Joon 14

Jisasol gami Ganumiyago toollomno illo'moneyokwe puuto imo'nodowodo tovinokwono

1Toruda'ai Jisasol gami uumjunyokwe toorai aro kuudokaikono. “Kemoro poowokalago ton jul'nyo maikworo'jo. Kevu Gooti toolluno kuudo uubweyodupudo toorekul nuu kwonyuno kuruv kuudo neya donubweyogaulo. 2Nuu muunyu kai'muuno ila'mi kemi ago tov nyullovurovaikubwemwalmonyugono. Moro Nyunumiyago toolluro ago muunyu akai'muu kwosuko su toru noulomwallo'moneyokwe tov bwotonyago adovorojosungiko ton wo'dupudorukono. Ago su towai mworowo'jujuko'mno'juki nuu kuu'maiyo toru'no me'no aikudo'mujukonyugono. Toro kuvi kuruv ago su towai nooso. 3Nuvnokwe toonyu ago su towai me'no sullovurovaikubwemi tov aikomgu kuvinono noolamonyugono. Su toro kwolami toga kemi wolekumorabo'mi nuuge ilomwallo'moneyokwe nekumokailamonyugono.#1Krn. 15:51-52; 1Ts. 1:3b 4Aki moro ilamo su tomuuno puuto tovino kevu kuudo nyau'mwakovo.” Kuudokaikono.

5Jisasol toro kuudoka toga Toomasol aro kuudokaikono. “Agutoloo, nevu gumoro ilabino su tomuuno kuudo miyau'mwakuuwono. Toro tovino tov su toro tomuu ilai'meyo'moneyokwe puuto su tovino adadomgu'aro kuudo youromaranonoldeyo?” Kuudokaikono. 6#Jn. 10:28; 1Tm. 2:5-6; 1Jn. 5:12Toro kuudoka tovi Jisasol aro kuudokaikono. “Nuvnokwe toonyu puutonyugono. Aki nuu yogalo nebal'nodonyugono. Aki nuu aiyo yiunokuudo mujomwekovlaiyo'moneyokwenyugono. Toro te a'mwo pwolnodo kwol kuruv moro Nyunumiyago toollomno biyo'mo kwino'ji tool puuto pumgu'aro abwo'ji tov ku'nono mabai'mowonekono. Toro kwol kuruv yiuno numi'aro abwo'ji toolno'gwowi nokwo bai'mowonekono. 7Kevu numino kuudo po'dogalo souronumaropujuko'mno'juki kevu moro Nyunumiyago kwolluno kuruv kuudo nokwo souromaropujukorekikono. Toro kuvi kuruv kevu mi sumdo me'no nuwonodupudo tovi'aro mi Nyunumiyago kwollu kuruv me'no wonodupudorekikono. Toro te agada'ai kevu kwolluno kuudo nyouromo'movla'mwalpinorekikono.” Kuudokaikono.

8Jisasol toro kuudoka tovi Filipol aro kuudokaikono. “Agutoloo, gumi Junumiyago toollu donekuduuwallono. Guu kuvinono anekuduuwallubi tov nemoro ilaiyo nekullunodowodo tonyu yiuno'no itovanekubwebinekugono.” Kuudokaikono. 9Toro kuudoka tovi Jisasol kuudokaikono. “Filipoloo, nuvu guuge manyu toga me'no mwalodowolo kuvi kuruv guu numino kuudo po'dogalo miyouronuma'mwakudekugono. Neya duu'nono. A'mwo pwol mi anuwono'ji su tool moro Nyunumiyago kwollu kuruv me'no wonodowodekono. Toro te guu aro madubinono. “Oo gumi Junumiyago toollu donekuduuwallono.” Madubinono.

10Guu mino aro tovino neya donubweyono. Mi Nyunumiyago toollu uuguro'mwonyodumdonyugono. Aki mi Nyunumiyago su tool numi nuguro'mwonyodowodekono. Moro yogalo ikudodumdo ton nuvnokwenyuro tovida'aiyonmaiyo. Toro kuvi kuruv yogalo ikudodumdo su ton mi Nyunumiyago nuguro'mwonyodowodo toolluda'aiyogano. Mi Nyunumiyago su tool moro ato tovi'aro gamoro womdo ton yodowodekono.

