Lucas 11

Nagturo si Jesus Parti sa Pangamuyo

(Mat 6:9-13, 7:7-11)

1Isaeang adlaw, nagpangamuyo si Jesus sa sangka lugar. Pagkatapos nana it pangamuyo hay nagpangabay kana ro sambilog sa anang mga sumueunod. Hambae nana kay Jesus, “Ginuo, tud-i man abi kami kon paalin magpangamuyo, pareho man baea kay Juan nga Manogbawtismo nga gintud-an nana ro anang mga sumueunod.” 2Naghambae si Jesus kanda, “Kon magpangamuyo kamo hay makara ro inyong ihambae:

‘Ama, balaan ro imong ngaean. Kabay pa nga tahuron ka it mga tawo. Kabay pa nga magpasakop eon ro tanan nga mga tawo sa imong paghari sa andang tagipusuon.

3Taw-i kami adlaw-adlaw it among kinahangean nga pagkaon.

4Patawara kami sa among mga saea dahil ginatuman namon ro sugo nga dapat kami magpatawad sa tanan nga nagakasaea kamon.

Ayaw kami pagpabay-i nga matentar.’ ”

5Pagkatapos, naghambae pa gid kanda si Jesus, “Halimbawa abi nga may sambilog kinyo nga mag-adto it tungang gabii sa baeay ku anang amigo. Tapos hay mahambae abi mana imaw nga Mig, pahueama abi anay ako it tatlong bilog nga tinapay.#11:5 Ro tinapay sa andang tyempo hay matsa pinggan it eagko, imaw man ro korte. Sambilog eang hay busog eon ro makakaon. 6Nag-abot abi mana ro akong amigo sa baeay. Kaeayo pa't-a mana ro anang ginhalinan ag owa gid ako it idat-on kana. 7Masabat man ro anang amigo nga idto sa sueod it baeay, ‘ayaw eon abi mana ako pag-isturbuha, mig. Nakapanarangka eon abi mana kami. Ag isaea pa hay hibugtaw 't-a mana rang mga unga kon bumangon pa ako ag taw-an ta ku ing kinahangean. Malisod eo't-a mana ron.’ 8Ginahambae ko kinyo nga mabangon eon lang ro tagbaeay ngato ag taw-an ro anang amigo ku tanan nanang kinahangean bukon it dahil nga mag-amigo sanda kundi dahil sa pagkapilitaryo ku anang amigo ngato.

9“Ngani ginahambae ko kinyo nga magpangayo kamo permi sa Dyos ku inyong kinahangeanon ag itao nana ron kinyo. Usuya ninyo permi kon ano ro inyong kinawaea ag buligan kamo nana nga makita ron. Panuktok kamo permi sa anang pwertahan ag buksan nana ron para kinyo. 10Dahil ro tanan nga nagapangayo hay makabaton, ro tanan nga nagausoy hay makakita ag ro tanan nga nagapanagbalay hay pagabuksan. 11Anong klasing ama ro gatao it sawa sa anang unga kon pangayuan imaw it isda? 12Ukon mangayo ra unga it itlog hay taw-an na't-a it tibaba? 13Kon kamo nga mga maeain#11:13 Ro buot hambaeon dikara ni Jesus hay bukon eang it ratong mga tawo ro maeain kundi napatungod ra sa tanan, dahil ro tanan nga tawo iya sa kalibutan hay maeain sa mata it Dyos. hay nagatao ngani it manami sa inyong mga unga, mas kapin pa gid ro Ama sa eangit. Itao nana ro Espirito Santo sa nagapangayo kana.”

Ro Gahom ni Jesus hay Halin sa Espirito Santo Bukon it kay Satanas

(Mat 12:22-30; Mar 3:22-27)

