Juan 16

1Nagpadayon si Jesus it paghambae, “Ginasugid ko eagi kinyo rayang mga paghingabot kinyo sa ulihi, agod kon matabo eon don hay indi kamo magtalikod sa inyong pagtuo kakon. 2Indi eon nanda kamo pagpasudlon sa sinagoga,#16:2 Nagakahueugan ra nga owa eon sanda ginabilanga nga Judio ag indi eon sanda puyding mag-intra sa mga importanti nga oeobrahon sa kabuhi it mga Judio. ag ro mas grabi pa hay maabot ro oras nga eaom ku mga magapatay kinyo nga ro andang ginaobra hay mayad nga buhat nga ihaead sa Dyos sa pagsimba kana. 3Obrahon ron nanda kinyo dahil saea ro andang pagkakilaea sa akong Ama, ag pati man kakon. 4Ginasugiran ko kamo kara agod pag-abot it oras hay hidumduman ninyo ro akong ginhambae.”

Ro Oeobrahon ku Espirito Santo

“Owa ko ra eagi kinyo pagsugiran ku primero pa eang nga nagsunod kamo kakon, ay mabuhay pa man ro atong pag-ililiba. 5Makaron pa eang ay gabalik eon ako sa nagpadaea iya kakon. Pero owa gid-a it bisan sambilog kinyo nga nagapangutana kon siin ron. 6Pero sayod ako nga dahil sa akon ngarang mga ginhambae kinyo hay nasubuan gid kamo. 7Pero matuod ro akong hambae ngara nga para gid sa inyong kamaeayran ro akong pagpanaw, ay kon indi ako magpanaw hay indi man riya makaadto kinyo ro Manogbulig. Pero kon makapanaw eon ako, ipadaea ko imaw iya kinyo. 8Kon mag-abot imaw iya hay pamatud-an nana nga bukon it tama ro mga ginaisip ku mga owa nagatuo kakon parti sa andang saea, parti sa akong pagkamatarong ag hanungod sa paghukom it Dyos. 9Ro akong buot hambaeon hay pamatud-an nana nga saea gid-a nga owa sanda nagatuo kakon. 10Pamatud-an man nana nga matarong 't-a ako sa mata it Dyos ag ro pamatuod kara hay magabalik ako sa akong Ama, ag indi eon ninyo ako hikita. 11Ag hanungod sa paghukom it Dyos, pamatud-an nana nga hukman gid it Dyos ro andang saea. Ro pamatuod kara hay ginhukman eon it Dyos si Satanas nga nagadumaea sa tanan nga mga owa gatuo kakon.

12“Abo pa kunta ro akong igasugid kinyo, ugaling hay bukon pa kamo it haom magbaton karon. 13Pero kon mag-abot eon ro Espirito Santo nga manogpahayag it kamatuuran halin sa Dyos hay ipaeubot nana kinyo ro tanan nga kamatuuran ngaron. Ro anang isugid kinyo hay bukon it ana-ana eang, kundi kon ano ro anang habatian halin sa Dyos. Isugid man nana kinyo kon ano ro matabo sa ulihi. 14Ako ro anang pasidunggan tungod anang isugid kon ano ro akong gustong ipasayod pa gid kinyo. 15Gintugyan kakon it Ama ro tanan nga gusto nanang ipasayod sa mga tawo, ag itugyan ko man ron sa Espirito Santo. Mawron nga ginhambae ko kinyo nga isugid nana ro akong gustong ipasayod pa gid kinyo.”

Pagabayluhan it Kalipay ro Kasubo ku mga Sumueunod ni Jesus

16Naghambae pa gid si Jesus, “Sa indi magbuhay hay indi eon ninyo ako makita, pero indi man kapilahan hay makita ninyo ako it uman.”

