Mateo 12

Eabaw pa si Jesus sa Adlaw it Inogpahuway

(Mar 2:23-28, 3:1-6; Luc 6:1-5)

1Isaeang ka *Adlaw it Inogpahuway, si Jesus ag ro anang mga sumueunod hay nag-agi sa taeamnan it trigo.#12:1 Ro trigo hay tanom nga haeos pareho it paeay ro dahon ag bunga. Nagutom ro anang mga sumueunod ngani tag nagaagi sanda hay nagpangutoe sanda it trigo ag anda rato nga ginkukut. 2Pero may idto nga mga Pariseo nga nakakita kanda ag ginhambaean nanda si Jesus, “Tan-awa tuo ring mga sumueunod. Nagaobra't-a sanda it bawae sa Adlaw it Inogpahuway.”

3Nagsabat si Jesus, “Owa maton ninyo habasa kon nag-alin anay si Haring David ag ro anang mga kaibahan kat owa sanda it makaon. 4Nagsueod imaw sa Baeay it Dyos#12:4 Ro Baeay it Dyos hay torda nga gin-obra nga simbahan anay ku mga Judio. kato ag ginpangayo idto ro tinapay nga haead sa Dyos ag kinaon na rato. Gintaw-an man nana kato ro anang mga kaibahan maskin nagahambae ro atong Kasuguan nga ro mga saserdote eang ro makakaon ku rato nga tinapay.#12:4 Lev 24:9 ag 1 Sam 21:1-6. Bisan gin-obra rato nanday David hay owa sanda nagkasaea sa panueok it Dyos. 5Owa man maton ninyo habasa sa Kasuguan nga ro mga saserdote nga nagatrabaho sa Templo sa Adlaw it Inogpahuway hay nagaeapas sa sugo nga indi dapat magtrabaho ro mga tawo sa adlaw ngaron. Pero bisan nagatrabaho sanda sa Templo sa adlaw ngaron hay owa sanda ginabilanga it Dyos nga nagkasaea sanda.#12:5 Owa nagakasaea ro mga saserdote tungod ginsugo it Dyos nga magtrabaho sanda sa Adlaw it Inogpahuway (Num 28:9-10). 6Pero ginahambae ko kinyo nga may iya makaron nga mas pa kaysa sa Templo.#12:6 Ro ginapatungdan ni Jesus kara hay imaw mismo. 7Nasueat sa Kasueatan nga naghambae ro Dyos, ‘Mas mahaega kakon ro inyong pagkaeuoy sa inyong isigkatawo kaysa sa inyong paghaead it sapat agod tumanon eang ro Kasuguan.’#12:7 Hos 6:6. Kon haeubtan ninyo ro kahueugan karon hay owa eon kunta ninyo pagkondenaha rayang mga inosente sa inyo nga ginapabangod. 8Owa sanda nagkasaea tungod ako't-a nga Unga it Tawo ro may otoridad nga maghambae kon ano ro puydi ag indi puydi nga obrahon kon Adlaw it Inogpahuway.”

Ginpamayad ni Jesus ro Sangka Tawo nga Kimpay ro Alima sa Adlaw it Inogpahuway

(Mar 3:1-6; Luc 6:6-11)

9Pagkatapos, naghalin si Jesus sa taeamnan ngato it trigo ag nag-adto sa sinagoga idto sa ratong lugar. 10May idto nga tawo nga kimpay ro anang alima. May mga Pariseo man idto nga nagausoy it sil-an nga ikaakusar si Jesus. Ngani ginpangutana nanda imaw, “Puydi baea sa atong Kasuguan ro magpamayad it masakiton kon Adlaw it Inogpahuway?”

11Nagsabat si Jesus, “Sin-o iya kinyo ro indi magpatakas ku anang karnero nga nahueog sa kutkut sa Adlaw it Inogpahuway? 12Mas pa gid ro haega it tawo kaysa sa sapat ngani puydi't-a ro paghimo it mayad sa atong isigkatawo bisan Adlaw it Inogpahuway.” 13Ginhambae dayon nana tag kimpay ngato, “Untaya ro imong alima.” Gin-untay ku tawo ro anang alima ag nagmayad eagi rato ag owa eon it diperensya pareho ku sambilog pa nanang ka alima. 14Pumanaw eagi ro mga Pariseo ag ginplanuhan kon paalin patyon si Jesus.

