Matius 5
5
Yesus ndom vaga dugwit, mamuleragagi wene
1Avakwa wisane At Yesus inim lagwi ako il inigu lagagirik, ndom vaga andoma inggya lagagirik, horaik werekma, it At ane welagwi menda ako At adema wagagwa.
Enendawi adenggen dogop wene
(Lukas 6:20-23)
2Wagu lagagwama, wene mamulirigya dugwit,
3“It avakwa enendawi sovalek Ala ovaga vanggabaluk agarwik andi, At mbogot vaga menda en At avema bisaliga iratma,
enendawi adenggenat umbutu dogopwak o.
4It avakwa enendawi wakhedelagwi halok andi, Ala en enendawi aik wakbisayogon atma,
enendawi adenggenat umbutu dogopwak o.
5It avakwa enendawi sagain andi, Ala en o avok yugeragagi ako irat enandok arusogom atma,
enendawi adenggenat umbutu dogopwak o.
6It avakwa enagas-enagarom uvup ako hak, Ala endawi ombasiga menda ogagu dogop hogop ombasagwi ako andi, Ala en eve sek menda irat wogerayogon atma,
enendawi adenggenat umbutu dogopwak o.
7It avakwa enabwa en okbiselagwi ako andi, Ala en it ogo enabwa en okbisayogon atma,
enendawi adenggenat umbutu dogopwak o.
8It avakwa enendawi weyak dek sek adigat agarwik ako andi, Ala inil hasogom atma,
enendawi adenggenat umbutu dogopwak o.
9It avakwa inim ogorek werekma dambubiselagwi ako, At Ala en, ‘Hit An naburi aro,’ yugerayogon atma,
enendawi adenggenat umbutu dogopwak o.
10It Ala endawi ombasiga menda ogasagwi vaga, avakwa en anggin-mbanggin okbiselagwi ako andi, At mbogot vaga menda en At avema bisaliga iratma,
enendawi adenggenat umbutu dogopwak o.”
11-12“Hit ao dek hinigik, it navi-navi anggin-mbanggin oginipu lagagwa ako hak, hit ogo An woknembetep vaga avakwa en wiyiknom-weyaknom okbugugwis, anggin-mbanggin okhinupwis, enane huluk adigat henovaga bugugwis, ogaguselok, henendawi adenggenat umbutu dogones o. Henangge hagalwik mbogot vaga wisane agarik atma, henendawi sek dugwit, hai watu dogones o,” yiluk, yugeragagi.
Garam inim, o awiya inim, yugeragagi wene
(Markus 9:50; Lukas 14:34-35)
13Wene ambi inim yugirigya dugwit, “O wen vaga yoma avakwa enanggelekma garam idup erogo mago ovagak andi, hirat ovara, garam aitek agya halok andi, idup andi nggarogonggan en idup werek ogarup? Idup halok andi, ambi ogarup segat ovara, idudek halok, ‘Yi evemenda dekma,’ yiluk, mbo hagarukmu inisok vaga sopalogo belagwi ako aro.”
14“It o wen vaga agarwik enanggelekma awiya okbiselagwi hit aro. Eke, o kota ndom vaga agarik halok andi, nggarogo hwilakbabuk erek. 15Avakwa en hali yevedogo baluk, sogolowak avema hwilak belagwidek. Ata, yevedogo baluk, winimen erogo selekma-at belagwi atma, it umwa agarwik ovok erogo awiya vaga agarwik o. 16It avakwa en hit sek ogagwi inil hinugu dogomundik, Henasin mbogot vaga menda siyabapwak yiluk, hiren anderogoat avakwa inivaga hali abya hak awiya oginipu dogones o,” yiluk, yugeragagi.
Wene Musa yugogogi ako adem sigam erogo yugeragagi wene
17Wene ambi inim yugirigya dugwit, “An ako Ala Wene Musa en dirup watigi inim, it ap navi-navi Ala en yugirigya hegek yugeragagwa dirup watugwa enane inim, An dek okbagiluk wagetek. Ata, atma des yupwak yiluk, wagagis. 18Mbogot-wen ao dek agetek hegek, Ala Wene Musa en dirup watigi andi, huruf ambi titik ogarek ako ao atma agetek hegek, dek arisogonbuk, ata, ovok erogo mondok ndatak-at arisogon o, yiluk, avyarat yukheraliga. 19Ala en wene ‘Yerogo ogarup, nderogo ogarup,’ yagagi wene ako, ap ambien, ‘Yi maduk atma, iya dek o,’ yiluk, sovalogo bagya dugwit it nin ogo anderogo sovalogo bagu dogopwak yiluk mamulirigya halok, ap andi, At mbogot vaga menda avema bisaligama andoma at inis mondok sovalek-at dogosogon. Eke, ap ambien wene andi, wokbaluk, des erogo ogarit lagya, eke, des erogo mamulirigya, ogagya halok andi, At mbogot vaga menda avema bisaligama andoma inis mondok werek siyalek-at dogosogon. 20It ap Ala wene vagago welagagwa menda inim, it ap Varisi menda inim, Ala endawi ombasiga menda horogat ogasagwi andi, hit anderogo horogat ogagu hiniselok, At mbogot vaga menda avema bisaligama nunggusogombuk. Ata, it madugat ogagusigik, hit andi ombok erogo ogagu hiniselok andi, At mbogot vaga menda avema bisaligama andoma nunggup segat yukheraliga o,” yiluk, yugeragagi.
