I LUKASI 22

Tinoo mepate Ira i Yesu

22:1-2

(Mat. 26:1-5; Mrk. 14:1-2; Yoh. 11:45-53)

1 # Pel. 12:1-27 Oleo langkai Roti Nahi Peragi, anu nineeako Pasa, rangkuomo. 2Luwuno petewawado sando mpesomba ka anu mponto'ori Taura mpo'ungke sala, kana'umpe ka dompokompepate Ira i Yesu, hangano medoito ira a mia hadio.

I Yudasi umasa Ira i Yesu

22:3-6

(Mat. 26:14-16; Mrk. 14:10-11)

3Ka mewinsoomo i Mosa'o ndi Yudasi, anu meneeako i Karioti, asa mia inso a hopulu ka orua ana guru atuu. 4Ka i'amba lumakoomo i Yudasi tepohaweako ira petewawado sando mpesomba ka luwuno petewawado anu mpodagai Raha-Do Ue Ala ka domenteriso, bakana'umpe ka ipokompeweengako Ira i Yesu ndi ondae. 5Tedoa ira mpo'unde ka ntepo'asa ira mpoweeakono doi. 6I'induo, ka mompu'u inso a tempo atuu mo'ungkeomo tempo anu moiko ka ipeweengako Ira i Yesu nahi domento'orio mia hadio.

Pepatinda pongkaanga Pasa

22:7-13

(Mat. 26:17-19; Mrk. 14:12-16)

7Ka haweakoomo oleo langkai Roti Nahi Peragi, onaemo oleo mia asalakono mposumbele bimba Pasa. 8Ka Do'amba i Yesu tumenao i Peturu ka i Yohane, Dopotae, ”Ilakomo, ipatindaa kitamo pelimbua Pasa ka tompongkaa.” 9Mesikeno ira ndi Ondae, ”Isua po'ehe-Miu kipompatinda?” 10Dosangki ira, ”Tewala mewinso komiu a laro ngkota, komiu tepotowoakono asa mia anu mowawa kusi me'ihi uwoi. Itondaomo lumako a raha pinewinsokino, 11ka ipauako ira umbu raha atuu: Mesikeno Ira Guru ndi omiu: isuake po'iagano bolongko Aku merongaako ira ana guru-Ku mongkaa Pasa? 12Ka i'amba mia atuu ta tumisoakomiu aasa bolongko langkai i wawono anu sompoomo luwu, asalakono i tu'aimo ipatindao.” 13Ka melungka iramo ka luwuno dohaweo kana anu Dopauako ira i Yesu. Ka do'amba patindao Pasa.

Pompakosia pelimbua wongi

22:14-23

(Mat. 26:20-29; Mrk. 14:17-25; Yoh. 13:21-30; 1Kor. 11:23-25)

14Mansano haweako tempono, mentoro Iramo i Yesu mongkaa meronga saru luwuno tinena-Do. 15Dopotaeako ira, ”Tekewoi Aku ntu'u mongkaa kanga Pasa andio meronga saru omiu, se'eluno napi Kutebobarasai. 16Hangano Kupauakomiu: Nami Aku kumaano mbo'u ranta ka ihaweo te'ihiino a Poparentaa-Do Ue Ala.” 17Ka Do'amba umalao aasa tonde, montarima kasi, ka Do'amba motae, ”Alaomo andio ka impetiao i olomiu. 18Hangano Kupauakomiu: mompu'u kanandio-andio nami Aku mo'inu mbo'u hasilino keu anggoro ranta ka ihawe Poparentaa-Do Ue Ala.” 19Ka Do'amba umalao roti, montarima kasi, sumiba-sibao ka Doweeako ira, Dopotae, ”Ndiomo koroi-Ku anu imewineeako; imeweweuomo andio gagi rorambe-Ku.” 20#Yer. 31:31-34 Kanandio koa mbo'u Doweweuo umarido mpongkaa, Do'alao tonde ka Dopotae, ”Tonde andio pedandia wo'ohu hangano rea-Ku, anu ime'inuwuako.

21 # Pud. 41:10 Sine, kitao, kaeno mia anu meweenga-Kune, ndio meronga saru Ongkue a meda andio. 22Hangano i Ana Manusia lano Ira lumako kana anu pinakosiomo, sine, masolaomo mia anu meweengako Ira!” 23Ka i'amba mpompu'u iramo mpesisikeno, isema i olodo anu moweweu kanandio.

