Matius 21
21
Yesu nitadoꞌi mintama i Yerusalem
(Mrk. 11:1-11, Luk. 19:28-40, Yoh. 12:12-19)
1Tòna dungkuꞌ‑mo i Yerusalem ti Yesu sola: pasikolaNa, pang deaꞌa‑mi se i lipu: Betpage i matepaꞌna Mungku Saitun, na pantuyu Yesu ti idua pasikolaNa lumao dolung 2moa teꞌ, “Nao: se i lipu: ung ta hele heteꞌ se too. U mangitaa se sahe: inanna keledai nipintaiꞌ‑ing sola: anakàna. Hùraꞌ‑ingko se pang baha nai iduanna mai. 3Pang ìna ara tau ung marràho‑ko se, konai:‑ko se teꞌ, ‘Na parallui Tuangki, pang Na uleing‑da sahe:.’ ”
4Mène:‑mo to ti ung nipaara mangking tikannaꞌ ti suana Puang ung nipadeaꞌ mangola: nabi teꞌ,
5“Konai:‑ing mao i tau i lipu: Sion teꞌ,
‘Hele! Bùruꞌ‑mo ti Datumu.
Malumu ti pinanahanNa pang mampimmantoi: besa keledai,
keledai ung mangura maang.’ ”*#21:5 Yes. 62:11, Sak. 9:9.
6Lumanna‑mi ti idua pasikolaNa to, pang mampukauꞌ mène: ti ung na pantuyu‑ing Yesu mao i dei: se. 7Na baha‑i se ti inanna keledai to sola: anakàna, màli: na lapìngi‑i se kayaꞌ i sòhongnanna ti anaka keledai to, pang na pimmantoi: Yesu. 8Pang tau ung dang makàdaꞌ bosona mambìniꞌ kayaꞌ i sòhongnanna‑i se pai dalang. Ara ho ti ung si mangala kalidina bunga pang mangilaꞌ i lummu: dalang. 9Pang tau boso: ung si midolung pang tau ung si mingulaꞌ nai keboꞌ mikako-kakoang‑i se nasang teꞌ,
“Hosana!*#21:9a Hosana! Sua: Ibrani, palleona Pudi ti Puang! Pudi‑mi ti Hatiꞌna Daud!
Nipudi te ung bùruꞌ i laling konana Puang!*#21:9b Mas. 118:25-26.
Nipudi ti Puang i kaoneang ung kamìnang iaho!”
10Tòna mintama‑mo i Yerusalem ti Yesu, na kasaluhahei: nasang tau i anto teꞌ, “Isai‑Da ti te?”
11Pang tau boso: to mangkonai: teꞌ, “Dea‑mo te ti nabi Yesu tu Nasareꞌ nai Galilea.”
Yesu mampasahu pumpubaloko nai kaoneang Tamming Kabussùngang
(Mrk. 11:15-19, Luk. 19:45-48, Yoh. 2:13-16)
12Mintamanna‑mi ti Yesu i kaoneang Tamming Kabussùngang pang mampasahu nasang pumpubaloko pang tau ung si mambalaꞌ i anto. Na haling-haling‑ing ti mejanna pumputukaꞌ seeng pang esòngangna pumpubaloko kudaꞌ merpati.*#21:12 Tu Yahudi mangàna: pumali ti mampinomba‑ing seeng ung ara gambaraꞌ tau i Tamming Kabussùngang. Pumputukaꞌ seeng mantokaꞌ seeng tu Yahudi ung dang ara gambaraꞌ tau, na tukaꞌ seeng ung nai negara sintàna:, pang mangkorai: piuhainna. Hele gambaraꞌ i Mrk. 12:16. Pùna ara patuhoang pang aka-aka sintàna: nibaloko i kaoneang Tamming Kabussùngang, mangking madàli na balaꞌ tau ung bùruꞌ nai karaona, pang na pimmalaꞌ‑ing. Hampoꞌ patuna kaoneang Tamming Kabussùngang dea‑mo nikaonei: minomba mao i Puang, pang pitarunna oloꞌ-oloꞌ pang tau ung mubaloko, mubalaꞌ pang mantukaꞌ seeng marreroꞌi kapinombaang. 13Na konai: Yesu mao i tau to‑i se teꞌ, “I laling Suraꞌna Puang nironno: mène: tee, ‘TammingKu nikonaia tamming kaoneang musumbayang.’ Hampoꞌ u babe se pukobuangna tau ung làsi:!”*#21:13 Yes. 56:7, Yer. 7:11.
14Nai anto, bùruꞌ ti tau ung si buta pang ung si kempang mao i Yesu i kaoneang Tamming Kabussùngang pang Na pumatalete:. 15Hampoꞌ to na ita‑mi se kapala-kapala imang pang ung si manarangna i aluku ti kalle-kalleang ung na pukauꞌ Yesu, pang massàding anaka ung si mikakoang i kaoneang Tamming Kabussùngang teꞌ, “Pudi‑mi ti Hatiꞌna Daud!” lalak‑i se tungka.