14Isaeang adlaw, may sangka tawo nga ginpabuyon it demonyo. Ginsuboe ni Jesus ro demonyo ngato sa ratong tawo. Pagkaguwa ku demonyo hay nakahambae dayon ro tawo ngato. Hangawa ro kaabo nga tawong nakasaksi 15pero ro iba kanda hay naghambae, “Paagi eang sa gahom ni Beelzebul#11:15 Ro Beelzebul hay sambilog pa nga tawag kay Satanas. nga pinuno it mga demonyo makasuboe imaw it mga demonyo.” 16Gusto ku iba kanda nga testingan si Jesus ngani ginapaobra kunta nanda imaw it milagro sa kaeangitan bilang pamatuod nga pinadaea imaw it Dyos. 17Pero sayod ni Jesus ro andang ginapaino-ino ngani ginhambae nana sanda, “Ro kada nasyon nga nagagrupo-grupo ag nagailinaway permi ro mga pumueuyo hay mawasak gid. Makaruyon man ro matabo sa panimaeay nga perming nagailinaway. 18Ngani kon si Satanas mismo ro nagasuboe sa anang mga sinakpan nga mga demonyo nga maghalin sa mga tawo nga andang ginsudlan hay ginakuntra nana ro ana mismong kaugalingon. Kon makaruyon hay paalin makapadayon ro anang pagdominar? Ginapangutana ko kamo kara ay sininyo hay paagi eang sa gahom ni Beelzebul makasuboe ako it mga demonyo. 19Kon matuod nga nagasuboe ako it demonyo dahil sa gintaw-an ako it gahom ni Beelzebul, sin-o man ro nagtao it gahom sa inyong mga sumueunod sa pagsuboe it mga maeain nga espirito? Ro inyo mismong mga sumueunod ro makapamatuod nga saea kamo! 20Pero dahil nga ginsuboe nakon ro mga demonyo paagi sa gahom it Dyos, nagapakilaea ra nga nag-abot eon kinyo ro paghari it Dyos.”

21Hambae pa ni Jesus, “Indi hitakaw ro pagkabutang it sangka makusog nga tagbaeay kon una imaw gabantay ag armado gid. 22Pero kon gubaton imaw it mas makusog pa kana ag maperdi imaw, agawon dayon kana ro anang armas nga anang ginasaligan nga makadepensa kana. Pagkatapos hay pangeuguson dayon kana ro anang mga pagkabutang ag ipanueupod ku nageugos ngato sa anang mga kaibahan.

23“Ro owa nagaapin kakon hay nagakuntra kakon. Ro owa nagabulig kakon sa pagtipon ku mga tawo hay nagapatapeaag kanda paeayo kakon.”

Ro Peligro Kon Indi Magbaton sa mga Ginaturo ni Jesus

(Mat 12:43-45)

24Naghambae pa si Jesus kanda, “Kon magguwa ro maeain nga espirito sa sangka tawo hay nagawarang ra sa *disyerto nga owa it tubi ag nagausoy idto it mapahuwayan. Ag kon owa imaw it hikita hay mahambae imaw sa anang kaugalingon, ‘Mabalik eon lang ako sa akon anay nga ginhalinan nga tawo.’ 25Pagbalik nana, hiabutan nana nga ro anang gin-guwaan nga tawo hay pareho it baeay nga malimpyo eon ag ginpanami.#11:25 Ro kahueugan kara hay ro tawo nga ginsubuean it maeain nga espirito hay mayad eon pero owa imaw nagtuo kay Jesus ngani owa nagaistar kana ro Espirito Santo. Puydi imaw nga balikan ku maeain ngato nga espirito nga nagguwa kana ag puydi man imaw nga masudlan it iba pa nga maeain nga espirito. 26Tapos, madaea imaw it pito pa gid nga ka espirito nga mas maeain pa kaysa kana. Masueod sanda sa tawo ngato ag idto mag-istar, ngani mangin mas grabi ro sitwasyon ku ratong tawo kaysa sa dati.”

27Tag nagahambae pa kara si Jesus hay may sangka bayi nga idto sa mga nagapaeamati kana nga nagsinggit. Hambae nana, “Bulahan ro bayi nga nag-unga ag nagpasuso kimo.” 28Pero nagsabat si Jesus, “Matuod ron pero mas kapin 't-a nga bulahan ro mga nagapamati ag nagatuman sa mensahi it Dyos.”

Ginpangisgan ni Jesus ro mga Tawo nga Nagatesting Kunta Kana

(Mat 12:38-42, 16:1-4; Mar 8:11-12)

