Lukas 17
17
Mampatu: dosa pang mupantengkai:‑ing
(Mat. 18:6-7, 21-22, Mrk. 9:42)
1Musua: ti Yesu mao i pasikolaNa teꞌ, “Ung massangkeꞌ tulino ìnang ara‑da, hampoꞌ macilaka ti tau ung mambabea sangkeꞌ to! 2Belo: sule: ìna nipintaꞌi hatu ung lammuꞌ i barakona, màli: nitibe‑i mao i tasiki, nai none: na hukùnga Puang àlo i hunni sàbaꞌ mampabùruꞌ marèneꞌ nai besanna tau tee‑i se ung nihele supi:. 3Deanna‑mo to, kuyaꞌ‑ko se leleng aka ti ung nu pukauꞌ!
Ìna sola: dalangmu mampukauꞌ dosa, ràho belo:‑i. Ìna mingkatobaꞌ nai dosanna, pantengkai:‑ing. 4Pang ìna pimpitu sangàlo mampukauꞌ dosa matung, pang pimpitu ho bùruꞌ musua: moa teꞌ, ‘Ku mingkatobaꞌ‑mo,’ baꞌ pantengkai:‑ingda.”
5Musuana‑mi ti ung si Na tonnoꞌ to moa teꞌ, “O Tuang, pumatotoꞌ‑ingnang ti kapatongangangki!”
6Na sùmuinna‑mi moa teꞌ, “Na moi sibali‑i hatunna tanammong ti kapatongangangmu se, u helaa se musua: mao i lòpo:*#17:6 lòpo: to i sua: Yunani, palleona lòpo: kakeaꞌ balanda, dea‑mo besa lòpo: ung pàraꞌ tungka ti oaꞌna. Sua: Malayu murbei. tee teꞌ, ‘Tibokaꞌ‑ko, pang tilamung‑ko i laling tasiki!’ pang matantu na toroꞌi sahe:.”
Ung parallu mao i kaunang
7Na patùrung Puang Yesu ti mampaturo:‑i se moa teꞌ, “I ari: nai àlaꞌmu se ung mangampu kaunang ung mupajeko, dea‑raka mangkuyaꞌ domba, pang ìna mangule:‑ming mao i rasang, u moaa se naꞌ teꞌ, ‘Tùrung‑ko mai manne:’? 8Matantu hang mènei: to. Sangadinna, u moaa se teꞌ, ‘Mupasònoꞌ‑ko, patokana‑ingnaꞌ ti ung ku annena pang layani‑kaꞌ deaꞌ ku ladu manne:. Ladu to, u manne:.’ 9Parallu naꞌ u mukurusumangaꞌ se mao i kaunang to sàbaꞌ na pukauꞌ ti ung nisuo:‑ing? Tantu hari:. 10Mène: ho mao i dio se. Ìna u mampukauꞌ‑mo se nasang ti ung nisuo:‑ingko se, parallu u moa se teꞌ, ‘Hang parallu‑kangka nikurusumangaꞌ. Ki mampukauꞌ teng aka ti ung parallu ki pukauꞌ.’ ”
Yesu mampumatalete: sampulo: tau ung balala
11I laling pammulaoangna Yesu mao i Yerusalem, mangola: àlaꞌna Samaria pang Galilea. 12Tòna mintamaa‑mi se i besa lipu:, mao ti sampulo: tau ung balala mampasikorai:‑I. Tèdeꞌ‑i se karao:-rao: sangkìdoꞌ nai Yesu, 13pang mikakoang moa teꞌ, “O Yesu, o Tuang, pulemu‑kangka!”
14Na itanna‑i Yesu ti tau to‑i se, Na silàha:‑ing teꞌ, “Nàmo: se i imang-imang mampupiita kalaemu.”*#17:14 Ara atorang Musa ung mangkonai: moa teꞌ dea ti imang parallu mamparessa tau ung mangkonai: kalaena pàda:‑mo nai sai balala. Ladu na sabii imang moa teꞌ hùling‑mo ti sai to, na pupiìsang moa teꞌ tau to mading‑mo missola: pole i tau boso: pang mukobu: sola: jamaa i laling kapinombaang pàli i Puang. Hele i Im. 13:45-46, 14:1-4. Tarrang‑i se i pammulaoang lumao, hùling‑mo ti sainna‑i se.
15Aranna‑mi besa nai àlaꞌna‑i se ung manghele kalaena moa teꞌ matalete:‑mo. Mangulena‑ming mao i Yesu sìnang mampilabui: musua:-sua: mampaiaho Puang. 16Mukalimuntuꞌna‑mi tumunnuku i heleꞌna Yesu mukurusumangaꞌ. Tau to dea‑mo tu Samaria.
