I LUKASI 23
23
Ondae i Yesu i arono i Pilatu
23:1-7
(Mat. 27:1-2, 11-14; Mrk. 15:1-5; Yoh. 18:28-38)
1Ka i'amba mpentade iramo luwu anu menteriso atuu ka domewawa Ira i Yesu i arono i Pilatu. 2I tu'ai mpompu'u iramo tumuluri Ira, dompotae, ”Kimehaweomo, nine mia andio mokontesaa ira tongkumami, ka umonto ira mpo'owahi sima'ulu a Datu, ka mongkona koroi-Do Dopotae, nine Ondaemo i Kerisituu, anu Mokole.” 3Mesikeno i Pilatu ndi Ondae, ”Omiuke mokoledo to Yahudi?” Sumangki Ira i Yesu, ”Omiu koa pauo.” 4Motae i Pilatu a mpetewawado sando mpesomba ka luwuno mia hadio atuu, ”Nahi kupohawe maupo sala hapa a mia andio.” 5Sine komoro-morosono dompedada, dompotae, ”Palili doposingkiako ira pompaguru-Do i asa wawo wita Yudea, Dopompu'u inso i Galilea ka haweomo i ndi'ai.” 6Mansano rumongeo i Pilatu pinau atuu mesikenoomo, nde to Galileake mia atuu. 7Ka mansano tumo'orio, nine Ondae i Yesu inso a poparentaano i Herode, metenaomo ka Dowinawa me'aro ndi Herode, anu i tempo atuu kongko mbo'u i Yerusale.
Ondae i Yesu i arono i Herode
23:8-12
8Tempono i Herode kumita Ira i Yesu, onae tedoa mo'unde. Hangano tehineomo ta mingki kumita Ira, hangano mararu irongeo mongkona Ondae, metiangi mbo'u pomperorohino ta kumitao kana'umpe Dopoweweu i Yesu aasa petondoni. 9Onae hadio pesikenono ndi Ondae i Yesu, sine nahina sinangki-Do i Yesu maupo hapa. 10Kontongaano atuu melako iramo petewawado sando mpesomba ka anu mponto'ori Taura i arono ka dompompau hadio pontuluri anu mobea mongkona Ondae. 11Ka mompu'uomo i Herode ka sorodaduno tumata Ira ka mopodeu-deu Ira, ipokonaako Ira lemba meloe pompelangkai ka i'amba metena mokule Ira ndi Pilatu. 12Ka a oleo koa mbo'u atuu mesambe'e iramo i Herode ka i Pilatu; se'eluno me'iwali ira.
Ondae i Yesu mekule i arono i Pilatu
23:13-25
(Mat. 27:15-26; Mrk. 15:6-15; Yoh. 18:38–19:16)
13Ka i'amba i Pilatu pumpu ira petewawado sando mpesomba ka luwuno petewawa saru palili, 14ka ipotaeako ira, ”Imewawaomo mia andio ndi ongkue gagi aasa mia anu mompopo'oo palili. Imengkitaomo liomiu nine kuparesa Iramo, ka inso a luwuno sala anu imentuluriako Ira nahina kupohawe ndi Ondae. 15Ka i Herode mbo'u naahi, hangano onae metena mokule Ira ndi omami. Menteeano nahina maupo hapa te'asa anu wineweu-Do anu tekona saru pohuku mate. 16Gagi aku sumepi Ira, ka ku'amba motola Ira.” [17Hangano onae asalakono mompotolaako ira asa mia a oleo langkai atuu.] 18Sine mpebooli ira mperonga-ronga, ”Pepate Iramo, potolaakami i Baraba!” 19I Baraba andio wininso a laro torungku hangano aasa pe'ewa a laro ngkota ka hangano pompepatea. 20Pohona mbo'u i Pilatu mepau meroku ndi ondae, hangano ta mingki motola Ira i Yesu. 21Sine mpebooli ira mesangkio, dompotae, ”Paso Iramo a ngkeu pinotamba!” 22Mepau i Pilatu anu kopentoluno ndi ondae, ”Mosa'oa hapa anu menteeano iweweuomo mia andio? Nahina maupo te'asa sala-Do anu hinaweku ndi Ondae, anu tekona saru pohuku mate. Gagi aku sumepi ira, ka ku'amba motola Ira.” 23Sine saru mpebooli mpedada ira ka me'emao, ka Dopinaso a ngkeu pinotamba, ka poko'ariano mponangiako ira peboolido. 24Ka i'amba i Pilatu pakosio, ka dome'ininduako po'emado. 25Ka ipotolao mia anu tinorungku hangano pe'ewano ka pompepatea atuu menunu saru po'emado, sine Ondae i Yesu ipeweengako Ira ndi ondae ka domeweweu Ira po'e-po'ehedo.
Ondae i Yesu winawa ka Dopinaso a ngkeu pinotamba
23:26-32
26Tempono Domewawa Ira i Yesu, domerakoo asa mia anu meneeako i Simo inso i Kirene, anu da iaopo ihawe inso a inia susua, ka i'amba ninaa keu pinotamba atuu a wawo oweano, ka ipo'ahao tumonda Ira i Yesu. 27Hadio ntu'u mia tumonda Ira; i olodo hadio beine anu mpengese ka sumabangi Ira. 28Mewolili Ira i Yesu ndi ondae ka Dopotae, ”Hei ana beine to Yerusale, si mpengesei Aku, tendeano impengeseiomo koroimiu ka luwuno anamiu! 29Hangano kitao, ta hawe tempono mia mpotae, Me'uraomo beine anu bita ka anu pe'anakaano nahi hori me'ana, ka anu uono nahi hori mompo'uo. 30#Hos. 10:8; Meng. 6:16 Ka mia mpompu'u iramo mpepauako ira torukuno: Tehoamo dunsi kami! Ka a luwuno pongku: Howui kamimo! 31Hangano tewala mia moweweu kanandio a ngkeu tuwu, hapake anu ta gagi a ngkeu mokari?”
