Lucas 6

Mas may Otoridad si Jesus Kaysa sa mga Sueundanan nga Gindugang it Tawo Parti sa Adlaw it Inogpahuway

(Mat 12:1-8; Mar 2:23-28)

1Isaeang ka Adlaw it Inogpahuway, si Jesus ag ro anang mga sumueunod hay nahaagi sa taeamnan it trigo.#6:1 Ro trigo hay tanom nga haeos pareho it paeay ro dahon ag bunga. Tag nagaagi sanda hay nagpangutoe it uhay ku trigo ro anang mga sumueunod ag anda rato nga ginpinilipiti agod mabuoe ro upak, ag tapos hay ginkinaon. 2May idto nga mga Pariseo nga nakakita ku andang gin-obra ag ginhambaean sanda, “Ham-an it nagaobra kamo it bawae sa Adlaw it Inogpahuway?” 3Nagsabat si Jesus, “Owa maton kamo kabasa kon ano ro ginhimo kato ni David tag gin-gutom imaw ag ro anang mga kaibahan? 4Nagsueod imaw sa Baeay it Dyos#6:4 Ro Baeay it Dyos hay torda nga gin-obra nga simbahan anay ku mga Judio. ag nangayo it tinapay nga haead sa Dyos ag ginkaon na rato. Gintaw-an man nana kato ro anang mga kaibahan maskin nagahambae ro atong Kasuguan nga ro mga saserdote eang ro makakaon ku rato nga tinapay.”#6:4 Lev 24:9 ag 1 Sam 21:1-6. Bisan gin-obra rato nanday David hay owa sanda nagkasaea sa panueok it Dyos.

5Ag hambae pa ni Jesus kanda, “Ako nga Unga it Tawo ro may otoridad nga maghambae kon ano ro puydi ag indi puydi nga obrahon sa Adlaw it Inogpahuway.”

Ginpamayad ni Jesus sa Adlaw it Inogpahuway ro Sangka Tawo nga Kimpay ro Alima

(Mat 12:9-14; Mar 3:1-6)

6Kaisaea pa gid kato nga Adlaw it Inogpahuway, nag-adto si Jesus sa sinagoga#6:6 Daya siguro ro sinagoga sa Capernaum (basaha sa 4:31). ag nagturo. May idto nga tawo nga kimpay ro anang tuo nga alima. 7May idto man nga mga maestro it Kasuguan ag mga Pariseo. Anda gid nga ginabantayan si Jesus kon pamayron nana ro tawo ngato sa Adlaw it Inogpahuway agod may anda dayon nga ikaakusar kana. 8Pero sayod ni Jesus ro andang ginapaino-ino. Ginhambae dayon nana sa tawo nga kimpay ro anang alima, “Tindog iya sa printi.” Nagtuman ro tawo. 9Ginpangutana dayon ni Jesus ratong mga nagabantay kana, “Kutan-on ko abi kamo. Suno sa atong Kasuguan, ano ro puydi nga obrahon kon Adlaw it Inogpahuway? Ro mayad o ro maeain? Magtabang baea o magpatay?” 10Gintueok sanda tanan ni Jesus ag ginhambae nana dayon rato nga kimpay, “Untayan ring alima.” Gin-untay ku tawo ro anang alima ag nagmayad eagi rato. 11Naakig it duro ro mga maestro it Kasuguan ag ro mga Pariseo ngani gin-istoryahan nanda kon ano ro andang dapat obrahon kay Jesus.

Nagpili si Jesus it Anang Dose nga ka Apostoles

(Mar 3:13-19)

12Pagkataliwan it pilang adlaw, nagtukad si Jesus sa bukid agod magpangamuyo. Sang gabii ro anang pagpinangamuyo sa Dyos. 13Pagkaagahon kato, ginpatipon nana idto ro tanan nga mga nagasinunod kana. Nagpili dayon imaw kanda it dose nga anang gintawag nga mga *apostoles. 14Raya ro anang mga ginpili: si Simon nga ginpangaeanan nana nga Pedro, si Andres nga igmanghod ni Simon, si Santiago, si Juan, si Felipe, si Bartolome, 15si Mateo, si Tomas, si Santiago nga unga ni Alfeus, si Simon (nga isaeang ka rebelde anay sa paggobyerno it Roma), 16si Judas#6:16 Rayang si Judas hay ginatawag nga si Tadeus sa Mat 10:3 ag sa Mar 3:18. nga unga ni Santiago, ag si Judas Iscariote nga nagtraidor kay Jesus ku ulihi.

