Lukas 2
2
Yesu nikianak‑ing
(Mat. 1:18-25)
1Tempo to, Kaisar Agustus mampiparenta‑ing mangking nasang tau i kadatuang Roma mampinghare:‑ing kalae: mangking konana na ronno: ung muparenta. 2Parenta to dea‑mo ung parrara nipukauꞌ tempona Kirenius miluhali gubernur i propinsi Siria. 3Deanna‑mo to, nasang tau lumao mampinghare:‑ing kalae: i pantang-pantang lipuna.
4Yusup ho lumao nai Nasareꞌ i Galilea, làngang mao i Betlehem i Yudea, lipuna Datu: Daud dolung, sàbaꞌ dea ti Yusup hatiꞌna‑da Daud. 5Lumao mampinghare:‑ing kalaena sipolai: Maria, lopakànaa, ung tarrang kaleang. 6Tòna one:‑i se i Betlehem, na lampiꞌ‑mo tempona kianaka. 7Mangkianakàna‑ming anaka muane, anaka lihoana. Na babaꞌinNa‑mi ihanang, màli: na loling‑I i besa parahang ung biasa nipake mampakanne: oloꞌ-oloꞌ i rasang to. Sàbaꞌ rasang to, hari: hura: kaoneang ung salokaꞌ.
Pikuyaꞌ domba pang malaikaꞌ
8Tempo to, ara pikuyaꞌ domba ung leta: i padang dùkuꞌ i anto. Hengi dea to, one:‑i se mangkuyaꞌ dombanna. 9Hang na sàdaꞌ-sàdaꞌ‑i se, besa malaikaꞌna Puang mampingèneꞌi, pang pampanana nai kamalabiꞌangna Puang massilaoi:‑i se, pang mariaꞌ‑i se tungka. 10Hampoꞌ musua: ti malaikaꞌ to teꞌ, “Hau mariaꞌ! Sàbaꞌ ku bùruꞌ‑ko mai mampakareba‑ingko se kareba belo: ung mampabùruꞌa kahakaang ung lammuꞌ, ung mampatu: nasang tau. 11Àlo tee, i lipuna Daud, nikianaka‑ming ti Pipasalamaꞌmu, dea‑mo Puang Datu: Pipasalamaꞌ. 12Ung miluhalia tanda matung, u mangkoraia se anaka malea: ung nibabaꞌi ihanang pang niloling i parahang.”
13Ha na sàdaꞌ-sàdaꞌ‑i se, malaikaꞌ to, na pasola: malaikaꞌ sintàna: ung boso: tungka. Nasangna‑i se mampudi Puang moa teꞌ,
14“Malabiꞌ ti Puang iaho i suruga!
Pang i lino, nasang kabeloang na koraia tulino
ung na pulemu Puang.”
15Tòna mangule:‑ming mao i suruga ti malaikaꞌ to‑i se, silàha:-làha:‑mi se ti pikuyaꞌ to teꞌ, “Baꞌ, ingke se sahe: i Betlehem manghele aka te ung na pupiìsang‑mingke Puang.” 16Masàraꞌna‑mi se lumao mangokaꞌ deaꞌ na korai: ti Maria sola: Yusup, pang to Anaka ung niloling i parahang.
17Dea to na ita‑mi se ti Anaka to, na patidolu‑mi se ti aka ung na padeaꞌ‑ing malaikaꞌ mampatu: Anaka to, 18pang nasang tau ung massàding patidoluangna‑i se mimàha. 19Hampoꞌ na pailaling pinanaha Maria ti nasang to, pang na tangaꞌ-tangaꞌ.
20Pikuyaꞌ to‑i se mangule:‑ing mao i padang na pasianu mampaiaho pang mampudi Puang sàbaꞌ nasang to ung na sàding‑mi se pang ung na ita. Pang sileo: ho tungka, to ung na padeaꞌ malaikaꞌ.
Simeon mampudi Puang
21Tòna karoꞌa:‑mo àlona ti Anaka to, nisinni:‑mo. Pang na hengi‑ing se kona:, Yesu, kona: ung na padeaꞌ malaikaꞌ tempona hang na kaleang‑ming inanNa.
22Dea to na lampiꞌ‑mo ti tempona mallìsòngi kalae: siulaꞌ atorang-atorang Musa ladu kianaka, Yusup pang Maria làngang mao i Yerusalem i Tamming Kabussùngang. Pang na baha‑i se ho ti Anaka to mao i heleꞌna Puang, 23mène: ti ung nironno: i laling Suraꞌna Puang moa teꞌ, “Nasang anaka lihoa: muane, parallu nipinomba‑ing mao i Puang.”*#2:23 Kel. 13:2, 12, 15, Bil. 18:15-16. 24Pang i laling mampukauꞌ atorang mallìsòngi kalae: to, mampinomba‑ing se besa pimmalaꞌ mène: ung na patantu atorangna Puang, dea‑mo idua kudaꞌ rùdu: dea‑raka idua kudaꞌ merpati ung mangura.*#2:22, 24 Hele i Im. 12:1-8.
25Tempo to, ara besa tau i Yerusalem ung nikonai: Simeon, ung mahulo: pang manuruꞌ mao i Puang. Tau to tarrang mangahong tempona Puang mampasalamaꞌ tu Israel. Pinanaha Malìsong manterei‑i, 26pang mampupiìsang‑mo mao i dea moa teꞌ, “Hang matea‑mo:do i dang nu ita‑mi ti Datu: Pipasalamaꞌ ung na àluꞌ Puang.”
