Yohanes 11
11
Kamateangna Lasarus
1Ara besa tau ung mipanaꞌ ung nikonai: Lasarus. Tau to, tu Betania sola: mantàdina ung nikonai: Maria pang Marta. 2Maria dea‑mo to ti bahine ung pimbesaa na mantoli hingkùrang ung buudùkang màmiꞌ mao i kokoꞌna Puang Yesu, pang na sangki bahulakàna. Dea tòna mipanaꞌ ti Lasarus, 3mantàdina to mampakatu kareba mao i Yesu teꞌ, “O Tuang, mantàdiki ung Ta pulemu to, mipanaꞌ.”
4Hampoꞌ to na sàding‑mo Yesu ti kareba to, musua: moa teꞌ, “Sai to, hang tontong‑i nipumate, sangadinna mangola: to, nipupiitaa ti kamalabiꞌangna Puang pang AnakàNa.”
5Dea ti Marta, Maria pang Lasarus na pulemu Yesu. 6Hampoꞌ to Na sàding‑mo moa teꞌ mipanaꞌ ti Lasarus, leta:‑kang idua àlona i anto ung Na kaonei:, 7màli: na musua: mao i pasikolaNa teꞌ, “Ingke‑me: se mangule:‑ing mao i Yudea.”
8Misùmunna‑mi se teꞌ, “O Rabi, hang masai tàruꞌ‑mi ti tu Yahudi àla: manghatui‑Ke. Oꞌ aka Ta mangulea‑ming mao i anto?”
9Na sùmuinna‑mi Yesu teꞌ, “Hang sampulo:‑i naꞌ idua jaang ti tempona masilao: i laling sangàlo? Tau ung mammulao tempona masilao: to, hang na pintodo‑ingda, sàbaꞌ paita nai kamasilaoang ung massilaoi: lino tee. 10Hampoꞌ tau ung mammulao i pihengi, na pintodo‑ingda, sàbaꞌ hari:‑da kamasilaoang ung massilaoi:‑i.”
11Mène:‑mo to ti suana Yesu. Màli: na musua: kang ho moa teꞌ, “Mantàdita se Lasarus leto‑mo, hampoꞌ Ku lumaa mangenang‑i.”
12Musuana‑mi ti pasikolaNa teꞌ, “O Tuang, i leto‑mi, mataletenaa‑moda.”
13Na sannaꞌ‑i dasse: moa teꞌ musua:‑Da mampatu: leto mahulo:. Hampoꞌ ung na patu: suana Yesu dea‑mo kamateangna Lasarus. 14Deanna‑mo to, Na kahuloi: ti massilàha:‑ing se teꞌ, “Mate‑moda ti Lasarus. 15Pang Ku masannang teng ho ti ha one:‑Kaꞌ tempo to, sàbaꞌ làbi beloa‑da sule: mao i dio se, mangking u patongang se. Ingke‑me: se ta lumao i Lasarus.”
16Nai anto, Tomas, ung nikonai: teng TaRapi:, musua: mao i sola: pasikolana teꞌ, “Hàme: se ta ulaꞌ‑i ti Tungguru, eloꞌna ta mate se sola:.”
Yesu‑mo ti toaꞌna katuhoang ung màle
17Tòna deaꞌ‑mo ti Yesu i kaoneang to, ùpaꞌ‑moda àlona ti Lasarus i kaburuꞌ. 18Betania dungkuꞌ i Yerusalem, màka: araa itàlu kilo karaona. 19Jadiꞌ, boso: ti tu Yahudi ung bùruꞌ mao i Marta pang Maria, mampakatana‑i se.
20Na sàdingna‑i Marta moa teꞌ bùruꞌ ti Yesu, sàhe: lumao mantadoꞌi‑I, hampoꞌ dea ti Maria leta: i rasang. 21Musuana‑mi ti Marta mao i Yesu teꞌ, “O Tuang, àla: inne:‑Ke tempo to, àla: hang mate‑iko ti mantàdiku. 22Hampoꞌ ku ìsang‑ko moa teꞌ moi i latenna ho, aka pòteng ti ung Ta palau nai Puang, Ta Na hengiing.”
23MisùmunNa‑mi teꞌ, “Mantàdimu tuhoa‑da pole.”
24Misùmunna‑mi ti Marta teꞌ, “Ku ìsang moa teꞌ tuhoa‑da pole tempona nasang tau ung mate nipatuho:, i àlo tampakàna.”