Nagturo si Jesus ag Nagpamayad it Kaabo-abo nga Masakiton

(Mat 4:23-25)

17Pagkatapos, nagpanaog sa bukid sanday Jesus ag ro anang mga ginpili ngato. Bago sanda nakaabot sa ubos hay nagpundo anay sanda sa sangka lugar idto nga patag-patag. Nagatueumpok idto ro kaabo-abo nga iba pa nga mga sumueunod ni Jesus, pati man ro kaabo-abo nga mga tawo nga halin pa sa Judea, sa Jerusalem ag sa mga syudad it Tiro ag Sidon nga maeapit sa kadagatan. 18Nag-adto sanda idto kay Jesus agod magpamati kana ag agod himayad nana sanda sa andang mga baeatian. Ro mga ginapalisdan it mga maeain nga espirito hay ana man nga ginpamayad. 19Ngani ro tanan nga tawo idto hay nagtininguha nga matabing si Jesus, ay nagaguwa eang kana ro gahom ag nagamayad dayon sanda tanan.

Ro mga Pakamaayuhon it Dyos ag Ro Anang mga Pinahan

(Mat 5:1-12)

20Tapos, nagtan-aw si Jesus sa kaabo-abo nana ngato nga mga sumueunod ag naghambae,

“Bulahan kamo nga mga kubos#6:20 Owa ra nagakahueugan nga ro tanan nga kubos hay matapoe sa mga sinakpan it Dyos dahil eang sanda hay kubos. Ro kahueugan siguro kara hay pareho sa Mat 5:3 nga nagapatungod sa mga kubos nga nagaako nga owa sanda it mahimo kon owa ro Dyos. ay matapoe kamo sa mga sinakpan it Dyos.

21Bulahan kamo nga mga ginagutom makaron ay mabusog gid kamo.#6:21 Ro kahueugan kara hay pareho siguro sa Mat 5:6 nga “Bulahan ro mga tawo nga nagahandom gid it duro nga magkabuhi it matarong sa panueok it Dyos ay sanda ro taw-an it Dyos ku andang ginahandom.”

Bulahan kamo nga nagatangis makaron ay magakalipay gid kamo.#6:21 Ro kahueugan siguro kara hay pareho sa Mat 5:4 nga “Bulahan ro mga nagakasubo dahil sa andang mga saea ay sanda ro pagaaeam-aeaman it Dyos agod magbaskog ro andang buot.”

22Bulahan kamo kon ginakaugtan kamo, indi pagkilan-on, ginatuya-tuya ag ginapakaeain ku mga tawo bangod kakon nga Unga it Tawo. 23Makaruyon man kato ro gin-obra ku andang mga kalolo-lolohan sa mga propeta. Ngani magkalipay kamo ag magsinta-sinta sa kasadya kon matabo ron, ay mabahoe ro inyong batunon nga premyo sa eangit.

24“Makaeueuoy kamo nga mga manggaranon ay ro inyong ginaagyan nga matawhay ag bugana nga pagpangabuhi hay hasta eang iya sa kalibutan.

25Makaeueuoy man kamo nga mga busog makaron ay maabot ro adlaw nga magutuman gid kamo.

Makaeueuoy man kamo nga ro ginapahaegahan eang makaron hay ro inyo mismong kalipay, ay maabot ro adlaw nga magakasubo gid kamo ag magatangis.

26Makaeueuoy kamo nga mga nagapaeapad it papel sa inyong isigkatawo agod eang dayawon. Makaruyon man abi kato ro gin-obra ku mga nagpakuno-kuno nga mga propeta ag gindayaw sanda ku mga tawo pero ginpinahan sanda it Dyos.”

Dapat nga Indi Kita Magbaeos sa Nagahimo Katon it Maeain

(Mat 5:38-48, 7:12a)

27Naghambae pa gid si Jesus, “Pero kinyo nga nagapamati makaron, ro akong mahambae hay higugmaa ro inyong mga kaaway. Obrahi it mayad ro mga naugot kinyo. 28Ipangamuyo sa Dyos nga pakamaayuhon ro nagasumpa kinyo. Pangamuyui ro mga nagaobra it maeain kinyo. 29Kon ginsampae ka sa sangka uyahon, pasampaean pa gid ro sampihak. Kon bue-on ro imong pangsanib, taw-an pa gid ro imong eambong. 30Taw-i ro tanan nga nagapangayo kimo. Kon ginbuoe kinyo ro inyong pagkabutang, ayaw eon pagbawia.#6:30 Ro buot hambaeon ni Jesus hay indi kita dapat magpadaea-daea sa atong handom nga magbaeos sa saea nga ginhimo katon. Mas mayad pa nga madueaan kita it pagkabutang kaysa sa pasundan naton ro mga maeain nga baeatyagon. 31Himua sa imong isigkapareho ro gusto nimo nga himuon nanda kimo. 32Ham-an gid abi it dayawon kamo kon ro inyo eang nga ginahigugma hay ro mga nagahigugma man kinyo? Bisan ngani ro mga makasasaea hay nagahigugma man sa mga nagahigugma kanda. 33Ham-an gid abi it dayawon kamo kon maghimo kamo it mayad sa mga mayad man kinyo? Gahimo man ngani karon bisan ro mga makasasaea. 34Ag ham-an gid abi nga dayawon kamo kon magpahueam kamo sa hasayran ninyo nga makabayad man kinyo? Gapahueam man ngani bisan ro mga makasasaea sa kapareho nanda nga mga makasasaea man basta makabayad eang. 35Ayaw kamo magtuead karon kundi higugmaa ninyo ro inyong kaaway ag himui sanda it mayad. Kon magpahueam ka, ayaw magpaabot nga bayaran ka. Kon makara ro inyong ginaobra hay mabahoe gid ro inyong premyo, ag ginapakita ninyo nga mga unga kamo it Dyos nga Eabing Mataas tungod mabuot ro Dyos bisan sa mga owa it kabaeaslan ag sa mga maeain. 36Ngani mangin maeueuy-on kamo pareho ku inyong Ama nga maeueuy-on.”