11Toro te kevu mino aro tovino kuudo neya donubweyulo. Nuu mi Nyunumiyago toollu uuguro'mwonyodumdonyugono. Aki moro Nyunumiyago su tool numi nuguro'mwonyodowodekono. Mino tov su toro neya donubweyulo. Toro kuvi kuruv moro aikudumo su tovi kuudo muubwepi to'gwowi moro duuwallo jurogudo ikuduuwallodumdo tonyu me'no wonoma'dupudo tovino tov kuudo neya donubweyogaulo.

12Nuu nebal'no kuunodo aro ikudumo'mokwono. A'mwo pwol mino kuudo anubweyo'ji su tool moro duuwallo jurogudo yodumdo ton aval'no nomomjumovla'mwalonekono. Aki a'mwo mino kuudo anubweyo'ji su toolluro duuwallo jurogudo pun moro yodumdo akanyu nuuwolopinogano. Nuu mi Nyunumiyago toollomno sulami tovino tov su toro nokwo momjumovla'mwalonekono. 13Kevu moro yovo tovida'ai buro'nyo buro'nyodeyo tonyuno mi Nyunumiyago toollu kuudoganpi tov nuvnokwe toonyu kuvinono imonyugono. Moro Nyunumiyago su tool nuu gamoro Kwolaiyo toonyuro yodo'mure tovida'ai yovo aguto ma'mwalono'moneyokwe tovino'mo kuvinono imonyugono. 14Toro te kevu buro'nyo buro'nyodeyo tonyuno moro yovo tovida'ai anyudoganpi tov nuu kuvinono imonyugono.”

Jisasol Gooti toolluro Kuullo toollu wolomoropiyabiyo'moneyokwe adoka tovinokwono

15Aki Jisasol aro kuudokaikono. “Kevu mino kalo buuropino aikulluno'ji tov moro yogalo tonyu neya duumjunogaulo. 16Nuu mi Nyunumiyago toollu wuudogano'mi kemi ikullo'mwojo'moneyokwe pwol nomekwopiyabwonekono. Toro amekwopiyabwo'ji su tool kevuge mwalowo'ji yiunokuudo mujomwekovla'mwalonekono. Toro amekwopiyabwo'ji su tool Gooti toolluro Kuullo tookono. 17#Ef. 2:22Toro te Kuullo su tool Gooti toolluno yogalo nebal'nodo tov yodekubwasumwalonekono. Toro toollu kwako akavida'ai a'mwo abolo kuudo manubwepi ton mamapinekono. Toro ton kwollu mwonoma'dupudo tovino tov ku'nono mamapinekono. Toro kuvi kuruv kevno'gwowi su toolluno kuudo me'no youroma'dupudorekikono. Toro tool aga kevuge mujomwekovla'mdowodekono. Aki toro tool lukomgu kemi kuulekumwalowo'ji yiunokuudo mujomwekovla'mwalonekono.

18Kevu solkaiyo tekwojekulbusuko nyumo'nupiyokweyo'mo nuu kemi yiunokuudo maikugollu'mo'monyugono. Nuu kemiyomno aiko te nobaiki'mo'monyugono. 19A'mwo abolo kwako akavi mwalodupudo ton wobo toga mi manuwonmwalpinogano. Toro kuvi kuruv kevno'gwowi numi kuuno nonuwonmwalpinorekikono. Nuu aiyo mujomwekovla'mdumdo tovino tov kev kworekul kuruv aiyo nomjomwekovla'mwalpinorekikono. 20Aki nuu aiyo aiko te me'no aduka'mi toga kevu aro tovino kuudo nyouronumapinorekikono. Nuu mi Nyunumiyago toollu uuguro'mwonyodumdonyugono. Aki kevu mi nuguro'mwonyodupudorekikono. Aki nuu kwonyu kuruv kemi ikuguro'mwonyodumdonyugono. Kevu su toro tonyuno kuudo nyouromapinorekikono.

21Toro te a'mwo pwol moro yogalo tonyu ilaiyo mollomarowo'ji kuvinono kuumjuno'ji su tool mino kalo buuropino kuunodo winyokwekono. Aki mino kalo buuropino kwino'ji su toolluno moro Nyunumiyago kwol kuruv kwolluno kalo buuropino winmwalonekono. Aki nuu kwonyu kuruv a'mwo su toolluno kalo buuropino mollo'mi nuvnokwenyuno a'mwo su toollu kuu'maiyo toru nuuwiyalo'numwalmonyugono.” Kuudokaikono.