27Tempo dea teng to, Simeon na rannang Pinanaha Malìsong mintama i kaoneang Tamming Kabussùngang. Pang Yesu na baha tudolunNa mao i anto mangking mampukauꞌ‑i se ung siulaꞌ atorang aluku. 28Na alanna‑mi Simeon ti Anaka to pang na salangkung na pasianu musumbayang mukurusumangaꞌ moa teꞌ,
29“O Puang, i latenna, koi: tee kaunangMu sadia‑mo mate i laling kabeloang,
siulaꞌ suaMu ung Nu pusua: dolung mao i koi:.
30Ha umma‑i to, ku ita mata‑mo ti kasalamaꞌang nai Dio,
31ung Nu patokana‑ming nasang tulino,
32dea‑mo kamasilaoang ung massilaoi: dalang ung tongang mao i tau ung dang dea tu Yahudi,
pang mampabùruꞌa kamalabiꞌang mao i taumMu tu Israel.”
33Dea ti Yusup pang Maria mimàha massàding suana Simeon mampatu: Anaka to. 34Na pasakkena‑mi Simeon, màli: na musua: mao i Maria moa teꞌ, “Kalehai ti tee. Na tumang Anaka tee, boso: tu Israel niuluꞌa nai esòngangna, pang boso: ho ung nilantoing. Miluhalia‑Da tanda nai Puang, ung na ebaa boso: tau, 35pang nai none:‑mo i anto, nipupiitaa ti isinna pinanahanna pantang tau. Pang dea ti pinanahammu na tosua kamasussaang, mène: ung na tosu: sulampaka.”
Hanna mampudi Puang
36One: i anto, ara ho Hanna, besa nabi bahine ung matua:‑mo tungka, anakàna Panuel, nai rapu Aser. Tòna mangura maang, kimuane‑da. Hampoꞌ pitu‑i heaꞌna na sola: muanena, 37miluhali pali:. I latenna, umuruꞌna karoꞌa:‑mo pulona ùpaꞌ heaꞌna. Hari:‑da na mampalii: kaoneang Tamming Kabussùngang. Àlo hengi minomba one: sìnang mapuasa pang musumbayang.
38Tempo dea ho teng to, mindùkuꞌ i dei: se, màli: na mampudi pang mukurusumangaꞌ mao i Puang. Pang na rara i anto, musua: mampatu: Anaka to mao i nasang tau ung tarrang mangahong tempona Puang massalokaꞌi Yerusalem.
39To na pukauꞌ‑mi se Yusup pang Maria nasang ti ung parallu nipukauꞌ siulaꞌ atorangna Puang, mangule:‑ming se mao i Nasareꞌ, i Galilea. 40Dea ti Anaka to sa: baraꞌ-baraꞌna pang sa: pabuu:-buuna pang sa: kitangaꞌ-tangaꞌ belona. Pang makàso: moa teꞌ malemunna Puang manterei‑I.
Yesu one: i Tamming Kabussùngang
41Tumpuꞌ heaꞌ, tudolunna Yesu làngang mao i Yerusalem mingulaꞌ muPaska, dea‑mo Paskanna tu Yahudi. 42Pang dea tòna sampulo:‑mo idua heaꞌna ti Yesu, làngang‑mi se ho mao i anto, siulaꞌ kabiasaangna perayaang to. 43Tòna ladu‑mo ti perayaang, mangule:‑ming se, hampoꞌ dea ti Yesu leta:‑kangda i Yerusalem pang hang na ìsang‑i tudolunNa. 44Na sannaꞌ‑i dasse: moa teꞌ sipolai:‑mo solana. Deanna‑mo to, mammulao‑mi se sangàlo, màli: na okaꞌ‑i dasse: i àlaꞌna mantàdi:-tàdina pang siìsangna‑i se. 45Hampoꞌ tiꞌ hari:‑Da, mambùruꞌ‑ing mangule:‑ing se mao i Yerusalem mangokaꞌ‑I.
46Àlo ung kaitàlu na korai:‑mi se i kaoneang Tamming Kabussùngang, mesong i lummuna tungguru i aluku. Tarrang‑Da mampisàdìngi tungguru to‑i se pang mingkutiki. 47Nasang tau ung massàding Yesu mimàha tungka manghele kapaìsàngangNa pang pisùmunNa. 48TudolunNa mimàha tungka manghele‑I i anto. Musuana‑mi ti inanNa teꞌ, “O Anàku, aka pu U pène:‑kangka te? Ki masussa‑moka tungka sola: amamMu mangokaꞌ‑Ko!”
49Na sùmuinna‑mi moa teꞌ, “Oꞌ aka pu u Mi okaꞌ dosse: pai iaka? Ha ta ìsang‑i se naꞌ moa teꞌ parallu‑ko Ku one: i tammingna AmangKu?” 50Hampoꞌ hang na pahang‑i se ti pisùmunNa.
51Mangulena‑ming ti Yesu sipolai: tudolunNa nau: mao i Nasareꞌ. One: i anto, tuho: manuruꞌ mao i dei: se. Pang nasang kara-kara dea to, na pailaling pinanaha inanNa.
52Dea ti Yesu sa: baraꞌ-baraꞌna pang sa: kitangaꞌ-tangaꞌ belona, pang sa: na pulemu-lemunna Puang pang tulino.
Currently Selected:
Lukas 2: skx
Highlight
Share
Copy
Want to have your highlights saved across all your devices? Sign up or sign in
