Lucas 9

Ginpapanaw ni Jesus ro Anang Dose nga ka Sumueunod Agod Magwali ag Magpangmayad

(Mat 10:1-15; Mar 6:7-13)

1Kaisaea kato, ginpatipon ni Jesus ro dose nanang ka mga sumueunod ag gintaw-an nana sanda it otoridad ag gahom nga magpangsuboe it tanan nga demonyo ag magpamayad it mga baeatian. 2Ana dayon sanda nga ginpapanaw agod magwali parti sa paghari it Dyos sa anang mga sinakpan ag magpamayad it mga masakiton. 3Nagbilin man imaw kanda. Hambae nana, “Ayaw kamo it daea it bisan ano kon magpanaw kamo, bisan baston o bag. Ayaw man kamo it baeon it pagkaon o kwarta o bisan ilislan. 4Kon ginabaton kamo sa sangka baeay, idto eang kamo magdayon hasta nga maghalin eon kamo sa lugar ngaron. 5Kon may hiadtunan kamo nga banwa nga indi magbaton kinyo ro mga pumueuyo, aywani sanda. Ag kon maghalin kamo sa banwa ngaron hay pagpaga ro tapu-tapu sa inyong mga siki bilang tanda nga, sa mata it Dyos hay pareho sanda it mga tawo nga owa nagakilaea kana.” 6Nagpanaw dayon ro mga sumueunod sa mga kabaryuhan ag nagwali ku Mayad nga Balita ag nagpamayad it mga masakiton bisan siin sanda mag-adto.

Naglitik ro Ueo ni Herodes

(Mat 14:1-12; Mar 6:14-29)

7Owa mabuhayi hay habatian ni Herodes#9:7 Si Herodes ngara hay si Herodes Antipas nga unga ni Herodes nga hari tag si Jesus hay eapsag pa eang. nga gobernador#9:7 Sa Griniyego raya hay “tetrarcus” nga puepareho it gobernador. it Galilea ro tanan ngarang ginpang-obra ni Jesus ag naglitik ro anang ueo ay gahinambae ro iba nga nabanhaw 't-a kuno si Juan nga Manogbawtismo. 8Ginahambae man ku iba nga rayang si Jesus hay tag propeta anay kuno nga si Elias nga nagbalik. Ag ro hambae pa gid ku iba hay sambilog kuno imaw ra sa mga propeta kato anay nga nabanhaw. 9Naghambae si Herodes, “Ginpapugutan ko it ueo si Juan nga Manogbawtismo pero sin-o raya ngara nga abo eo't-a ro akong habatian parti kana?” Ngani gusto gid ni Herodes nga makita si Jesus.

Ginpakaon ni Jesus ro Sobrang Limang Libo Paagi sa Anang Gahom

(Mat 14:13-21; Mar 6:30-44; Juan 6:1-14)

10Pagbalik ku mga apostoles halin sa andang panaw, ginsugid nanda kay Jesus ro andang gin-obra. Gindaea dayon nana sanda sa lugar nga maeapit sa banwa it Betsaida agod sanda-sanda eang idto. 11Pero kaabo nga mga tawo ro nakasayod nga nagpanaw sanday Jesus ag nag-aeapas 't-a sanda. Pag-abot nanda kon siin sanday Jesus hay gin-abi-abi nana sanda ag ginsinugiran parti sa paghari it Dyos ag ana nga ginpamayad ro mga nagamasakit. 12Tag hapon eon hay nagpaeapit kay Jesus ro anang doseng ka apostoles ag naghambae, “Mayad siguro nga papanawon eon naton ro kaabo ngara nga mga tawo idto sa mga baeay sa kaumahan ag sa kabaryuhan sa libot, agod makabakae sanda it pagkaon ag makakita sanda it madayunan ay owa it kabaeayan sa lugar ngara.” 13Pero nagsabat kanda si Jesus, “Kamo mismo ro magtao kanda it pagkaon.” Nagsabat sanda, “Limang ka tinapay ag daywang ka isda gid lang ro pagkaon ngara iya, mageuwas eang abi ron kon magpanaw kami ag magbakae it pagkaon para sa kaabo-abo ngarang tawo.” 14Ginhambae nanda ron ay mga limang libong ka eaki ro idto.#9:14 May mga bayi ag mga unga man idto. Ginsugo ni Jesus ro anang mga sumueunod, “Papungkua ninyo ro mga tawo sa hilamunon it mga tig 50 ro kada grupo.” 15Gintuman nanda si Jesus ag nagpungko dayon ro tanan nga mga tawo. 16Tapos, ginbuoe ni Jesus ro limang ka tinapay ag daywang ka isda. Nagtangda imaw sa eangit ag nagpasaeamat sa Dyos. Ginpihak-pihak dayon nana ro mga tinapay ag isda ngato ag gintao sa anang mga sumueunod agod ikapanueupod sa kaabo ngato nga mga tawo. 17Nagkaon sanda tanan hasta nagkaeabusog. Pagkatapos hay gintipon ku mga sumueunod ro mga habilin nga tinapay ag isda ag nakatipon sanda it dose ka kaing.