22Jisasol toro wuujuno sumaiyokwe gamoro uumjunyokwe pwolluno yovo tov Juudasolekono. Su tool Juudas Iskeriyootolmaiyo. Gabovo Juudasol aro kuudokaikono. “Agutoloo, guu yiuno nemino to'no yanekulo'nubino kuvi kuruv yiuwi'nokai a'mwo abolo kwako akavi mwalodupudo tonyu mwiyalo'nubino su tov adadomgu'aro kuvinono imo'nono'mdeyo?” Kuudokaikono. 23Toro kuudoka tovi Jisasol kuudokaikono. “Yiuwi'nokai a'mwo abolo numino kalo buuropino kwinpi ton moro yogalo wuudodo'mure tovi numjunpinogano. Aki mi anumjunpi su tonyuno mi Nyunumiyago tool kalo buuropino winmwalonekono. Aki nuuge'aro moro Nyunumiyago tooke'aro toonal a'mwo abolo su tonyu nami ago tovibusuko noulomwalosunonakono. 24Toro kuvi kuruv a'mwo pwol mino kalo buuropino mwino'ji su toolno'gwowi moro yogalo tovi muumjunonekono. Moro yogalo aikudumwako akav nuvnokwenyuro'maiyo. Yogalo su tov mi Nyunumiyago amonuwopiyaboka toollurokwono.

25Toro te nuu kevuge kuuno mwalodumdo toga yogalo su tonyu sodekubwasumwakonyugono. 26Toro kuvi kuruv lukomgu mi Nyunumiyago tool gamoro Kuullo toolluno'gwowi kemi sobanyo mollekudaiyo'moneyokwe nomekwopiyabwonekono. Kuullo su tool moro yovo tovuro jurogudo tokwe bowo'ji yiuwi'nokai tonyuno yodekubwasumwalonekono. Aki moro yiuwi'nokai kuuguudo yodekubwosumelabodumdo tonyuno aki aiko te kuudo you'movlapino'moneyokwe ikullo'mwojumwalonekono.

27Oo kevu sumwoluko kavo wosunmwalpino'moneyokwe tov nuu kemi ikubweyo'mi ikugollu'mo'monyugono. Sumwoluko kavo wosunyo'moneyokwe su tov a'mwo abolo kwako akavi mwalodupudo ton ku'nono maikullabupinokwono. Toro kuvi kuruv nuvnokwe toonyuno'gwowi moro sumwoluko kavo wosunyo'moneyokwe tov kemi aikullamono. Toro te kemoro poowokalago ton jul'nyo mibwosunpinono. Aki toro toorekul luko mipinono. 28Nuu aro tovino me'no aikudumonyugono. “Nuu aikugollu'mo'mi kuvi kuruv kemiyomno aki aiko te nobaiki'mo'monyugono.” Su toro aikudumo tovi kevu me'no kuu'numaporekikono. Toro te kevu mino kalo buuropino aikulluno'ji tov nuu mi Nyunumiyago toollomno sulami tovino ilaiyo nokwo ipinorekikono. Aro tovinokwono. Moro Nyunumiyago su tool numi muunyu toru'aro nuwolo'mdowodekono. Toro toollomno sulami tovino ilaiyo neya ipinorekikono. 29Yogalo akav yere mimo'noduke kuvi kuruv agada'ai yiuno'no aikudadokwono. Toro aikudadokwo su tov aro tovino'mokwono. Lukomgu moro yogalo tovi kuvinono sumo'no'ji su toga kevu mino kuudo nonubwepinonyugono.

30Nuu kemi manyu toga kuuguudo miyodekubwasumwalmonyugono. Su tov aro tovinokwono. Kwako akavi mido mollomwalodowodo Satanyol abadopiyo. Toro abadopiko su tool mi buro'nyo buro'nyo kaiyako yanyugollo'moneyokwe jurogudo puru'monodo kuruv nonagutekono. 31Toro tool jurogudo nonaguto kwol kuruv nuu wonyapino yodo'mure toonyu kaiyako nyanyugolonekono. Toro yanyugolodowo'jure kuga kuruv nuu mi Nyunumiyago toolluro adanyoka tovino'gwowi nuumjunmonyugono. Mi Nyunumiyago toollu uumjunodo'mure su tovi'aro a'mwo abolo kwako akavi mwalodupudo ton wonopi kuudo yanuupinogano. Oo gami Ganumiyago toolluno kalo buuropino winodowodoldeyo. Kuudo yanuupinogano.” Jisasol toro kuudokaikono. Me'no wuujuno sumaiyokwe gami uumjunyokwe toorai kuudokaikono. “Kevu julodaiyulo. Nevu kado avlawanoo.” Kuudokaikono.

Currently Selected:

Joon 14: SMB

Highlight

Copy