluk, ndom vaga unggugwa. 29Unggu lagagwarik, Yesus samban ogagyama, At elese adik agya lagagirik, asum mudu amumulip digavok ovagak ogagya hegek, 30-31abinak yevedek vaga ap mberen Musa Elia eneyave sigam ari wagu lagagwarik, Yesus o Yerusalem hambup vage atma des yisogon wene ako, Yesus inim wene mbanggugwa.

32Wene mbanggusigik, ap Peterus aswei inim mondok nogo yup okbogogi ovara, iniluk agu lagagwarik, Yesus mondok abinak ovaga werekma, ap mberen inim enogogwa. 33Inigu lagagwarik, it ap mberen ako Yesus hekbaluk, dagaguluk ogagusim, Peterus en Yesus yugugu dugwit, “Nasin wai. Nit yoma agurik yi sek atma, eravo henggam ambi Hat, ambi Musa, ambi Elia valogo bigigasogom,” yugogogi. (Andi yugogogi ako un inggutmu, yugogogi.)

34Ako ao yugugu hegek, hena wagya dugwit, lovarogo bogogi. Hena enovaga lovakbisa wagya lagagimu, enalon wisane agusigik, 35hena anggelekma en ane ambi iri dugwit, “An nabut denogo bagagis ako yi atma, At ane des erogo hunggu dogones.” 36Iri lagagimu, bikhugu lagagwarik, Yesus adigat hagagwa. Hugu lagagwarik, ogagya hagagwa ako, o andi hudi avakwa mondok yugeregetek mbup yagagwa.

Madis avyak endawima en wibagagi wene

(Matius 17:14-18; Markus 9:14-27)

37Hutun At Yesus ane welagwi menda inim ndom vaga akoma en wambu wagu lagagwama, avakwa wisane At adema wagagwa. 38Adema wagu lagagwarik, avakwa wisane homari wagagwa ako ambien ane ombok vaga Yesus yugugu dugwit, “Ngguru wai. Nabut ambengga endagoma bikhanok yiluk, yukhisiga, Nasin! 39Madis en avyak ako vagari wagek adigat ogagya halok, na iri hegek, legogo wen vaga ndun okbagya lagarik, inggis-isok ndogom-ndogom watya, owarilagap ogarupwak yiluk, okbagya, ogagya lagarik, wasiga. Hekbaluk, wulup andi, ombasigadek. 40Anen Hat hane welagwi menda ako madis nggigilogo wibapwak yiluk, yugirigi ovara, iren nggigilogo wibaup meyan inigis.”

41Yugugu lagagimu, At Yesus en, “Hit avakwa yogak agipik yi, henendawi novaga vanggabaluk, avyarat nembetetek weyak adigat ogarup ombarit nagwis yi, An hit hinim ndugwis maren dogop, eke An ndugwis maren hit hinim nendawi sagain akluk dogop?” yiluk, yugirigya lagagirik, ap abut edup werek ako yugugu dugwit, “Habut wolok oma.”

42Yugugu lagagimu, ao wolok wagya hegek, madis akoen avyak eyave legogo wen vaga ndun okbagya lagagirik, inggis-isok ndogom-ndogom yupwak yiluk okbagagi. Okbagya hegek, At Yesus en madis edup agoda werek menda ako mberugu lagagirik, avyak ako sek okbaluk asin wogogogi. 43Wogugu lagagimu, it avakwa en Ala anye wisane hugu lagagwarik, “Wi!” yiluk, vok yagagwa.

“Narusogom o,” yiluk, ambi inim yugeragagi wene

(Matius 17:22-23; Markus 9:30-32)

Yesus yi ogagek ndi ogagek ovok ogarit lagya vaga, it avakwa ovok en, “Wi!” yiluk, vok yugusigik, Yesus en At ane welagwi menda ako yugirigya dugwit, 44“An wene yukheraliga yi, des erogo henaruk holes. An Ap-At Endaklagagis yi, narupwak yiluk neyave vagago ap wogirigya hagup.” 45Yugeragagi ovara, it dibagetek welagagwa. Eke, wene andi, hwilago ovagak yugeragagirikmu, yedok hegetek ovara, “Yukneregen ako andi, nggarogo yukneregen?” yiluk, enalon en aigwakma wegetek mbup yagagwa.