16Musua:‑i se mao i Yesu teꞌ, “U sàding naꞌ aka ti ung na konai:‑i se anaka to‑i se?”
Na sùmui teꞌ, “Ku sàding. Hampoꞌ hara‑mo: se naꞌ mambasa suana Daud i Suraꞌna Puang? teꞌ, ‘Ana-anaka si sama‑i maang U paturo:‑mo mampudi‑Ko.’*#21:16 Mas. 8:3.”
17Na paliina‑mi Yesu ti tau to‑i se missòhong lipu: mao i Betania pang one: muhengi.
Yesu mantunna: lòpo: ara
(Mrk. 11:12-14, 20-24)
18I miluhengi àlo i hingkoꞌna, i laling pammulaoang sumule: mao i Yerusalem, burorang ti Yesu. 19Na itanna‑mi ti santoaꞌ lòpo: ara i minanaꞌ dalang. Mao Na hele, hampoꞌ hari: hoana Na korai: moi besa, sangadi daungna pòteng. MusuaNa‑mi mao i lòpo: to teꞌ, “Hang hoao:‑do hura: deaꞌ tùrungna!” Pang tempo dea ho teng to, pàtu: malaso ti daungna.*#21:19 Pipaturo: ung nikorai: nai lòpo: ara dea‑mo mène: tee. Tau ung na patongang‑ming Puang mampukauꞌ kamaꞌangNa, parallu manghoa:‑ing hoa: ung belo:. Mènena tau ung mampidolung‑ing tu Yahudi i laling alukùna‑i se, moi belo: i heleangna nai karaona, hampoꞌ tiꞌ hari: hoana, sipatu: mangkorai: hukungang. Hele i Mi. 7:1 pang Yer. 8:13.
20To na ita‑mi se pasikolana Yesu ti aka to, mimàhanna‑mi se pang musua:‑i se teꞌ, “Mangaka pùna hela‑da pàtu: mate ti lòpo: ara to?”
21Na sùmui Yesu mao i dei: se teꞌ, “Matantu te ung Ku pusua: matung e teꞌ Ìna u mupatongang se pang hang bata-bata‑ko se, handei:‑da teng u hela se mampukauꞌ aka ti ung Ku pukauꞌ‑mo mao i lòpo: ara to, hampoꞌ mao ho i mungku tee, ìna u konai: se teꞌ, ‘Titeiꞌ pang titibe‑ko mao i laling tasiki!’ nasang to nipukauꞌa matung. 22Pang aka pòteng ti ung nu palau se mangola: pusumbayang, ìnang u tarimaa se, deinti u mupatongang se.”
Pingkutìkang mampatu: kuasanna Yesu
(Mrk. 11:27-33, Luk. 20:1-8)
23Tòna sumule:‑mo mao i kaoneang Tamming Kabussùngang ti Yesu pang mupaturo: i anto, bùruꞌ ti kapala-kapala imang pang ung si matua:-tuana tu Yahudi mao i Yesu pang mingkutiki‑i se teꞌ, “Aka ti pingkakìniangMu mampukauꞌ nasang te? Isai ti ung mampakuasa‑Ko?”
24Na sùmui Yesu teꞌ, “Baꞌ Ku mingkutìka‑kang. Ìna u sùmui se, Ku konaia‑ko ho matung isai ti ung mampakuasa‑Kaꞌ mampukauꞌ nasang te. 25Pudoiꞌna Yohanes, isai ti ung mampakuasa? Puang? dea‑raka tulino.”
Silàha:-làhana‑mi se teꞌ, “Ìna ta konai: se Puang, Na konaia teꞌ, ‘Baꞌ aka pu dang nu patongang‑ko se deꞌ?’ 26Hampoꞌ ìna ta konai: se tulino, ta mariaꞌ se mao i tau boso:, sàbaꞌ nasang tau mangkonai: teꞌ nabi‑da ti Yohanes.” 27Jadiꞌ, na sùmui‑i se teꞌ, “Hang ki ìsang‑ika.”
Na oanna‑mi Yesu mao i dei: se teꞌ, “Ìna mène: to, hang Ku konaii:‑ko ho matung isai ti ung mampakuasa‑Kaꞌ mampukauꞌ nasang te.”
Rampeang idua anaka
28“Hampoꞌ mangaka ti pantangaꞌmu se tee? Ara besa ama: ung mangampu idua anaka muane. Tau to mao i anaka lihoana pang mampantuyu‑i teꞌ, ‘O anàku, nao: mingkamaꞌ i kinete: anggoroꞌ i latenna.’ 29Na sùmui anaka to teꞌ, ‘Ayyo Ama:.’ Hampoꞌ hang lumai:‑da.
30Lumanna‑mi ti tau to i anaka tampaka mampantuyu ho. Pang na sùmui anaka to teꞌ, ‘Hang mio:‑kaꞌko.’ Hampoꞌ i hunninna, na sassang ti pisùmunna, na toroꞌinna‑mi to pipantuyunna amanna.*#21:29-31 Ara ho teks Yunani ung mampasitukaꞌ sùmunna idua anaka to, mène: ung nironno: i BIMK pang TB2. 31Jadiꞌ, isai ti nai idua anaka to ti ung mampukauꞌ pampuinahanna amanna?”
