Muuduko 22
22
Gooti tool Eburaiyamollu, “Gumoro kwolaiyo Aisakol miyo'mo doromiroudapiyono,” kuudoka tovinokwono
1 #
Hib. 11:17-19
Toruda'ai lukomgu Gooti tool Eburaiyamollu yamju wiyoganyo'moneyokwe aro adomarokaikono. “Eburaiyamoloo.” Toro tovi Eburaiyamol wuu'nyuno sumaiyokwe aro kuudokaikono. “Anyugeyo.” Kuudokaikono.
2Toro kuudoka tovi Gooti tool kuudokaikono. “Guu kwolaiyo yiuno Aisakolnodokwekugono. Toro toolluno kalo buuropino gujunodowodo su toollu guu momworaro'bi Mooraiyo tomuuno domokavlavono. Toro mokavlavo'bi muumuudo aguduuwallumi pwollu muunyu toru sulo tokwe nyuroudapiyo'mo dukwagupto puruv luvagilovo'bi gumoro kwolaiyo su toollu miyo'mo doromiroudapiyono.” Kuudokaikono.
3Toro kuudoka tovi Eburaiyamol wuu'nyuno sumaiyokwe lomwo iru'mago toga dukavo'no kado plaiyo'moneyokwe gami doonki pwollu amollovrowosokaikono. Toro mollovrowosuno sumaiyokwe gamoro womdokwe a'mwo pworake'aro gamoro kwolaiyo Aisakeke'aro toorai momwora'no sumaiyokwe noromiroudapiyo'mo duko pugai adovamnojokaikono. Toro dovomnojomwora'no sumaiyokwe Gooti toolluro kuuduuwalloka toru'no avlavoporogano. 4Toro tooro plaino plaino sumaveyokwe iruko pullal me'no uuwolo'no'no aikomguda'ai iruko naba 3 tollugwoji kuuno plaino sumaveyokwe toga Eburaiyamol muumuudo toollu manyu toruda'ai kwonokaikono. 5Eburaiyamol toro wonyuno sumaiyokwe gamoro womdokwe toorallu aro kuudokaikono. “Nuuge'aro mi kwolaiyo tooke'aro tonumdonal aikomgu yagwoto illogalowosi Gooti toollu ilomoropi yowosunumdonakono. Toro illogalodowosure toga kevu doonki akaike akaru domwalojulo.” Kuudokaikono.
6Toro wuujuno sumaiyokwe Eburaiyamol noromiroudapiyo'mo duko tov Aisakollu ameroomwosokaikono. Toro meroomwosuno sumaiyokwe toga Eburaiyamol dukworoka tokwe'aro kwallu'mopto tokwe'aro tovallu momwora'no sumaiyokwe avlavolonumdakono. 7Toro tonumdal puuto tomuu plaino sumaleyokwe toga Aisakol gami ganumiyago toollu adomarokaikono. “Nyunumiyago aikuno.” Toro kuudoka tovi Eburaiyamol kuudokaikono. “Oo mi kwolaiyoloo, buro'nyo'mekudeyo?” Kuudokaikono. Toro kuudoka tovi Aisakol aro samuugojokaikono. “Nuu dukworoka tokwe'aro duko nyureyo'mo tokwe'aro tovallu noonmwakono. Toro kuvi kuruv noromiroudapiyo'mo sipsip bwopto toolno'gwowi gadomuu domwallo?” 8Toro samuugojoka tovi Eburaiyamol kuudokaikono. “Mi kwolaiyoloo, Gooti gavnokwe tool sipsip nyuroudapiyo'mo toollu nonakullabwonekono.” Kuudokaikono. Toro yajunyuno sumaleyokwe avlavolonumdakono.
9 #
Jms. 2:21
Toro tonumdal plaino sumaleyokwe Gooti toolluro kuuduuwalloka toru ai'movolonumdakono. Toro ki'mo'mno sumaleyokwe Eburaiyamol Gooti toollu wiroudapiyo'mo dukwagupto puruv sulo tokwe aluvagilovokaikono. Toro luvogilowosuno sumaiyokwe dukwagupto tovi muunyu toru duko ton silloullosokaikono. Toro ino sumaiyokwe Aisakollu wuulo tokwe meroso'no duko tovi muunyu toru sulomoga'bworosokaikono. 10Toro ilomoga'bworosuno sumaiyokwe Eburaiyamol gami kwallu'mopto tov maro'no gami kwolaiyo toollu romiyo'moneyokwe sukolomworarokaikono. 11Toro ikolomwora'duke toga Gooti Yawelluro ensel tool muunyu kai'muuda'ai deko aro kwoloduuwopiyabokaikono. “Eburaiyamoloo. Eburaiyamoloo.” Toro kuudoka tov Eburaiyamol kuudokaikono. “We, anyugeyo.” Kuudokaikono.