Ginpahayag ni Pedro nga si Jesus ro Maneueuwas nga Ginpromisa it Dyos

(Mat 16:13-20; Mar 8:27-30)

18Isaeang adlaw nga nagpangamuyo nga isaeanhon si Jesus, idto ro anang mga sumueunod sa ueu-unahan. Pagkatapos nana it pangamuyo, ginpangutana nana sanda, “Sin-o kuno ako kon sa mga tawo?” 19Nagsabat sanda, “May gahambae nga si Juan nga Manogbawtismo ka kuno. Kon sa iba ma't-a, ikaw kuno hay kat si Elias anay. Sa iba pa gid hay may nabanhaw nga isaea sa mga propeta man kato anay.” 20Ginpangutana nana sanda, “Hay kon kinyo, sin-o ako?” Nagsabat si Pedro, “Ikaw ro Maneueuwas nga ginpromisa it Dyos.” 21Ginbilinan gid sanda ni Jesus nga indi rato igsugid bisan kanyo.

22Naghambae pa gid imaw, “Ako nga Unga it Tawo hay dapat gid nga mag-antos it abo nga kalisod ag indi pagpatihon ku mga pinuno it mga saserdote, mga maestro it Kasuguan ag ku kaibahan nandang mga lider. Pagapatyon ako pero banhawon man dayon pagkatatlong adlaw.”

Dapat Haom Kita nga Mag-antos it Kalisod ag Bisan Mamatay Dahil sa Pagsunod kay Jesus

(Mat 16:24-28; Mar 8:34–9:1)

23Tapos, naghambae si Jesus sa tanan nga nagapaeamati kana, “Kon sin-o ro naila nga mangin sumueunod nakon hay dapat nga talikdan nana ro anang kaugalingon nga mga handom ag gusto, ag dapat nga haom imaw nga mag-antos bisan pa mag-atubang imaw it paghingabot ag kamatayon por dahil sa anang pagsunod kakon.#9:23 Sa Griniyego, raya hay “pas-anon ro anang krus ag magsunod kakon.” Ro sambilog pa nga puydi nga mangin kahueugan kara hay dahil ro krus hay ginagamit sa pagpatay sa mga kriminal, pareho man nga aton nga ginaeansang sa krus ag ginapatay ro atong mga handom ag gusto kon aton ron sanda nga ginatalikdan agod tumanon ro pagbuot it Dyos. 24Ro bisan sin-o nga naila nga magsunod sa ana eang nga gusto sa anang kabuhi hay mamatay man gihapon ag pinahan sa impyerno. Pero ro bisan sin-o nga magsakripisyo ku anang gusto agod sundon ro akong pagbuot hay makabaton it kabuhi nga owa it katapusan. 25Ano pa abi ro pueos kon mangin ana it tawo ro tanan nga iya sa kalibutan, kon ro kabaylo man karon hay pinahan imaw sa impyerno hasta sa owa it katapusan? 26Kon ikahuya ninyo ako ag isikway ro akong ginaturo, isikway ko man kamo kon magbalik Ako nga Unga it Tawo. Sa akon nga pagbalik iya sa kalibutan hay may akon nga grabi nga kasilaw ku akon nga Ama ag ku anang mga balaan nga anghel. 27Matuod rang ginahambae kinyo nga may iya kinyo nga indi gid mamatay hasta indi nanda makita ro paghari it Dyos sa anang mga sinakpan.”#9:27 Hambae ku iba, raya hay napatungod sa pag-abot ku Espirito Santo ku Kaadlawan it *Pentecostes ag sa mga sari-saring milagro nga mabasa naton sa libro it Mga Binuhatan.