29Tag nagainabo pa gid ro mga tawo, naghambae si Jesus, “Ro mga tawo makaron nga tyempo hay mga maeain it kabubut-on. Ginausuyan nanda ako it milagroso nga pamatuod nga pinadaea ako it Dyos pero owa it ipakita kanda kundi ro pareho ku natabo kay Propeta Jonas kato anay. 30Ro natabo kay Jonas hay pamatuod sa mga tagaNineve nga pinadaea imaw it Dyos. Makaruyon man kakon nga Unga it Tawo. Ro matabo man kakon hay pamatuod sa mga tawo makaron nga pinadaea ako it Dyos. 31Pag-abot it adlaw it paghukom, ro rayna it Seba#11:31 Sa Griniyego raya hay “Rayna it Sur.” Mabasa ra sa 1 Hari 10:1-13. Ro iba hay nagahambae nga ro dati nga nasyon it Seba hay ginatawag makaron nga Yemen nga maeapit sa Saudi Arabia. Sinana ma't-a ku iba raya hay nasyon it Etiopia makaron. hay magatindog ag magahambae nga dapat eang nga pinahan ro mga tawo sa tyempo ngara tungod imaw ngani hay nagbiyahe halin pa sa kaeayo-eayo nga lugar#11:31 Ro kaeayuon ku anang ginbiyahe hay mga 2,000 kilometros. agod eang magpamati sa pagturo ku maaeam nga hari nga si Solomon. Pero may mas pa kay Solomon iya kinyo ugaling hay owa gid kamo nagainato sa anang ginaturo. 32Pag-abot ku adlaw it paghukom, magaatubang sa hukom ro mga tagaNineve kaibahan ku mga tawo makaron nga tyempo ag magahambae sanda nga dapat kamo pinahan. Ham-an? Dahil nagtalikod ngani sanda sa andang mga saea pagwali ni Jonas pero kamo hay owa gid nagatalikod sa inyong mga saea maskin may mas pa kay Jonas iya kinyo.”

Ayaw Pagsalipdi ro Iwag nga Nagapaathag ku Kamatuuran Parti sa Dyos

(Mat 5:15, 6:22-23)

33Naghambae pa gid si Jesus, “Owa it nagasindi it lampara ag ana ra dayon nga taguon o takeuban it paniga kundi ana ra nga ginabutang sa tueungtungan agod mahayagan ro nagasueod sa baeay. 34Ro imong mata hay kaparis it lampara nga nagatao it kahayag kimo. Mawron nga kon owa it diperensya ro imong mata, mahayagan gid ro imong bilog nga eawas. Pero kon madueom ro imong panueok, apektado man ro imong bilog nga eawas. 35Ngani mag-andam gid kamo ay basi eaom ninyo hay kahayag eon ro inyong ginasunod pero kadueom 't-a gali. 36Pero kon ro bilog nimo nga pagkabuhi hay nahayagan it mayad ag owa it bisan sangkiri nga kadueom hay mahayagan it husto ro imong paino-ino pareho it tawo nga ginaiwagan it kahayag-hayag nga iwag.”#11:36 Ro kahueugan siguro kara hay kon magtuo ro sangka tawo nga matuod gid ro mensahi halin sa Dyos ag indi imaw magduda bisan sangkiri hay buligan imaw it Dyos nga maeubtan it mayad ro mensahi ngato.

Ginkondenar ni Jesus ro mga Pariseo ag ro mga Maestro it Kasuguan Dahil sa Andang Pagkaipokrito

(Mat 23:1-36; Mar 12:38-40; Luc 20:45-47)

37Pagkatapos ni Jesus it hambae, may sangka Pariseo nga nagkangay kana nga magkaon sa andang baeay. Nagmunot si Jesus ag pag-abot idto hay sumaylo imaw sa lamisa agod magkaon. 38Hangawa gid-a ro Pariseo pagkapan-o nana nga owa si Jesus naghimo it ritwal sa pagpalibanaw bago magkaon. 39Ngani naghambae ro Ginuo kana, “Kamo gid-a nga mga Pariseo hay pareho it nagahugas it pinggan ag baso nga ro likod eang ag ro liwan ro ginahugasan. Makaruyon kamo ay ro inyo eang nga eawas ro inyong ginalimpyuhan pero ro una't-a sa inyong kabubut-on hay puro kahanguean ag kaeainan. 40Mga kaumangon gid-a kamo! Bukon abi nga ro inyong eawas ag kabubut-on hay pareho nga gintuga it Dyos? Mawron nga pareho ron nga dapat ninyo nga limpyuhan. 41Dapat ninyo nga limpyuhan ro maeain nga una sa inyong kabubut-on ag magtao kamo sa mga imoe nga owa ginamunti it inyong buot. Bukon eang dayon it ro inyong mga buhat nga makita ro mangin limpyo sa mata it Dyos kundi pati ro inyong kabubut-on.