12Toro kuudoka tovi ensel tool aro aduumjukurokaikono. “Kwolaiyo su tool kaiyako puru'monodo kuruv nomaro'jo. Aki toro toollu guu maromiyosubinono.” Aduumjukurokaikono. Toro duumjuku'no sumaiyokwe kuudokaikono. “Guu kwolaiyo pwolnodokwe tooku gumi kwolaiyo su toolluno kalo nokwo amamwonyo'bujukekugono. Toro kweku kuruv aga noromiyo'mo yodore tookuji gwonodum kuudo saguu'mekugono. Oo akal yiuwi'nokai toga Gooti toollu uumjunodowodoldeyo. Kuudo saguu'mekugono.” Gooti Yawelluro ensel tool toro kuudokaikono.
13Toro wuudoduke tovi Eburaiyamol wuu'nyuno sumaiyokwe sumdo yenomollo'no kwonoka tov sipsip kwolo pwol i'jurako te gamoro koomwo tovi'aro abuuruubidapiyoka toollu kwonokaikono. Toro kwonoka toollu galoma'no sumaiyokwe Gooti toollo'mo kwiroudapiyokaikono. Toro kwiroudapiyoka tool gamoro kwolaiyo Aisakolluro aiko toru'no amarokaikono. 14Toro kwiroudapiyoka su toru'no yovo tov Eburaiyamol aro sowarokarukono. “Gooti Yawel nonyabwonorukono.” Sowarokarukono. Toro te aga kuga kuruv aro dodupudorukono. “Oo Gooti Yawelluro muumuudo toollu muunyu toru nekullabodowodorukono.” Kuuno dodupudorukono.
15Toruda'ai Gooti Yawelluro ensel tool muunyu kai'muuda'ai Eburaiyamollu aki aiko te deko kwoloduuwopiyabokaikono. 16#Hib. 6:13,14Toro tool aro kuudokaikono. “Gooti Yawel gumino aro agudadopiyo. Guu gumi kwolaiyo pwolnodokwe tooku kalo amamwonyo'bujukekugono. Toro kweku kuruv mi ilaiyo to'no anumjunmado tovino tov nuvnokwe toonyu subuu'yamju aro adagujumono. 17#Hib. 11:12Sugudo pun nogubwemonyugono. Toro agubwemi tovida'ai gumi jukweyago kwolaiyo sawosunpi tooro bwotonyago kuunodo imo'nupinorogano. Toro tooro muunyu kai'muuda'ai sullugabwo wo'dupudo toorobusuko imo'nupinorogano. Aki soolwara wolo tomuuda'ai we'gullugulludo wo'dupudo tonbusuko imo'nupinogano. Toro imo'nopi aki kemi ikomago toorai movomjapiyopi kemoro wagwolago tonyu nomapinorogano. 18#Krt. 3:25Aki gumoro jukweyago kwolaiyo pwollu moro sugudo tov uubwemovla'mwalmonyugono. Toro uubwemovla'mdo'mure tovida'ai yiuwi'nokai a'mwo abolo kwako akavi mwalodupudo kun kuruv nomapinokwono. Guu moro yogalo tovi kaduko yodum anumjunmado tovino tov toro imonyugono. Gooti Yawel toro agudadopiyo.” Ensel tool Eburaiyamollu toro kuudokaikono.
19Toruda'ai Eburaiyameke tonumdal gami womdokwe toorallomno aikomgu kwolalonumdakono. Toro wolai'mo'mno sumaleyokwe yiuwi'nokai tooro Biyasiba'no aikomgu aboporogano. Toro bino sumaveyokwe Biyasiba toru abomwaloporogano.
Nahoorolluro sawosunoka toorainokwono
20Toruda'ai lukomgu Eburaiyamol kuuguudo aro tovi kuu'nokaikono. Gumi jugwai'yago Nahoorolluro abolo Milkav kwolaiyo pworai somarokakwono. 21-22Toro tooraino yovo tov muudu'no somaroka tool Uusolekono. Aki kwolaiyo su toolluro gagwai'yago tooro Buusoleke Aramollu ganumiyago Kemuuweleke Kesetoleke Hasoo'weke Pildaseke Jitilapeke Betuuweleke toorai somarokakwono. 23A'mwo Betuuwelol su tool Rebekavi ganumiyagekono. Toro te Nahoorolluro abolo Milkav 8-pela muugunyo su toorai toro somarokakwono. Aki Nahoorol Eburaiyamollu gagwai'yagekono. 24Aki Nahoorolluro abolo puvino yovo tov Ruumaveyokwono. Toro tov kwolaiyo aro toorai somarokakwono. Tebaike Gahameke Tahaseke Maka'weke toorai somarokakwono.
Currently Selected:
Muuduko 22: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