Na sùmui‑i se teꞌ, “Anaka tampaka.”
Na oanna‑mi Yesu teꞌ, “Matantu te ung Ku pusua: matung e teꞌ Tupassima pang tau ung si mambaloko kalaena, dolùnga miluhali taunna Puang nai none: dio se. 32Sàbaꞌ Yohanes bùruꞌ pang mampakareba dalang kamahuloang, hampoꞌ ha u patongang‑ko se. Hampoꞌ tupassima pang tau ung si mambaloko kalaena mampatongang‑i. Hampoꞌ moi u ita‑mo se nasang ti to, hang mingkatobaꞌ‑ko se ho pang ha u patongang‑ko se.”
Rampeang pumpingkamaꞌ i kinete: anggoroꞌ
(Mrk. 12:1-12, Luk. 20:9-19)
33Na konaina‑mi Yesu mène: tee, “Pisàdìngi‑ko se te rampeang sintàna: e. Ara besa tau ung mallamùngi kinete: anggoroꞌ, màli: na hering‑i mimpaling. Ladu to, mangkekena‑mi kaoneang mamparra anggoroꞌ pang mampatèdeꞌ tanno:. Ladu nai anto, na pupisaro ti kinete: to mao i pira-pira pumpingkamaꞌ, màli: na lumehoꞌ.*#21:33 Hele i Yes. 5:1-2. 34Tòna tempona‑mo muratu, na pantuyu‑mo ti pira-pira pangkoringna mao mantarima umpana. 35Hampoꞌ pumpingkamaꞌ to‑i se mantingkang pangkoring to‑i se. Na panaꞌi‑i se ti besa, sintàna: na hatui‑i se, pang sintàna: kang ho na patei‑i se. 36Na pantuyunna‑mi ho pole ampunna kinete: ti pangkoringna sintàna:, ung làbi maranga nai dolung. Hampoꞌ nipène:‑i se ho teng to solana. 37Tampàkang, kàle: anakàna ti ung na pantuyu mao i pumpingkamaꞌ, sàbaꞌ na tangaꞌ teꞌ, ‘Manassa na sangadii: se ti anakàku.’
38Hampoꞌ to na ita‑mi se ti anakàna to, silàha:-làha:‑mi se teꞌ, ‘Hoda‑mi o ti ung mampumanaꞌa o. Hàme:, patei‑ke se, mangking kìta: se ti ung mangala manaꞌna!’ 39Na tingkangna‑mi se pang na tibe mao i sòhongna kinete:, màli: na patei‑i se.”
40Mingkutikìna‑mi ti Yesu teꞌ, “Jadiꞌ, ìna sumule:‑mo ti ampunna kinete: to, aka ti ung na pukauꞌa mao i pumpingkamaꞌ to‑i se?”
41Na sùmui‑i se teꞌ, “Manassa mampateia tau to ung si kadetu pinanahanna, màli: na pupisaro‑i pole ti kinetena to mao i pumpingkamaꞌ sintàna:, ung mio: mangkàlaꞌ haseleꞌna mao i dea tòna tempona‑mo.”
42Musuana‑mi ti Yesu mao i dei: se teꞌ, “Hara‑mo: se naꞌ mambasa i Suraꞌna Puang? teꞌ,
‘Hatu ung na tibe puntamming
miluhali‑mo hatu ung kamìnang parallu.
Nasang te, Puang‑da ti ung mampukauꞌ,
pang belo: tungka nihele.’*#21:42 Mas. 118:22-23. Hatu manturo: Datu: Pipasalamaꞌ ung na tibe ung si matua:-tuana tu Yahudi.
43Deanna‑mo to, Ku pusua: matung teꞌ, Umpamu se i kadatuangna Puang nialaa nai dio se pang nihengiing mao i tau sintàna: ung mantoroꞌi pampuinahanna Puang. [ 44Isai ti ung marèneꞌ i hatu to masolànga, pang isai ti ung na karèneꞌi hatu to, marùbùka.]”*#21:44 Mampatu: hatu to, nipupihuyang i Yes. 8:14-15 pang Dan. 2:34-35, 44-45. marèneꞌ i hatu to palleona, hang mio:‑i mupatongang mao i Yesu. na karèneꞌi hatu to palleona, na hukùnga Puang àlo i hunni sàbaꞌ mantumpaꞌ Yesu.
45Tòna massàding‑mi se rampeangna Yesu ti kapala-kapala imang pang tu Parisi, na ìsang‑i se teꞌ rampeang to, mampatu: dei: se. 46Deanna‑mo to, na okaꞌ‑i se ti dalang mantingkang Yesu, hampoꞌ mariaꞌ‑i se mao i tau boso:, sàbaꞌ tau boso: to mangàna: teꞌ Yesu dea‑mo nabi.
Currently Selected:
Matius 21: skx
Highlight
Share
Copy
Want to have your highlights saved across all your devices? Sign up or sign in