17Nagpaeangutan-an dayon ro ibang mga sumueunod ni Jesus, “Ano baea ro anang buot hambaeon sa anang ginhambae ngara nga sa indi magbuhay hay indi eon naton imaw hikita, pero indi man kapilahan hay hikita man naton imaw it uman? Ag ano ro anang buot hambaeon sa ‘dahil magabalik ako sa akong Ama’? 18Ano baea ro kahueugan it ginahambae nana ngara nga sa indi magbuhay ay? Indi't-a naton maeubtan ro anang ginahinambae.”

19Sayod si Jesus nga gusto nanda nga magpangutana kana, ngani naghambae imaw, “Nagapaeangutan-an kamo sa akong ginhambae nga sa indi magbuhay hay indi ninyo ako hikita pero indi man kapilahan hay hikita ninyo ako it uman. 20Matuod gid rang ginahambae kinyo nga maueahab kamo ag magatangis sa kasubo samtang ro mga owa nagatuo kakon hay magakalipay. Matuod nga magakasubo kamo pero pagabayluhan man ron sa ulihi it kalipay. 21Pareho abi ron it bayi nga manog-unga, nga ginalisdan kon ginasaeapuan pa eang. Pero kon matawo eon ngani ro eapsag hay malipatan eon nana ro kalisod dahil sa anang kalipay nga natawo eon sa kalibutan ro anang unga. 22Makaruyon man kamo. Nagakasubo kamo makaron, pero mapakita pa ako kinyo it uman ag magakalipay gid ro inyong buot, ag owa it makabuoe karon kinyo bisan ano ro magkaeanabo. 23Sa ulihi hay bukon eon it ako ro inyong ginapangayuan. Matuod gid rang ginahambae kinyo nga bisan ano ro inyong pangayuon sa akong Ama sa akong ngaean hay itao ron nana kinyo. 24Hasta makaron hay owa pa kamo it hapangayo sa Ama nga ginagamit ro akong ngaean. Pangayo kamo ag taw-an kamo agod mangin tueos ro inyong kalipay.”

25Naghambae pa gid si Jesus, “Gagamit ako makaron it mga paanggid nga istorya sa pagsugid kinyo ku mga bagay ngara. Pero maabot ro oras nga indi eon ako maggamit karon kundi ihambae ko kinyo it diritso ag klaro ro parti sa Dyos Ama. 26Kon mag-abot eon ro oras ngaron, makapangayo kamo kana sa akong ngaean. Owa ako gahambae nga kakon pa't-a kamo mag-agi sa inyong ginapangayo kana, 27tungod ro Dyos Ama mismo hay nagahigugma kinyo. Ginahigugma nana kamo tungod ginahigugma ninyo ako, ag nagapati kamo nga naghalin gid ako kana. 28Idto ako naghalin sa Dyos Ama ag nag-adto ako iya sa kalibutan, pero makaron hay mahalin eon ako sa kalibutan ay mabalik eon ako kana.”

29Naghambae dayon ro anang mga sumueunod, “Haron 't-ana, diritso eon ro imong paghambae ag owa ka eon gagamit it paanggid nga istorya. 30Sayod eon kami nga nakasayod ka ku tanan. Bisan ro mga pangutana nga una pa sa paino-ino it mga tawo hay sayod eon nimo, ngani owa eon it kinahangean nga ipangutana pa ron kimo. Mawron nga nagapati kami nga halin ka matuod sa Dyos.”

31Nagsabat si Jesus, “Ginaako ninyo makaron nga nagatuo kamo kakon 32pero maabot ro oras, ag madali lang gid ron ngani mag-abot, nga magatilipeaag kamo ag aywanan ninyo ako nga isaea. Pero owa eon gid man ako gaisaeahanon ay kaibahan ko ro akong Ama. 33Ginasugid ko ra kinyo agod magtawhay ro inyong paino-ino dahil may inyong maeueot nga kaangtanan kakon. Magaagi kamo it mga kalisod iya sa ibabaw it kalibutan, pero ayaw kamo magpaeuya it buot, ay ako ro nagperdi ku kaeainan iya sa kalibutan.”

Currently Selected:

Juan 16: akl

Highlight

Copy