32Ka hinao koa mbo'u winawa orua mia mosa'o gaudo ira hinuku mate saru Ondae.
Ondae i Yesu pinaso a ngkeu pinotamba
23:33-43
(Mat. 27:33-44; Mrk. 15:22-32; Yoh. 19:17-24)
33Mansado mehawe a mpo'ianga anu meneeako Taku ulu, i tu'ai domempaso Ira i Yesu a ngkeu pinotamba ka orua mia mbo'u mosa'o gaudo atuu, anu asa mia i koana-Do ka anu asa mbo'u i manggali-Do. 34#Pud. 22:19 Dopotae i Yesu, ”Oo Ama, I'ampuni iramo, hangano nahi domento'orio hapa anu wineweudo.” Ka mpotende ira undi ka dompetiao sangka-Do. 35Mia hadio mpentade i tu'ai ka luwuno domengkitao. Luwuno petewawa mopodeu-deu Ira, dompotae, ”Mia susua Dokadudui ira, po'ineeomo kanandio-andio ka Dokaduduio koroi-Do Ondae-Do, tewala Ondaemo i Mesia, mia bininiki-Do Ue Ala.” 36Luwuno sorodadu mbo'u mpopodeu-deu Ira; dompotasiako Ira anggoro mo'olo 37ka dompotae, ”Tewala Omiumo mokoledo to Yahudi, kaduduiomo koroi-Miu!” 38Hinao koa mbo'u binuri a wawo ulu-Do, ”Ndiomo mokoledo to Yahudi.”
39Asa mia inso a mia mosa'o gauno anu ndinoe atuu mepaukiako Ira, ipotae, ”Kombake Omiumo i Kerisituu? Kaduduiomo koroi-Miu ka omami!” 40Sine anu asa mia kumuahakono, ipotae, ”Nahi udoitoako Irake Ue Ala, sekono omue montarima pohuku anu mengkena? 41Ontae lano tekona tohinuku, hangano montarima kita sulono anu menunu saru wineweuto, sine mia andio nahina te'asa wineweu-Do anu sala.” 42Ka i'amba motae, ”Yesu, Ipewowolo aku koa, tewala hawe Komiu gagi Mokole.” 43Motae Ira i Yesu ndi onae, ”Kupauakomu, menteeano oleo koa mbo'u andio omue kohawe meronga saru Ongkue i Paradesi.”
Mate-Do i Yesu
23:44-49
(Mat. 27:45-46; Mrk. 15:33-41; Yoh. 19:28-30)
44Tempo atuu bara'ura langku hopulu ka oruamo, ka i'amba wongi-wongi tumutuwio asa wawo wita atuu hawe langku otolu, 45#Pel. 26:31-33 hangano mata'oleo nahi mewanta. Ka pelingo a Raha Mempori tesempa tepe'orua. 46#Pud. 31:6 Ka Do'amba i Yesu mebooli meroku, ”Oo Ama, A ngkae-Miu Kupeweengakono penaa-Ku.” Ka umari-Do mepau kanandio Dopeweengakono penaa-Do. 47Mansano kumitao petewawado sorodadu hapa anu gagi, i'unde-unde Ira Ue Ala, ipotae, ”Mentee ntu'u, mia andio mia mentee!” 48Ka umarino luwuno mia hadio, anu mehawe mpehowu i tu'ai mpengkita, mengkitao hapa anu gagi atuu, mpekule iramo saru mentotopao koroido. 49#Luk. 8:2-3 Luwuno mia tepoto'ori-Do i Yesu tewinso saru beine anu mentonda Ira inso i Galilea, mpentade ola-olai ka mengkitao luwuno atuu.
Ondae i Yesu kinaburu
23:50-56a
(Mat. 27:57-61; Mrk. 15:42-47; Yoh. 19:38-42)
50Hinao asa mia anu meneeako i Yusupu. Onae asa mia anu mentoro a Majelisi Langkai, ka asa mia anu me'aroa ka moleo. 51Onae nahi pemoikoo pompakosi ka wineweudo Majelisi atuu. Onae inso i Arimatea, aasa kotado to Yahudi ka onae monsisikori Poparentaa-Do Ue Ala. 52Onae lumako me'aro ndi Pilatu ka i'emao wata ngkoroi-Do i Yesu. 53Ka umarino ipotiio wata ngkoroi atuu, itongoakono sawu lena, ka i'amba momboleo a laro ngkaburu anu kineke a pongku watu, anu napi hori hina wata ngkoroi pinombole. 54Oleo atuu onaemo oleo pepatindaa ka oleo Saba tamo ronga pinu'u.
55Ka beine anu me'aiwa mperongaako Ira i Yesu inso i Gelilea, mpetonda ira ka domengkitao kaburu atuu ka ba kana'umpe ipinombole wata ngkoroi-Do. 56aKa mansado mpekule, domempatindao rampa-rampa ka lana mire.
Pewangu-Do i Yesu
23:56b–24:12
(Mat. 28:1-10; Mrk. 16:1-8; Yoh. 20:1-10)
56b #
Pel. 20:10; Win. 5:14 Ka a oleo Saba mpenaa-naa ira montonda Songka,
Currently Selected:
I LUKASI 23: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
