लूका 22
22
यीशुआ कु मारनै कि साजिश
(मत्ती 26:1–5; मरकुस 14:1,2; यूहन्ना 11:45–53)
1अखमिरी रोटिया का तिंहवार जिस्कु फसह भी कैहते हैं, नेहड़ै थिया। 2अर प्रधान याजक अर यहूदी शास्त्री मौक्के लाभ्या करे, कि यीशुआ कु किस तरीक्के थ मारया जावै, पर वो लोक्कैं थ डरते थिये।
विश्वासघात्ती यहूदा
(मत्ती 26:14–16; मरकुस 14:10,11)
3अर शैतान यहूदा इस्करियोतिया म बड़ी गया, जो बारां प्रेरीतैं माहला एक थिया। 4अर वो प्रधान याजकैं अर बड़े अधिकारीयैं धौरै गया, अर उनथै बातचित करी, कि यीशुआ कु किस तरीक्के थ उनकै हात्थैं म पकड़ुआवै। 5इस बात्ता थ वो खुश होए, अर उसकु पैसे दैणैं का वादा करया। 6अर इस बात्ता थ वो मान्नी गया, अर यीशुआ कु धौक्के थ पकड़ुआणैं का मौक्का देखणैं लाग्गी गया, जिद कोइ भीड़-भाड़ ना होवै।
फसह किया रोटिया कि त्यारी
(मत्ती 26:17–25; मरकुस 14:12–21; यूहन्ना 13:21–30)
7फेरी बिना खमीरा किया रोटिया का वो दिन आया, जिसमै फसह के तिंहवारा के #22:7 मेमना यानी भेड्डा का बच्चा।मेमने कि बली करनी होत्ती थी। 8अर यीशुऐं पतरस अर यहून्ना कु याह कही घलाया कि, “जाइकना म्हारे खाणैं वास्तै फसह किया रोटिया कि त्यारी करैं।”
9उनूर उसथै बुझ्झया, “हम कड़ै त्यारी कराँ?”
10यीशुऐं उनथै कैहया, “देक्खो, शहरा म जात्तै ही, थमकु पाणिया का घड़ा चाओड़ा एक बन्दा मिलग। जिस घरा म भी वो जावै थम भी उसकै गैल्लै उसी घरा म चले जाइय्यो। 11अर उस घरा के मालका थ कहीयो, ‘गुरूएं चिकु कही घलाया है कि, वो मैहमान्नै कि जाघ्घा कड़ै है, जड़ै हूँ मेरे चेल्लैं सात्थी फसह कि रोट्टी खावैं?’ 12वो थमकु एक छता पर सजा-सजाया बड़ा कमरा दिखाई दैग, ओठ्ठी त्यारी करीयो।”
13उनूर जाइकना इदा ही देख्या जिदा कैहया गया थिया, अर फसह किया रोटिया त्यार करी।
प्रभु भोज
(मत्ती 26:26–30; मरकुस 14:22–26; 1 कुरिन्थियों 11:23–25)
14फेरी वो वक्त आई गया, जिद यीशु प्रेरीतैं सात्थी रोट्टी खाणैं बैस्या। 15अर यीशुऐं उनथै कैहया, “मेरी घणी इच्छा थी कि दु:ख चाणैं थ पैहलै, या फसह कि रोट्टी थारै सात्थी खावैं। 16क्योंकि हूँ थमकु कैहता हैं, जिदा ताइं परमेश्वरा के राज्जा म फसह किया रोटिया का मतलब पूरा होई ना जावै, उस वक्ता ताइं हूँ याह रोट्टी दुबारै कोइन खावैं।”
17फेरी यीशुऐं प्याल्ला लेइकना शुकर करया, अर कैहया, “इस्कु लेइकना आपसरीया म बांट्टी लवो। 18क्योंकि हूँ थमकु कैहता हैं, कि इबकै थ जिदा ताइं परमेश्वरा का राज ना आवै, हूँ अंघूरैं का रस कोइन पिवैं।”
19फेरी यीशुऐं रोट्टी ली अर शुकर करीकना तोड़ी, अर याह कहिकना उनकु दिन्ही, “याह मेरा शरीर है, जो थारै वास्तै दिया जात्ता है। मेरीया यादगारीया म इदा ही करया करो।” 20रोटिया के बाद्दाम, यीशुऐं याह कहिकना प्याल्ला भी दिया, “याह प्याल्ला मेरे उस खुन्ना के जरीये थ नवाँ करार है, जो खून थारै वास्तै बहाया जात्ता है।
21“पर देक्खो, मिस्कु पकड़ुआणैं आळे का हाथ भी इस खाणे म शामिल है। 22क्योंकि इन्सान्ना का बेट्टा तो इदा ही मरगड़ा, जिदाकि परमेश्वरैं उसकै वास्तै ठाणोंड़ा है, पर हाय उसकै उप्पर जिस्के जरीये थ वो पकड़ुआया जाग।”
23फेरी वो आपसरीया म ही बूझणैं लाग्गी गये, “म्हारै माहला कौण है, जो याह काम करग?”
