Matius 16
16
Ap Farisi aʼge en e, “Nis en pobi hobuogoluk elalin aʼge mesik tin da,” oluk Yesus moʼgulegisa wene
(Markus 8:11-13; Lukas 12:54-56)
1Liplau wagarik oruakma, is ap Farisi aʼge emin, is ap Saduki aʼge emin, Yesus ebabut ʼbaluogoluk eʼbek wegesarik e, disogo moʼgulegisa,
“Hat hebe haik Allah ʼbogorl pam aʼge en ʼbelakhobou wagama wegen holuk e, nis en pobi hobuogoluk nenilem elalin aʼge mesik tin da,” oluk moʼgulegisa. 2Asogo moʼgulegisema at Yesus en e,
[“O mo obuk osokhwe, ʼbogorl pam o lim pasu holuk, his en e,
O hebi ema, opogu legep ani o. 3Ye, hubet dakhasogo o homuk hasulat hikhasu holuk henil yetholuk e,
Moru lok aʼge nouwa, oluk ogu legep ani o. ʼBogorl orogole pobirak poluk,
Asogo tua, oluk henede weʼgerlak welat, ebabut enagat ʼbalogwi henaluk aʼgeat de, di aʼge yu aʼge o yogodak tago aʼge ai, his henaluk emagoluk tagokhwe hogu legep aʼgeat de, pobirak erlak welegep yema re!] 4His aphwami yogodak ya welegep aʼge yema re, henebabut modok wiak til noʼgulat, Allah emin loʼboksogo wolom puk yema re! Asogo welat, his en e,
Nis en pobi hobuogoluk e, hat en elalin aʼge mesik tin da, oluk moʼgulnogu legep aʼgeat de, an nebe pobi nobuagoluk an en elalin mu aʼge mesik tik erlak o. We, at Yunus en aphwami pema pobi tuagoluk elalinat tegei ai ʼgelaʼge nak e, an en pobuk mesik tisokhwe henil niagup ani o,” oluk asogo moʼgulentesirik, is ap ebano eba ugonoboluk e, o momu laga.
“Aphwami Farisi aʼge Saduki aʼge enemin onowene re, soʼboru roti poruagoluk eʼgen ano ogola ʼgwelabogwi ai ʼgelaʼge o,” oluk moʼgulentesi wene
(Markus 8:14-21)
5At Yesus osi iak wogu legesa aʼge ebano en emin ik yeʼgelak ano ik etle akhit oʼgwe lebegesarik, osi enil yethegesa ʼgal e, soʼboru roti aʼge memerak poluk legesema re, 6at Yesus en e, disogo moʼgulentesi,
“Is ap Farisi aʼge emin, ap Saduki aʼge emin, eʼgen soʼboru roti poruagoluk ogola ʼgwelabogwi ai ʼgelaʼge tenakho oruak aʼge ano pam wiagaphonobuano oluk, henebabut heberlogo welemis o,” oluk moʼgulentesi. 7Asogo moʼgulentesimu, is-is nak ogulat e, disogo egesa,
“Soʼboru roti aʼge mesik woluk wom erlak ai en egei hegi,” oluk ogwiam 8at Yesus en enagat pobirak enebesirik e, disogo moʼgulentesi,
“Henede nebam heʼberik po puk aʼge yema re! His-his nak ogulat,
Soʼboru roti aʼge erlak, oluk ogu legep ai nopaget. 9Henede dokhumsogo pobi togu legep erlak yema re! Soʼboru roti aʼge ebe huaben aʼgeat de, ap enebe 5.000 neʼgesa aʼge ano memerak pegep? Asogo neʼgesarik dedilogo pegesema, mul sum egeik aʼge meren ʼgelaʼge ogola yagasogo pegep no. 10Ye, agaikhe soʼboru roti aʼge ebe sabiren aʼgeat de, ap enebe 4.000 aʼge neʼgesarik dedilogo pegesa aʼge, mul sum egeik aʼge meren ʼgelaʼge ogola yagasogo pegep no. Henede eberak erlak welegep yema re! 11An en soʼboru roti aʼge paget moʼgulhentegis erlak aʼgeat de, nopaget pobi tu erlak welegep. Eʼgen soʼboru roti aʼge poruagoluk ogola ʼgwelabogwi aʼge ai ʼgelaʼge, is ap Farisi aʼge emin, Saduki aʼge emin, pekharok oruak ai en henebabut heberlogo welemagoluk moʼgulhentegis o,” oluk moʼgulentesi. 12Asogo moʼgulentesimu, is ebano pobi tigisarik e, disogo egesa,
“I. Wene egei ai re, we, eʼgen soʼboru roti aʼge poruagoluk ogola ʼgwelabogwi aʼge ai paget moʼgulnentesi erlak o. At e, is ap Farisi aʼge emin, Saduki aʼge emin, onowene moʼgulontogwi aʼge ebano pam wiagapnonobuano oluk, nenebabut heberlogo welemagoluk moʼgulnentesi ani o,” oluk pobi tigisa.
