Lukas 4
4
Yesu na kakaꞌi Datuna dihata bulituku
(Mat. 4:1-11, Mrk. 1:12-13)
1Tempona Yesu mampalii: Uhai Yordan, na kapùnoi:‑mo Pinanaha Malìsong. LumanNa‑mi i padang ung tunini pang na rannang leleng Pinanaha Malìsong. 2Ùpaꞌ pulona àlona masainna i anto, na kakaꞌi Datuna dihata bulituku. I laling tempo to, hari:‑da Na manganne: aka-aka. Tampàkang, burorang.
3Musuana‑mi ti Datuna dihata bulituku teꞌ, “Ìna U Anakàna Puang, baꞌ pupiluhali‑mi roti ti hatu tee.”
4Na sùmui teꞌ, “I laling Suraꞌna Puang nironno: moa teꞌ, ‘Tulino hang tuho:‑ida nai roti teng.’*#4:4 Ul. 8:3.”
5Na bahanNa‑mi Datuna dihata bulituku mao i kaoneang ung iaho, pang i laling tempo ung dang nipikapìdong‑ing, mampupiita nasang kadatuang i lino. 6Na konai: moa teꞌ, “Kuasa muparenta, pang kamalabiꞌangna nasang kadatuang tee, U ku hengiing. Sàbaꞌ nasang to, ku nihengi‑ming, pang isai-sai teng ti ung ku kapelai: ku panghengi‑ing, ku hengi‑ing. 7Deanna‑mo to, ìna U mi pinombai, nasang ti to miluhalia ung Nu ampu.”
8Na sùmui Yesu teꞌ, “I laling Suraꞌna Puang nironno: mao i taunNa moa teꞌ, ‘Parallu u mampinombai teng Puangmu, pang mallayani‑I.’*#4:8 Ul. 6:13.”
9Na bahanNa‑mi Datuna dihata bulituku mao i Yerusalem pang na paone: i kaoneang ung kamìnang iaho i kaoneang Tamming Kabussùngang. Musuana‑mi moa teꞌ, “Ìna U Anakàna Puang, baꞌ mingkaràsang‑Ko nai antee! 10Sàbaꞌ i laling Suraꞌna Puang nironno: moa teꞌ, ‘Puang mampantuyua pira-pira malaikaꞌNa mangkuyaꞌ‑ko.’ 11Pang, ‘U na timàngi: se, mangking moi kokoꞌmu ha mingerong‑i i hatu.’*#4:10-11 Mas. 91:11-12.”
12Na sùmui Yesu teꞌ, “Nironno: ho moa teꞌ, ‘Hau mangkakaꞌi Puangmu.’*#4:12 Ul. 6:16. Hele ho catatan kaki i Mat. 4:7.”
13To na pukauꞌ‑mo Datuna dihata bulituku ti nasang laoangna dalang mangkakaꞌi Yesu mangking mampukauꞌ dosa, na palii:‑mo ti Yesu pang mangahong kanàha: ung belo:.
Yesu mamparara kamaꞌangNa i Galilea
(Mat. 4:12-17, Mrk. 1:14-15)
14Mangulena‑ming ti Yesu mao i Galilea, pang na kuasai‑mo Pinanahanna Puang. Pang kareba mampatu: kalaeNa, dumallaꞌ i pangalanna propinsi to. 15Mupaturo: pai tamming-tamming kapinombaang i anto, pang nasang tau mampirerèngi‑I.
Yesu nitumpaꞌ i Nasareꞌ
(Mat. 13:53-58, Mrk. 6:1-6a)
16Yesu lumao ho i Nasareꞌ, lipu: ung Na kaonei: baraꞌ. Tempo àlo kapillìheang, mène: kabiasaangNa, lumao i tamming kapinombaang. I anto tèdeꞌ tokana mambasa Suraꞌna Puang, 17pang nihengi‑ing suraꞌ nabi Yesaya. Dea to Na hungkai‑mo ti lolongang suraꞌ to, Na korai: ti sua: ung mampatu: Datu: Pipasalamaꞌ moa teꞌ,
18“Pinanahanna Puang manterei‑Kaꞌ,
sàbaꞌ Ku Na patongko‑mo mampakareba
Kareba Belo: mao i tau ung milemu-lemui.
Ku Na pantuyu mampupiìsang
kasalokaꞌang mampatu: tau ung na ala poni:
pang kapaitaang mampatu: tau ung buta,
massalokaꞌi tau ung nihele polu
19pang mampakareba bùruꞌna tempona
Puang mampasakke taunNa.”*#4:18-19 Yes. 61:1-2, pang hele ho i 58:6.
20Na lolongna‑mi pole Yesu ti suraꞌ to, pang Na ule:‑ing mao i ung mangatoroꞌ, màli: na mesong mupaturo:. Nasang tau i laling tamming kapinombaang to, mangkapupui‑I. 21Pang na rara‑mo Yesu ti mampaturo:‑i se nai sua: to teꞌ, “I latenna tikannaꞌ‑mo to sua: ung nu sàding se.”
22Sua:-suaNa belo: tungka, dea pùna nipirerèngi‑I. Hampoꞌ mimàha‑i se. Sàbaꞌ na konai:‑i se moa teꞌ, “Handei: naꞌ anakàna Yusup ti te?”