बड़ा कौण समझ्या जाग?
24 #
मत्ती 18:1; मर 9:34; लूका 9:46 अर उनके बिच्चा म या भी बहस होई, “म्हारै माहला बड़ा कौण है?” 25यीशुऐं उनथै कैहया, “दुस्सरीयैं जातियैं के राजे उनकै उप्पर हुकम चलावते हैं, अर जो उनकै उप्पर हक राखते हैं, वो मदद करनै आळे कुहावते हैं। 26#मत्ती 23:11; मर 9:35#मत्ती 20:25–27; मर 10:42–44पर थम इदा ना बणियों। पर थारै माहला जो बड़ा है, वो तो ल्होड़े ज़ू बणैं, अर जो मुखिया है वो सेवका ज़ू बणैं। 27#यूह 13:12–15क्योंकि बड़ा कौण है, वो जो रोट्टी खाणैं बैठ्ठा है, या फेरी वो जो सेवा करता है? क्या वो ही कोइना जो रोट्टी खाणैं बैठ्ठा है? पर हूँ थारे बिच्चा म सेवका ज़ू हैं।
28“पर थम वो हो, जो मेरे इम्तहान्नै म हमेशा मेरै सात्थी रहे। 29अर हूँ थमकु एक राज्य देया करता हैं, जिदा मेरे बाप्पैं मिस्कु दिया। 30#मत्ती 19:28ताकी थम मेरे राज्जा म मेरीया मेज्जा पर खाओ-पियो, अर राज-गदियैं पर बैस्सीकना इस्राएला कियैं बारैंह एल्ली का इन्साफ करो।
पतरसा के मुकरनै के बारे बताणां
(मत्ती 26:31–35; मरकुस 14:27–31; यूहन्ना 13:36–38)
31“शमौन, हे शमौन, शैतान्नै थमकु मांग्गी लिया है, ताकी थमकु गेहुँआ ज़ू छांट्टै। 32पर मैं थारै वास्तै प्रार्थना करी है, कि थारा विश्वास भटकी ना जावैं। अर जिद तौं पुठ्ठा आवैं, तो तेरे विश्वस्सी भाइय्यैं कु मजबूत करीयैं।”
33पतरसैं यीशुआ थ कैहया, “हे प्रभु, हूँ तेरै सात्थी जेल्ला म जाणैं, अर मरनै ताइं भी त्यार हैं।”
34फेरी यीशुऐं कैहया, “पतरस हूँ चिकु कैहता हैं, कि आज मुर्गे के बाँग दैणैं थ पैहलै ही तौं तीन बारी मुकरी जाँग, कि तौं मिस्कु नाही जाणैं।”
बटुआ अर झोळी
35 #
मत्ती 10:9,10; मर 6:8,9; लूका 9:3; 10:4 अर यीशुऐं उनथै कैहया, “जिद मैं थमकु बटुआ, अर झोळी, अर जुतियैं बिना घलाया थिया, तो क्या थमकु किसी बात्ता कि कमी होई?”
