Mga Binuhatan 6
6
Pito ro Ginpili Agod Magbulig sa Pagpanueupod it Kinahangeanon ku mga Pobre
1Sa rato man nga tyempo hay nagainabo eon ro mga sumueunod it Ginuo sa Jerusalem. May mga Judio nga mga tumueuo nga nagbaeahoe sa mga lugar nga sa guwa it Israel nga nag-ueuli eon sa Jerusalem. Griniyego ro andang linggwahe ag pamatasan. Kaisaea kato hay nagsakit ro andang buot kuntra sa mga Judio nga tagaidto mismo. Ro andang reklamo hay kon ginapanueupod ro rasyon para sa mga baeo kada adlaw hay ginataliwanan 't-a kuno ro andang mga baeo. 2Ngani ginpatawag ku doseng ka apostoles ro kaabo-abo nga mga sumueunod. Hambae nanda, “Bukon it tama nga pabay-an namon ro pagwali it mensahi it Dyos agod magpanueupod lang kami it pagkaon. 3Ngani, mga igmanghod, pili kamo it pitong ka eaki sa inyong mga kaibahan. Dapat nga maaeam sanda, ginadayaw sanda it mga tawo sa andang pagginawi, ag ginagamhan permi it Espirito Santo. Sanda ro aton nga padumaeahon ku oeobrahon ngara. 4Ag kami ma't-a hay ibutang namon ro among oras sa pagpangamuyo ag sa pagwali ku mensahi it Dyos.” 5Nalipay ro tanan nga mga sumueunod ngato sa andang habatian. Ngani ginpili nanda si Esteban nga malig-on ro pagtuo ag ginagamhan permi it Espirito Santo. Ginpili man nanda sanday Felipe, Procorus, Nicanor, Timon, Parmenas ag Nicolas nga tagaAntioc nga nagsaylo sa relihiyon it mga Judio. 6Pagkatapos, anda sanda nga ginpresentar sa mga apostoles. Gintungtung dayon ku mga apostoles ro andang alima kanda ag ginpangamuyuan sanda. 7Dahil mas abo eon ro oras ku mga apostoles nga magwali ngani mas nageapnaag pa gid ro mensahi it Dyos. Nag-inabo pa gid ro mga sumueunod sa Jerusalem ag kaabo-abo man nga mga saserdote ro nagpati ag nagtinuman sa mensahi parti kay Jesus.
Gindakop si Esteban
8Si Esteban nga isaea sa pito ngato nga ginpili, una gid kana ro bulig ag gahom it Dyos ngani naghinimo imaw it mga makangawa-ngawa ag milagrosong pamatuod nga hasaksihan it mga tawo. 9Pero may nag-abot nga mga myembro it Sinagoga it Mga Hinilway kon tawgon. Mga Judio sanda nga nagaistar anay sa Cyrene, sa Alexandria, sa Cilicia ag sa Asya. Andang gindenibate si Esteban 10pero indi nanda imaw maperdi ay gintaw-an imaw it kaaeam it Espirito sa paghambae. 11Ngani nagsuhoe sanda it pilang ka tawo ag andang ginpahambae nga, “Habatian namon nga ginasinura nana ro mga ginturo ni Moises nga ginpasueat kana it Dyos!” 12Sa anda ngatong ginhambae hay ginsuesuean nanda nga maakig ro mga tawo, ro mga maestro it Kasuguan ag iba pang mga manogdumaea it mga Judio. Ngani inadtunan nanda si Esteban, dinakop ag pinaatubang sa *Sanedrin. 13Nag-usoy sanda it mga testigo nga andang ginpasugid it pinuril. Hambae nanda, “Owa it pahuway ro paghinambae it maeain ku tawo ngara kuntra sa atong sagrado nga Templo ag sa atong Kasuguan. 14Matuod ro among ginahambae ngara ay habatian namon imaw nga naghambae nga rayang si Jesus nga tagaNazaret hay magaguba ku rayang Templo ag anang bayluhan ro mga sueundanan nga ginpanubli pa naton kay Moises.” 15Tinueok dayon it mayad ku tanan nga idto sa tilipunan it *Sanedrin si Esteban ag hakita nanda nga ro anang uyahon hay masilaw pareho ku ana it anghel.
Currently Selected:
Mga Binuhatan 6: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