23Musuana‑mi ti Yesu teꞌ, “Tantu u mampake se dalang sua: tee mampatu: Koi: teꞌ, ‘He Pumpakuli:, pumatalete:‑kai: ti tanandapoꞌmu. Kalle-kalleang ung Nu pukauꞌ tènga i Kapernaung pukauꞌ ho inne: i lipuMu.’ ” 24Musua: kang ho ti Yesu teꞌ, “Matantu te ung Ku pusua: matung e teꞌ Hari:‑da nabi ung nitarima i lipuna. 25Pang tongang te ung Ku pusua: matung e teꞌ Tempo Elia, tòna hang urang‑i itàlu heaꞌna mitàra pang kaburoràngang ung lammuꞌ malleo: nasang lipu: i Israel, boso: ti ung tuho: pali: i Israel. 26Hampoꞌ na moi mène: to, hang na pantuyu‑ida Puang ti Elia mao mantuhoi: ung pali: to, sangadinna mao‑da sule: i besa ung pali: ung dang dea tu Israel i lipu: Sarpat i pangalanna kaparentaangna Sidon. 27Mène: ho i laling tempo nabi Elisa, boso: ti tau i Israel ung balala, pang hari: moi besa ung na papàda:, sangadi to Naaman tu Siria.”
28Nasang tau i tamming kapinombaang to, lalaka tungka tòna massàding aka to. 29Tèdeꞌna‑mi se mampasahu Yesu missòhong lipu:, pang na baha mao i minanaꞌ lipu:, ung mapikung, mangking na summang‑ing se nau:. 30Hampoꞌ na sùsong teng Yesu malai ti tau boso: to.
Tau ung na katama dihata bulituku
(Mrk. 1:21-28)
31Nauna‑mi ti Yesu mao i Kapernaung, besa ho lipu: i Galilea. I anto mampaturo: tau tempo àlo kapillìheang. 32Nasang tau ung massàding, mimàha i laling pangaeNa mupaturo:, sàbaꞌ mupaturo:‑Da sola: kuasa. 33I tamming kapinombaang to, ara besa tau ung na katama dihata bulituku. Tau to mikakoang moa teꞌ, 34“He, Yesu tu Nasareꞌ, aka ti ung Nu pukauꞌa mao i kami? U mai naꞌ massolàngia‑kang? U ku ìsang, moa teꞌ Dio‑modo ti ung malìsong, ung bùruꞌ nai Puang.”
35Musuana‑mi ti Yesu mamparenta dihata bulituku to teꞌ, “Mànaꞌ! Pissòhong‑ko nai tau tee!” Na pimmaiꞌna‑ming dihata bulituku ti tau to i heleꞌna‑i se, màli: na missòhong, hampoꞌ hang na pusàro‑i tau to.
36Nasang tau mimàha pang silàha:-làha: moa teꞌ, “Hang makàdaꞌ‑ida belona ti sua:-suaNa! Sàbaꞌ makuasa‑Da mamparenta dihata bulituku malai, pang sòhong‑i se.” 37Urungang kareba mampatu: Yesu dumallaꞌ i nasang pangalanna lipu: to.
Yesu mampumatalete: siranna Simon pang tau sintàna:
(Mat. 8:14-17, Mrk. 1:29-34)
38Yesu mampalii: tamming kapinombaang to, pang lumao i rasangna Simon. Siranna Simon bahine, na santaꞌ na pupirarung. Pang na palau‑i se ti Yesu manghele‑i. 39Lumanna‑mi ti Yesu mallummàngi bahine to, pang manghùlìngi sai to. Tèdeꞌna‑mi sahe: mallayani‑i se.
40Tòna lìli:‑mo ti kùlaꞌ, nasang tau mambaha mantàdi:-tàdina mao i Yesu, ung maparriꞌ nai rupa-rupa sai. Yesu mantokaꞌ tau to‑i se pang mampumatalete:. 41Mène: ho ti dihata bulituku, malai nai boso: tau, sìnang mikei:-kei: teꞌ, “Dio‑mo ti Anakàna Puang!”
Hampoꞌ na ràho Yesu, sàbaꞌ na pusua:‑mi se ti ung na ìsang‑i se, moa teꞌ Dea‑mo ti Datu: Pipasalamaꞌ, pambàtiꞌ hang tempona‑mi nipupiìsang.
Yesu mupaturo: i tamming-tamming kapinombaang
(Mrk. 1:35-39)
42Palumayàngang maang, Yesu mampalii: lipu: to pang lumao i kaoneang ung tunini musumbayang. Tau boso: mangokaꞌ‑I. Pang dea to na korai:‑mi se pang na sàding‑i se moa teꞌ mangaku: kakarang, na apuꞌ‑i se mangking hang tùrung‑I mampalii: lipu: to. 43Hampoꞌ musua: ti Yesu moa teꞌ, “Kareba Belo: mampatu: kadatuangna Puang, parallu ho Ku pakareba mao pai lipu:-lipu: sintàna:. Sàbaꞌ dea‑mo to ti patuna Na pantuyu‑ingNaꞌ mao i lino.”
44Deanna‑mo to, Yesu mampakareba pai tamming-tamming kapinombaangna tu Yahudi.
Currently Selected:
Lukas 4: skx
Highlight
Share
Copy
Want to have your highlights saved across all your devices? Sign up or sign in