Pepau-paua tempono pelimbua wongi

22:24-38

(Mat. 26:31-35; Mrk. 14:27-31; Yoh. 13:36-38)

24 # Mat. 18:1; Mrk. 9:34; Luk. 9:46 Gagiomo mbo'u pegagaa i olodo ana guru-Do i Yesu, ba isema anu ta tinudu lalu langkai i olodo. 25#Mat. 20:25-27; Mrk. 10:42-44 Motae Ira i Yesu ndi ondae, ”Mokoledo luwuno tongku parenta ira palilido ka mia anu mpompolempa pabawa ndi ondae menineeako pepekaduduia. 26#Mat. 23:11; Mrk. 9:35 Sine omiu komba kanatuu, tendeano anu lalu langkai i olomiu ka igagimo anu lalu mongura ka petewawa gagi puu pompekakaako. 27#Yoh. 13:12-15 Hangano isemake anu lalu langkai: anu mentoro mongkaa, ke anu mompekakaako? Kombake onae anu mentoro mongkaa? Sine kongko Aku i tonga-tongamiu gagi puu pompekakaako. 28Omiumo anu mpo'ia mpiha meronga saru Ongkue a laro luwuno po'ara-arahakoa anu pinembasai-Ku. 29Ka Ongkue tumantuiakomiu luwuno tiano Poparentaa, mengkena kana Ongkue Dotantuia-Kune Ama-Ku, 30#Mat. 19:28 nine komiu mpongkaa ka mpo'inu mpe'asa meda saru Ongkue a laro Poparentaa-Ku ka komiu mpentoro a wawo ngkadera poparentaa bitara ira hopulu ka orua suku Isaraeli.

31Simo, Simo, kitao, i Mosa'o mo'emaomo ta dumuku komiu kana gandu, 32sine Kupekakaiakomumo, ka si bali pompe'ala-alamu. Ka omue, tewala upokonto'oriomo, pokoroso iramo pepaekompomu.” 33Sumangki i Peturu, ”Ue, mepatinda aku mewinso a ntorungku ka mate meronga saru Omiu!” 34Sine Dopotae i Yesu, ”Kupauakomu, Peturu, oleo andio nahi ta kumokoroido manu, ba napi pentolu upehapu, nine uto'ori Aku.”

35 # Mat. 10:9-10; Mrk. 6:8-9; Luk. 9:3; 10:4 Ka Do'amba motaeako ira, ”Tempono Kutena komiu nahi mpowawa kadu-kadu, pebaku ka sapatu, hinaoke makuramiu hapa-hapa?” 36Mesangki ira, ”Maupo te'asa naahi.” Dopotaeako ira, ”Sine kanandio-andio, isema hinao kadu-kaduno, ka iwawao, kanandio koa mbo'u anu hinao pebakuno; ka isema anu nahina ka i'asao lemba meloeno ka ipo'oli ponai. 37#Yes. 53:12 Hangano Kupauakomiu, nine pau a Wunta Mempori andio asalakono inihii ndi Ongkue:

Ondae Ira tewinso i olodo anu me'ewa.

Hangano hapa anu teburi mongkona Ongkue kontongaano inihii.” 38Dompotae, ”Ue, ndio orua ponai.” Sumangki Ira, ”Sompoomo.”

I bonde Getisemani

22:39-46

(Mat. 26:36-46; Mrk. 14:32-42)

39Ka i'amba lumako Iramo i Yesu meluarako inso a ngkota ka kana wela lakoa-Do te'aro a Pongku Saitu. Ana guru-Do mbo'u mentonda Ira. 40Mansa-Do hawe a mpo'ianga atuu Dopotaeako ira, ”Impekakaimo ka si ntedonta a laro po'ara-arahakoa.” 41Ka Do'amba me'olaiako inso ndi ondae bara'ura asa mpewunoa watu olono, ka Do'amba menggolontu ka mekakai, Dopotae, 42”Oo Ama-Ku, tewala Ipemoikoo, I'alaomo tonde andio inso ndi Ongkue; sine komba po'ehe-Ku, tendeano po'ehe-Miumo anu gagi.” 43Ka aasa mala'eka inso i langi mepopokita ndi Ondae mokoroso Ira. 44Tedoa Ira doito ka komoro-morosono Dopekakai. Ko'iso-Do kana iti-itino rea anu nte'i'iti a wita. 45Ka Do'amba mentade inso a mpekakai-Do ka Dopekule a ana guru-Do, sine Dohawe ira kontongaado mpoturi hangano mpompemasusa. 46Dopotaeako ira, ”Tembio ka impoturi? Impewangumo ka impekakai, ka si ntedonta a laro po'ara-arahakoa.”