उनूर कैहया, “किसी चिज्जा कि कमी कोइन होई।”
36यीशुऐं उनथै कैहया, “इबकै जिस्कै धौरै बटुआ है वो उसकु लेई लवैं, अर इदा ही आपकी झोळी भी लेई लवैं, अर जिस्कै धौरै तलवार ना होवै वो आपके कापड़े बेच्चीकना एक तलवार लेई लवैं। 37क्योंकि हूँ थमकु कैहता हैं, कि पवित्र शास्त्रा का याह पाठ मेरै पर जरूर पूरा होग, ‘वो एक गुनेहगार गिणया गया,’ हाँ, या बात जो मेरे बारे म जो लिखोड़ी है, पूरी होणैं जाया करती है।”
38उनूर उसथै कैहया, “हे प्रभु देख, एठ्ठै दौ तलवाराँ हैं।”
या सुणी यीशुऐं उनथै कैहया, “हुआ घणियाँ हैं।”
जैतुन्ना के पहाड़ा पर यीशुआ कि प्रार्थना
(मत्ती 26:36–46; मरकुस 14:32–42)
39पिछैं यीशु बाहर निकळिकना जैतुन्ना के पहाड़ा उप्पर चल्या गया, जड़ै वो हमेशा जात्ता थिया, अर चेल्ले भी उसके गैल्लै होई लिये। 40उस जाघ्घा पर पोंहोंची यीशुऐं उनथै कैहया, “प्रार्थना करो कि थम इम्तहान्ना म ना पड़ो।”
41अर यीशु उनथै एक भाठ्ठा राळणैं किया दूरीया ताइं चल्या गया, अर गोड्डे टेक्कीकना प्रार्थना करनै लाग्गी गया कि, 42“हे बाप, अगर तौं चाँहवैं तो इस प्याल्ले कु मेरै परला चाई ले। तोभी मेरी नाही पर तेरी ही मरज़ी पूरी होवै।” 43फेरी उसकु स्वर्गा थ एक स्वर्गदूत दिस्या जिनु उसकु शक्ती दी थी। 44अर एक्की पास्सै यीशु घणा दु:खी होइकना पूरे मना थ प्रार्थना करया-करया, अर उसका पसीन्ना मान्नो कि खुन्ना कियैं बड़ियैं-बड़ियैं बुन्दैं ज़ू ज़मिन्ना पर पड़या करया।
45फेरी वो प्रार्थना थ उठ्या, अर आपके चेल्लैं कु धौरै जाई देख्या, जो उदास होइकना सोई गये थिये। 46अर यीशुऐं उनथै कैहया, “उठ्ठो, कि सोया करो? प्रार्थना करते रहो, ताकी थम इम्तहान्ना म ना पड़ो।”
यीशुआ कु पाक्कड़ना
(मत्ती 26:47–56; मरकुस 14:43–50; यूहन्ना 18:3–11)
47अर जिद यीशु ये बात्तां उनथै कैहया ही करया, तो देक्खो उनकै वळ एक भीड़ आई, अर यीशुआ के बारां चेल्लैं माहला एक जिस्का नाम यहूदा इस्करियोत्ती थिया उनकै आग्गै-आग्गै आया करया। अर वो यीशुआ का चुम्मा लैणै वास्तै उसकै धौरै आया। 48यीशुऐं उसथै कैहया, “हे यहूदा, क्या तौं चुम्मा लेइकना इन्सान्ना के बेट्टे कु धोक्का देई पकड़ुआणा चाहता हैं?”
