Lucas 3

Ro mga Ginhimo ni Juan nga Manogbawtismo

(Mat 3:1-12; Mar 1:1-8; Juan 1:23, 26-27)

1Nagtaliwan ro mga dinag-on hasta nag-abot ro ika-15 anyos ku paghari ni Tiberius bilang Emperador it Roma. Ro gobernador kato it Judea hay si Poncio Pilato, ag ro gobernador it Galilea hay si Herodes.#3:1 Rayang si Herodes hay unga ni Herodes nga nagpapatay ku mga unga nga eaki sa Betlehem kato nga ro idad hay hasta sa daywang dag-on (Mat 2:16). Si Felipe nga igmanghod ni Herodes ro manogdumaea it Iturea ag Traconitis. Ro manogdumaea it Abilenia hay si Lisanias. 2Ro pinakapinuno nga saserdote kato hay si Anas, ag ku ulihi hay si Caifas.

Ku rato man nga tyempo hay may ginhambae ro Dyos kay Juan nga unga ni Zacarias kat idto si Juan nagaistar sa *disyerto. 3Ngani naglibot si Juan sa tanan nga lugar sa libot it suba it Jordan ag nagwali sa mga tawo nga dapat sandang maghinuesoe ag magtalikod sa andang mga saea, ag magpabawtismo agod patawaron sanda it Dyos.

4Sa ginhimo ngato ni Juan hay natuman ro ginsueat ni anay Propeta Isaias nga:

“May tawo idto sa *disyerto nga nagasinggit,

‘Pahauma ro aeagyan it Ginuo. Patadlunga ro anang daean.

5 Ro kada linggahob hay tambakan ag ro kada bukid hay tapanon. Ro daean nga tiko hay patadlungon, ag ro mga samad nga karsada hay kaadyanon.

6 Ag hikita it tanan nga mga tawo ro kaeuwasan nga ginpahaom it Dyos.’ ”#3:6 Isa 40:3-5.

7Abo nga mga tawo ro nag-adto kay Juan agod magpabawtismo. Naghambae imaw kanda, “Mga tuso gid-a kamo pareho it sawa! Sin-o ro naghambae kinyo nga makapaeagiw kamo sa pina it Dyos paagi sa inyong pagpabawtismo? 8Kon matuod nga nagatalikod kamo sa inyong mga saea, ipakita ron paagi sa inyong mayad nga buhat. Ag ayaw kamo magsalig nga tungod mga inapo kamo ni Abraham hay makalibre kamo sa pina it Dyos. Ginahambae ko kinyo nga ro Dyos hay makahimo it inapo ni Abraham halin sa rayang mga bato iya. 9Haom eon ro pina it Dyos kinyo pareho it wasay nga haom eon nga ipukan it kahoy. Ro kada kahoy nga owa nagabunga it manami hay pukanon ag igatong.”

10Nagpangutana ro mga tawo kay Juan, “Hay maalin kami kara?” 11Nagsabat si Juan, “Kon daywa ro imong eambong, taw-an ro sambilog sa owa. Kon may pagkaon ka, taw-i man ro owa.”

12May mga manogsukot man it buhis nga nag-adto kay Juan agod magpabawtismo. Nagpangutana sanda kana, “Hay kami, maestro? Maalin man kami?” 13Nagsabat kanda si Juan, “Ayaw kamo magsukot sa mga tawo it gapaeangeapaw kaysa sa dapat isukot.”

14Nagpangutana man ro mga soldado kay Juan, “Hay kami? Maalin man kami?” Nagsabat si Juan, “Ayaw kamo magpamaeag ag magpabangod sa mga tawo agod makapangwarta eang kamo. Dapat nga makuntento kamo sa inyo nga sweldo.”

15Naghawat-hawat ro ginhawa it mga tawo ay eaom nanda hay si Juan eon ro Maneueuwas nga ginpromisa it Dyos. 16Naghambae kanda si Juan, “Ginabawtismuhan ku kamo it tubi pero may maabot nga mas eabaw pa kakon nga bisan gahubad eon lang ku higot it anang sandalyas hay bukon ako it takos. Pagabawtismuhan nana kamo it Espirito Santo ag kaeayo. 17Ana eon nga paeainon ro mga matarong nga tawo sa mga maeain pareho it mangunguma nga haom eon nga magpahangin ku anang tubas. Anang tipunon ro matimgas nga eamigas ag taguon sa anang bodega. Pero ro mga upa hay ana nga iitsa sa kaeayo nga owa nagakapaeong.”