Nag-iba ro Itsura ni Jesus

(Mat 17:1-8; Mar 9:2-8)

28Pagkataliwan it mga waeong adlaw nga ginhambae ra ni Jesus, nagsaka imaw sa bukid agod magpangamuyo. Gindaea nana sanday Pedro, Juan ag Santiago. 29Tag nagapangamuyo si Jesus hay nag-iba ro itsura ku anang uyahon. Ro anang eambong hay nangin kaputi-puti ag kasilaw-silaw. 30Ag gulpi eang dayon nga may daywang ka tawo nga nagpakita nga nagapakighambae kana. Ro daywa ngato hay sanday Moises ag Elias. 31Kasilaw-silaw gid-a sandang daywa. Nagaistorya sanda kay Jesus parti sa anang kamatayon nga idto matabo sa Jerusalem sa indi magbuhay agod tumanon ro kabubut-on it Dyos. 32Hamuok gid ro tueog ni Pedro ag ku anang mga kaibahan pero habugtaw sanda it gulpi. Hakita nanda nga kasilaw-silaw si Jesus pati man ro daywa nga kaibahan nanang nagatindog. 33Tag nagabueag eon kay Jesus ratong daywa, naghambae si Pedro kay Jesus, “Sir, mayad ngani ay iya kami. Mayad siguro maobra kami it tatlong ka panilungan. Sambilog para kimo, sambilog para kay Moises ag sambilog man para kay Elias.” Matsa owa sa paino-ino ni Pedro ro ana ngatong ginhambae. 34Tag nagahambae pa imaw, gintabunan sanda it daeaura ngani hinadlukan sanday Pedro. 35Ag may limog dayon nga naghambae halin sa daeaura, “Daya ro akong unga. Imaw ro akong pinili. Pamati kamo kana it mayad.” 36Pagkatapos it ratong hambae, owa eon dayon sanda it ibang hakita kundi si Jesus eang. Owa gid sanda it ginsugiran ku anda ngatong hakita hasta nga owa pa nabanhaw si Jesus.#9:36 Sa Griniyego, raya hay “sa ratong mga inadlaw” pero mabasa sa Mat 17:9 ag Mar 9:9 nga ro buot hambaeon kara hay hasta owa pa nabanhaw si Jesus.

Ginpamayad ni Jesus ro Sangka Unga nga Ginsudlan it Maeain nga Espirito

(Mat 17:14-21; Mar 9:14-29)

37Pagkaaga kato, pagkapanaog ni Jesus ag ku anang tatlong ka sumueunod halin sa bukid, kaabo-abo nga mga tawo ro nagsueang-sueang kana. 38Tapos, sambilog sa mga tawo idto hay nagtawag kay Jesus ag naghambae, “Maestro, kaeuy-i man ro akong unga nga eaki! Bugtong ko man lang imaw ra nga unga. 39Permi imaw nga ginaatake it maeain nga espirito ag gulpi eang dayon imaw nga nagasiyagit ag ginapawaeas imaw ag nagabuea ro anang ba-ba. Haeos indi imaw pag-aywanan ku maeain nga espirito ag mat binakoe eon dayon ro anang eawas. 40Nagpakitluoy ako sa imong mga sumueunod nga subueon nanda ro maeain nga espirito sa eawas ku akon nga unga pero indi nanda masarangan.” 41Naghambae si Jesus, “Abi gid-a ro mga tawo ngara makaron. Owa pa't-a gihapon kamo nagatuo kakon ag mga balingahag gid-a kamo it paino-ino! Hasta hin-uno pa't-a ako mag-iba kinyo bago kamo magtuo kakon? Hasta hin-uno pa't-a ako magtiniis kinyo?” Ginhambae dayon nana ro tatay ku unga, “Abi, daeha ro imong unga iya kakon.” 42Tag nagapaeapit kay Jesus ro unga, ginpatumba ra it demonyo ag ginpawaeas. Pero ginsugo ni Jesus ro maeain nga espirito ngato nga magguwa sa unga. Pagkatapos, nagmayad eon dayon ro unga ag gin-intrigar ra ni Jesus sa anang tatay. 43Ag tanan nga mga tawo idto hay hangawa gid sa pwerti nga gahom it Dyos.

Nagsugid it Uman si Jesus Hanungod sa Anang Pag-antos, Kamatayon ag Pagkabanhaw

(Mat 17:22-23; Mar 9:30-32)

Ag samtang nagakinaguea pa ro mga tawo sa tanan nga ginahimo ni Jesus, naghambae imaw sa anang mga sumueunod, 44“Tamnan gid sa inyong paino-ino ro ihambae ko ngara. Ako nga Unga it Tawo hay traiduron ag itugyan sa mga manogdumaea.” 45Pero owa sanda kaeubot ku ginhambae ngato ni Jesus tungod ginlipod rato kanda agod indi nanda maeubtan. Natahap man sanda magpangutana kon ano ro kahueugan kato.

Ro Pinakamapainubuson ro Importanti sa Mata it Dyos

(Mat 18:1-5; Mar 9:33-37)

46Ku ulihi, nagbinais ro mga sumueunod ni Jesus kon sin-o gid kanda ro pinakaimportanti. 47Hasayran ni Jesus ro una sa andang paino-ino. Ngani ginhakwat nana ro sangka unga ag ginpatindog sa anang euyo. 48Naghambae dayon imaw, “Ro bisan sin-o nga nagadipara sa nagatuo kakon nga mapainubuson pareho ku unga ngara hay ako gid-a ro anang ginadipara. Ag ro bisan sin-o nga nagahimo karon kakon hay ana man nga ginahimo ron sa Dyos nga nagpadaea kakon. Ngani kon sin-o ro pinakamapainubuson kinyo tanan hay imaw 't-a ro importanti.”