Indi Kita Dapat Magpanghusgar sa Iba

(Mat 7:1-5)

37Naghambae pa gid si Jesus, “Ayaw kamo magpanghusgar, ag indi gid kamo paghusgaran it Dyos. Ayaw kamo magpangkondenar, ag indi gid kamo pagkondenaron it Dyos. Patawara ro nagakasaea kinyo, ag patawaron man kamo it Dyos. 38Mangin maatag kamo permi sa iba, ag makaruyon man ro ibaeos it Dyos kinyo. Ro inyong mabaton hay abo, dasok, ligon ag nagapaeang-awas. Kon mauno it abo ro inyong ginatao hay makaruyon man it abo ro ibaeos it Dyos kinyo.”

39May ginhambae dayon kanda si Jesus nga mga halimbawa. Hambae nana, “Aeang-aeang ma't-a nga makaguyod ro bulag it pareho nana nga bulag man ay pareho gid sanda nga mahueog sa kutkut.#6:39 Ro kahueugan siguro kara hay ginakompara ni Jesus ro mga Pariseo ag ro mga maestro it Kasuguan sa mga bulag dahil ginapataeang nanda ro mga tawo sa andang saea nga mga ginaturo. 40Owa it estudyante nga eabaw pa sa anang maestro. Pero kon nakaeubot ag nag-antigo gid ro estudyante ku anang gintun-an hay mangin pareho eon dayon imaw sa anang maestro. 41Ham-an it hakita mo ro kaisot-isot nga puling it imong isigkatawo pero indi mo mapan-uhan ro puling nga matsa tablon it bahoe sa imo mismong mata? 42Paalin ka makahambae sa imong isigkatawo nga bue-on mo ro anang puling nga ikaw ngani mismo hay owa kakita ku tablon nga una sa imong mata? Eaom nimo hay mayad ka gid-ing! Bue-a anay ro tablon sa imong mata agod makakita ka it mayad bago mo bue-on ro puling ku imong isigkatawo.”

Ro Batasan it Tawo hay Makita sa Andang Buhat

(Mat 7:16-20, 12:33-35)

43Naghambae pa gid si Jesus, “Ro manami nga kahoy hay owa gabunga it bulok, ag owa man gabunga it manami ro bulok nga kahoy. 44Makilaea ro kada kahoy paagi sa ana nga bunga. Indi ka makapu-pu it higera sa kasiitan, ag indi ka man makabuoe it ubas sa kaarumahan. 45Makaruyon man ro tawo. Ro tawo nga may mayad nga kabubut-on hay gahimo man it mayad, ag ro tawo nga may maeain nga kabubut-on hay gahimo man it maeain. Kon ano ro una sa kabubut-on it tawo hay imaw man ro gaguwa sa ba-ba.”

Dapat Natong Pamatian ag Tumanon ro Ginaturo ni Jesus

(Mat 7:24-27)

46Naghambae pa gid si Jesus, “Ham-an it ginatawag ninyo ako nga Ginuo ay owa man kamo nagatuman sa akong ginahambae kinyo? 47Isugid ko kinyo kon sa ano ginakompara ro tawo nga nagapaeapit kakon ag nagapamati ag nagatuman sa akong ginahambae. 48Pareho imaw it nagpatindog it baeay nga nagkutkut it madaeom ag ro pundasyon hay anang ginbangot it mayad sa dalipi. Nagbaha ro suba ag nagbaskog ro sueog ag bumunggo sa baeay, pero owa rato mauyog ay malig-on ro pagkaobra. 49Pero ro nagapamati ku akon nga mga ginaturo ugaling owa man nagatuman kara hay pareho it nagpatindog it baeay nga gintungtung eang nana rato sa eugta nga owa it pundasyon. Pagbaha it suba hay nagbaskog ro sueog ag bumunggo sa baeay. Natumba eagi rato ag nawasak gid.”

Currently Selected:

Lucas 6: akl

Highlight

Copy