18Abo pa't-a nga mga makaruyon ro anang ginhambae sa mga tawo sa anang pagwali kanda ku Mayad nga Balita. 19Bisan pa ngani si Gobernador Herodes hay ginbinadlong ni Juan tungod gin-asawa ni Herodes ro ana mismong hipag nga si Herodias#3:19 Bukon eang si Herodias it hipag ni Herodes kundi gumankon pa gid ay ro ama ni Herodias hay igmanghod ni Herodes sa ama. Ginbueagan nanday Herodes ag Herodias ro andang mga asawa ag nag-asawa sanda nga daywa bisan bawae ra sa mata it Dyos. ag dahil man sa iba pa nanang mga maeain nga ginaobra. 20Ku ulihi, gindugangan pa gid ni Herodes ro anang mga saea ay ginpapriso na si Juan.

Ro mga Nagkaeanabo Tag Ginbawtismuhan si Jesus

(Mat 3:13-17; Mar 1:9-11)

21Tag owa pa't-a si Juan hapapriso hay nagpangbawtismo imaw it kaabo nga mga tawo. Kaibahan man dikato si Jesus. Tag nagapangamuyo si Jesus pagkabawtismo kana hay nagbukas ro eangit 22ag nagpanaog ro Espirito Santo nga kaitsura it salampati ag naghapon kana. May naghambae dayon halin sa eangit, “Ikaw ro akong palangga nga unga. Nalipay gid ako it duro kimo.”

Ro Linahi ni Jesus#3:22 Sa rayang listahan ku linahi ni Jesus, ro iba nga mga ngaean hay eain ag eain man ro kaabuon it mga ngaean kaysa sa listahan sa Mat 1:1-17. May mga mangin-aeamon nga nagahambae nga ro mga ngaean nga ginlista sa Mateo hay mga kalolo-lolohan ni Jose ag ro nalista ma't-a sa Lucas hay mga kalolo-lolohan ni Maria.

(Mat 1:1-17)

23Nag-umpisa si Jesus sa anang pagturo ag pagwali tag mga traynta anyos eon ro anang idad. Ro pageaom it mga tawo hay unga imaw ni Jose nga unga ni Eli. 24Si Eli hay unga ni Matat nga unga ni Levi. Si Levi hay unga ni Melki nga unga ni Janai. Si Janai hay unga ni Jose. 25Si Jose hay unga ni Matatias nga unga ni Amos. Si Amos hay unga ni Nahum nga unga ni Esli. Si Esli hay unga ni Nagai. 26Si Nagai hay unga ni Maat nga unga ni Matatias. Si Matatias hay unga ni Semein nga unga ni Josec. Si Josec hay unga ni Joda. 27Si Joda hay unga ni Joanan nga unga ni Resa. Si Resa hay unga ni Zerubabel nga unga ni Shealtiel nga unga ni Neri. 28Si Neri hay unga ni Melki nga unga ni Adi. Si Adi hay unga ni Cosam nga unga ni Elmadam. Si Elmadam hay unga ni Er. 29Si Er hay unga ni Josue nga unga ni Eliezer. Si Eliezer hay unga ni Jorim nga unga ni Matat. Si Matat hay unga ni Levi. 30Si Levi hay unga ni Simeon nga unga ni Juda. Si Juda hay unga ni Jose nga unga ni Jonam. Si Jonam hay unga ni Eliakim. 31Si Eliakim hay unga ni Melea nga unga ni Mena. Si Mena hay unga ni Matata nga unga ni Natan. Si Natan hay unga ni David. 32Si David hay unga ni Jesse nga unga ni Obed nga unga ni Boaz. Si Boaz hay unga ni Salmon nga unga ni Nashon. 33Si Nashon hay unga ni Aminadab nga unga ni Admin. Si Admin hay unga ni Arni nga unga ni Ezron. Si Ezron hay unga ni Perez nga unga ni Juda. 34Si Juda hay unga ni Jacob nga unga ni Isaac. Si Isaac hay unga ni Abraham nga unga ni Tera. Si Tera hay unga ni Nahor. 35Si Nahor hay unga ni Serug nga unga ni Reu. Si Reu hay unga ni Peleg nga unga ni Eber. Si Eber hay unga ni Shela. 36Si Shela hay unga ni Cainan nga unga ni Arfaxad. Si Arfaxad hay unga ni Shem nga unga ni Noe. Si Noe hay unga ni Lamec. 37Si Lamec hay unga ni Metusela nga unga ni Enoc. Si Enoc hay unga ni Jared nga unga ni Mahalalel. Si Mahalalel hay unga ni Cainan. 38Si Cainan hay unga ni Enosh nga unga ni Set. Si Set hay unga ni Adan nga unga it Dyos.

Currently Selected:

Lucas 3: akl

Highlight

Copy