Kon Sin-o ro Owa Nagakuntra kay Jesus hay Kaibahan Nana

(Mar 9:38-41)

49Tapos, naghambae si Juan, “Sir, nakakita kami it tawo nga nagagamit ku imong ngaean sa pagsuboe it mga demonyo. Ginbawaean 't-a namon imaw ay bukon man abi naton imaw it kaibahan.” 50Pero nagsabat si Jesus, “Ayaw ninyo imaw pagbawaei tungod ro owa nagakuntra kinyo hay kaapin ninyo.”

Ginbalibaran Sanday Jesus sa Sangka Baryo it mga *Samaritano

51Tag madali lang mag-abot ro adlaw nga magakayab si Jesus sa eangit, nagdesidir imaw nga mag-adto sa Jerusalem. 52May ginpauna imaw idto sa sangka baryo it mga *Samaritano agod mag-usoy it andang madayunan. 53Pero indi magbaton idto ro mga tawo kay Jesus ay sa Jerusalem imaw nagapaadto.#9:53 Owa abi nagahilibaot ro mga Samaritano ag ro mga Judio ngani ginapakitaan ku mga Samaritano it maeain nga buot ro mga nagaagi sa andang lugar nga idto paadto sa Jerusalem. Isaea pa hay kon sa mga Samaritano hay ro Jerusalem hay bukon it tama nga lugar nga simbahan (basaha sa Juan 4:20). 54Pagkasayod ku anang daywang ka sumueunod nga sanday Santiago ag Juan nga indi kanda magbaton ro mga tawo, ginhambae nanda si Jesus, “Hay ano, Ginuo, paueanan namon sanda it kaeayo halin sa eangit agod magkaeatugbang sanda?”#9:54 Ro ibang Griniyego nga kasueatan hay ginsugpon raya: “pareho ku gin-obra ni Elias.” 55Pero binalikid sanda ni Jesus ag pinangisgan.#9:55 Ro ibang Griniyego nga kasueatan hay may ginsugpon nga “hambae nana, ‘Owa kamo kasayod kon ano ro kinaiya ku espirito nga inyong ginasunod. Owa ako nga Unga it Tawo nag-adto iya para samaron ro kabuhi it tawo kundi euwason ron.’ ” 56Tapos kara hay nagdiritso lang sanda sa ibang baryo.

Ro mga Dapat Isakripisyo ku Gustong Mangin Matuod nga Sumueunod ni Jesus

(Mat 8:18-22)

57Tag nagapinanaw sanda, may eaki nga naghambae kay Jesus, “Mamunot ako kimo bisan siin ka mag-adto bilang isaea sa imong mga sumueunod.” 58Nagsabat si Jesus, “Ro mga sapat sa taeon hay may buho nga ginaulian. Ro mga pispis hay may pugad, pero ako nga Unga it Tawo hay owa gid it bisan maeugban.”

59Tapos, may sangka tawo nga ginhambae ni Jesus, “Musyon. Sunod kakon.” Pero nagsabat ratong tawo, “Ginuo, gusto ko nga mangin sumueunod nimo, pero mauli anay kunta ako ag ipaeubong ro akong ama.”#9:59 Posible nga ro ama ku tawo ngato hay buhi pa ugaling hay magueang eon ag ro gustong hambaeon ku tawo ngato kay Jesus hay kon owa eon ugaling ro anang ama hay mangin sumueunod eon imaw ni Jesus. 60Nagsabat si Jesus, “Pabay-i ro mga patay sa panueok it Dyos#9:60 Mga patay sanda sa panueok it Dyos dahil owa sanda nahakat magpamati sa ginaturo ni Jesus. nga mageubong ku andang patay. Pero ikaw't-a hay magpanaw ag magwali parti sa paghari it Dyos.” 61May isaea pa gid nga naghambae kay Jesus, “Ginuo, mamunot ako kimo pero mauli anay ako sa amon agod mageaong.” 62Pero naghambae si Jesus kana, “Ro tawo nga naila magsunod kakon pero perming nagabalik ro anang isip sa anang haaywanan nga pangabuhi hay parehas it tawo nga nagaarado pero nagainadwing. Ro tawo nga parehas kara hay bukon it bagay nga itapoe sa mga sinakpan it Dyos.”

Currently Selected:

Lucas 9: akl

Highlight

Copy