Enaninis umbutu saoen, yugeragagi wene
21Anderogo yugirigya lagagirik, ambi inim yugirigya dugwit, “Nenombawi o muk welagagwa ako wene Ala en it yugirigya dugwit, ‘Ap warup moga. Eke, saen ap ambi watya halok, owak dilogo weyak onggo ovaga baup,’ yiluk, yugeragagi ako, hit ovok henaruk hunggugup ovara, 22yogak Anen yukhirigya dugwit, ‘Hit sanien henaninis henaswemuni enovaga bugu hiniselok andi, henowak dilogo weyak onggo henovaga bigiga hagup, yiluk, yukheraliga o. Hit ambien henaswe ambi yugugu dugwit, “Hat mondok meyan heyagi,” yiluk, adem dek hegek yugugu hiniselok andi, weyagat yusogom atma, henowak dilupwak yiluk, it ap wene amburup mbalisagwi menda enadema wokhenombolok lasogom. Eke sanien “Hat mondok nggabelekdek yundup erek,” yugugu hiniselok andi, hali abya wuluk-herek yagaligama akoma mabigigaup-at, ari landiga.”
23“Andi halok, hiren Ala wogirup menda wolok Ala ake belagwima belaguluk, ogagu dugwit, henaswe ambi endawi weyak okbagep ako, henape wenggelagya halok, 24Ala wogirup menda ako ao wogigitekma, Ala ake belagwima andenam baluk, endak henaswe ako hinim dambulagu dogomundik, At Ala wogirup menda ako At ake baup sek aro.”
25“Ap hinim ogorek akoen ap enowak dilivisagwima enadema bigigelagya halok, suvaga ao hinim lagu dugwit, yiluguluk vagalogo hinim henendawi dambulhedaup. Dek halok, at hinim ogorek en ap enowak dilisiga menda adema bigigelagya, andien, ap enowak dilisiga menda en ap ayegen werek adema bigigelagya, andien, ap ayegen werek akoen ap heda marogo lembaga mabugugu, ogagu saoen, suvaga ao hinim lagu dugwit, hodorogo vagalogo hinim henendawi dambulhedaup. 26Heda marogo lembaga mabuguguselok, at enowak dilisiga menda akoen, ‘Onggo anderogo baup,’ yiluk, yukhirigya halok ako mondok ovok erogo bagetek hegek, andoma en mondok wibigigasogombuk, yiluk, an avyarat yukheraliga,” yugeragagi.
Akwa ugun oginipu saoen yugeragagi wene
27Wene ambi inim yugirigya dugwit, “Ala yugugu hegek Musa en wene yugirigya dugwit, ‘Ap ogwa werek hegek, hwa agun werek hegek, ogarup moga,’ yiluk, yugeragagi ako ovok henaruk hunggugup ovara, 28Anen andi, yerogo yukheraliga: Ap saen hwa il bikhigya dugwit, endawima en, ‘Ayai, hwa andi ogakli ale,’ endawi ombasiga halok andi, vage endawima en hwa ako ogaga atma, yiluk, yukheraliga. 29Hinil venak amot vikit weyak ogarup okhinipu halok, hulirogo mbo hanes. Heneyave apik hegek, hali abya wuluk-herek adigat yagaligama mbo lakbigigaup andi weyak. Ata, heneyave venak vikit degerogo baluk, venak adigat Ala avema nunggup halok andi sek o. 30Hininggis amot vaga en weyak ogarup okhinipu halok, mbalogo mbo lakbas. Heneyave apik hegek, hali wuluk-herek adigat yagaligama nunggup andi weyak. Ata, hininggis venak ambi dek okbaluk, venak vaga adigat Ala avema nunggup halok andi sek o,” yiluk, yugeragagi.
Enogwai hekbugu saoen, yugeragagi wene
(Matius 19:9; Markus 10:11-12; Lukas 16:18)
31Wene ambi inim yugirigya dugwit, “Musa en yerogo yagagi: ‘Ap ambi ogwa hekbagiluk, “Hwa yi hekbagi o,” yiluk dirup warogo hwa ako wogirup,’ yiluk, yagagi ovara, 32Anen andi, yerogo yukheraliga: Ap ambi ogwa ap adik en ogagetek hegek hekbagya halok, hwa ako ap adik ambien inim alyak wapwak yiluk, okbaligama, ap hwa hekbagas ako weyak ogasiga andi. Eke, ap ambi hwa bonggalek ako wigya halok, at ogo, alyak waliga,” yiluk, yugeragagi.