Si Jesus ro Pinili it Dyos

15Pero sayod ni Jesus kon ano ro andang plano ngani naghalin imaw sa rato nga lugar. Kaabo nga mga tawo ro nagsunod kana ag ana nga ginpamayad ro tanan nga may masakit 16pero ana man sanda nga ginbilinan nga indi igpamalita ro parti sa anang mga ginpang-obra.#12:16 Owa abi imaw naila nga mag-adto eang kana ro mga tawo agod hipamayad eang sanda. Ag owa man imaw naila nga obrahon nanda imaw nga hari dahil makahimo imaw it mga milagro. 17Ngani natuman ro ginsueat ni Propeta Isaias nga,

18 “Hara ro akon nga ginpili nga magserbi kakon. Imaw ro akong palangga ag nalipay gid ako it duro kana. Pagamhan ko imaw permi sa akong Espirito ag ipahisayod nana sa tanan nga rasa it tawo kon paalin sanda mangin matarong sa panueok it Dyos.

19 Indi imaw makigdibati ag makigsilinggitan. Indi man imaw mabatian sa mga kalye nga nagadiniskurso it mabaskog.

20 Indi nana pag-utdon ro tigbaw nga basag eon ag indi nana pagpaengon ro nagakilo-kilo nga iwag. #12:20 Nagakahueugan ra nga maeueoy-on ag mabuot imaw sa mga maeuya ro pagtuo.

Padayunon nana ro pagkamaeueoy-on ag pagkamabuot hasta nga ro tanan nga kaeainan hay maperdi ku pagkamatarong nga ginatao it Dyos.

21 Ro tanan nga rasa it tawo hay magasalig kana nga ana sanda nga euwason.” # 12:21 Isa 42:1-4.

Ro Gahom ni Jesus hay Halin sa Espirito Santo Bukon it kay Satanas

(Mar 3:22-27; Luc 6:43-45, 11:14-23)

22Isaeang adlaw, may gindaea kay Jesus nga sangka tawo nga bulag ag apa dahil ginsudlan it demonyo. Ginsuboe ni Jesus sa ratong tawo ro demonyo ag nakahambae ag nakakita eon dayon ro tawo ngato. 23Hangawa gid tanan ro kaabo nga mga tawo nga nakakita ku ay Jesus ngato nga gin-obra ag sinanda, “Raya eon baea ro atong ginahueat nga apo ni Haring David?”

24Pero pagkabati karon ku mga Pariseo hay naghueutikan sanda. Sinanda, “Makasuboe man lang ron it mga demonyo dahil sa gahom ni Beelzebul#12:24 Ro Beelzebul hay sambilog pa nga tawag kay Satanas. nga pinuno it mga demonyo.”

25Sayod ni Jesus ro andang ginapaino-ino ngani ginhambae nana sanda, “Ro kada nasyon nga nagagrupo-grupo ag nagailinaway permi ro mga pumueuyo hay mawasak gid. Makaruyon man ro matabo sa kada banwa ag panimaeay nga perming nagailinaway. 26Ngani kon si Satanas mismo ro nagasuboe sa anang mga sinakpan nga mga demonyo sa mga tawo nga andang ginsudlan hay ginakuntra man nana ro anang kaugalingon. Kon makaruyon hay paalin makapadayon ro anang pagdominar? 27Kon matuod nga nagasuboe ako it demonyo dahil gintaw-an ako it gahom ni Beelzebul, sin-o man ro nagtao it gahom sa inyong mga sumueunod sa pagsuboe it mga demonyo? Ro inyo mismong mga sumueunod ro makasaksi nga saea kamo! 28Pero dahil nga ginsuboe nakon ro mga demonyo paagi sa gahom it Espirito it Dyos, nagapakilaea ra nga nag-abot eon iya kinyo ro oras ku paghari it Dyos sa anang mga sinakpan.”