25Musuana‑mi ti Yesu mao i Marta teꞌ, “Koi:‑mo ti ung mampatuho: tau ung mate pang Koi:‑mo ti toaꞌna katuhoang ung màle. Tau ung mampatongang‑Kaꞌ, tuhoa, na moi mate‑mo. 26Pang nasang tau ung mangkorai:‑mo katuhoang ung màle sàbaꞌ mampatongang‑Kaꞌ, harai:‑da na mate. U patongang naꞌ ti aka te?”
27Misùmunna‑mi ti Marta teꞌ, “Ayyo Tuang,*#11:27 Tuang. Sua: Yunani kurios mading nipatengka: Tuang dea‑raka Puang. ku patongang‑ko moa teꞌ Kinta:‑mo ti Datu: Pipasalamaꞌ, Anakàna Puang, ung niàluꞌ bùruꞌa mao i lino tee.”
28Ladu na pusua: ti to, lumanna‑mi manghàngo Maria. Na neniki teꞌ, “Inne: ti Tungguru, pang u Na hàngo.” 29Jadiꞌ, mukaenang sahe: ti Maria mao mampasiitaꞌi‑I.
30Tempo to, Yesu hang mintama‑mi i lipu:, sangadinna one: maang i anto ung na kaonei: Marta mantadoꞌi‑I. 31Tu Yahudi ung tarrang mampakatana Maria i rasang, mangita Maria tèdeꞌ pang masàraꞌ-sàraꞌ missòhong. Jadiꞌ, lumai: se mangulaꞌ‑i, sàbaꞌ na sannaꞌ‑i se lumao i kaburuꞌ kumàraka.
32Dea tòna deaꞌ ti Maria i Yesu, mingkabongka i heleꞌNa pang musua: teꞌ, “O Tuang, àla: inne:‑Ke tempo to, àla: hang mate‑iko ti mantàdiku.”
33To na hele‑mi Yesu ti Maria ung mantalihuhu: kumàraka, sola: to tu Yahudi‑i se, lalaka malemu*#11:33 lalaka malemu. Lalaka malemunna Puang Yesu na tumang manghele hoana dosa i lino tee, mènena kapipanaꞌang, kamateang, kamasussaang, pang dang mupatongangna. Pang lalakàNa na tumang manghele teꞌ tau to‑i se masussa tàruꞌ mène: tau ung dang ara ranùngangna. (Hele i 1Tes. 4:13-14.) Ara ho pira-pira pumputassereꞌ ung mangkonai: moa teꞌ handei: kàle: ung lalaka, sangadinna besa ung Na sàding i pinanahanNa ung kaladung. pang masussa ti pinanahanNa. 34Na kutikìna‑mi moa teꞌ, “Iaka u kaburuꞌ‑ko se?”
Misùmunna‑mi se teꞌ, “Hàme:, Ta hele‑i Tuang.”
35Tumìtiꞌna‑mi ti uhai matanna Yesu.
36Silàhana‑mi se ti tu Yahudi teꞌ, “Hele! Lammuꞌ tungka ti malemunNa mao i Lasarus.”
37Hampoꞌ aranna nai àlaꞌna‑i se ung mangkonai: teꞌ, “Tau tee, mampapaita‑moda tau ung buta. Hang hela‑I naꞌ mampukauꞌ ho aka-aka mangking Lasarus hang mate‑i?” 38Bùruꞌna‑mi pole ti lalaka malemunna Yesu.
Na dùkuꞌinna‑mi ti kaburuꞌ to, dea‑mo besa liokoꞌ ung nitanaꞌ hatu ung lammuꞌ. 39Misuona‑mi ti Yesu teꞌ, “Kèsoko ti hatu ti.”
Musuana‑mi ti Marta teꞌ, “O Tuang, ùpaꞌ‑moda àlona i kaburuꞌ. Bosia‑moda.”
40Misùmunna‑mi ti Yesu teꞌ, “Hang Ku konai:‑ingko naꞌ teꞌ, Ìna u mupatongang, u itaa ti kamalabiꞌangna Puang?”
41Jadiꞌ, na kèsok‑i se ti hatu to, màli: na tumonga: ti Yesu pang musua: teꞌ, “O Ama:, kurusumangaꞌ sàbaꞌ U Mi pisàdìngi‑mo. 42Ku ìsang‑ko moa teꞌ lupu U Mi pisàdìngi, hampoꞌ Ku pusua: ti tee mangking tau te‑i se mampatongang moa teꞌ Dio‑mo ti ung mampantuyu‑Kaꞌ.”