Ondae i Yesu rinako

22:47-53

(Mat. 26:47-56; Mrk. 14:43-50; Yoh. 18:1-11)

47Tempono da mepau Ira i Yesu mehawe iramo asa bawaa mia, ana guru-Do anu meneeako i Yudasi, asa mia inso a hopulu ka orua ana guru atuu, melempa i arodo. I Yudasi umpedaako Ira i Yesu ka iwoo-woo Ira. 48Motae Ira i Yesu ndi ondae, ”Hei Yudasi, upeweengako Ira i Ana Manusia molalo a mpewoo-woo?” 49Tempono ondae, anu mperonga saru Ondae i Yesu, mengkitao hapa anu ta gagi, mpotae iramo, ”Ue, asalakonoke kami mensapoiako ira ponai?” 50Ka asa mia inso ndi ondae sumapoio atano Sando Mpesomba Langkai ranta ka ite'opu biri ngkoanano. 51Sine Dopotae i Yesu, ”Ariakonomo atuu.” Ka Do'amba umanggao birino mia atuu ka mokotompao.

52Ka Dopotaeako ira i Yesu petewawado sando mpesomba ka petewawado anu mpodagai Raha-Do Ue Ala saru mia memota'u anu me'aiwa rumako Ira, Dopotae, ”Potaemiu Ongkue andio puu mporontu, ka ime'aiwa tangki ponai ka pontunduhi? 53#Luk. 19:47; 21:37 Kahinaano sompo-sompo oleo Kukongko i tonga-tongamiu a laro Raha-Do Ue Ala, ka nahi merako Aku. Sine onaemo andio tempomiu, ka onaemo andio pabawano wongi-wongia atuu.”

I Peturu humapu Ira i Yesu

22:54-62

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Ka Do'amba i Yesu rinako ka winawa inso i tu'ai. Winawa Ira a rahano Sando Mpesomba Langkai. Ka i Peturu metonda ntoe. 55I tonga-tongano kintala atuu mia mpopotuwu api ka dompentoro melimbuo. I Peturu mbo'u mentoro i tonga-tongado. 56Aasa ata beine kumitao mentoro umpeda a api; ipoposooo, ka i'amba motae, ”Mia mbo'u andio meronga saru Ondae.” 57Sine i Peturu mehapu, ipotae, ”Naahi, komba kuto'ori Ira!” 58Nahi tehine umarino atuu asa mia susua kumitao ka ipotae, ”Omue mbo'u asa mia inso ndi ondae!” Sine motae i Peturu, ”Naahi, ongkue naahi!” 59Ka bara'ura asa langku umarino atuu asa mia susua manasa ipotae, ”Mentee ntu'u, mia mbo'u andio meronga saru Ondae, hangano onae mbo'u to Galilea.” 60Sine motae i Peturu, ”Naahi, nahi kuto'orio hapa pinaumu.” I tempo koa mbo'u atuu, kontongaano mepau, kumokoroidoomo manu. 61Ka i'amba mewolili Iramo i Yesu kumitao i Peturu. Ka ipewowoloomo i Peturu nine mepau Iramo i Ue ndi onae, ”Napi kumokoroido manu oleo andio, pentolumo uhapu Aku.” 62Ka i'amba lumako meluarako ka ipengese mompemasusa.

Ondae i Yesu i arono Puu mpobitara Agama

22:63-71

(Mat. 26:63-68; Mrk. 14:60-65; Yoh. 18:19-24)

63Ka mia anu merako Ira i Yesu, mopodeu-deu Ira ka tumunduhi Ira. 64Domentutuwio rupa-Do ka dompesikeno, ”Kuri'a Ipauo isema tumunduhi Komiu?” 65Ka hadio mbo'u pompepaukiako anu pinaudo ndi Ondae. 66Ka mansano meene mpepumpu iramo nteriso luwuno mia memota'udo tongku Yahudi ka petewawado sando mpesomba ka guru agama, ka do'amba mewawa Ira i arono Puu mpobitara Agamado, 67dompotae, ”Tewala Omiumo i Mesia, pauakamimo.” Sumangki Ira i Yesu, ”Maupo Kupauakomiu, sine nahi komiu mpe'ala-alao; 68ka maupo hinao Aku mesikenoakono ndi omiu, nahi komiu mesangki. 69Mompu'u kanandio-andio i Ana Manusia mentoroomo i koana-Do Ue Ala Anu Tedoa Pabawa.” 70Mpotae iramo luwu, ”Tewala kanatuu, Omiu andio Ana-Do Ue Ala?” Sumangki Ira i Yesu, ”Omiu isa'a mempauo, nine Ongkuemo Ana-Do Ue Ala.” 71Ka do'amba mpotae, ”Pombio mbo'u kita mpokere ponsakosii? Tomerongeomo andio inso a wiwi-Do Ondae-Do.”

Currently Selected:

I LUKASI 22: XMZ

Highlight

Copy