49जो ओठ्ठै होणैं आळा थिया उसकु देक्खिकना उसके चेल्लैं उसथै कैहया, “हे प्रभु, क्या हम तलवार चलावाँ?” 50अर उनकै माहलैं एक्की महायाजका के दास्सा पर तलवार चलाइकना उसका सज्जा कान काट्टी दिया।
51पर यीशुऐं उनथै कैहया, “इब हुआ करो।” अर पिछैं यीशुऐं उसके कान्ना क हाथ लगाइकना उसकु सूल करी दिया।
52पिछैं यीशुऐं मुखिया याजकैं अर परमेश्वरा के भवना के अधिकारीयैं थ अर यहूदी अगुवैं थ, जो उसपर चढ़ाई करया करे, उनथै कैहया, “क्या थम मिस्कु डाक्कू समझीकना तलवाराँ अर डंडे लेइकना निकळे हो? 53#लूका 19:47; 21:37जिद हूँ परमेश्वरा के भवना म हर दिन थारै सात्थी थिया, तो थमु मेरै हाथ कोइन लगाया। पर इब या थारा वक्त है। अर अंधेरे किया शक्तिया के चालणैं का वक्त है।”
पतरसा का मुकरना
(मत्ती 26:57,58,69–75; मरकुस 14:53,54,66–72; यूहन्ना 18:12–18,25–27)
54पिछैं वो यीशुआ कु पाकड़ीकना महायाजका क घरै लेई गये। अर पतरस दूरा थ ही उसकै गैल्लै चाल्या करया। 55अर बेहेड़े म वो सारे आग जाळिकना बैस्सी गये, अर पतरस भी उनकै सात्थी बैस्सी गया। 56अर आग्गू के चारने म एक्की दासीयैं उसकु बैठ्ठोड़े कु देख्या, अर पिछैं गौर लगाई देक्खी कैहणैं लाग्गी गई, “या भी तो उसी सात्थी थिया।”
57पर पतरस मुकरी गया, अर कैहया, “हे औरत, हूँ उसकु नाही जाणैं।”
58थोड़ी देरा बाद किसी बन्दैं उसकु देक्खी, कैहया, “तौं भी तो उन्ही माहला एक हैं।”
पतरसैं कैहया, “भाई वो हूँ कोइन।”
59अर लगभग एक्की घड़िया क बाद्दाम किनी होरी भी तकड़ा थ कैहया, “बिलकुल या भी उसी सात्थी थिया। क्योंकि या भी गलील परदेस्सा का रैहैणैं आळा है।”
60पतरसैं कैहया, “हे भाई, मिस्कु कोइन पता तौं क्या कैहया करता हैं?” वो या कैहया ही करया कि जिधी मुर्गे बाँग देई दिन्ही। 61फेरी प्रभुएं पतरसा वळ घुम्मीकना देख्या, अर पतरसा कु प्रभुआ कि वो बात याद आई जो उनु कही थी, “कि आज मुर्गे के बाँग दैणैं थ पैहलै ही तौं तीन बारी मुकरी जाँग, कि तौं मिस्कु नाही जाणैं” 62अर पतरस बाहर निकळिकना घणा रौणैं लाग्गी गया।
यीशुआ का मज़ाक उड़ाणा
(मत्ती 26:67,68; मरकुस 14:65)
63जिनूर यीशुआ कु पाकड़ोड़ा थिया वो उसकु मार-मारीकना उसका मज़ाक उड़ाणैं लाग्गी गये। 64अर उसकियाँ आँख्खी मुँदीकना उसथै बूझणैं लाग्गी गये, “भविष्यवाणी करीकना बता चिकु किनु मारया?” 65अर उनूर होर भी घणियाँ बुराइय्या कियाँ बात्तां उसकै खिलाफ कहिय्याँ।
यीशु यहूदी अगुवैं क साम्है
(मत्ती 26:59–66; मरकुस 14:55–64; यूहन्ना 18:19–24)
66 जिद दिन चढ़या, तो लोक्कैं के यहूदी अगुवे अर प्रधान याजक अर यहूदी शास्त्री भेळे होये, अर यीशुआ कु आपकिया पिचात्ती म ल्याइकना बुझ्झया, 67“अगर तौं मसीह हैं, तो हमकु बताइद।”
यीशुऐं उनथै कैहया, “अगर हूँ थमकु कही भी दैं, तो थम विश्वास कोइन करो। 68अर अगर हूँ थारै थ बुझ्झैं तो जवाब कोइ देई सको। 69पर इबकै थ इन्सान्ना का बेट्टा महान परमेश्वरा क सज्जै हाथ बैठ्ठा रैहैग।”
70इस बात्ता पर सारैं उसकु कैहया, “तो फेरी क्या तौं परमेश्वरा का बेट्टा हैं?”
यीशुऐं उनथै कैहया, “थम आप ही कैहया करते हो कि हूँ हैं।”
71फेरी उनूर कैहया, “इब हमकु गवाहीया कि क्या जरुरत है? क्योंकि हमु आप ही उसके मोह थ सुणी लिया है।”
Currently Selected:
लूका 22: Sansi
Highlight
Share
Copy
Want to have your highlights saved across all your devices? Sign up or sign in
New Life Literature