“Yi menda ndi menda ininis vaga hanum mbalup moga,” yugeragagi wene
33Wene ambi inim yugirigya dugwit, “O muk avakwa yugurugu lagagwa ako, ‘Ala inis vaga hanum mbanggu dugwit, henane huluk-huluk yup andi moga. At Ala ivaga, “Anderogo ogarisogon,” yiluk, At inis vaga hanum mbanggu dugwit yagalagwi ako wane-wane-at ogagu dogones o,’ yugu lagagwa ako henaruk ovok hunggugup ovara, 34Anen andi, hiren yugu dugwit, ‘Yi menda ndi menda inis vaga hanum mbalogo yukheraliga o,’ yiluk, yugeraup andi mondok moga. Mbogot andi, Ala wene yugeraligama atma, mbogot inis vaga hanum mbalubuk, 35eke, wen yi, Ala isok ago bago agarik atma, wen inis vaga hanum mbalubuk, eke o Yerusalem andi, ap ombok inis werek agarik atma, o kota Yerusalem inis vaga hanum mbalubuk, yiluk, yukheraliga. 36Hit hiniris mudis agya, mudu agya, ogasiga ako andi, At Ala en adigat ogasiga atma, hinunggul inis vaga hanum mbalup andi ogo moga-at. 37Hiren, ‘E o,’ imbita halok andi, ‘E o,’ at yup. Eke, ‘Dek o,’ imbita halok andi, ‘Dek o,’ yup. Ambi inim hondalogo yup okhinipu halok andi, at weyak ogasiga menda ako enat yukheraliga atma, Anen ‘Yubuk,’ yiluk, yukheraliga,” yugeragagi.
“Weyak okhinipuselok, onggo enarubuk,” yugeragagi wene
(Lukas 6:29-30)
38Wene ambi inim yugirigya dugwit, “O muk erogo Musa en avakwa yugirigya lagagi ako, ‘Hinil sunggulogo buguguselok, onggo it inil-at sunggulogo bugwis, eke, henaik danggalogo buguguselok, onggo it enaigat danggalogo bugwis, ogagu dogones o,’ yiluk, yugirigya lagagi ako hit ovok henaruk hunggugup ovara, 39Anen andi, yerogo yukheraliga: Weyak okbuguguselok, onggo enarup moga. Henelagandin venak amot vikit hinituselok, venak inim henarupwak yiluk, enakbetaup. 40Hit ambi ogarumwi vaga henowak dibaluk, ‘Onggo henasum bayu andi wogeraup o,’ yukhiruguselok, sogwesum inimat wogeragup. 41Ap ambien ane anye vaga, ‘Sup horok satu kilometer andenam banilales,’ yiluk, yukhirigya halok, hiren sup o adumu dua kilometer-at balales. 42Ap ambien ‘Andi menda wokneres,’ yukhirigya halok, at wogeres. Eke, ‘Henangge andi sidok wokneres,’ yukhirigya halok, henanggon en henelokwe nomo yubuk, yiluk, yukheraliga,” yugeragagi.
It hinim ogorek henendawi hunik okbugu dogop wene
(Lukas 6:27-28, 32-36)
43Yesus en wene ambi inim yugirigya dugwit, “O muk avakwa yugurugu lagagwa ako, ‘It hinim agipik henendawi hunik oginipwis, eke, hinim ogorek agipik halok andi, henaninis okbugwis, ogagu dogones o,’ yiluk, yugu lagagwa ako ovok henaruk hunggugup ovara, 44-45Anen andi, yerogo yukheraliga: Henasin mbogot vaga menda akoen mo il andok dugwit, it avakwa mondok weyak menda inim, sek menda inim, enovavut hwalek inim, enovavut hwalekdek menda inim, ovok erogo enabwa en sek okbugu dugwit, enagarom sek arupwak yiluk hivi wogirigya, musu wogirigya, ogasiga atma, Henasin mbogot vaga menda aburi arovovok en, it hinim ogorek agipik ako henendawi hunik oginipwis, eke, it anggin-mbanggin okhinivisagwi menda ako, enake samban ogagwi, ogagu dogones o, yiluk, yukheraliga. 46It henabwa ombasagwi ako, enadigat hit henendawi hunik okbugu hiniselok, andi onggo ambi hedaup ombasagwi? It ap weyak pemerintah enake yoparip wonggalisagwi menda#5:46: It pemerintah enake yoparip wonggalisagwi menda ako, ap Yakuri menda ovara, it pemerintah Oroma enake avakwa Yakuri menda en yoparip pajak bapwak yiluk yugurugu lagagwa. It wisane en avakwa enayoparip nomalogombo nungguselok, avakwa Yakuri menda en mondok enanggon umbutu lagagwa. ako ogo anderogoat ogasagwi atma, onggo hedaup degat umbutu dogones. 47Eke, hit henaswemuni adigat hai warogo woginipu hiniselok, hit adigat henovavut sek ombasagwi? Dek. It avakwa weram Yakuri dek menda anderogo wane-wane ogasagwi atma, hiren ‘Nit iya,’ ombarubuk. 48Hit Henasin mbogot vaga menda mondok sek adigat agarik ako wane-wane, hit ogo sek anderogoat dogones,” yiluk, yugeragagi.
Currently Selected:
Matius 5: nbq2013
Highlight
Share
Copy
Want to have your highlights saved across all your devices? Sign up or sign in