29Tapos, naghambae pa si Jesus, “Si Satanas hay pareho it sangka makusog nga tagbaeay nga haperdi ag gin-gapos ag puydi eon matakawan ku anang pagkabutang. Ginperdi ko eon si Satanas mawron nga masuboe ko ro ana nga mga demonyo sa mga tawo. 30Ro bukon ko it kaapin hay nagakuntra kakon. Ro owa nagabulig kakon sa pagtipon ku mga tawo hay nagapatapeaag kanda paeayo kakon. 31Ngani ginahambae ko eagi kinyo nga mapatawad it Dyos ro mga tawo sa tanan nandang mga saea ag pag-insulto sa ibang tawo pero ro nagainsulto sa Espirito Santo#12:31 Paagi sa gahom ku Espirito Santo hay ginsuboe ni Jesus ro demonyo sa bersikulo 24 pero ginhambae ku mga Pariseo nga rato hay sa gahom ni Satanas. Rato hay pag-insulto sa Espirito Santo. hay indi pagpatawaron. 32Ro maghambae it kuntra kakon nga Unga it Tawo hay puydi nga mapatawad pero ro maghambae it kuntra sa Espirito Santo hay indi gid mapatawad bisan hasta hin-uno.”

33Naghambae pa gid dayon si Jesus, “Kon sa inyong tan-aw hay sadyaan ro bunga, hambaea't-a ninyo nga sadyaan ro kahoy. Kon sa inyo ma't-a nga tan-aw hay bukon it sadyaan ro bunga, hambaea't-a ninyo nga bukon it sadyaan ro kahoy. Makilaea gid ro kahoy sa ana nga bunga.#12:33 Ginhambae ni Jesus ro mga Pariseo nga magdesisyon kon mauno ro andang pagkilaea kana. Kon makita nanda nga mayad ro anang ginaobra dapat hay maghambae sanda nga imaw hay mayad, bukon it maeain. 34Mga tuso gid-a kamo pareho it sawa!#12:34 Ro sawa sa *disyerto hay tuso gid. Permi sanda masae-an nga patay nga sanga ag gulpi eang dayon nga mangangkit it tawo nga nagaagi. Paalin abi kamo makahambae it mga mayad ay mga maeaot kamo? Kon ano ro una sa kabubut-on hay imaw man ro nagaguwa sa ba-ba. 35Ro tawo nga may mayad nga kabubut-on hay nagahambae it mayad, ag ro may maeain nga kabubut-on hay nagahambae man it maeain. 36Ginahambae ko eagi kinyo nga ro kada isaea hay manabat sa kada owa it sayod nana nga ginhambae pag-abot ku adlaw it paghukom. 37Ro imong mga ginhambae hay gamiton it Dyos sa paghusgar kimo, kon bilangon ka nga inosente o kondenado.”#12:37 Ro mga maeain naton nga ginahambae hay bunga ku atong mga maeain nga ginaisip (basaha sa bersikulo 34 ag Mar 7:21) nga nagatueod katon sa pag-obra it maeain.

Ginpangisgan ni Jesus ro mga Manogdumaea nga Nagatesting Kunta Kana

(Mat 16:1-4; Mar 8:11-12; Luc 11:29-32)