At Petrus en, “Hat hebe Kristus at o,” oluk ʼbaksogo Yesus moʼgulesi wene
(Markus 8:27-30; Lukas 9:18-21)
13O eba en, at Yesus o kota Kaisarea ap ʼgain Filipi en logap tegeimu eba orlu agarik e, at osi iak wogu legesa aʼge ebano hin wogentasulat e, disogo moʼgulentesi,
“Is aphwami en, an abat daklau wegi aʼge ano an nebaget ogulat e, sa oluk ogwi no,” oluk moʼgulentesimu, 14is en e, disogo egesa,
“Is aphwami nin pema en e,
At ebe re, Yohanes ik olomu ʼbelabenebise laga aʼge ano de o, ogulat, is nin pema en e,
At ebe re, Elia de o, ogulat, is nin pema en e,
At ebe re, Yeremia de, hwi a, ap Allah iak moʼgulontogu legesa aʼge ebano mesik hwi a? ogulat, ogwi o,” oluk moʼgulegisa. 15Asogo moʼgulegisema, at Yesus en e,
“Is en asogo ogwi aʼgeat de, his en nak e, an nebaget e, sa opogu legep no,” oluk moʼgulentesimu, 16at Simon Petrus ano en e,
“Hat hebe re, Kristus Allah elaluk modok welago aʼge omlogo, nis delnonobuagoluk at en perakpou weigoluk obok moʼgulnentesi aʼge anoat o,” oluk moʼgulesi. 17Asogo moʼgulesimu, at Yesus en e,
“Simon Yona omlogo not o. Aphwami en moʼgulhegisema egen erlak o. We, an naik ʼbogorl pam aʼge en moʼgulhesimu egen ani o. Holuk e, hogola hagai hasu lemen o. 18Ye, mesik emin moʼgulheik. Hat honuk helep u ʼgelaʼge, Petrus o. Ye, helep ia yu pam heʼbisogo re, an nosi odoksogo onoboluk o ʼgelaʼge wusogo enebaik holuk e, at opma ogodima eiye aʼge ano en ningsogo tenentarok welema erlak o. 19At Allah en eragam enebasuam ʼgogumu eba, ʼgoduk horogwi aʼge kunci hat wokheik o. Hat en, ʼgwiangma yema aʼge paget togup no yo o, oluk, wene ʼbalogun holuk e, ʼbogorl pam aʼge en ogo wene ʼbalegei ʼgelaʼgeat ua o. Ye, hat en ʼgwiangma yema tu op oluk ogun holuk e, ʼbogorl pam aʼge en ogo op egei ʼgelaʼgeat ua o,” oluk Petrus moʼgulesi. 20Asogo moʼgulesirik, osi ebano ʼberlegat disogo moʼgulentesi,
“His en e, an nebaget e,
At ai Kristus, Allah en delnonobuagoluk perakpou weik, oluk obok moʼgulnentesi aʼge anoat o, oluk aphwami ado pema modok moʼgulentagup o,” oluk enesaʼgo weregei.
At Yesus en e, “Di obotut yu obotut nebam poluk watnobua ani o,” oluk naduk moʼgulentesi wene
(Markus 8:31–9:1; Lukas 9:22-27)
21Hwerli ai hwerli en e, at Yesus en osi iak wogu legesa aʼge ebano at pobuk tua aʼge disogo oluk, ʼbaksogo moʼgulentesi,
“An o Yerusalem eba lo nedetak welegi o. Laikmu re, is ap enarlue aʼge ebano emin, Allah eiye aʼge onuelak ʼgaindek emin, Allah iak pelal wogo eiye aʼge emin, enemin en, di obotut yu obotut aʼbigat taknoboluk an nebe watnobua ani o. Watnobuema, nebe werak agauwa ʼbiren weleiktik e, agauwa henaganak aʼge en e, Allah en nelalugapnobua o,” oluk ʼbaksogo moʼgulentesi. 22Asogo moʼgulentesimu at Petrus en e, Yesus woluk ematekma lagarik disogo moʼgulesi,
“Hat wene egen ai asogo takhobouwano oluk, Allah en delhobuak o,” oluk esaʼgo weregei. 23Esaʼgo weregeimu, at Yesus epema hebeksogo Petrus ʼgwelakholuk disogo moʼgulesi,
“Hat Iblis hegi o. Allah ede epasu hegitsogo eberigen erlak, we aphwami en opogwi hegitsogo eberak poluk neʼgebela ʼbalise legen yu, nologotma yema enat ʼbok lak o,” oluk moʼgulesi. 24Asogo moʼgulesirik e, at osi iak wogu legesa aʼge ebano mesik disogo moʼgulentesi,
“At ap sa en an neʼberlik nese leigoluk holuk e, ebabut uʼgwarek paget ede ʼburl welat tiso aʼge ai,
Nebit, oluk ukpoluk, e pam edikpoluk warenebiso aʼge ai agan aʼgeat woluk neʼberlik nese leigoluk wemak o. 25Ye, ap sa uʼgwarek en,
An nebe nelaluk wolom nagai yo, oluk ebe erlele hwerlasu holuk e, waremarik e, nal ema o. Aʼge re, ap sa en ebe erlele hwerlasu erlak an nebaget warago holuk e, ebe erlele horlouwa o. 26Ap sa en di aʼge yu aʼge ʼgwiangma aʼge ʼberlegat eiye ema aʼgeat de, pobuk ebe nal emarik holuk e, at en e,
An mesik elit sabusogo pagathwerlegi, oluk u no? Modok erlak o. Ebe nal ema ai ebalema re, noʼgwe aʼge eʼbirek oʼgo dip tu no. Mia o. 27An abat daklau wegi ano re, pobuk naik erliktogwi modok welagai ai ʼgelaʼgeat takpoluk, is malaikat Allah ʼbogorl pam en yoʼgo ʼbelagonobou ago aʼge ebano nenemin womultik, ai erlige re, aphwami ʼberlegat enebabut loʼbok togwi aʼge hegitsogoat oʼgo wogentauma o. 28Ye, his edik welegep aʼge yema ado pema warom erlak welat, an abat daklau wegi ano ʼgain Nonuk Logo aʼge weleigoluk aphwami ʼberlegat neragam onobou agoam henil niagubat o, oluk demat moʼgulhentegis o,” oluk moʼgulentesi.
Currently Selected:
Matius 16: WUL
Highlight
Share
Copy
Want to have your highlights saved across all your devices? Sign up or sign in