“An iya, hat iya,” yugu dugwit, wene alelo watugwa wene

(Matius 18:1-5; Markus 9:33-37)

46Andien, hivis Yesus ane welagwi menda en, “An iya hat iya,” yugu dugwit, wene alelo watugwa. 47It enendawi umbutu dugwit, wene alelo watwis ako At Yesus yedok inugu lagagirik, avyak maduk ambi wogogo alilimu mendek okbaluk, 48it ako yugirigya dugwit, “At ambi henanggelekma mondok sovalek agarik halok andi, at ap ombok adigat agarik. Anderogo atma, ap ambi An ninis vaga at avyak yi, waliga halok andi, Anat wokneraliga, eke, An wokneraliga halok andi, At lakbani wagagi ako waliga o,” yiluk, yugeragagi.

“Hinim ogorek dek halok hit menda-at,” yugeragagi wene

(Markus 9:38-40)

49Yugirigya lagagimu, Yohanes en, “Nasin wai. Ap ambi nit ninim nelagwidek ovara, aren Hat hinis vaga madis nggigilogo wibagya ninil hugu lagurik, ‘Moga’ yugugup,” yugogogi. 50Yugugu lagagimu, At Yesus en, “‘Moga,’ yugurubuk. It hinim ogorek dek halok andi, hit menda aro,” yugeragagi.

Samaria menda en, “Yesus ninim dogop nenanggon,” umbutugwa wene

51Andien, hivis At Yesus mbogot vaga wolok dagaup vage vanggo yi wagya lagagimu, Yesus o Yerusalem laup yiluk, endawi ambi mbugulik dugwit, 52yonggo endak lakbisa lagagi lagu lagagwarik, At wagyama ake vipuk erogo bapwak yiluk, avakwa Samaria menda enamwa andoma ambi nonggagagwa. 53Nunggugu lagagwama, avakwa o Samaria menda en, Yesus o Yerusalem mondok laup imbitigi ako yedok hugu lagagwarik, enanggon umbutu dugwit, “Yerusalem laup embetarikmu, lapwak en,” yiluk, hekbagagwa. #9:53: It Samaria menda andi it enombawi Yakuri menda ovara, it Yakuri menda ninen, ‘Hit nit menda dek,’ yiluk, yugu lagagwama, it Yakuri menda inim ogorek welagagwa. It Yakuri menda o Yerusalem samban ogari lagu lagagwa ovara, it Samaria menda en o Ndom Nggerisim vaga samban ogagu lagagwa. Andi halok, ap Yakuri menda sup Samaria vaga Yerusalem laguselok, ‘Nenanggon,’ umbutu lagagwa. 54It anderogo umbutugwa ako At ane welagwi menda Yakobus Yohanes iperen inigu lagagwarik, “Nenasin wai! Hali mbogot vaga en yevedogo iniri wambu warupwak yiluk, yuguruk ai?”

55Yugugu lagagwama, ena endenogo biginugu dugwit, mbereragagi. 56Mberirigya lagagirik, o adik ambima lagagwa.

Yesus inim nagu dogop wene

(Matius 8:19-22)

57Suvaga lagusim, ap ambien Yesus yugugu dugwit, “Hat nggoma laup imbita heyalok, an niperenat nagu dogosogom o.”

58Yugugu lagagimu, At Yesus en, “Yangge do andi, enawi yo masalekma homoma agarwik, eke, swa mbogot vaga nelagwi ako, enawi yo vaga valek agarwik, ovara, An Ap-At Endaklagagis yi andi, nogo yiligama ogo mondok dek,” yiluk, yugogogi.

59Yugugu lagagirik, Yesus en ap adik ambi yugugu dugwit, “Hat An ninim nagu dogosogom o,” yugogogi ovara, ap akoen, “Ai, Nasin. An nasin endak wen sabaluk, hinim nagu dogogwen, ‘Sek,’ yukniru.”

60Yugugu lagagimu, At Yesus en, “It avakwa Ala wene enendawima dek halok andi, nggorak ndatak-at agarwik ako menda en enowa-enasin hambuguselok, wen sabugu dogopwak yiluk, hekbisin. Hat andi, Ala avema bisaup wene ako, yi awi ndi awi yugeregek nagu dogwen,” yugogogi.

61Yugugu lagagimu, ap adik ambien Yesus yugugu dugwit, “Nasin. Hat hinim nagu dogosogon imbiti ovara, lagiluk, endak nowa-nasin yugeralapim, ‘Sek,’ yukniru.”

62Yugugu lagagimu, At Yesus en, “It avakwa en An ninim nagu dogop umbutu dugwit, enambukmu biginuguselok, Ala avema dugwit Ala eyavup ogarit lagu dogop meyan,” yiluk, yugeragagi.#9:62: Wene andi, Ala eyavup sek ogarit lagusim ovara, wene adik ambi ari wagya halok musek lagya dugwit, Ala avema dogop andi meyan halok, yagagi.

Currently Selected:

Lukas 9: nbq2013

Highlight

Copy