38May idto nga mga maestro it Kasuguan ag mga Pariseo nga naghambae kay Jesus, “Maestro, pakitai abi kami it milagroso nga pamatuod nga pinadaea ka it Dyos.” 39Pero nagsabat si Jesus, “Ro mga tawo makaron nga tyempo hay mga maeain it kabubut-on tungod nagtalikod sanda sa Dyos. Gapangayo sanda kakon it milagroso nga pamatuod kon sin-o gid ako, pero owa it ipakita kanda kundi ro pareho ku natabo kay Propeta Jonas kato anay. 40Si Jonas hay nagtenir it tatlong adlaw ag tatlong gabii sa tiyan it kabahoe-bahoe nga isda ag pagkatapos hay gineuad imaw nga buhi gihapon. Makaruyon man ro matabo kakon nga Unga it Tawo, matenir man ako it tatlong adlaw ag tatlong gabii sa akong eueubngan ag pagkatapos hay mabanhaw dayon. 41Pag-abot ku adlaw it paghukom, magaatubang sa hukom ro mga tagaNineve kaibahan ku mga tawo makaron nga tyempo, ag magahambae sanda nga dapat kamo pinahan. Ham-an? Dahil nagtalikod ngani sanda sa andang mga saea pagwali ni Jonas pero kamo hay owa gid nagatalikod sa inyong mga saea maskin may mas pa kay Jonas iya kinyo. 42Pag-abot ku adlaw it paghukom, magatindog man ag magasaksi kuntra kinyo ro rayna it Seba,#12:42 Sa Griniyego raya hay “Rayna it Sur.” Mabasa ra sa 1 Hari 10:1-13. Ro iba hay nagahambae nga ro dati nga nasyon it Seba hay ginatawag makaron nga Yemen nga maeapit sa Saudi Arabia. Sinana ma't-a ku iba raya hay nasyon it Etiopia makaron. tungod imaw ngani hay nagbiyahe halin pa sa kaeayo-eayo nga lugar#12:42 Ro kaeayuon ku anang ginbiyahe hay mga 2,000 kilometros. agod eang magpamati sa pagturo ku maaeam nga hari nga si Solomon. Pero may mas pa kay Solomon iya kinyo ugaling hay owa gid kamo nagainato sa anang ginaturo.”

Ro Peligro Kon Indi Magbaton sa mga Ginaturo ni Jesus

(Luc 11:24-26)

43Naghambae pa si Jesus kanda, “Kon magguwa sa sangka tawo ro maeain nga espirito hay nagawarang ra sa *disyerto nga owa it tubi ag nagausoy idto it mapahuwayan. Ag kon owa imaw it hikita 44hay mahambae dayon imaw sa anang kaugalingon, ‘Mabalik eon lang ako sa akon anay nga ginhalinan nga tawo.’ Pagbalik nana hay hiabutan nana nga ro tawo ngato nga anang ginhalinan hay pareho it baeay nga owa it nagaistar ag malimpyo eon ag ginpanami rato.#12:44 Ro kahueugan kara hay ro tawo nga ginsubuean it maeain nga espirito hay mayad eon pero owa imaw nagtuo kay Jesus ngani owa nagaistar kana ro Espirito Santo. Puydi imaw balikan ku maeain ngato nga espirito nga nagguwa kana ag puydi man imaw masudlan it iba pa nga maeain nga espirito. 45Tapos, masampit imaw it pito pa gid nga ka espirito nga mas maeain pa kaysa kana. Masueod sanda sa tawo ngato ag idto mag-istar, ngani mangin mas grabi ro sitwasyon ku ratong tawo kaysa sa dati. Makaruyon man ro matabo sa mga maeain nga tawo sa makaron nga tyempo.”

Ro Nagatuman sa Dyos ro Ginakabig ni Jesus nga Anang Matuod nga Pamilya

(Mar 3:31-35; Luc 8:19-21)

46Samtang nagaturo pa si Jesus sa mga tawo, nag-abot ro anang ina ag mga igmanghod. Idto sanda sa liwan ag andang gin-usoy si Jesus ay gusto nandang makighambae kana. 47May nagsugid kay Jesus, “Idto sa liwan si nanay mo ag ro ing mga igmanghod. Gusto nandang makighambae kimo.” 48Nagsabat si Jesus sa tawo nga naghambae kana, “Huo, una matuod sanda pero sugiran ta kon sin-o ro akon nga ina ag mga igmanghod sa panueok it Dyos.” 49Tapos, ginturo ni Jesus ro anang mga sumueunod ag naghambae, “Raya ro akong ina ag mga igmanghod. 50Ro bisan sin-o nga nagatuman sa pagbuot ku akon nga Ama sa eangit hay ruyon ro akong ginakabig nga ina ag mga igmanghod nga eaki ag bayi.”

Currently Selected:

Mateo 12: akl

Highlight

Copy