42“Makaeueuoy kamo nga mga Pariseo ay makangingidlis gid ro matabo kinyo sa ulihi! Nagatao gid kamo sa Dyos it ikanapueong parti bisan ku inyong tanom nga mga panakot#11:42 Lev 27:30 ag Deut 14:22. pero owa gid kamo gahimo it matarong sa inyong isigkatawo ag owa man ninyo ginahigugmaa ro Dyos. Dapat hay ginaobra ninyo ron ag padayon man gihapon kamo nga nagatao sa Dyos ku inyong mga ikanapueo nga parti. 43Makaeueuoy kamo nga mga Pariseo ay makangingidlis gid ro matabo kinyo sa ulihi! Sa sinagoga hay naila gid-a kamo permi nga magpungko sa mga pungkuan para sa mga dungganon nga mga tawo. Sa kadagayaan hay naila man kamo nga pagsinaluduhan it mga tawo. 44Makaeueuoy kamo nga mga Pariseo ay makangingidlis gid ro matabo kinyo sa ulihi! Pareho kamo it mga eueubngan nga owa it tanda ag ginatapak-tapakan eang it mga tawo ay owa sanda kasayod nga may nagakaeunot gali idto sa sueod.”#11:44 Kon makatapak ro mga Judio sa eueubngan hay mangin mahigko sanda sa mata it Dyos sa sueod it pitong adlaw (Num 19:16). Ro buot hambaeon kara ni Jesus hay kon magsinunod ro mga tawo sa ginaturo ku mga Pariseo hay matapnan sanda ku andang maeain nga kabubut-on ag mangin makangingil-ad sanda sa mata it Dyos.

45May idto nga sangka maestro it Kasuguan nga nagsabat kay Jesus, “Maestro, ginainsulto mo't-a pati kami sa imo ngarong ginahinambae.” 46Nagsabat si Jesus, “Makaeueuoy man kamo nga mga maestro it Kasuguan ay makangingidlis gid ro matabo man kinyo sa ulihi! Ginapapas-an ninyo ro mga tawo it mga kasuguan nga malisod tumanon pero owa gid kamo gabulig kanda bisan sangkurot.

47“Makaeueuoy kamo ay makangingidlis gid ro matabo kinyo sa ulihi! Ginapanami gid ninyo ro mga eueubngan ku mga propeta anay kato, pero ro inyong mga kalolohan ro nagpamatay kanda. 48Ngani gapakilaea nga ginakunsinti man ninyo ro andang gin-obra sa mga propeta tungod sanda ro nagpatay sa mga propeta ag kamo ro nagapanami ku andang eueubngan. 49Raya ro ginhambae ku maaeam nga Dyos parti kinyo: ‘Paadtunan ko sanda sa mga propeta ag mga apostoles. Pamatyon nanda ro iba sa akong mga paadtunon ag hingabuton ro iba.’ 50Ngani ro mga tawo makaron nga tyempo ro manabat ku kamatayon it tanan nga propeta halin ku pagtuga ku kalibutan, 51umpisa kay Abel hasta kay Zacarias.#11:51 Si Abel ro hauna nga nasueat sa Sagrado nga Kasueatan nga ginpatay (basaha sa Gen 4:8) ag si Zacarias ro katapusan (basaha sa 2 Cron 24:20-22). Sa Bibliya nga Hinebreo, ro 2 Cronica ro katapusan nga libro, bukon it Malakias pareho ku aton nga Bibliya makaron. Ginpatay si Zacarias sa ueot ku Templo ag ku altar nga idto sa *lagwirta it Templo. Ginahambae ko eagi kinyo nga manabat gid sa Dyos ro mga tawo sa rayang tyempo sa kamatayon it tanan nga propeta nga ginpamatay dahil sa andang pagsunod sa Dyos.

52“Makaeueuoy kamo nga mga maestro it Kasuguan ay makangingidlis ro matabo kinyo sa ulihi! Inyo nga gintago sa mga tawo ro matuod nga paagi kon paalin nanda makilaea ro Dyos. Pareho kamo it tawo nga gintago nana ro yabi sa pwertahan it baeay agod indi makasueod ro iba. Kamo mismo hay owa naila magpati sa mensahi it Dyos ag ro iba nga naila kunta magpati hay inyong ginabaeabagan.”

53Dikato nag-umpisa ro grabi nga pagkinuntra ku mga maestro it Kasuguan ag ku mga Pariseo kay Jesus. Ngani tag nagguwa eon imaw sa baeay it ratong Pariseo hay ginbinirahan nanda imaw it pangutana parti sa kon anong bagay 54ay anda kunta imaw nga ginadakop-dakop sa istorya ay basi may ikahambae imaw nga magamit nanda agod ikaakusar imaw.

Currently Selected:

Lucas 11: akl

Highlight

Copy