17Musuana‑mi ti Yesu moa teꞌ, “Hang sampulo:‑i naꞌ tau ti ung nipumatalete:? Iaka‑mi ti ung kamesaa:? 18Aka na dea teng te tau ung dang dea tu Yahudi e, ti ung mangule:‑ing mampaiaho Puang?” 19Musuana‑mi ti Yesu mao i tau to teꞌ, “Tèdeꞌ‑ko, pang sumule:‑mo:. Kapatongangangmu mampasalamaꞌ‑mo:.”
Kabùruꞌangna kadatuangna Puang pang kabùruꞌangnaa pole Anaka Tulino
(Mat. 24:23-28, 36-41)
20Ara pira-pira tu Parisi mingkutiki mao i Yesu mampatu: i sangkanna ti bùruꞌnaa kadatuangna Puang. Na sùmui moa teꞌ, “Kadatuangna Puang hang bùruꞌ‑ida mangola: tanda-tanda ung niita mata, 21pang harai:‑da tau ung mangkonai: moa teꞌ, ‘Hele! Antee‑da ti kadatuangna Puang e!’ dea‑raka ‘Antoo‑da!’ Sàbaꞌ katongangangna, kadatuangna Puang one:‑mo i àlaꞌ-àlaꞌmu se.”
22Ladu to, musua: mao i tau ung mangulaꞌ‑Mi teꞌ, “Bùruꞌa ti tempona u mampukalela se mangita besa àlo nai àlo-àlona Anaka Tulino, hampoꞌ ha u itao: se. 23Pang u na ongiing se tau moa teꞌ, ‘Hele! One:‑Da i antoo!’ dea‑raka ‘Inne:‑Da!’ Hampoꞌ hau lumao se, dea‑raka mangulaꞌ‑i. 24Sàbaꞌ kabùruꞌangna Anaka Tulino niitaa iaka-aka pòteng, mène: salabia: massilaoi: pantang songiꞌna langiꞌ.
25Hampoꞌ dolung nai anto, parallu‑Da mangola: boso: kamaparriꞌang pang na tumpaꞌ tau ung si tuho: i latenna.
26Pang tempo kabùruꞌangna Anaka Tulino, mènea to tempo Nuh lùlung. 27Tempo to, tulino lupu teng manne:, menung, silopaka pang mupasilopaka, deaꞌ àlona Nuh mintama i laling lemmang ung mène: kapalaꞌ tasiki. Bùruꞌna‑mi ti uhai sabaꞌ pang tau ung dang mintama i laling lemmang lòsoꞌ punta.*#17:27 Hele i Par. 7:11-24.
28Mène: ho ti tempo Lot. Tempo to, tulino mamputangaꞌ teng manne:, menung, mubalaꞌ, mubaloko, mutani pang mirasang. 29Hampoꞌ to àlona Lot missòhong nai Sodom, api pang belerang marèneꞌ nai langiꞌ mène: urang, pang tau ung leta: i anto lòsoꞌ punta.*#17:29 Hele i Par. 18:20 – 19:26. 30Mènea‑mo to ti àlo kabùruꞌangna Anaka Tulino.
31Àlo to, isai-sai ti ung tarrang iaho atuꞌ ung marante,*#17:31 atuꞌ ung marante. Hele catatan kaki i Mat. 24:17. hau na mintama hura: i rasang mangala aka-aka. Mène: ho ti ung mingkamaꞌ i kinete:, hau na mao hura: mangala aka-aka. 32Kalehai‑ko se ti ung jadi mao i bahinena Lot!*#17:32 Hele i Par. 19:26.
33Isai-sai ti ung mangkaraꞌi tungka katuhoangna i lino tee, kahùlìngànga katuhoang ung tongang. Hampoꞌ isai-sai ti ung marìngang kahùlìngang katuhoangna, tau to mangkoraia katuhoang ung tongang.
34Ku pusua: matung teꞌ, I pihengi àlo to, araa idua tau i besa paturuang. Dea ti besa nialaa pang besa nipaleta:. 35Pang araa idua bahine ung tarrang mukampung i besa kaoneang. Dea ti besa nialaa pang besa nipaleta:. [ 36Pang araa ho idua tau ung tarrang mingkamaꞌ i kinete:. Dea ti besa nialaa pang besa nipaleta:.]”
37Na sàdingna‑i se pasikolaNa ti suana Yesu to, mingkutiki moa teꞌ, “Onea iaka ti bùruꞌna Anaka Tulino pang hukungang to Tuang?”
Na sùmui mampake dalang sua: teꞌ, “Iaka teng ara ung mate, i anto mukobua ti kudaꞌ ung manganne:.”
Currently Selected:
Lukas 17: skx
Highlight
Share
Copy
Want to have your highlights saved across all your devices? Sign up or sign in