43Ladu Na pusua: ti to, Na pilabui: ti mikakoang teꞌ, “Lasarus, missòhong‑ko!” 44Missòhongna‑mi ti tau to, ung mate‑mo. Kangkangna pang kokoꞌna na potoꞌ maang ihanang, pang silanna ho pàraꞌ maang ti pipotoꞌna.
Musuana‑mi ti Yesu mao i tau ung one: i anto teꞌ, “Esing‑ko se ti pipotoꞌna, mangking salokaꞌ mammulao.”
Kasitoroꞌang mampatei Yesu
(Mat. 26:1-5, Mrk. 14:1-2, Luk. 22:1-2)
45Nai anto, boso: nai àlaꞌna to tu Yahudi ung bùruꞌ mampubelai Maria, ung mangita nasang to ung na pukauꞌ Yesu, mampatongang‑I. 46Hampoꞌ ara ho pira-pira nai àlaꞌna‑i se, lumao i tu Parisi mampatidolu nasang to ung na pukauꞌ Yesu.
47Deanna‑mo to, tu Parisi pang kapala-kapala imang, mangkobu:‑i se Ung si Nipiama: i tu Yahudi pang silàha:‑i se teꞌ, “Aka ti ung ta pukauꞌa se? Tau tee, mampukauꞌ boso: tanda kalle-kalleang. 48Ìna ta kamànaꞌi se teng tùrung mène: tee, nasang tau mampatongàngI:, mambùruꞌ‑ing ampu parenta tu Roma bùruꞌa manghuntang‑ing Tamming Kabussùngang,*#11:48a Tamming Kabussùngang. Sua: Yunani kaoneangta. pang kìta: tu Yahudi.”*#11:48b Ung si Nipiama: to mantannaꞌ moa teꞌ Yesu mambahaa tau mangeba kaparentaangna tu Roma. Hele i 6:15.
49Besa nai àlaꞌna tau to‑i se, nikonai: Kayapas. Dea ti Kapala Imang tempo to. Na pusua: teꞌ, “Hari:‑da aka u ìsang se. 50Hang hela‑ko se naꞌ mantassereꞌ moa teꞌ làbi belo:‑da sule: mao i dio se ìna besa tau mate nai none: kìta: tau boso:, mambùruꞌ‑ing punta ti kìta: tu Yahudi?”
51Na pusua: ti to, handei:‑da nai pantangaꞌna kalenanna, sangadinna sàbaꞌ tiꞌ tempo to, dea ti Kapala Imang, na pupihuyang‑da moa teꞌ Yesu matea sàbaꞌ tu Yahudi, 52pang handei: sàbaꞌ tu Yahudi teng, sangadinna mangking ana-anakàna Puang ung nipasisara-saraka, Na kobu: pang Na pamesa.
53Jadiꞌ, na rara àlo to, Ung si Nipiama: i tu Yahudi to, mangkasitoroꞌi‑i se mampatei Yesu. 54Deanna‑mo to, Yesu hang lumai: hura: i heleꞌna tau boso:. Na palii: ti i Yudea lumao i lipu: Epraim, dungkuꞌ i padang ung tunini. Pang leta: i anto sola: pasikolaNa.
55Tempo to, dùkuꞌ‑mo ti perayaang Paska tu Yahudi, pang boso:‑mo ti tau nai lipu:-lipu: làngang mao i Yerusalem mangking mallìsòngi kalae: siulaꞌ atorang tu Yahudi hang nirara‑mi ti perayaang to. 56Tau to‑i se mangokaꞌ Yesu. Silàha:-làha:‑i se one: i kaoneang Tamming Kabussùngang moa teꞌ, “Mangaka dosse: ti pantangaꞌmu? Màka: ha maiI:‑da no e, muPaska?” 57Musua:‑i se mène: to sàbaꞌ kapala-kapala imang sìnang tu Parisi mampadeaꞌ‑mo parenta teꞌ ìna ara tau ung mangìsang iaka na kaonei: ti Yesu, parallu na pinghare:‑ing mangking nitingkang.
Currently Selected:
Yohanes 11: skx
Highlight
Share
Copy
Want to have your highlights saved across all your devices? Sign up or sign in
